Maseseg ya Sagyaten so Sakey tan Sakey ya Manggawa na Maabig

Ipapaseseg na Hebreos 10:24 ya “nonoten tayo so sakey tan sakey pian makapansasagyatan itayo a mangaro tan manggawa na maabig.” Nasagyat tayo ray agagi diad alimbawan ipapanengneng tayo tan diad pangibalikas na pananisia tayo. Iyistoryam ed agagi iray balibalin eksperiensyam. Ipaliknam ya maliket ka ed panlilingkor mod si Jehova. Balet agmo ikokomparay sarilim ed arum. (Gal. 6:4) Usar moy abilidad mo pian nasagyat so arum ya “mangaro tan manggawa na maabig,” aliwan konsiensiaen ira pian manggawa ray maabig. (Nengnengen so libron Eskuelaan Parad Ministeryo, p. 158, par. 3.) No nasagyat tayo ran mangaro, napakiwas iran manggaway maabig, singa say itulong ed arum o pampulong.​—2 Cor. 1:24.