BILAY NA KRISTIANO

Anapen ed JW.ORG so Karunongan ya Makatulong ed Inagew-agew

Legan tayon manbibilay ed sayan mair-irap ya kaunoran iran agew, ipaparaan itayon maong na Salita na Dios pian nasarag tayo ray subok. (2Ti 3:1, 16, 17) Pero no maminsan, kaukolan tayoy tulong pian naalmo tayo ray prinsipyo na Biblia ya ombagay ed situasyon tayo. Singa bilang, ompan sakey kan ateng ya manaanap na advice ed pamabaleg na ananak, odino sakey kan tinedyer ya lalabanan mo ray subok ed pananisiam, odino ompan abalo ka la tan maneermen ka ed impakaandi na asawam. Wala ray naalmom ya artikulo ed jw.org ya mangituro ed sika na saray espisipikon prinsipyo na Biblia ya makatulong ed sarayan situasyon tan arum ni ra.—Pro 2:3-6.

Say website ya jw.org diad tablet. Nanengneng ed melag ya litrato so tab ya BANGAT NA BIBLIA.

Diad home page na jw.org/pag, pilien so tab ya BANGAT NA BIBLIA. (Nengnengen so litrato 1.) Pilien so labay mon kategorya diad ompaway ya pampilian. Odino pilien so LIBRARYA > SERYE NA SARAY ARTIKULO tan say labay mon kategorya. (Nengnengen so litrato 2.) Wala met irayan kategorya diad JW Library^®.a Seguradon na-enjoy mo irayan artikulo balanglan diad website odino diad app. Sarag mo met ya anapen so espisipikon topic panamegley na feature ed pananap diad jw.org.

Say website ya jw.org diad tablet. Nanengneng ed saray melag ya litrato so tab ya LIBRARYA tan say kategorya ya SERYE NA SARAY ARTIKULO.

I-type irayan topic diad kahon ya “Anapen” tan manpili na artikulon labay mon basaen.

Pamabaleg na ananak
Tinedyer ya walay depresyon
Sano naandid bilay so asawa

a Wala ray serye ya diad jw.org ni labat so pakanengnengan na kompleton serye na saray artikulo.