Tasi Itayo ed Amin a Panaon

1. Antoy naaralan tayo ed samay impanpulong nen Jesus ed samay bii a walad abay na bobon?

¹ Naksawan tan napgaan lay Jesus lapud sikatoy pigay oras lan manaakar. Kanian, legan a manasaliw na naakan iramay papatumbok to, sikatoy yinmurong ed abay na bobon diad paway na syudad na Samaria pian manpainawa. Aglinma si Jesus ed Samaria pian manpulong, noagta sikatoy dinmalan labat ditan sanen sikatoy paarap ed Galilea pian ituloy so ministeryo to diman. Anggaman ontan, inanamot toy pankanawnawan manpulong ed sakey a bii ya onaasol diman. (Juan 4:5-14) Akin? Lapud si Jesus et agbalot tinmunda a magmaliw a ‘matoor tan matua a tasi’ nen Jehova. (Apo. 3:14) Aaligen tayo si Jesus diad pagmaliw a Tasi nen Jehova ed amin a panaon.​—1 Ped. 2:21.

2. Antoy gawaen tayo pian akaparaan tayon manpulong na impormal?

² Manparaan: Pian akaparaan itayon manpulong na impormal, mangawit itayon lanang na literatura. Mangaawit a naynay so dakel a manangipalapag na saray tract tan iyoopresi da iratan ed saray manbabantay diad lakoan, gasolinaan, tan diad arum niran nakatongtong da ed sanagew. (Ecl. 11:6) Walay sakey ya agin bii a mabetbet a manbiabiahe. Seseguroen to a walad bag ton lanang so melag a Biblia tan samay libron Ibabangat na Biblia, tan panggugunaetan ton nakatongtong iramay nakakaabay to ed luganan.

3. Panon tayon nigapo so tongtongan?

³ Pangigapoy Tongtongan: Sano manpupulong na impormal, agtayon tampol itotongtong so nipaakar ed Biblia. Sanen inggapo nen Jesus so tongtongan da ed samay biin walad abay na bobon, agto impakabat a tampol so inkasikato a Mesias. Sikato so kinmerew ni na danum pian nasagyat so imano to. (Juan 4:7-9) Sanen inalig na agin bii iyan paraan na pitotongtong, nalmoan ton mas mainomay so pangigapoy pampulong sano sikatoy tepetan da no kasin manseselebra na holiday. Imbes ya ibaga ton agmibibiang ed selebrasyon lapud ta sakey ed Saray Tasi nen Jehova, ibabaga ton, “Personal a desisyon ko so agmanselebra.” Mabetbet a manusisa ni imay nantepet, kanian makapanpulong la’d satan imay agin bii.

4. Panon kayon napakiwas na Mateo 28:18-20?

⁴ Asumpal nen Jesus so maseseg a ministeryo to diad dalin, balet sikatoy siansia nin interesado ed pakasumpal na panagpulong a kimey a singa ginawa to. (Mat. 28:18-20) Kanian singa say Ehemplo tayon si Jesus, Tasi itayo a lawas akaparaan a mangipaamta ed pananisia tayo.​—Heb. 10:23.