Saray Bendisyon na Saramay Manguunor ed Dios

Imbaga nen propetan si Moises ya no unoren tayo ray ganggan na Dios, bendisyonan itayo na Dios. (Deuteronomio 10:13; 11:27) Uunoren tayoy Dios aliwan lapud antakot tayoy nadusa. Saray balibalin kualidad na Dios so mamakiwas ed sikatayon onunor ed sikato. Sakey ni, lapud inaro tayoy Dios, agtayo labay ya gawaen iray mamaermen ed sikato. “Saya so kabaliksan na panangaro ed Dios, ya unoren tayo ray ganggan to.”​—1 Juan 5:3.

Balet, akin et nabendisyonan itayo no unoren tayoy Dios? Pantongtongan tayoy duaran rason.

1. NO UNOREN TAYOY DIOS, MAGMALIW TAYON MARUNONG

“Siak si Jehova a Dios mo, say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran.”​—ISAIAS 48:17.

Kabat itayo nen Jehova a Dios, say Amalsa ed sikatayo, tan iiter to so panangigiya ya kaukolan tayo. Pian makapanggawa tayo na makabat iran desisyon, kaukolan tayon aralen ed Masanton Kasulatan iray labay na Dios ya gawaen tayo tan iyaplika tayo iratan ed bilay tayo.

2. NO ONUREN TAYOY DIOS, MAGMALIW TAYON MALIKET

“Mas maliket iramay onderengel tan manusumpal ed salita na Dios.”​—LUCAS 11:28.

Natan, minilyon ya totoo so malikeliket lapud uunoren da so Salita na Dios. Singa bilang, walay sakey ya laki ed Spain ya mapaspasnok, tan aliwliway panagtrato to ed arum​—anggan diad mismon asawa to. Aminsan, abasa to ed sulsulat nen propetan si Moises imay nipaakar ed mauyamon laki ya si Jose, ya anak nen Jacob. Inlako si Jose bilang aripen tan impriso anggano anggapoy kasalanan to. Balet nansiansian mauyamo, mikakareenan, tan manamerdona. (Genesis, kapitulo 37-45) Oniay inamin na saman ya laki a tagad Spain: “Akatulong ed siak imay alimbawa nen Jose pian magmaliw ak ya mauyamo, maaro, tan nawalaan ak na kontrol ed sarili. Kanian natan et malikeliket ak.”

Nabasa ed Masanton Kasulatan iray dakel nin panangigiya no panon tayon tratoen so arum. Pantongtongan tayo iratan diad onsublay ya artikulo.