Epektibon Usaren Iray Kabiangan na Libron Ibabangat na Biblia

Legan ya aaralen na sakey no anto so peteg ya ibabangat na Biblia tan iyaaplika toy nanaaralan to, sikatoy onaligwas tan manbunga ed espiritual. (Sal. 1:1-3) Natulongan tayon onaligwas iray iyaaralan tayo no epektibo tayon usaren so arum a kabiangan na libron Ibabangat na Biblia.

Saray Tepet ed Gapo na Kapitulo: Diad gapo na kada kapitulo et wala ray tepet ya naebatan diad panaral. Nayarin basaen irayan tepet pian pannonoten so iyaaralan tan talaranan toy ebat. Odino sarag mo met ya pankomentoen na antikey ed kada tepet. No aliway imbaga to, agmo kaukolan ya ipetek a tampol. Ontulong iray komento to pian naamtaan mo no antoy kaukolan mon idanet tan ikday imano.​—Uli. 16:23; 18:13.

Apendise: No atalosan tan inawat la na iyaaralan mo so walad mismon kapitulo, nayarin ibagam ya sikato lay man-rebyu na apendise a mikonektaan ed inaral yo. Diad ontumbok ya panaral yo, sarag yon pantongtongan itan a magano pian naamtaan mo no atalosan to. Balet no iisipen mon makatulong ed sikato, aralen so intero odino kabiangan na mikonektaan ya apendise, a basaen iray parapo tan usaren iray tepet ya imparaan mo.

Kahon Parad Repaso: Saray ebat ed tepet a walad gapo na kapitulo et naromog ed kahon parad repaso a walad sampot na kapitulo. Sarag mo yan usaren pian naamtaan no atalosan tan nipaliwawa na iyaaralan mo iray manunan punto. Sansakey yon basaen iratan pati saray kaiban teksto. Insan kerew mod iyaaralan mo ya usaren to ray teksto pian ipaliwawa no akin a tua iratan.​—Gawa 17:2, 3.