“Onyaman ed Maabig Iran Kimey”

¹ Diad kaunoran laran agew na maseseg a ministeryo to, si apostol Pablo so maapit ya akikimey ed si Timoteo tan Tito. Sinulat toy balang sakey ed sikara na manulibayan iran balikas na panamaseseg. Inkuanto ed si Tito a “saraman so manisia ed Dios” so magunaet a “pansiansiaen day kanonotan da ed panmantini ed maabig iran kimey.” (Tito 3:8, NW) Inkuan to ed si Timoteo a saraman so manilalo ed Dios so nepeg ya “onyaman ed maabig iran kimey.” (1 Tim. 6:17, 18, NW) Alay abig iyan simbawa parad sikatayon amin! Balet anto so mamakiwas ed sikatayon manggawa na maabig iran kimey ed bilay tayo? Tan antoran espesipikon kimey so nayarin gawaen tayo ed arapen iran agew?

² Say mamapakiwas ed pagmaliw tayon mayaman ed manepeg iran kimey so manlalapud pananisia tan panangaro tayo ed si Jehova tan manlalapud alay abig ya ilalo ya impagamor to ed sikatayo. (1 Tim. 6:19; Tito 2:11) Nagkalalo la ed sayan panaon na taon, napapanonotan itayo ya imbaki nen Jehova so Anak to ed dalin pian niyalangon nen Jesus so Ama to tan itarya so dalan a mamaarap ed bilay parad amin a manepeg a totoo. (Mat. 20:28; Juan 3:16) Nipabitar iyan maong diad panselebra ed Memoryal na impatey nen Kristo no Marso 28. Bilang ikiwas ed ilalo tayon pakagamor na andi-anggaan a bilay, agta napapakiwas itayon manggawa na anggaay nayarian tayo pian “onyaman ed maabig iran kimey”? Siempre napapakiwas itayo! Antoran kimey so nayarin gawaen tayo natan?

³ Maabig Iran Kimey a Gawaen ed Marso tan Kayari to: Segurado, onatendi itayo ed Memoryal​—say sankaimportantian a nagawa ed taon parad Tastasi nen Jehova ed sankamundoan. (Luc. 22:19) Balet labay tayon inabang so gayaga na satan ya okasyon ed dakel anggad posibli. Nengnengen so report na serbisyo ed 2002 Yearbook, tan naimano yo a nen imbeneg a taon diad dakel a bansa ed interon dalin, say inmatendi ed Memoryal et mamitlo, mamipat, maminlima, odino maminpigan danay ed karakel nen say bilang na saray manangipalapag. Seguradon nankaukolan itan na magunaet a sagpot ed biang na amin diad saray kongregasyon pian manggawa na malaknab a panangibunog ed saray imbitasyon parad Memoryal diad interon teritorya ra. Sirin, labay tayon usaren so dakel a panaon a nayarian tayo manlapud natan anggad Marso 28 diad pangimbita ed totoo ya onatendi ed Memoryal, a tulongan iran makaaral nipaakar ed ilalo na kilalaban.

⁴ Kaslakan et walaan itayo na maabig a panaon legan na Abril tan bakasyon itan na saray maneeskuela. Panon tayon naanamot iya ed pagmaliw ya “onyaman ed maabig iran kimey”? Diad pantultuloy a maseseg a pibibiang ed panangipulong na maong a balita, pagmaliw a ‘maseseg ed maabig iran gawa.’ (Tito 2:14; Mat. 24:14) No agkayo makapan-auxiliary payunir ed Marso, kasin nagawaan yo itan ed Abril tan/odino Mayo? No manpapayunir kayo ed sayan bulan, kasin nitultuloy yo ni?

⁵ Naimano na arum a mantratrabaho a nayarian day manpulong a sakey oras odino onsulok ni diad pamaarap da ed trabaho ra, pantasi diad saray karsada odino idalaw ed totoon mantratrabaho diad masaksakbay a manlulukas iran tindaan. Arum so manguusar na kabiangan na oras da ed panangugto pian manpulong. Arum so akaimano a posibli so pangiyaral na Biblia ed katrabahoan legan na panangugto. Dakel ya agagin kainaan so akapangigana na panaon parad lawak na ministeryo legan a walad eskuelaan so ananak da. Diad ibangon a masasakbay ed pigaran agew pian asikasoen iray kimey da ed abung, sikaray walaan na malaem ya oras legan na sanagew parad panagpulong tan panagbangat a kimey.​—Efe. 5:15, 16.

⁶ Anggano agkayo makapan-auxiliary payunir, sarag yon iyarunsa so personal ya eskedyul pian nawalaan na babaleg a pibibiang ed ministeryo, a gawaen so anggaan na nayarian yo a ‘manggawa na maabig, a mayaman ed saray maabig a gawa, a managpalangkap, a mainomay a mangiter’ na katuaan ed arum.​—1 Tim. 6:18.

⁷ Tandaan so Maabig a Kimey a Panaggaway Babangatan: Kada taon et walaray interesadon totoo ya onaatendi ed Memoryal. Posibli kasi parad arum diad kongregasyon so pangimano ed saraman so onatendi ya agni niyaaralan? Kasin niyuksoy so pamawil ed sikara tekep na ilalon tulongan iran onaligwas ed espiritual? Nayarin arum ed sarayan onaatendi ed Memoryal et kakanayon na Tastasi. Arum et nayarin inyaralan la ed apalabas tan mankaukolan labat na panamaseseg pian nituloy lamet so panagaral tan pian onatendi ed saray miting a regular. Agaylan gayaga parad sikatayo so pakanengneng ed sikaran magmaliw ya aktibon lingkor nen Jehova a kaiba itayo!

⁸ Tekep na apadaak a pibibiang ed ministeryo legan na Marso tan kayari to, maseguron naromog tayo so dakel nin interesadon totoo a pawilen tayo. Panggunaetan so pangitilak ed sikara na sakey a tepet. Insan isipan ya ebatan itan ed ontumbok ya idalaw. Sano gawaen tayo iya, saya so mangilukas na dalan parad pamawil. No mas masakbay so ibisita tayo, lalon maabig. No agtayo akapangigapo na panangiyaral ed unonan dalaw, labay tayon panggunaetan so pangigapo na sakey diad ontumbok ya idalaw no posibli.

⁹ Sano mibiang itayo ed panagpulong diad karsada, kaukolan a sinononot itayon mangigapo na tongtongan ed saray totoo. Dakel a manangipalapag so akala ed saray kangaranan, saray address, tan numero na telepono na saray interesadon totoo a naabet da legan a manpupulong diad karsada. No say too ya akatongtong so agmanaayam ed teritorya yo, mangala na Please Follow Up (S-43) a porma diad Kingdom Hall, sulatan, tan iter itan ed sekretaryo na kongregasyon, a mangipasa ed satan ed kongregasyon ya akan-teritorya ed panaayaman na too. No say sekretaryo so agmakapanggawa ed satan, ipawit to itan ed sangan opisina parad pangasikaso. Diad onian paraan, say interesado so nabayuboan.

¹⁰ No nala so numero na telepono balet agnala so address, sirin manggawa na panagpawil ed indibidual panamegley na telepono. Iparaan lan masakbay so labay yon itongtong. Iparaan yoy libron Reasoning pian walan tampol so panreperensyaan yo. Arum so ontatalona ed pangiyaaral da ed saray indibidual panamegley na telepono, pati saraman so agda nasasabi ed ayaman. Sakey ya agin bii so angala na saray numero na telepono manlapud interesadon bii a nabet to diad panagkabkaabungan a ministeryo, tan bilang resulta et akapangigapo na duaran panangiyaral na Biblia.

¹¹ Mikoopera ed Saray Mamatakken Diad Panulong ed Saray Inaktibo: Interesadon maong iray mamatakken ed pangiter na maaron imano ed saraya. Lapud inkiwas lan mismo na saratan, dakel ed sikara so onaatendi lamet ed saray miting ed kongregasyon. Namomoria ra so pankaukolan na maapit a pililimog ed organisasyon nen Jehova ta pian nagamoran so espiritual a kaligenan ya adeskribe diad Salmo 91. Arum ed saraya so mibibiang lamet ed lawak na serbisyo. No onatendi so arum ya inaktibo ed Memoryal ed sayan bulan, nayarin kaliktan da so paiyaralan na Biblia a personal. No ontan so kipapasen, saray mamatakken so mangiyuksoy na sakey a mangiyaral ed saraman so manpilalek a patulongan. No sikayoy nakerew ya ontulong ed onian paraan, say pitutulongan yo so pablien a maong.​—Roma 15:1, 2.

¹² Itultuloy a ‘Mantinien so Maabig Iran Kimey’: Naimano na dakel ya akibiang ed panag-auxiliary payunir a serbisyo ed sakey bulan odino onsulok ni ya apadaak so kimey da ed lawak diad tinmumbok iran bulan. Akabet ira na interesadon totoo a liknaen da a kaukolan dan pawilen. Saya so amakiwas ed sikaran mangisekar na kaaruman a sagpot pian ompaway ed lawak na serbisyo a mas mabetbet ta pian nakatongtong lamet iray interesado. Arum so akapangigapo na saray panangiyaral, tan tinmulong itan ed sikara a nawalaan na nagkalalon pibibiang ed ministeryo.

¹³ Arum met so aliketan a maong lapud malaem la’d panagpulong tan panaggaway babangatan a kimey ya akapakiwas dan man-analisa ed saray prayuridad da. Bilang resulta, arum so akayarin mamawas ed sekular a trabaho ra tan tuloytuloy a nan-auxiliary payunir. Arum met so akayarin onloob ed regular payunir a serbisyo. Ayarian dan iteen so ilalo ra ed Dios a nagkalalo ya aliwan diad saray bengatla ya iyoopresi na mundo. Naimano ra a say pagmaliw a ‘malangkap, mainomay a mangiter,’ so angitarok na mayaman iran bendisyon nen Jehova tan amaelet na ilalo ra ed panggayaga ed ‘peteg a bilay.’ (1 Tim. 6:18, 19) Siempre, legan ya ondarakel so manpapayunir, nagugunggonaan so interon kongregasyon. Saray payunir so mangitongtong ed saray eksperiensya ra tan managyat ed arum a mibiang ed ministeryo a kaiba ra, tan saya so mamapetang na espiritual ya atmospera ed kongregasyon.

¹⁴ Komon ta amin tayo so “onyaman ed maabig iran kimey” legan na sayan panaon na Memoryal tan kayari to diad pamadaak ed pibibiang tayo ed Kristianon ministeryo. Ipanengneng tayo sirin so apresasyon tayo ed agawaan la nen Jehova diad impangiter to ed sikatayo na ilalon andi-anggaan a bilay diad matunong a balon dalin.​—2 Ped. 3:13.