Idayew si Jehova Panamegley na Impormal a Panagtasi
1 Saray matoor a lingkor nen Jehova so manaanap na saray pankanawnawa pian sikatoy idayew da ed kada agew. (Sal. 96:2, 3; Heb. 13:15) Say sakey a paraan a nagawaan tayo iya et diad panamegley na impormal a panagtasi. Dakel a managdayew nen Jehova natan so misalsalamat lapud walay angipaamta ed sikara na mensahe na Panarian panamegley na impormal a panagtasi.
2 Say impormal a panagtasi ed sakey a too so mabetbet a mamawala na pankanawnawa parad arum pian narengel so mensahe na Panarian. Alimbawa, say impitongtong nen Jesus ed sakey a Samaritana diad bobon nen Jacob so angitonton ed dakel ni a nagmaliw ya interesado ed maong a balita. (Juan 4:6-30, 39-42) Legan ya apriso si Pablo tan Silas diad Filipos, sikaray nantasi ed guardia na prisoan, tan say interon sankaabungan na saman a too so angawat ed katuaan.—Gawa 16:25-34.
3 Saray Pankanawnawa: Antoran pankanawnawa so walad sikayo pian mantasi ed impormal a paraan? Gagawaen itan na arum sano mansasaliw ira, walad publikon luluganan, odino manaalagar diad panpadoktoran. Ayarian na arum so mantasi legan na bakantin oras da diad pantratrabahoan odino diad eskuelaan. Diad pangiyan labat na sakey ed saray publikasyon tayo ed Biblia diad lugar a nanengneng itan et nayarin managyat la ed arum pian mantepet nipaakar ed saray sisiaen tayo.—1 Ped. 3:15.
4 No Panon ya Igapo: Nadngel na sakey a mabaing ya ugaw a bii a mantaon na pitora diad miting ya importantin maong parad amin so manpulong. Kanian sanen akila ed si nanay to pian mansaliw, sikatoy angikarga na duaran brosyur ed bag to. Legan a manbabayar si nanay to, inyopresi na saman ya ugaw so sakey a brosyur ed sakey a bii, a mabulos ya angawat ed satan. Sanen atepetan no panon a sikatoy akapanpakpel ya inmasingger ed samay bii, onia so ebat na sayan mabaing ya ugaw a bii: “Inkuan ko’d inkasiak, Ready, Set, Go! Insan’ak inmasingger!”
5 Pian mantasi ed impormal a paraan, kaukolan tayon amin so inkamabulos a singa ed satan ya ugaw a bii. Antoy makatulong ed sikatayo? Ipikasi so pakawalaan na pakpel pian makapansalita. (1 Tes. 2:2) Mangiparaan la na sakey a tepet odino komentoan so sakey a makapainteres a tema a nayari yon usaren pian nigapo so tongtongan. Insan manmatalek a bendisyonan nen Jehova iray sagpot yo.—Luc. 12:11, 12.
6 Say impormal a panagtasi ed totoo a naaabet tayo ed kada agew et mangitatarok na dayew ed si Jehova tan mangiiter na gayaga ed sikatayo. Nayarin ontulong itan ed sakey pian mankurang ed dalan a mamaarap ed bilay ya andi-anggaan.