Abril—Panaon Pian ‘Impasyan Mankimey tan Isekar so Inkasikatayo’
1 Saray simba antis tan kayari na Memoryal so panaon a panagdalepdep parad totoo nen Jehova. Saya so panaon pian morekdeken no antoy agawaan na impatey nen Kristo tan molimolien so inter na Dios ya ilalo tayo ya agawan posibli lapud nipaagus a dala nen Jesus. No nonoten yo so Abril 19 nen katantaon, antoy nanonotan yo? Kasin natandaan yo niray kalupaan ya anengneng yo ed saman a labi? say mabalor, maespiritual ya atmospera ed Memoryal? say masimoon a Makasulatan a diskusyon tan saray impapuson pikakasi? Nayarin determinado kayon sigpot a mangipatnag ed kinaaralem na pisasalamat yo lapud aron impatnag nen Jehova tan si Jesus ed sikayo. Panon so pangaapekta ed sikayo na ontan a panagdalepdep natan?
2 Mabitar a saray totoo nen Jehova so mangibabalikas na pisasalamat da a nibebesngaw ed dakel a paraan ya aliwa lambengat diad salita. (Col. 3:15, 17) Nagkalautla nen imbeneg ya Abril, nambanikel itayo pian ipanengneng so apresasyon tayo ed saray probisyon nen Jehova parad kilalaban diad impangisekar tayo ed inkasikatayo diad Kristianon ministeryo. Walay 19,704 a nan-auxiliary payunir. Say sagpot da, pati ed sagpot na amin niran manangiyabawag na Panarian, so nanresulta ed balon pantok na saray manangipalapag. Lalo itayon nanggayaga diad impakanengneng ed masulok a 100,000 iran panangiyaral na Biblia a nikondukta ed saman a bulan tan balon pantok na saray inmatendi ed Memoryal!
3 On, say inkasegurado na ilalo tayo so mamapakiwas ed sikatayo. Singa itan ed insulat nen apostol Pablo: “Lapud saya lanti mansagpot tan mantepel kami, lapu ed wala kamin manilalo ed Dios a mabilay a sikato so Manangilaban ed saray amin a totoo, lalo ed saray manisia.”—1 Tim. 4:10.
4 Diad sayan panaon na Memoryal, panon yon ipanengneng so pananisia yo ed saray probisyon nen Jehova parad bilay? Nen imbeneg ya Abril walaan itayo na balon pantok na saray manangipalapag ed Pilipinas, tan saya so tinumbokan na sananey a pantok nen Mayo a walay 136,396. Kasin napalumbasan tayo itan a bilang ed sayan Abril? Posiblin nagawaan tayo iya. Balet balang manangipalapag, bautismado tan agbautismado, so nakaukolan a mibiang. Dakel a balo ni so nayarin onkualipika met a mibiang. Kanian, legan a manplaplano kayo a mamasyan mankimey tan isekar yoy inkasikayo ed sayan Abril, nonoten iray paraan a nayarian yon sagyaten so arum, pati saray balo ni tan agtanto eksperiensiado, pian miulop ed sikayo.
5 Panulong ed Arum a Mangituloy ed Aktibidad Da: No walaray amta yo ya agmakapapaway ed lawak na kimeyan ed loob na sakey bulan odino duara, nayarin pasesegen yo ira tan imbitaan iran miulop ed sikayo ed lawak na kimeyan. No walaray inaktibo ed kongregasyon, saray mamatatken so manggawa na nikaduma iran sagpot pian bisitaen iratan tan pasesegen iran onggapo lamet ed Abril.
6 Amin tayo so nepeg a mantultuloy ya onkerew na espiritu nen Jehova pian mamabiskeg ed sikatayo ed panaglingkor ed sikato. (Luc. 11:13) Antoy nepeg tayon gawaen pian nagamoran itan ya espiritu? Basaen so apuyanan a Salita na Dios. (2 Tim. 3:16, 17) Nepeg tayo met a ‘dengelen so kuan na espiritu ed saray iglesia’ diad pagmaliw a presenti ed amin a limaran sinimban miting. (Apoc. 3:6) Natan la so pankanawnawa pian tulongan iray iregular tan saray inaktibo a paaligwasen da iray ugali ra ed panagaral tan mantultuloy ed iyaatendi ra ed miting. (Sal. 50:23) Gawaen tayo iya legan tayon asikasoen a maong so mismon espiritual a kipapasen tayo. Ingen, wala ni kakaukolanen.
7 Impaliwawa nen apostol Pedro ya iter na Dios so masanton espiritu to ed “saray ontulok ed sikato [bilang manuley].” (Gawa 5:32) Say ontan a katutulok et laktipen toy pangunor ed ganggan a “manpulong ed totoo, tan sigpot a mantasi.” (Gawa 1:8; 10:42, NW) Kanian, anggaman tua a nakaukolan tayo so espiritu na Dios a mamabiskeg ed sikatayon manpulong, tua met a legan tayon ipapanengneng so pilalek tayon paliketen si Jehova, nagkalalon tulongan to itayo. Komon ta agtayon balot melmelagen so kaimportantian na panggawa ed saratan ya unonan kundang na mabulos a katutulok!
8 Tulongan Iray Kalangweran: Atateng, kasin naiimano yo a labay la na ananak yon itongtong ed arum so katuaan? Kasin mimila la ira ed sikayo ed lawak na kimeyan? Kasin napanuliranan ira ed kondukta ra? No ontan, akin a masuyat? Asinggeran so sakey ed saray membro na Congregation Service Committee, tan nengnengen no kasin say anak yo et kualipikado a nibilang a manangipalapag ed sayan Abril. (Nengnengen so libron Our Ministry, pahina 99-100.) Bidbiren a saray anak yo so makatulong ed mabiskeg a paraan diad kirayewan nen Jehova diad panaon na Memoryal.—Mat. 21:15, 16.
9 Sakey a Kristianon ina diad Georgia, E.U.A., so lawas mamapaseseg ed ugaw nin anak ton bii ya itongtong to ed arum so nipaakar ed si Jehova. Nen imbeneg a taon, legan a mibibiang ed ministeryo iman ya ugaw a kaibay ina to, sikatoy angipalima na brosyur a Kakaukolanen ed sakey a too tan impaliwawa ton agano iray lugan na satan. Intepet na laki ed sikato: “Pigara lay taon mo?” Inyebat na ugaw: “Pitora.” Mankelaw so laki ed pakanengneng ed sikato a mangiiter ed ontan a makabaliksan a presentasyon. Nibana a saman a laki so akapilimog la ed Tastasi sanen sikatoy ugaw ni balet agton balot seneryoso itan bilang dalan na kabibilay. Ag-abayag, nikondukta so pangiyaral ed Biblia ed saman a laki kaibay asawa to tan say ugaw met nin anak to a bii.
10 Dakel a kalangweran so manangipalapag la, tan panggagayagaan tayoy piuulop da legan a mikikimey ira ed sikatayo ed serbisyo. Sarayan kalangweran so nayarin mamakiwas tan mamaseseg ed arum a kaedaran da. Balet say Abril so matukoy met a panaon parad sinansakey iran pamilya pian paeleten so pankakasakey da tan pabiskegen so espiritualidad da diad paniiba ran mankimey ed sagradon serbisyo. Saray ulo na pamilya so nepeg a mangidaulo ed saya.—Uli. 24:27.
11 Panulong ed Saray Balo Ni: Komusta met iray balo nin iyaaralan yo na Biblia? Kasin makatulong ira ed nikaduman sagpot ed sayan Abril? Nayarin pilalek dan itongtong ed arum no antoy nanaaralan da legan a kokobrian yo so kapitulo 2, parapo 22, odino kapitulo 11, parapo 14, ed libron Pikakabat. No magano yo lan nasumpal so libro, iparaan so malinew a paningbat ed sayan tema legan yon kokobrian so kapitulo 18, parapo 8, ya oniay nibaga: “Anganko et magunaet kayon mangibaga ed kakanayon yo, kakaaro, tan ed arum so nanaaralan yo. Diad tua, nayarin saya so nagagawaan yo la, no panon ya innabang met nen Jesus so maong a balita ed arum diad impormal iran kipapasen. (Luc. 10:38, 39; Juan 4:6-15) Nayarin natan et labay yon gawaen so nagkalalo ni.” Kasin tua iya ed saraman so iyaaralan yo?
12 Kasin say iyaaralan yo et manisia ed Salita na Dios? Kasin iyaaplika to laray prinsipyo na Biblia? Kasin itutunos to lay bilay to ed saray estandarte na Dios? Kasin sikato lay onaatendi ed saray miting ed kongregasyon? Kasin labay toy manlingkor ed si Jehova a Dios? Akin sirin a sikatoy agpasesegen a mitongtong ed mamatatken ta pian nadetermina ra no kasin sikatoy kualipikado a magmaliw ya agbautismadon manangipalapag tan kaiba yon mankimey ed Abril? (Nengnengen so Our Ministry book, pahina 97-9.) Diad onian paraan et naeksperiensia to no panon a say organisasyon nen Jehova so manuporta ed saray sagpot to a manlingkor ed si Jehova.
13 Tua, arum ya estudyante so maples ya onaligwas nen say arum. Kanian, mitunosan ed panangidirehi ed Hunyo 2000 a Ministeryo Tayo ed Panarian, pahina 4, parapo 5-6, dakel so angiyaral na sakey nin libro ed totoo ya angipanengneng na interes ed inmuna balet mankaukolan na kaaruman a tulong pian magmaliw ya aktibo ed pililimog. Agtayon balot naekalan na ilalo a sarayan matuan-impanpuso so magmaliw a peteg a babangatan nen Kristo, “balanglan diad aganon panaon odino diad abayag a panaon.” (Gawa 26:29, NW) Ingen, no say panaon a pangiyaaral yo ed saratan ya indibidual et nibaga yon “abayag a panaon” la, kasin sayan panaon na Memoryal et maabig a pankanawnawa parad iyaaralan yo pian onggapon mangipanengneng ed kinaaralem na apresasyon to ed dondon nen Kristo?
14 No Panon Iran Tulongan a Mibiang: Dakel so naaralan tayo nipaakar ed panulong ed saray kualipikado ya onggapo ed ministeryo diad pangusisa ed impangipasal nen Jesus ed arum. Agto labat inanap so karaklan tan imbaga to ed saray apostol to ya onggapo la ran mansalita. Indanet to nin inmuna no akin a kaukolan so panagpulong, impaseseg so masimoon ya awawey, tan insan tora inikdan na taloran manunan probisyon: kaiba, teritoryan pampulongan, tan mensahe. (Mat. 9:35-38; 10:5-7; Mar. 6:7; Luc. 9:2, 6) Nagawaan mo met itan. Balanglan tulongan moy dilin anak mo, balon iyaaralan, odino siopaman ni ya agla makapanrereport, matukoy no manggawa na nikaduman sagpot pian gemtanen so onggendan iran gagala.
15 Ipabitar so Pankaukolan: Ipaslep ed sakey so kaimportantian na panagpulong. Magmaliw a positibo nipaakar ed satan. Mangisalaysay na saray eksperiensia a mangipanengneng ed nagagawaan na kongregasyon ed ministeryo. Ipatnag so awawey ya imbalikas nen Jesus diad Mateo 9:36-38. Pasesegen so prospektibon manangipalapag odino inaktibo a mangipikasi ed personal a pakapibiang to ed ministeryo ontan met ed italona na kimey ed sankamundoan.
16 Pasesegen so Sakey a Manisip Nipaakar ed Dakel Iran Pankanawnawa a Manpulong: Salambiten so posibilidad na pakapiulop ed grupo na panagaral na libro parad panagpulong ed kabkaabungan. Saglawien so pitongtong ed saray kakanayon tan kabkabat odino pitongtong ed saray katrabahoan odino kaeskuelaan legan na panangugto. Sano manbiabiahe, mabetbet a nigapo na sakey so tongtongan diad pangipanengneng labat na personal ya interes ed kapara iran pasahero. Sano sikatayo la so mangigapo, mabetbet a mamawala iya na pankanawnawa a mangiter na maabig a pantasi. Talagan dakel so pankanawnawa ya inabang tayoy ilalo tayo ed arum diad “inagew-agew.”—Sal. 96:2, 3.
17 Balet, nayarin mas marakep no sika tan say balon manangipalapag so sankaiban mankabkaabungan bektaman a posibli. No angigana ka na kalat a padaaken so serbisyom legan na Abril, tepeten ed manangasikaso na teritorya no kasin walay matukoy a teritorya. No wala, saya so mangiter ed sika na saray pankanawnawan nakimeyan itan a maong. Alimbawa, sano asumpal ka lan nampulong odino onla ka lan miaral odino ed arum iran pasen, nayarin naimanom a walay too ed sakey ya abung a diad inmuna et anggapoy asabi odino walay angipanengneng na interes. No matukoy, bisitaen a magano no bilang ta epektibon tuloy itan. Bilang resulta, saya so ontulong ed pakapenek tan gayaga ed ministeryo.
18 Mangiparaan na Makasagyat a Mensahe: Sakey a pamaakaran so pankaliktan na sakey a manginabang ed mensahe na Panarian, balet sananey met a pamaakaran so pagmaliw ton matalek nipaakar ed paraan na pangitongtong to ed satan, nagkalalo la no sikatoy balo ni odino abayaglan agpinmaway ed lawak na kimeyan. Say panulong ed saray balo ni tan inaktibo a manparaan et makabkabaliksan. Say Service Meeting tan miting parad lawak na kimeyan so makapangitarya na makatulong iran ideya, balet makanakana so personal a panagparaan.
19 Panon yon natulongan iray balo ni a manparaan parad serbisyo? Igapo diad panangipresenta ed magasin, tan pansiansiaen itan a simpli tan antikey! Panisipen ira na saray agawa a nibalita a paninteresan na saramay walad teritorya, insan mananap na sakey a punto ed kaplesan iran magasin a misiglaotan ed satan. Ipasal yon dua so presentasyon, tan usaren itan ed ministeryo a tampol no nayadyari.
20 Bayuboan so Posiblin Nagawaan Tayo Parad Arapen ya Idaraak: Nen imbeneg a taon say inmatendi ed Memoryal diad sankamundoan et masulok a 14.8 milyon. Say bilang na saray manrereport bilang manangipalapag et masulok labat ya anemiran milyon. Kabaliksan na saya a ngalngalin 8.8 milyon a totoo ya interesado so inmatendi ed sayan espisyal a programa a ditan da nadngelan so inkisalaysay na sakey ed manuna iran bangat na Biblia. Akabat dan personal so pigara ed sikatayo, a maseguron pandinayewan da. Dakel ed sikara so walaan na maabig a komento nipaakar ed sikatayo, mandodonasyon parad sankamundoan a kimey tayo, tan mangidedepensa ed sikatayo ed arum. Sayan baleg a grupo so pakapatnagan na posiblin nagawaan parad arapen ya idaraak. Anto so nagawaan tayo pian tulongan ira a nagkalalon onaligwas?
21 Karaklan ed balo ni iran onaatendi ed Memoryal et resulta na personal ya impangimbita na sakey ed sikatayo. Kaslakan et saya so mankabaliksan a walay sakey lan kabat da ed dumerengel. No walay onatendi ya inimbitaan tayo, responsabilidad tayon ipalikna a sikatoy naabrasa tan sikatoy asistian pian sigpot a nagunggunaan manlapud programa. Lapud napano so hall, sikatoy iyanapan na yurongan. Pabayesen na Biblia, tan inabang ed sikato so panagkantaan yo. Ebatan iray tepet a nayarin itepet to. Say maligsa, personal ya imano yo so mamayubon tuloy ed interes to. Siempre, amin tayo so makan-responsabilidad ed satan—no naimano tayo so balon lupa, sikatoy ampetang ya abrasaen tan mitongtong a magano pian nakabat.
22 Say iyatendi ed Memoryal so nayarin mamawala na peteg ya epekto ed panag-isip na sakey. Say inyatendi to so pakapatnagan ya agto ni aromog so aanapen to tan niyoopresi tayo so bengatlan liknaen ton kaukolan ton usisaen a maong. Say pangipaliwawa ed alay abig a probisyon na dondon so nayarin walaan na aralem a kabaliksan ed sakey a too ya andian na ideya nipaakar ed malaklaknab a panangaro nen Jehova. Nayarin tampol ton natebek a duma itayo—masimoon, makaaro, maaro, tan marespeto. Say hall tayo so miduma ed nanenengneng to ed saray simbaan a walaray imahen tan agmakabaliksan iran ritual. Seguradon naimano na saray balo ni a saray onaatendi et tugyopen na nanduruman klase na totoo tan anggapoy panagkolekta. Sayan pakaeksperiensia so nayarin magmaliw a mabiskeg a mamaseseg ed sikara ya onatendi lamet.
23 Kayari na Memoryal, say sakey so nepeg ya alerton onasingger ed kada balon inmatendi. No inimbitaan yoray balo ni, walaan kayo na nikaduman responsabilidad. Sakbay iran onalis, seguroen ya amta ra so arum niran miting diad Kingdom Hall. Salambiten so paulo na ontumbok a publikon paliwawa. Ipaamta ed sikara so lugar tan oras na Panagaral na Libro ed Kongregasyon ya asingger ed ayaman da. Saginonor, ikdan ira na kopya na libron Sekreto ed Pamilya, tan ipaamta ed sikara a say pantongtongan ed simba na Abril 30 et “Protektaan Yoy Pamilya Yo Manlapud Makaderal Iran Impluensia?” Ipaliwawa no akin a say intiron kongregasyon so manplaplanon onatendi ed sirkito odino espisyal ya agew ya asamblea, no walay akaeskedyul a magano lan nagawa.
24 Iyuksoy so makaaron ibisita diad ayaman da. Seguroen a walaan ira na saray kopya na brosyur a Kakaukolanen tan say libron Pikakabat, ya ontulong ed sikaran nakabisado iray manunan bangat na Biblia. No agni ira manaaral, iyopresi so panagaral na Biblia. Isuheri a basaen da so balon brosyur a Jehovah’s Witnesses, a mangipaparungtal na malinew a litrato ed no panon itayon onkukurang bilang sakey ya organisasyon. Imbitaan iran manbantay ed saray video tayo, a singa say Our Whole Association of Brothers. Ikabat ira ed arum diad kongregasyon. Diad ontumbok iran bulan, itultuloy a bisitaen iray balo ni; imbitaan iran onatendi ed saray miting sano ombisita so manangasikaso na sirkito odino sano walay sirkito odino espisyal ya agew ya asamblea yo. Ikdan ira na amin a pankanawnawa ya ipanengneng day inkasikara “a suston nikiling parad andi-anggaan a bilay”!—Gawa 13:48, NW.
25 No Antoy Nagawaan na Mamatatken: Say italona na pirmin sagpot ed ministeryo ed sayan Abril so mandependi, a nagkalalo, ed mamatatken. No sakey kan manangikondukta na panagaral na libro, ilista iray bengatlan nagawaan mo pian tulongan so amin a kagrupom ed panagaral na libro a mibiang ed nikaduma iran aktibidad. Wala ta iray niasain ed grupom a kalangweran ni, balo, iregular, odino inaktibo? Imanoen no kasin saray atateng, payunir, odino arum a manangipalapag so kinmiwas lan ontulong ed sikara. Mangitarya na antokaman a personal a tulong a nagawaan mon mismo. Sakey ya agin bii ya iregular ed lawak na kimeyan ed loob na duay taon so angusar na masulok a 50 oras ed ministeryo nen imbeneg ya Abril. Antoy amakiwas ed sikato? Inkuanto a nisesengeg ed saray makapabiskeg a panagpastol na mamatatken.
26 Saray mamatatken tan ministeryal a lingkor so nepeg a mantulongan pian naseguro a walay magenap a teritorya, magasin, tan literatura parad onsabin bulan. Kasin niyuksoy iray kaaruman a miting parad lawak na kimeyan? No ontan, ipaamta so espisyal iran uksoyan. Nagkalalo ed amin, diad mapubliko tan personal iran pikakasi yo, kerewen so panamendision nen Jehova parad apadaak a bulan na aktibidad tayo ed Panarian.—Roma 15:30, 31; 2 Tes. 3:1.
27 Nen imbeneg ya Abril diad sakey a kongregasyon ed North Carolina, saray mamatatken so peteg ya angipaseseg na apadaak ya aktibidad ed ministeryo. Diad saray miting kada simba, sinagyat daray manangipalapag a masimoon a konsideraen no kasin sikaray makapan-auxiliary payunir. Diad kada pankanawnawa, amin ed mamatatken tan ministeryal iran lingkor so makapaligsan angitongtong nipaakar ed panggawan sankaabigan a bulan so Abril ed kapiganman. Bilang resulta, 58 porsiento na saray manangipalapag, pati amin a mamatatken tan ministeryal a lingkor, so nampayunir ed saman a bulan!
28 Say Gayaga ed Sigpot a Pakapibiang: Antoray bendision ed ‘impasyan pankimey tan pangisekar ed inkasikatayo’ ed ministeryo? (1 Tim. 4:10) Nipaakar ed seseg na kongregasyon ed aktibidad da nen imbeneg ya Abril, onia so insulat na asalambit ed tagey a mamatatken: “Mabetbet a pantotongtongan na saray agagi so kabaleg na aro tan inkaapit ya alikna ra ed sakey tan sakey nanlapula’d nen pinadaak da so kimey da ed lawak na ministeryo.”
29 Sakey a kalangweran ya agin laki ya agmakaakar so nampirawat a makapibiang ed espisyal ya aktibidad nen imbeneg ya Abril. Diad impangiplanon maong tan diad tulong na ina to tan espiritual ya agagi to, nanggayagaan toy mabungan bulan bilang auxiliary payunir. Antoy liknaan to nipaakar ed naeksperiensia to? Inkuanto: “Pilpilimero ed bilay ko ya aliknak a singa ak makayari a too.”
30 Seguradon mayaman a bebendisionan nen Jehova iraman so mamapablin tuloy ed pribilihyo ra a mangitongtong nipaakar ed inkaari to. (Sal. 145:11, 12) Legan tayon nodnonoten so impatey na Katawan tayo, natalosan tayo a saray bendision ed maridios a debosyon so nagkalalo lan daakan ed arapen. Pinirawat a tuloy nen apostol Pablo so tumang ed magnayon a bilay. Ingen, amta to ya aliwa iyan bengatlan basta labat talaranan tan ilaloan. Insulat to: “Diad sayan gagala et peteg a mamapasya ak a mankimey, ya isesekar koy inkasiak unong ed ikukurang to tan onkikiwas ed siak tekep na pakapanyari.” (Col. 1:29, NW) Si Jehova panamegley nen Jesus, so amabiskeg ed si Pablo pian nasumpal toy manangisalbay bilay a ministeryo, tan ontan met so nagawaan To ed sikatayo natan. Kasin salien yo itan ed sayan Abril?
[Kahon ed pahina 3]
Siopa so Nayarin Pasesegen Yo a Mangipalapag ed Abril?
Say anak yo?
Iyaaralan yoy Biblia?
Sakey ya inaktibo la?