“Natan et Labalabay Ko Lay Manpulong!”

AGAK LA MALIKET

Makapaermen ta nen tinedyer ak la, binmetel so panangarok ed si Jehova. Makakaibeg ak ed saray kaklasek ta nagagawaan day labalabay da, balet siak andi. Naisip ko laingen ya istrikton maong iray atateng ko tan dakel so bawal ed relihyon tayo kanian mairap so manlingkor ed si Jehova. Manisia ak nin siansia ed si Jehova pero inmarawi lay liknaan kod sikato.

Manpupulong ak met ni pian agak magmaliw ya inaktibo, balet agak manpaparaan kanian no maminsan et agko amtay ibagak. Anggapo laingey return visit ko odino iyaaralan koy Biblia kanian agak la maliket, ya anggad mangiras ak lan manpulong. Naisip ko laingen, ‘Panon kasin nanaanosan na agagi so manpulong anta mairap?’

Nen 17 ko la, labalabay ko lay ombiig, kanian nan-impake ak insan ak la linma ed Australia. Maer-ermen iray atateng ko nen inmalis ak. Aburido ira, pero walay tiwala da ya manlingkor ak nin siansia ed si Jehova.

Nen wala ak lad Australia, lalon kinmapuy so espiritualidad ko. No maminsan et agak la makakapiaral. Saray kakaarok ed kongregasyon et iramay kaparak met ya tinedyer tan labalabay day oninum tan onsayaw ed nightclub. Tua, Tasi ak ni pero singa ak la worldly.

AGKO INILALOAN YA PANANGUMAN

Kalabas na manga duay taon, walay akabat kon sister ya baleg so epekto tod siak. Lapud sikato et apaisip ak no antoy gagawaen kod bilay ko. Diad samay abung ya panaayaman ko et walay kaibak ya apatiran single sister. Tan nampresenta kami ya diman manpundo na sakey simba so manangasikaso na sirkito tan say asawa to ya si Atsi Tamara. Miiistoryaan tan mi-eelekan ed sikami si Atsi Tamara no busy si asawa to ed saray kimey diad kongregasyon. Labalabay koy ugali to. Balibalin katongtong, kanian alemew so liknaan kod sikato. Maespiritual ya bii, pero kalog met.

Maligligsa tan singa agnakekesawan si Atsi Tamara. Makaalis so seseg to. Iiter toy sankaabigan to diad panaglingkor kanian malikeliket, siak balet kera-kera so iiter kod si Jehova kanian agak maliket. Anguman so bilay ko nen anengneng koy seseg tan liket to. Lapud alimbawa to et anonotan ko iyan teksto: “Maliket yon lingkoran si Jehova. . . . Eyag kayod liket.”—Sal. 100:2.

NO PANON YA PINMAWIL SO SESEG KO

Labay kon nalikna met imay liket ya nalilikna nen Atsi Tamara, pero dakel so kaukolan kon umanen ed bilay ko. Abayag met pero kalnakalna ak ya anguman. Manpaparaan ak la antis ak ya manpulong tan mano-auxiliary payunir ak sagpaminsan. Kanian agak la masyadon mannerbiyos no manpupulong ak. Mas nai-enjoy ko ta kabisadok no anto ran teksto so usaren ko. Ag-abayag, tuloytuloy ak lan auxiliary payunir.

Wala la ray kakaarok ed kongregasyon ya maespiritual tan nandurumay edad da. Baleg so nitulong na alimbawa ra pian umanen koy prayuridad kod bilay, tan apaseseg da ak ya basaen so Biblia ya inagew-agew. Nai-enjoy ko lan maong so ministeryok kanian nan-regular payunir ak. Sa wakas, aliknak lamet so liket diad kongregasyon.

WALA LAY PARTNER KON MANPAYUNIR LEGAY BILAY

Kalabas na sakey taon, akabat koy Alex. Maomaong ya brother, tan inar-aro toy Jehova tan say ministeryo. Diad saman et sikatoy ministeryal a lingkor tan anem taon lan manpapayunir. Nanlingkor met si Alex diad lugar ya baleg so pankaukolan diad bansan Malawi. Akaiba ton nampulong iray misionero tan akaaral ya maong ed sikara. Pinaseseg da ya lanang ton iyuna ed bilay to si Jehova.

Nankasal kami nen Alex nen 2003, tan tuloytuloy kamin nampayunir. Dakdakel so naaralan mi ed pampapayunir mi tan dakdakel met so bendisyon nen Jehova ed sikami.

AGNASABAAN YA BENDISYON

Nen 2009, naimbitaan kamin manlingkor ya misionero diad Timor-Leste. Abigla kami pero eksayted kami, tan mannerbiyos kami met. Kalabas na limay bulan, sinmabi kami ed Dili, say capital na Timor-Leste.

Duma so bilay ed Timor-Leste no ikompara ed bilay ya apasalan mi. Kaukolan mi mibagay ta duman maong so kultura, lenguahe, panangan, tan kabibilay da. Kada no manpulong kami, kaskasian mi ray totoo ta mairap so bilay da tan dakel so ag-akapanaral. Naapektoan so laman tan emosyon na dakel a totoo lapud guerra tan gulo.a

Makapalikliket so manpulong! Singa bilang, walay akabat kon maer-ermen ya 13 años ya bii ya si Maria.b Pigay taon la ya ulila ed ina tan matalag ton nanengneng so ama to. Singa arum met ya tinedyer, anggapoy direksion na bilay nen Maria. Aminsan, inyaki-akis tod siak legan ton ibabaga so nalilikna to. Pero agko natatalosan so ibabaga to ta agko ni masyadon kabisadoy lenguahe da. Nampikasi ak ed si Jehova ya komon et tulongan to ak pian napaseseg koy Maria. Imbasaan ko na pigaran makaligliwan teksto. Diad sinmublay iran taon, anengneng kon mismo no panon ya inuman na Biblia so ugali, itsura, tan bilay nen Maria. Sikatoy inmaligwas ya anggad abautismoan tan natan et wala met la ray iyaaralan to na Biblia. Agla maermen si Maria ta parte la natan na baleg ya pamilya nen Jehova tan amta to ya dakel so mangaaro ed sikato.

Bebendisyonan nen Jehova so kimey ya panagpulong diad Timor-Leste. Maslak ed saray agagi et samploy taon da ni labat ed katuaan, pero dakel ed sikara so payunir, ministeryal a lingkor, odino elder la natan. Say arum et walad remote translation office tan ontutulong iran mangipatalos na saray publikasyon tayo ed nanduruman lenguahe. Malikeliket ak kada no narengel ko ran mangansion ed aral, no nanengneng koy balibalin imis da, tan no naiimanok so iyaaligwas da ed espiritual.

AYA LA SO SANKALIKETAN YA BILAY!

Na-enjoy koy asainmin mi ed Timor-Leste anggano duman maong so bilay ditan no ikomparad bilay diad Australia. No maminsan, miseksekan kamid melag ya bus ya aliwa labat ya too so lugan to, noagta dakdakel met ya pisipising tan pinindar ya sira-sira. Wala ray iyaaralan mi ya melmelag so abung da tan manuusilan iray manok legan kamin manaaral. Tan manlinglinget kami kalamor ta agaylay salimuot. Pero anggano mairap, makaimis ak tan ibagak ed sarilik, ‘Malikeliket ak!’

Maong labat ta imbangat ak na saray atateng ko tungkol ed si Jehova tan agda ak pinaulyanan anggano kinmapuy so espiritualidad ko nen tinedyer ak. Tuan talaga imay ibabaga na Proverbio 22:6. Proud si Mommy tan Daddy ed sikami nen Alex. Maliket ira ta manpapausar kami ed si Jehova. Manlapu la nen 2016, manlilingkor kami diad kimey ed sirkito diad teritorya na Australasia branch.

Singa agak makapanisia ya nensaman et napipilitan ak labat ya manpulong. Natan et labalabay ko lay manpulong! A-realize ko ya anggan antoy nagawa ed bilay tayo, say tuan liket et manlapu labat ed interon-puso ya panaglingkor ed Dios. On, say apalabas ya 18 taon ya kaibak si Alex ya manlilingkor ed si Jehova so sankaliketan iran taon na bilay ko! Natan et natatalosan ko la no akin ya oniay imbaga nen salmistan David ed si Jehova: “Amin iramay manpapasalimbeng ed sika et manliket; lawas iran manggayaga. . . . Tan saramay mangaaro ed ngaran mo et manliket lapud sika.”—Sal. 5:11.