Siopa Kasi Malabay ed Saya?
1. Sano babasaen tayo so Say Panag-bantayan odino Onliing! antoy nonoten tayo, tan akin?
1 Saray magasin ya Say Panag-bantayan tan Onliing! et parad nanduruman klase na totoo. Kanian, nanduruma iray topic ed saray artikulo. Legan tayon babasaen ed personal a kopya tayo so kada artikulo, kaukolan tayon nonoten no siopa kasi nayarin malabay ed saya, insan tayo iyopresi iya ed sikara.
2. Anto ran topic ed magasin tayo so nayarin labay ya basaen na arum?
2 Kasin ipapaliwawa na balon isyu na Panag-bantayan so sakey ya topic ed Biblia ya apantongtongan yo na katrabahom? Wala kasi artikulon nipaakar ed pamilya ya makatulong ed sakey a kanayon mo? Wala kasi kabat mon manplaplanon onlad arum a bansa ya in-feature ed Onliing!? Kasin dugarugad saray negosyo odino ahensya na gobierno ed teritorya yo so sakey ed saray magasin tayo? Singa bilang, no say magasin tayo et ipapaliwawa toy irap ya nadadalan na saray maedad, balibali iyan iyopresid saray pasilidad ya mangaasikasod mamasiken tan akukulaw. Saray walad istasyon na pulis tan barangay hall et nayarin interesadod magasin tayon nipaakar ed krimen.
3. Mangibaga na eksperiensya a mangipapanengneng ed kana na pangiyopresi na espesipikon isyu na magasin ed saray iisipen tayon malabay a manbasa ed satan.
3 Resulta: Sanen abasa na sanasawan taga South Africa so Oktubre 2011 ya Awake! nipaakar ed no panon ya napabaleg a makalakal iray anak, tinawagan da so 25 ya eskuelaan diad teritorya da. Duamplo tan dua ed saratan so angalay kopya tan angibunog ed saray estudyante ra. Ontan met so ginawa na sananey nin sanasawa tan angipalima ira na kopya ed saray eskuelaan ed teritorya ra. Inusar ni ingen na saray maestra ed sakey ed saratan ya eskuelaan so magasin diad saray leksion da. Inistorya na sayan sanasawa so eksperiensya ra ed manangasikaso na sirkito kanian pinaseseg to ray kongregasyon ed sirkito to ya onla met ed saray eskuelaan diad teritorya ra. Lapud karakel na order ed branch office da, kaukolan lamet ya iyimprinta iyan isyu!
4. Akin a labay tayon nibunog ed dakel a totoo iray magasin?
4 Ipapaliwawa na saray magasin tayo no akin ya oniay nagagawad mundo, insan to ipaimano so Biblia tan say Panarian na Dios. Saraya labat so magasin ya ‘mangiyaabawag na kilalaban.’ (Isa. 52:7) Kanian labay tayon ibunog iraya ed dakel ya totoo anggad posible. Say maabig ya paraan pian nagawaan mo itan et diad pantepet ed sarilim, ‘Siopa kasi malabay ed saya?’