Usaren so Web Site Tayo Diad Pambangat ed Saray Anak Yo
1. Antoy gagala na seksion ed Web site tayo ya “Children”?
1 Say Web site tayon jw.org et denisinyo diad paraan ya nagustoan na amin, anggan antoy edad da. Say seksion ed Web site tayo ya “Children” (onlad Bible Teachings > Children) et ontulong ed saray ugaw nin ananak tan ed atateng pian onapit irad sakey tan sakey tan ed si Jehova. (Deu. 6:6, 7) Panon yon nausar iyan seksion diad pambangat yod saray anak yo?
2. Panon kayon makapili na ibangat yod ananak yo ya ombagay ed edad da?
2 Ibagay ed Pankaukolay Anak Yo: Nanduruma so pankaukolan na kada anak. (1 Cor. 13:11) Panon kayo sirin a makapili na ibangat yod ananak yo ya ombagay ed edad da? Tepetay sarili: ‘Anto kasi nagustoan na ananak ko? Antoy natalosan da? Panon kabayag so atension da?’ No say ananak yo et mantaon na talora paabeba, sarag yon ibangat ed sikara iray istoryan walad “My Bible Lessons.” Uusaren met na arum ya pamilya iray istoryad Biblia diad seksion ya “Teach Your Children.” Tan nia ni ray arum ya napampilian yo.
3. Panon ya nausar a maong na atateng iray istorya tan activity ya walad “Family Worship Projects”?
3 Family Worship Projects: Ontulong irayan project ed saray atateng diad pambangat ed ananak da. Pian naamtaan yo no panon yon nausar iray istorya tan activity, i-click so download button tan basaen so “Parents’ Guide” na kada project. Usaren iray picture activity, singa say coloring page diad pambangat ed melag nin anak yo. No medyo baleg lay anak yo, usaren iray study activity ya wadtan. Amin ya activity ed kada project et saksakey so angalaan ya istoryad Biblia. Kanian makapaniiba ed parehon family worship project so amin ya anak yo, antokaman so edad da.
4. Antoy nanengneng ed seksion ya “Become Jehovah’s Friend”?
4 Become Jehovah’s Friend: Saray video, kansion, tan activity ed sayan seksion na Web site tayo et makatulong ed saray atateng pian nipurek dad melag nin ananak da so Salita na Dios. (Deu. 31:12) Kada antikey ya animated video et pakaaralan na importantin leksion. Saray activity ya singa say search-and-find game so mangidanet ed saratan a leksion. Lapud labalabay na saray ugugaw so mangansion—tan mainomay dan natandaan iray nanaaralan da no kansionen da—lanang ya nanengneng ed Web site tayo iray Kingdom song tan arum nin kansion ya ginawa parad saray ugugaw.
5. Akin ya nepeg a kerewen na atateng so tulong nen Jehova diad pangibabangat day katuaan ed ananak da?
5 Atateng, labay nen Jehova ya magmaliw kayon maong ya ama tan ina. Kanian kerew yoy tulong to diad pangibabangat yoy katuaan ed saray anak yo. (Uko. 13:8) Diad tulong nen Jehova, nipasal yo ray anak yon “magmaliw a marunong parad kilalaban diad panamegley na pananisia nipaakar ed si Kristo Jesus.”—2 Tim. 3:15; Uli. 4:1-4.