Tulongan Iray Iyaaralan Mo na Biblia ya Paliisan Iray Mauges ya Kaulop

Pian makapikaaro ed si Jehova iray iyaaralan tayoy Biblia, kaukolan day manpili na maong iran kaulop. (Sal 15:1, 4) Natulongan ira na maong ya kaulop pian nagawaan day duga.—Pro 13:20; lff leksion 48.

Ipapanengneng moy pililikna ed saray iyaaralan moy Biblia no tutulongan mo ran paliisan iray mauges ya kaulop. Ompan naiirapan iran pultoten so pikakaaro da ed saray datin kaulop da. Kanian ipanengneng moy personal ya interes ed sikara aliwa labat ya no manaaral kayo. Sarag mo ran i-text, tawagan, odino bisitaen. Legan ya onaaligwas iray iyaaralan mo, sarag mo ran itagar ya miulop ed saray lingkor na Dios. Diad satan et nanengneng da ya mas dakel so onarum nen say naandid sikara no pultoten da lay pipiulop da ed saramay datin kakaaro da. (Mar 10:29, 30) Tan maliket ka met ta nanenengneng mon ombabaleg so pamilya nen Jehova.

BANTAYAN SO VIDEO NA DRAMATIZATION YA TULONGAN IRAY IYAARALAN MO NA BIBLIA YA PALIISAN IRAY MAUGES YA KAULOP, INSAN EBATAN IRAYAN TEPET:

• Siopa ray mauges ya kaulop?—1Co 15:33

• Antoy naiimadyin nen Jade ya nagagawa ed saray gathering na saray Tasi?

• Panon ya tinulongan nen Neeta si Jade ya salatan iray mauges ya kaulop to?