Inabang so “Maong Iran Bengatla” Diad Pagmaliw a Maparawes (Mat. 12:35a)

Seguradon amin tayo et labay tayon inabang ed arum so “maong iran bengatla” diad ‘pangiyugali ed panagparawes.’ (Roma 12:13) Idadaulo na saray elder so pangiyuksoy ed pamarawes tan pangipawil ed pasahe na saray iimbitaan ya espiker. Balet ompan ngalngali agtayo mamarawes ta mairap so bilay tayo, odino nababaingan tayon mangimbitad abung tayo. Pian natalonaan iyan liknaan, makatulong so pangipapuso ed simbawa nen Jesus ed si Marta. (Luc. 10:39-42) Indanet to ya say “sankaabigan a bengatla” ed pamarawes et say panlilimog tan pampapasesegan, aliwan say pinasyan panangan tan marakep ya abung. Diad pangiyaplika ed saya, amin tayo et makapanginabang na “maong iran bengatla” ed agagi tayo, ya singa ipapaseseg na Biblia.​—3 Juan 5-8.