Agka Mangikakayat na Impormasyon ya Aliwan Tua

Diad panaon tayo, mapmaples ya onsabi so impormasyon ed minilyon ya totoo panamegley na radyo, TV, Internet, o arum ni. Siempre, aglabay na saray mandadayew ed “Dios na katuaan” ya ikayat so impormasyon ya aliwan tua, anggano agda met ginagala. (Sal 31:5; Ex 23:1) Nayarin makaderal so pangipasa na impormasyon ya aliwan tua. Kanian pian naamtaan mo no tua so asagap mon impormasyon, isip mo ni iraya:

• ‘Siopay nanlapuan to ’ya?’ Ompan ag-amta na samay angipasa o angistorya so amin ya detalye. No impasa itan ed nanduruman totoo, ompan abawasan la o naaruman itan, kanian manalwar no agka segurado no siopan talagay nanlapuan to. Lapud saray agagin walaay pribilehyo et pantitiwalaan ya tua iray ibabaga o ipapasa ra, maal-alwar ira tan ag-ira mangipapasa na impormasyon ya alanganin o agmet ni segurado

• ‘Makaderal kasi ’ya?’ No deralen toy reputasyon na sakey a too odino grupo, mas maabig no agmo la ipapasa o ibabaga ed arum.​—Pro 18:8; Fil 4:8

• ‘Tua kasi ’ya?’ Seguradoen no talaga kasin tua so asagap mon balita, istorya, o agawa

BANTAYAN SO VIDEO YA PANON KON NAPATUNDA SO TSISMIS? INSAN EBATAN IRAYA:

• 

  Base ed Proverbio 12:18, antoy nayarin epekto na ibabaga tayo ed arum?

• 

  Panon ya makatulong so Filipos 2:4 no pantotongtongan tayoy arum ya too?

• 

  Antoy gawaen tayo no makapainsulto o negatibo lay ibabaga na arum?

• 

  Antis mon iyistoryay bilay na arum, anto ni ray itepet mod sarilim?