BILAY NA KRISTIANO

Kasin Akaparaan Ka no Ombagsak so Ekonomya?

Agtayo la nabibigla no manguman-uman so ekonomya diad interon mundo lapud saray nagagawa. Akin? Lapud manbibilay tayo lad sampot ya parte na kaunoran iran agew tan papasakbayan itayo na Biblia ya agtayo nepeg ya mantiwala ed “agnapanmatalkan iran kayamanan.” (1Ti 6:17; 2Ti 3:1) Antoy naaralan tayo ed alimbawa nen Arin Jehosafat tungkol ed pagmaliw ya akaparaan no bilang ta ombagsak so ekonomya?

Nen napepeligro so nasyon lapud saray onlulusob ya kalaban, nanmatalek si Jehosafat ed si Jehova. (2Aw 20:9-12) Nanggawa met na praktikal a paraan pian iparaan so nasyon, pinabiskeg to ray syudad tan angipuesto na saray bantay a sundalo. (2Aw 17:1, 2, 12, 13) Singa si Jehosafat, kaukolan tayo met so mantiwala ed si Jehova tan manggaway praktikal iran paraan pian nasarag tayo iray mairap ya kipapasen.

PANON ITAYON MAKAPANPARAAN NO BILANG TA OMBAGSAK SO EKONOMYA?

Manparaan ed espiritual: Dapat kontento ka, tan pabiskeg moy tiwalam ya sarag nen Jehova ya itarya so pankaukolan mo ed kada agew. (Mat 6:26; 1Ti 6:8) Dapat determinado kan ag-ikompromiso iray prinsipyo na Biblia pian labat nitarya iratan ya pankaukolan mo. (Rom 2:21) Iplanom no panon kan makaala na espiritual ya naakan no bilang ta naandi so kuryente tan Internet. Mangiparaan na pigaran pinilim ya inimprintan publikasyon, tan no posible et i-download lan tampol iray elektronikon publikasyon.

Iparaan iray nakaukolan: Bawasan moy utang tan panggastos no agmet kaukolan legan ya anggapo ni problema ed ekonomya. (Pro 22:7) No posible, mantipon na dugarugan suplay na naakan tan arum ni ran manunan nakaukolan. Pian makatipid na kuarta, nayarin iplano na arum so pantanem na pisipising tan mintinaen iratan.

BANTAYAN SO VIDEO YA KASIN AKAPARAAN KA NO WALAY ONSABIN KALAMIDAD? INSAN EBATAN IRAYAN TEPET:

Sakey ya eksena ed video ya “Kasin Akaparaan Ka no Walay Onsabin Kalamidad?” Nanengneng ed saray melag ya litrato so Biblia, emergency bag tan smartphone, tan saray manboboluntaryo ed construction.

Antoy nagawaan tayon mismo pian makapanparaan tayo ed onsabin kalamidad?

Your answer

Sakey ya eksena ed video ya “Kasin Akaparaan Ka no Walay Onsabin Kalamidad?” Ontutulong iray agagi ed pangiiter na relief diad panamegley na pamboboluntaryo ed construction tan pangiyeepas na saray materyales manlapud sakey a truck.

Panon itayon makapanparaan ya ontulong ed arum?

Your answer