Paaligwasen Iray Abilidad Tayod Ministeryo—Igapoy Tongtongan Pian Makapantasi ya Impormal

No Akin ya Importante: No manpupulong tayod kaabungan, mabetbet ya anggapod abung iray totoo. Balet nayarin nakatongtong tayo ra diad luluganan, no manaalagar na doktor diad sakey a clinic, no breaktime ed trabaho odino eskuelaan, tan arum ni. Linawa nen Jehova ya narengelan na amin so mensahe na Panarian. (1 Tim. 2:3, 4) Pian makapanpulong tayo, kaslakan et kaukolan ya sikatayoy mangigapo na tongtongan.

No Panon Iyan Nagawaan:

Manpili na pitongtongan. Kasin singa makaaro imay too tan labay toy mitongtong? Kasin iyabuloy na kipapasen ya relaks kayon makapantongtong? Wala ray manangipalapag ya minengnengan ni rad mata insan ira onimis. No onimis met imay too, igapo da lay mitongtong.
Manpikasin makalna tan antikey no bilang ta natatakot kan mitongtong.—Neh. 2:4; Gawa 4:29.
Igapo ed simplin pangibano. Agtampol imbaga nen Jesus so nipaakar ed Panarian nen akitongtong ed samay Samaritanan bii. (Juan 4:7) No maminsan, sarag mon igapoy tongtongan diad pangiter na komendasyon, singa bilang, “Makalkalakal iray anak yo!” Sarag mo met ya igapo ed pantepet a singa, “Abantayan yo may balita kalabian?”
No nigapo lay tongtongan, manggaway paraan pian napantongtongan yoy maong a balita, balet agmanggaganat. Paulyan mo labat ya natural so tongtongan. Nayarin mangibaga kay sakey a bengatlan makapainteres ed sikato pian mantepet. Singa bilang, no pantotongtongan yoy nipaakar ed pamilya, nayarin ibagam, “Walay amtak ya napanmatalkan a simbawa no panon so pamabaleg ed ananak.” No say pantotongtongan yo et nipaakar ed sakey a balita, nayarin ibagam, “Walay abasak ya maong a balita ya talagan agustoan ko.” Agka nadidismaya no napultot lay tongtongan antis ka nin makapantasi.
Mangawit kay tract tan arum nin literatura ya sarag mon iter ed saray interesado.

Gawaen Iya Legan na Sayan Bulan:

Salien ya mangigapoy anggan sakey a tongtongan ed kada simba ya say gagala et makapantasi ya impormal.