No Panon Tayon Ipanengneng so Panangaro ed Kaparan Too

Amin tayo et nanlapud inmunan laki, si Adan, kanian saksakey itayon pamilya. Anggaman iilaloan ed saray membro na pamilya ya aroen tan respetoen da so sakey tan sakey, matalag tayo lan nanengneng itan natan. Aliwan ontan so labay na maaron Dios ya gawaen tayo.

NO ANTOY IBABAGA NA MASANTON KASULATAN NIPAAKAR ED ARO

“Aro yoy kapara yon too a singa ed sikayon dili.”​—LEVITICO 19:18.

“Itultuloy yon aroen iray mamubusol ed sikayo.”​—MATEO 5:44.

NO ANTOY LABAY YA IBAGA NA AROEN SO KAPARAN TOO

Imanoen no panon ya deniskribe na Dios so aro dia ed Salita to ya nabasa ed 1 Corinto 13:4-7:

“Say aro et maanos tan maomaong.”

Isipen pa: Antoy naliknam no maan-anos tan maomaong so arum ed sika, tan agda kan tampol pampasnokan no alingo ka?

“Say aro et aliwan maimon.”

Isipen pa: Antoy naliknam no say arum et masyadon masuspetsa odino naiinggit ed sika?

Say aro et “agto aanapey dilin pankaabigan to.”

Isipen pa: Antoy naliknam no rerespetoen na arum iray desisyon mo, tan agda ipipilit iray opinyon da ed sika?

Say aro et “agmanbibilang na impakasakitan.”

Isipen pa: Akaparaan so Dios ya mamerdona ed saramay totoon magbabawi ya akagaway kasalanan ed sikato. “Agto lawas nonoten iray lingo tayo, tan agmansiansia . . . so sakit na linawa to.” (Salmo 103:9) Maliket tayo no pinerdona itayo na samay asakitan tayo. Kanian nepeg ya akaparaan tayon perdonaen so arum no asakitan da itayo.​—Salmo 86:5.

Say aro et “agto panliliketan so ag-inkatunong.”

Isipen pa: No walay makapuy ya agawa ed sikatayo, agtayo labay ya manliket so arum ed paniirap tayo. Kanian agtayo panliketan so paniirap na arum anggano aliway impantrato da ed sikatayo.

Pian naawat tayoy bendisyon na Dios, kaukolan tayon aroen so arum ed onia ran paraan​—antokaman so edad, lahi, odino relihyon da. Say sakey ya paraan pian nagawaan tayo iya et diad itulong tayo ed saray mankaukolan.