Sarag Moy Man-Informal Witnessing!
1. (a) Anto so informal witnessing? (b) Pigara ed saray akiaral natan so akaamta’d katuaan panamegley na informal witnessing?
1 Pigara ed kongregasyon yo so akaamta’d katuaan panamegley na informal witnessing? Ompan nasurprisa ka ed ebat. Say informal witnessing et laktipen toy panginabang ed maong a balita ed totoon nakakalimog tayo ed inagew-agew—sano manbiabiahe, ombibisita’d kakanayon, mititindaan odino mansho-shopping, ontan met ed eskuelaan, trabaho, diad kakaabay, tan arum ni. Walay grupo na masulok a 200 a bautismadon Tasi nen Jehova a say 40 porsiento ed sikara et akaamta’d katuaan panamegley na informal witnessing! Talagan epektibo sirin iyan metodo na panagpulong.
2. Antoran alimbawa na informal witnessing so nabasa tayo’d Biblia?
2 Saray ebanghelisador nen inmunan siglo et mabetbet a nampulong ya impormal. Alimbawa, sanen si Jesus et dinmalan ed sakey a syudad na Samaria, pinulongan to so sakey a bii ya onaasol ed bobon nen Jacob. (Juan 4:6-26) Inggapo nen Felipe so tongtongan ed Etiopen opisyal a manbabasay libro nen Isaias diad impantepet toy: “Natatalosan moy babasaen mo?” (Gawa 8:26-38) Sanen impriso si apostol Pablo ed Filipos, pinulongan to so sakey a manangipriso. (Gawa 16:23-34) Tan sanen sikatoy impriso ed sakey ya abung, ‘inawat to so amin ya oonla ed sikato, ya impulong to ed sikara so panarian na Dios tan makmakpel ton imbangat iray nipaakar ed Katawan a Jesu-Kristo.’ (Gawa 28:30, 31) Sarag mo met so manpulong ya impormal, anggan mabaing ka. Panon?
3. Antoy makatulong pian nalabanan tayoy inkamabaing?
3 No Panoy Onggapo: Karaklan ed sikatayo et nanairapan a mangigapoy tongtongan diad saray agtayo kabat. Angga ingen ed saray kabkabat tayo la et singa nababaingan tayon inabang so katuaan. Balet, napakiwas itayon manpulong sano dalepdepen tayoy nipaakar ed kamaongan nen Jehova, saray mablin espiritual a katuaan ya inter to’d saray lingkor to, tan say pakaskasin kipapasen na totoo ed sayan mundo. (Jon. 4:11; Sal. 40:5; Mat. 13:52) Ontan met, sarag tayon ipikasi ed si Jehova a tulongan to itayon ‘makapanpakpel.’ (1 Tes. 2:2) Oniay imbaga na sakey ya estudyante ed Gilead: “Apaneknekan kon makatulong so pampikasi sano nanairapan ak a mitongtong ed totoo.” No singa nababaingan kan mitongtong, manpikasi na antikey.—Neh. 2:4.
4. Pian makapan-informal witnessing, anto so kaukolan tayo nin aralen, tan akin?
4 Diad samay mismon tawag ya informal witnessing et mapatnag ya agkaukolan so poppormal a pangigapoy tongtongan odino pangibasan tampol na teksto. Makatulong no say aralen tayo nin unona et no panoy pangigapoy tongtongan ya agtayo balet isasalet a tampol so pampulong. Dakel a manangipalapag so mangibabagan sano agawaan da la iya, diad ibabayag na tongtongan et wala lay kompiyansa dan inabang so nipaakar ed maong a balita. Balet, no aglabay na too so mitongtong, agtayo pipiliten. Marespeton sumpalen lay tongtongan.
5. Antoy akatulong ed mabaing a sister pian makapan-informal witnessing?
5 Walay mabaing a sister a diad pititindaan to et impasal toy onnengneng ed mata tan onimis. No inmimis ’may too, igapo toy tongtongan. Insan no maabig so reaksion to, wala lay kompiyansa na samay sister ya ituloy so pitongtong. Dedengelen ton maong so ibabagay katongtong to tan tetebeken to no anton aspekto na maong a balita so paninteresan to. Panamegley na sayan paraan et dakel so niyopresi ton literatura tan akapangigapo ni ingen na panangiyaral na Biblia.
6. Panon tayon nigapo so tongtongan diad impormal a paraan?
6 Pangigapoy Tongtongan: Antoy sarag tayon ibaga pian nigapoy tongtongan? Inggapo nen Jesus so impitongtong to ed samay biin onaasol ed bobon diad inkerew toy danum. (Juan 4:7) Kanian, nigapo tayo met so tongtongan panamegley na pangibano odino pantepet. Diad pitotongtong yo et nayarin walay pankanawnawan nisalet yoy sakey a punto ed Biblia tan diad satan et makapangitanem kayoy bini na katuaan. (Ecl. 11:6) Makakapan-informal witnessing so arum diad pangibaga ra na bengatlan makaalay interes tan lapud satan et mantepet imay katongtong da. Singa bilang, legan yon aalagarey doktor, nigapo yoy tongtongan diad pangibaga yoy, “Antam, pitalaran ko ’may panaon ya agak la mansakit.”
7. Panon ya ontulong so inkamaobserba pian makapan-informal witnessing tayo?
7 Makatulong so inkamaobserba pian nigapo tayoy tongtongan. Alimbawa, no naobserbaan tayon maong so ugali na ananak na sakey ya ateng, komendaan tayo tan itepet tayo, “Antoy tinmulong ed sika akin et maabig so impamabaleg mo’d ananak mo?” Sakey ya agin bii so mangiimano ed no antoray pantotongtongan na saray katrabaho to, insan la’d satan manginabang na impormasyon base ed saray naoobserbaan ton paninteresan da. Sanen naamtaan ton manplaplano lan miasawa so sakey ya katrabaho to, inikdan toy Awake! a nipaakar ed panagplanoy kasal. Lapud saya et nituloy day tongtongan nipaakar ed Biblia.
8. Panon tayon usaren iray literatura pian makapangigapoy tongtongan?
8 Say sananey nin paraan pian nigapo tayoy tongtongan et diad pambasay literatura tayo ed lugar a nanengneng itayo na arum. Ibubukay na sakey a brother so Say Panag-Bantayan odino Awake! diad artikulon makapainteres so tema to insan to itan basaen. No walay naimano ton akanengneng ed magasin, tepetan to odino mangibagay antikey nipaakar ed samay artikulo. Lapud saya et nigagapo toy tongtongan tan makakapampulong. No mangiyan itayoy publikasyon ed lugar ya sankanengneng na arum, nayarin nainteresan iray katrabaho odino kaklase tayo tan mantepet ira nipaakar ed satan.
9, 10. (a) Panon itayon makapanggaway paraan pian makapan-informal witnessing? (b) Anto lay ginawam a paraan pian makapan-informal witnessing?
9 Manggaway Paraan: Lapud maganat so panagpulong a kimey, agtayo la aalagaren ya onsabi ni pankanawnawa insan tayo labat man-informal witnessing. Imbes, sikatayo lay manggaway paraan pian makapanpulong legan tayon gagawaen iray inagew-agew ya aktibidad tayo. Nonoten lan masakbay no sioparay posiblin naabet yo tan no panon yon nigapoy tongtongan. Marakep no walay awit yon naynay a Biblia tan ontan met ed literaturan sarag yon iyopresi ed saray nakatongtong yon interesado.—1 Ped. 3:15.
10 Dakel a manangipalapag so akaisip na nikadkaduma iran paraan pian makapan-informal witnessing. Sakey a sister ya manaayam ed guardiadon maong ya apartment so oonla’d recreation area na satan a bilding pian tuopen iray jigsaw puzzle na mararakep iran litrato na palsay Dios. Sano walay makaimano ed gagawaen to tan pandinayewan day karakep na litrato, usaren to iyan pankanawnawa pian itongtong ed sikaray sipan na Biblia nipaakar ed “sakey a balon tawen tan sakey a balon dalin.” (Apo. 21:1-4) Wala tay nanonotan mon paraan pian makapan-informal witnessing ka?
11. Panon tayon nabayuboan so interes na saramay napupulongan tayo panamegley na informal witnessing?
11 Bayuboay Interes: No walay angipanengneng na interes, bayuboan yo itan. No matukoy et nayarin oniay ibaga yo: “Maliket ak ta akapitongtong ak ed sika. Panon ta lamet kasin makapantongtong?” Say gagawaen na arum a manangipalapag et iter day address tan numeroy telepono da ed samay too insan da ibagan: “Balibali impantongtong ta. Sarag mo ak ya kontaken no labay moy kaaruman nin impormasyon nipaakar ed apantongtongan ta.” No agyo nabayuboan a mismo so interes, mangi-submit a tampol na Please Follow Up (S-43) form ed sekretaryo na kongregasyon yo pian niasain ed matukoy a kongregasyon so panggawa’d satan.
12. (a) Akin et nepeg ya irekord tan ireport so oras na pani-informal witnessing tayo? (b) Antoray maabig ya resulta na informal witnessing? (Nengnengen so kahon ya “Maabig so Resulta na Informal Witnessing!”)
12 Nepeg tayon ireport so oras na impan-informal witnessing tayo. Kanian anggano pigaran minuto labat itan ed sanagew et seguroen ya irekord. Isip yo pa iya: No kada manangipalapag et inagew-agew a man-informal witnessing na limaran minuto, masulok itan a 17 milyon oras ed binulan no pantutugyopen!
13. Antoy nepeg a mamakiwas ed sikatayon man-informal witnessing?
13 Say manunan mamakiwas ed sikatayon man-informal witnessing et say panangaro tayo’d Dios tan kaparan too. (Mat. 22:37-39) No talagan aapresyaen tayo iray kualidad nen Jehova tan say gagala to, napakiwas itayon itongtong ed arum so ‘maglorian panarian to.’ (Sal. 145:7, 10-12) Pakiwasen itayo met na panangiyansakit ed kaparan totoo a samboten ya inabang so maong a balita ed amin a pankanawnawa legan a wala ni panaon. (Roma 10:13, 14) No manisip itayoy paraan tan manprepara itayo, makapan-informal witnessing tayo tan makaliknay liket diad panginabang na katuaan ed saray matuan impanpuson totoo.
[Blurb ed pahina 4]
Makatulong no aralen yo nin unona so pangigapoy tongtongan ya ag-isasalet a tampol so pampulong
[Blurb ed ed pahina 5]
Dakel a manangipalapag so akaisip na nikadkaduma iran paraan pian makapan-informal witnessing
[Kahon ed pahina 5]
Saray Suhestion Pian Nigapoy Tongtongan
◼ Manpikasi parad tulong
◼ Mitongtong ed saramay agmanaapura tan makaaro
◼ Ipasal so inengneng ed mata, iyimis, tan igapoy tongtongan base ed bengatlan paninteresan na too
◼ Dengel ka’d ibabaga na katongtong mo
[Kahon ed pahina 6]
Maabig so Resulta na Informal Witnessing!
• Legan ya ipapaapiger na sakey a brother so kotsi to ed repair shop, pinulongan to iray wadman tan inikdan to ra na handbill a mangiimbita’d public talk diad kombension. Diad kombension ed tinmumbok a taon, walay brother ya agto kabat ya angibano’d sikato. Sakey iya manaya ed saramay lalakin inikdan to na handbill legan ton walad repair shop! Linma iyan laki ed samay public talk tan impaiyaralan na Biblia. Sikato tan say asawa to et abautismoan la.
• Walay sister a naamtaan toy katuaan panamegley na informal witnessing, tan ipapasen ton espisyal a teritorya to iray totoon nakakabat to lapud ananak to. Kaiba’d saya iray kakaabay da, ontan met ed atateng a nakakalimog to’d eskuelaan tan ed miting na atateng. Sano ikakabat toy inkasikato, ibabaga to met a baleg a tulong ed sikato so Biblia diad pamapabaleg to’d ananak to, insan to la umaney tongtongan. Balet lapud nigapo to lay tongtongan, diad kaunoran et mainomay to lan isalet so nipaakar ed Biblia. Panamegley na sayan paraan et 12 lay atulongan to anggad bautismo.
• Inanamot na sakey a sister a pulongan so ahente na insurance a linma’d abung to. Tinepetan to no labay toy nawalaay maong a bunigas, liket, tan andi-anggaan a bilay. On so ebat to ’may ahente, tan tinepet to no anton klase na insurance so tutukoyen to ’yan sister. Kanian imbasa na sister ed sikato iray sipan na Biblia tan inopresian to na publikasyon tayo, a sanlabi labat a binasa na samay ahente. Sikatoy impaiyaralan na Biblia, ginmapon akiaral, tan abautismoan.
• Legan a walad eroplano so sakey a sister, sikatoy akitongtong ed bii ed abay to tan pinulongan to. Antis iran mansian, inter na sister ed samay bii so address tan numeroy telepono to tan pinaseseg ton paiyaralan na Biblia no walay ombisita’d sikaton Tasi nen Jehova. Dia labat ed tinmumbok ya agew, walay duaran Tasi a linma’d abung na samay bii. Sikatoy impaiyaralan na Biblia, maples so inyaligwas to, abautismoan, tan ag-abayag et talora met lay iyaaralan to.
• Walay 100 años a bulag a brother a manaayam ed nursing home. Mabetbet ton ibabaga ya, “Kaukolan tayoy Panarian.” Lapud saya et sikatoy tetepetan na saray nars tan pasyente, kanian nipapaliwawa to no anto ’tay Panarian. Sikatoy tinepetan na sakey a biin mantratrabaho diman no antoy gawaen to’d Paraiso. Imbaga ton, “Makanengneng tan makaakar ak la’d saman kanian poolan ko la ’yay wheelchair ko.” Lapud bulag, kinerew to’d sayan bii ya ibasaan toy magasin. Sanen binmisita so anak na sayan brother, nampatanir imay bii no sarag ton gawa to la iramay magasin. Imbaga na sakey a nars ed samay anak ya, “Say mabetbet lan tema na tongtongan mi ed nursing home et: ‘Kaukolan tayoy Panarian.’”
• Legan a walad pila diad restawran so sakey a sister, nadngel toy tongtongan na maedad la ran lalaki nipaakar ed politika. Sakey ed sikara so angibagan agsarag na gobierno a solusyonay problema tayo. Imbaga na sister ed sarili to ya, ‘Pankanawnawak la iya.’ Nampikasin agano insan to ra inasinggeran. Sanen akikabat la, imbaga to’d sikara so nipaakar ed Panarian na Dios, say gobierno a mangiter na solusyon ed problema na totoo, tan inopresian to ra na brosyur ya awit to. Kabebekta et inmasingger so manedyer. Say abaloan na sister et paalisen da la. Balet ta say ibaga manaya na manedyer et nadngel toy tongtongan da, tan labay to met imay brosyur. Manak-akis met ya inmasingger so sakey ya empleyado, a datin iyaaralan na Biblia tan labay to lamet ya ituloy itan.