Aligen so Sankamaongan a Managbangat Sano Usaren so Libron Ibabangat na Biblia
1. Panon a nambangat si Jesus?
1 Si Jesus, say Sankamaongan a Managbangat, so lawas angipaliwawa ed saray bengatla diad simpli tan malinew a paraan. No maminsan, ta pian sagyaten iray dumerengel to a mannonot, tepetan to nira no antoy opinyon da. (Mat. 17:24-27) Impaarap toy imano ra ed Salita na Dios. (Mat. 26:31; Mar. 7:6) Inalwaran ton agto ra nalener ed impormasyon ta amta to met a mantultuloy iran manaral. (Juan 16:12) Interesado met si Jesus no kasin saray ibabangat to so papanisiaan tan natatalosan na saray babangatan to. (Mat. 13:51) Say libron Ibabangat na Biblia so denisinyo pian ontulong ed sikatayon makapanbangat met ed ontan a paraan.
2. Panon tayon usaren iray manangigapon tepet ed kada kapitulo?
2 Manangigapo a Tepetepet: Sano onggapo kan mangiyaral, marakep no ipaimanom ni iray manangigapon tepet ed silong na paulo. Ibasam iratan pian nasagyat so pantamitam na iyaaralan. Odino pakomentoan ed antikey iray tepet. Agla kaukolan a detalyadon singbaten odino korihien so kada aliwan komento to. Pisalamatan mo labat ed saray ideya to tan igapo lan konsideraen a tampol so materyal. Naamtaan mo met ed saray komento to ed saray manangigapo a tepet no dinan iray kabiangan na leksion a kaukolan mon palaknaben.
3. Panon tayon pansiansiaen a simpli so panagaral?
3 Saray Kasulatan: Say panangiyaral so nepeg ya akasentro ed Kasulatan. (Heb. 4:12) Balet, agla kaukolan a basaen so amin a nisitan teksto. Idanet iramay Kasulatan a basiyan na sisisiaen tayo. Saray tekston mangiiter labat na kaaruman ya impormasyon so agla nakaukolan a basaen. Diad tua, say paraan na impangipresenta na libron Ibabangat na Biblia ed katuaan et aliwan komplikado. Kanian, pansiansiaen a simpli so panagaral. Iyapasakey ed saray manunan punto, tan paliisan so detalyadon pangisalaysay odino pangisalet na agmet la nakaukolan iran materyal.
4. Panon tayon naamtaan no kasin mangigana itayo ni na panaon legan na panagaral pian singbaten so materyal ed apendise?
4 Apendise: Lugan na apendise so 14 a tema a manuporta ed nanduruman kapitulo. Saraya so agkapilitan a singbaten legan na panangiyaral. Makauley kayo lan mandesisyon no bukor lan basaen na iyaaralan so suplementaryon materyal, nagkalautla no natatalosan tan aawaten to met la so impormasyon ed kapitulon aaralen. Alimbawa, no sisiaen to la a si Jesus et Mesias, nayarin agla kaukolan a singbaten ed sikato so teman “Jesu-Kristo—Say Insipan a Mesias” sano aaralen yo so kapitulo 4, “Siopa si Jesu-Kristo?” Diad arum a kipapasen et ompan makagunggona no legan na panagaral et mangigana kayo na panaon pian singbaten so materyal ed apendise odino sakey a porsyon na satan.
5. No adesidi tayon konsideraen so impormasyon ed apendise, panon tayon gawaen itan?
5 No adesisyonan yon konsideraen so materyal ed apendise, mangiparaan kayo la na saray tepet insan yo aralen itan a singa ed gagawaen yo ed saray kapitulo. Odino depende ed pankaukolan na say iyaaralan, nayarin desisyonan yon mangigana na pigaran minuto legan na panagaral pian irepaso ed sikato so impormasyon. Diad ontan et naseguro yo no kasin atalosan ton talaga so materyal a binasa ton bukor.
6. Panon ya usaren so kahon parad repaso a walad sampot na kada panagaral?
6 Kahon a Parad Repaso: Lugan na kahon ed sampot na kada kapitulo iray komenton kaslakan lan mangeebat ed saray manangigapo a tepet. Nayari yon usaren irayan komento ta pian repasoen iray manunan punto na kapitulo. Nalmoan na pigaran manangipalapag a makatulong no basaen so kada komento pati saray katekep a teksto. Insan da paipaliwawa ed iyaaralan diad antikey no panon a saray teksto et mamapaneknek ed komento. Diad ontan et naamtaan na mangiyaaral no kasin atalosan a maong na iyaaralan iray manunan punto ed leksion tan no panon irayan susuportaan na Biblia tan no kasin sikatoy miabobon ed saratan. Mangipasal met itan ed iyaaralan a mangusar ed Biblia sano ipaliwawa toy katuaan ed arum.
7. Panon so nayarin pangusar tayo ed libron Ibabangat na Biblia pian nasumpal so kimey tayo?
7 Say sanka-epektiboan a dalan pian nasumpal tayo so kimey tayon manbangat tan manggaway babangatan et say pangalig ed saray metodo nen Jesus ed panagbangat. (Mat. 28:19, 20) Natulongan itayo na libron Ibabangat na Biblia a gawaen itan. Epektibo yon usaren itan pian nibangat so arum diad malinew, simpli, tan makapasagyat a paraan.