‘Manggawa na Maabig ed Amin’

¹ Say “Sigpot ya Ipulong so Salita na Dios” tan “Onyaman ed Maabig Iran Kimey” so teman inusar ed Pebrero tan Marso 2002 iran sigpit na Ministeryo Tayo ed Panarian. (Col. 1:25, NW; 1 Tim. 6:18, NW) Diad saratan ya isyu et apaseseg itayon mangisekar na nagkalalon sagpot pian tulongan iray interesado ya onatendi ed Memoryal, pian tulongan iray inaktibo a mibiang lamet ed kongregasyon, tan pian tulongan iray anak tayo tan kualipikadon iyaaralan ed Biblia ya onggapon mangipalapag na maong a balita. Andi-duaruwan nanggayagaan tayo so intalona bilang resulta na impankuli tayo. Natan, “unong a wala so kiambegya [mantultuloy a] manggawa itayo na maabig ed saray amin.”​—Gal. 6:10.

² Imbitaan Iran Onatendi Lamet: Diad Pilipinas, masulok a 280,000 a totoo so onaatendi ed Memoryal a tinaon ya aliwan manangipalapag na maong a balita. Lapud say iyaatendi ra so pakapatnagan met na interes, anto so nepeg tayon gawaen pian nasagyat iramay “tinandaan ed bilay ya andi-anggaan” a magmaliw a ‘mananisia’? (Gawa 13:48) Pasesegen iran onatendi lamet a tampol ed saray miting ed kongregasyon.

³ Akin ya ag-imbitaan so interesadon too ya onatendi ed Panagaral na Kongregasyon ed Libro pian napanggayagaan so makapainteres a diskusyon ed propesiya nen Isaias? No sakey kan kanayon odino kabkabat na too tan aka-eskedyul ka a mangiter na asainmin mo ed Teokratikon Eskuelaan Parad Panagministro, nayarin sikato so imbitaan mo pian narengel to so betang mo. Lawas mon ipaamta ed sikato iray titulo ed mapublikon paliwawa ed onsaginonor a simsimba. (Kaukolan ya ipeket so peles ya eskedyul ed information board.) Imanoen so antokaman a pankanawnawan naliing so pilalek na toon mandayew ed si Jehova. Tan siempre, no anggapo lay mangiyaaral ed sikato na Biblia diad kongregasyon, nayarian mon maaron opresian na panagaral.

⁴ Mantultuloy a Pasesegen Iray Inaktibo: Pigara ed saramay inmatendi ed Memoryal so nanggawa la na dedikasyon ed si Jehova. Balet, sinmabi punton tinmunda ra ed aktibon panagpulong na maong a balita. Ingen, papasesegen itayo nen Pablo a “manggawa itayo na maabig . . . nagkalalo ed saray kaamong na pananisia.” (Gal. 6:10) Kanian, saray inaktibo so nepeg a manunan asikasoen tayo.

⁵ Nayarin arum so kinmiwas la ed panamaseseg na mamatatken tan saray arum pian mibiang lamet ed ministeryo. No tinuro ka na mamatatken a tulongan so nagmaliw lamet ya aktibo a manangipalapag, tandaan mo a say dilin panangarom ed si Jehova tan ed lawak na kimeyan so mamabaleg na talek na satan a sakey. Ipanengneng mo’d sikato no panon kan mibibiang ed nanduruman aspekto na ministeryo pian napanggayagaan to itan, panggunaetan to so panagpulong a kimey, tan naeksperiensya toray bendisyon nen Jehova.

⁶ Ikdan na Maabig a Gapoan so Balon Manangipalapag: Sanen amoria na agano nin interesado a bii ya aromog to so tuan organisasyon na Dios, tampol a labay to lay onggapo ed serbisyo. Kayari ton naaralan no anto so kakaukolanen ed sikato, oniay inkuan to: “Labay ko lay onggapon tampol.” No say iyaaralan mo na Biblia et naabobonan lan mibiang ed lawak na kimeyan, tulongan mon natebek to so pankaukolan ya “onggapon tampol,” tan tulongan so balon manangipalapag a nawalaan na maabig a gapoan. Tulongan mon nabayuboan to so rotina ed panagparaan tan regular a pibibiang ed lawak na ministeryo kada simba.

⁷ No say mismon anak mo so nagmaliw ya agbautismadon manangipalapag, mikimeyan ed sikato pian onaligwas unong ed edad tan abilidad to. Panamegley na tulong mo, nayarin nasurprisa ka ed matalonan pitotongtong to, panangibasa to na Biblia, tan panangiyopresi to na literatura ed unabung. No walay aromog ton interesado diad lawak na kimeyan, ipasal mon ompawil tan bayuboan so interes.

⁸ Palaknaben so Dilin Ministeryom: Kasin iyabuloy na saray sirkumstansyam a napadaak ni so pibibiang mo ed panag-ebanghelyon kimey anggad kayari na panaon na Memoryal? Kasin nalaeman mo ni so oras mo kada simba na sakey o duara nen say gendat ya nauusar mo ed serbisyo? Masakbay mo ta lan nenengnengen so kalendaryo no kapigan ka makapan-auxiliary payunir lamet? Odino nayarian mo kasin organisaen so estilo na panagbilay mo pian makaloob ed sigpot-panaon a ministeryo? Amin a pansagpot tayo ed ministeryo so nayarin ontulong ed sakey pian awaten so katuaan! (Gawa 8:26-39) Diad inenengneng tayo ed arapen, “tumboken [tayo] lawas so maong, ya ipakana ed sakey tan sakey tan dia ed amin.”​—1 Tes. 5:15.

[Kahon ed pahina 3]

Itultuloy a Tulongan:

□✔ Iray inmatendi ed Memoryal

□✔ Iray aktibo lamet a manangipalapag

□✔ Iray balon agbautismadon manangipalapag