Kasin Pisasalamatan Moy Dios ed Saray Regalo Tod Sika?

1-2. Base ed Salmo 40:5, anto ray regalon inter nen Jehova ed sikatayo, tan akin ya aralen tayo iratan?

DAKDAKEL so regalo ed sikatayo nen Jehova. Singa bilang, say marakdakep ya planetan Dalin, say makapakelaw ya utek tayo, tan say Salita to, say Biblia. Lapud sarayan taloran regalo nen Jehova, walay balibalin panayaman tayo, sarag tayoy manisip tan mitongtong ed arum, tan amta tayoy ebat ed saray importantin tepet ed bilay.​—Basaen so Salmo 40:5.

² Diad sayan artikulo, aralen tayo irayan taloran regalo. Importante ya dalepdepen tayo iratan pian mas napabli tayo. Sakey ni, mas napakiwas tayon unoren so Amalsa, si Jehova. (Apo. 4:11) Tan mas amta tayo so ibaga tayo ed saray totoon manisia ed teoryan ebolusyon.

SAY ESPISYAL YA PLANETA TAYO

3. Akin et espisyal so planetan Dalin?

³ No isipen tayoy inkagawa na planetan Dalin, nanengneng tayo ya talagan marundunong si Jehova. (Roma 1:20; Heb. 3:4) Diad amin ya planeta ed solar system, espisyal so planetan Dalin ta dia labat nabilay iray totoo.

4. Akin ya mas marakep so planetan Dalin nen say anggan anton barko?

⁴ Say dalin et walad maaw-awang ya uniberso. Singa itan sakey a barko ya dakdakel so lugan to. Balet walay baleg a pidumaan na satan a barko ed planetan Dalin. Singa bilang, nabilay kasi iramay akalugan ed barko no sikara so manggawa na sarili dan panangan, danum, tan dagem, tan ag-ira nayarin manbantak na basura da diad dayat? Seguradon andi. Duma balet so planetan Dalin ta anggano bilyon-bilyon so manaayam dia, say dalin ya mismo so mamapawala na sarili ton dagem, panangan, tan danum ya kaukolan tayo, tan ag-iratan nauupot. Sakey ni, say marutak a dagem diad planetan Dalin et ag-ibabantak ed arum a planeta. Balet siansia nin balibali tan napanayaman so dalin. Akin ey? Lapud ginawa nen Jehova so dalin ya sarag ton iproseso iratan pian nausar lamet. Aralen tayo natan so duaran makapabilib ya proseso ya ginawa nen Jehova, say oxygen cycle tan water cycle.

5. Anto so oxygen cycle, tan antoy papaneknekan na satan?

⁵ Kaukolan na totoo tan ayayep so oxygen pian tuloytuloy iran manbilay. Bilyon-bilyon ya totoo tan ayayep so onsusungap na oxygen tan mangipapaway ira na dagem ya tatawagen a carbon dioxide. Balet say makapakelaw, agnanaupot so oxygen tan agnapapano na carbon dioxide so kaliberliber tayo. Akin? On ta denisinyo nen Jehova iray angkakabaleg ya kiew tan anggan saray angkekelag ya tanaman ya manepsep na carbon dioxide tan mangipaway ira na oxygen. Aya may tatawagen ya oxygen cycle. Kanian duga imay ibabaga na Gawa 17:24, 25 ya “say Dios . . . so mangiiter ed amin a totoo na bilay tan linawa.”

6. Anto so water cycle, tan antoy papaneknekan na satan? (Nengnengen met so kahon ya “Regalo nen Jehova so Water Cycle.”)

⁶ Ag-onaawet tan ag-onsesengaw so amin ya danum diad dalin lapud say planeta tayo et dugaruga so kaarawi to ed agew. No mas asingger ed agew so planetan Dalin, amin ya danum dia et onluag tan onsengaw kanian namagaan so dalin. No mas arawi so planetan Dalin diad agew, amin ya danum dia et onawet tan magmaliw ya yelo. Balet lapud dugaruga so angiposisyonan nen Jehova ed dalin, walay nagagawan water cycle. Anto tay water cycle? No napetangan na agew so danum diad saray dayat tan ilog, onsengaw iratan tan magmaliw ya lurem. Lapud petang na agew, kada taon et milyon-milyon ya litro na danum so onsesengaw tan magmamaliw ya lurem. Kayari na manga samploran agew, ompelag iratan bilang uran odino snow. Insan unagus iratan ed saray dayat odino ilog ya anggad naulit lamet so proseso. Lapud sayan proseso, agtayo nanaupotay danum. Paneknek itan ya talagan marundunong tan makapanyari si Jehova.​—Job 36:27, 28; Ecl. 1:7.

7. Panon tayon nipanengneng so pisasalamat tayo ed regalon nabasad Salmo 115:16?

⁷ Panon tayon nipanengneng ed si Jehova ya misalsalamat tayo ed sayan marakdakep ya dalin tan ed amin ya wadia? (Basaen so Salmo 115:16.) Say sakey ya paraan et dalepdepen tayo iray ginawa nen Jehova. No ontan so gawaen tayo, kada agew et makaisip tayo na pisalamatan tayo ed si Jehova. Say sakey nin paraan ya nipanengneng tayoy pisasalamat tayo et no lanang tayon lilinisan so abung tan sular tayo.

SAY MAKAPAKELKELAW YA UTEK TAYO

8. Akin et makapabilib so inkagawa na utek tayo?

⁸ Talagan makapabilib so inkagawa na utek na too. Nen wala ka nid eges nen nanay mo, nabubuo la so utek mo tan nilibon selula so onaarum ed utek mo kada minuto. Ibabaga na saray researcher ya say utek na baleg lan too et walay 100 bilyon ya selula to a tatawagen ya neurons. Maayos so inkatuop na saratan ya selula na utek tayo, ya manbelat labat na manga 1.5 kilo. Amtaen tayo so pigaran makapakelkelaw ya nagawaan na utek tayo.

9. Akin et manisia ka ya say abilidad tayon mansalita et regalo na Dios?

⁹ Makapakelkelaw so abilidad tayon mansalita. Isip mo pay nagagawa kada no mansalita ka. Diad kada salitan bitlaen mo, pambabansagen ya kontrolen na utek mo so igalaw na manga 100 ya muscle na dilam, kolokolong mo, bibil mo, pangam, tan pagew mo. Dapat eksakto so igalaw dan amin pian natalosan so ibagam. Base ed impan-research nen 2019 nipaakar ed abilidad tayon mansalita, anggan saray kapangiyanak ya ugugaw et nibiig da lay labay ya ibaga na saray sansasakey ya salita. Susuportaan na saya imay papanisiaan na dakel a researcher ya nen niyanak itayo et wala lay abilidad tayon makaaral na lenguahe. Paneknek itan ya say abilidad tayon mansalita et regalo na Dios.​—Exo. 4:11.

10. Antoy nagawaan tayo pian nipanengneng tayo ya misalsalamat tayo ed si Jehova ed impangiter tod sikatayo na abilidad a mansalita?

¹⁰ Nipanengneng tayo ya misalsalamat tayod si Jehova ed impangiter tod sikatayo na abilidad a mansalita no ipaliwawa tayod saramay manisia ed ebolusyon no akin ya manisia tayon walay Dios ya nanggawa ed amin. (Sal. 9:1; 1 Ped. 3:15) Ibabaga na saray manisia ed satan ya teorya ya bigla labat ya linmesa so planetan Dalin tan amin a wadia. Usaren tayo so Biblia tan saray punto ya walad sayan artikulo pian nidepensa tayo si Aman Jehova tan nipaliwawa tayo ed saramay malabay ya ondengel no akin ya talagan kombinsido tayo ya sikato so Amalsa ed tawen tan dalin.​—Sal. 102:25; Isa. 40:25, 26.

11. Anto ni sakey ya rason no akin ya makapakelkelaw so inkagawa na utek tayo?

¹¹ Say sakey nin makapakelkelaw ed utek tayo et sarag tayon tandaan iray impormasyon. Walay autor ya angibaga nensaman ya sarag kuno na utek tayo ya kargaen so impormasyon ya walad 20 milyon ya libro. Balet natan, adiskobre da ya mas dakel ni nakarga na utek tayo. Antoy sarag tayon gawaen lapud sayan abilidad tayo?

12. Akin ya duma tayod saray ayayep?

¹² Say sakey ya pidumaan tayod saray ayayep et sarag tayon ibiig so duga ed aliwa ta makakaaral tayod saray agawad sikatayo ed apalabas. Kanian amta tayo no anto ray kaukolan tayon umanen pian magmaliw tayon mas maong a too. (1 Cor. 6:9-11; Col. 3:9, 10) Sarag tayo ni ingen ya ipasal so konsiensia tayo pian nibiig ton tampol no antoy duga tan no antoy aliwa. (Heb. 5:14) Sarag tayon ipasal so sarili tayo pian magmaliw tayon mas maaro, makasi, tan matulong ed arum. Sarag tayo met ya aligen so patas ya panagtrato nen Jehova.

13. Base ed Salmo 77:11, 12, panon mon usaren so inter nen Jehova ya abilidad mon tandaan iray impormasyon?

¹³ Panon mon nipanengneng ya misalsalamat kad inter nen Jehova ya abilidad na utek mo ya tandaan iray impormasyon? Nonot mo no panon kan inasikaso tan tinulongan nen Jehova diad apalabas. No gawaen mo itan, mas kombinsido ka ya tulongan tan asikasoen to ka diad arapen. (Basaen so Salmo 77:11, 12; 78:4, 7) Isip mo met so kamaongan na arum, tan pisalamatan mo ra. Diad impanaral na saray researcher, naamtaan da ya mas maliket iray totoon amta ray misalamat. Maabig met no aligen moy Jehova ya wala ray bengatlan lilingwanan to la. Singa bilang, anggano perpekto so memorya to, lilingwanan to la ray lingo tayo tan peperdonaen to tayo no magbabawi itayo. (Sal. 25:7; 130:3, 4) Kanian no walay akasakit ed sika, labay nen Jehova ya perdonaen mo.​—Mat. 6:14; Luc. 17:3, 4.

14. Panon tayon nipanengneng ya misalsalamat tayod makapakelkelaw ya utek tayo?

¹⁴ Nipanengneng tayo ya misalsalamat tayod makapakelkelaw ya utek tayo no usaren tayo itan pian pagalangan imay angiregalo ed satan. Wala ray totoo ya uusaren day utek da pian gawaen no antoy labay da. Sikara la so mandedesisyon parad sarili da no antoy duga tan aliwa. Balet lapud si Jehova so nanggawa ed sikatayo, sikato so makaamta no anton talagay duga tan aliwa. (Roma 12:1, 2) No unoren tayoy Jehova, mareen so bilay tayo tan walay direksion na bilay tayo ta napapagalangan tan napapaliket tayoy Amalsa tan Ama tayo.​—Isa. 48:17, 18; Pro. 27:11.

SAY BIBLIA​—ESPISYAL A REGALO

15. Akin ya say Biblia et paneknek ya inaro nen Jehova iray totoo?

¹⁵ Say Biblia et regalo nen Aman Jehova. Impaisulat to so Biblia lapud inar-aro to itayo. Inter itan nen Jehova pian naebatan iray importantin tepet tayo. Singa bilang: Iner so nanlapuan tayo? Akin ya manbibilay tayo? Tan antoy nagawad arapen? Labay nen Jehova ya naamtaan na amin ya ananak to so ebat ed saratan ya tepet. Kanian diad apalabas ya nilasus a taon, wala ray lalakin tinulongan to pian nipatalos so Biblia ed dakdakel ya lenguahe. Say interon Biblia odino arum a parte na satan et wala lad masulok ya 3,000 a lenguahe! Say Biblia labat so nipatalos ed ontan karakel a lenguahe, tan atan met ya libro so sankarakelan a nibunog ed interon mundo. Kanian anggan iner so panaayaman na saray totoo, odino anggan antoy salita ra, sarag dan aralen so Biblia ed mismon salita ra.​—Nengnengen so kahon ya “Impatalos so Biblia Diad Saray Lenguahe ed Africa.”

16. Base ed Mateo 28:19, 20, panon tayon nipanengneng ya misalsalamat itayo ed si Jehova ed regalo ton Biblia?

¹⁶ Panon tayon nipanengneng ya misalsalamat itayo ed si Jehova ed regalo ton Biblia? Inagew-agew tayon basaen itan, dalepdepen tayo no anto ray ibabangat tod sikatayo, tan gawaen tayoy anggaay nayarian tayon iyaplika iray nanaaralan tayo. Ontan met, ipaamta tayo ed saray totoo iray nanaaralan tayo ed Biblia.​—Sal. 1:1-3; Mat. 24:14; basaen so Mateo 28:19, 20.

17. Anto ran regalo so inaral tayo ed sayan artikulo, tan antoy pantongtongan tayo ed onsublay ya artikulo?

¹⁷ Apantongtongan tayo la iray pigaran regalo nen Jehova ed sikatayo, singa say balibalin ayaman tayo, say planetan Dalin; say makapakelkelaw ya utek tayo; tan say Salita to, say Biblia. Balet wala ray regalo nen Jehova ed sikatayo ya agtayo nanengneng. Sarayan agnanengneng ya regalo to et pantongtongan tayo diad onsublay ya artikulo.