Aligen so Panaanos nen Jehova

1-2. Base ed Isaias 65:16, 17, antoy insipan nen Jehova ya mamaseseg ed sikatayon ag-onsuko?

“AGKA ONSUSUKO!” Atan so balibalin tema na 2017 ya regional a kombension tayo. Indanet ed saman ya kombension no panon tayon nasarag iray nanduruman problema. Apat taon lay linmabas, tan siansia nin aanosan tayoy bilay ed sayan mauges ya mundo.

² Anto ran subok so dadalanen mo? Ompan inateyan kay kaaro o kapamilya. Ompan walay graben sakit mo, odino onkakapuy lay laman mo lapud ontatatken ka la. Nayarin say pamilyam et biktima na agawan kalamidad o krimen. Ompan mairap so situasyon ed lugar yo ta imbawal na gobierno so kimey tayo. Ompan sakey kad saray naapektoan na COVID-19 pandemic odino arum nin sakit. Seguro, labalabay mo lan onsabi so panaon ya naandi la irayan amin, tan agtayo la iratan nanonotan!—Basaen so Isaias 65:16, 17.

3. Antoy importantin gawaen tayo natan, tan akin?

³ Mair-irap so bilay natan, tan mas grabe ni ran subok so dalanen tayo diad arapen. (Mat. 24:21) Importante sirin ya itultuloy tayoy mananos. Imbaga nen Jesus: “Diad pansungdo [o pananos] yo et niliktar yoy bilay yo.” (Luc. 21:19) Mas makapan-anos tayo no isipen tayo no panon met ya nanaanosan na arum so problema ra.

4. Akin et nibaga tayon si Jehova so sankaanosan ed amin?

⁴ No anos so pantongtongan, siopay sankaanosan ed amin? Anggapo lay arum noag si Jehova. Ompan agka makapanisia ya sikato. Pero isip mo pa: Sarasarag nen Jehova ya deralen lan tampol iyan mundo nen Satanas pian naandi lay amin ya problema. Balet maan-anos ton aalagaren so agew ya panggawa to ed satan. (Roma 9:22) Kanian mantetepel ni anggad isabi na satan ya agew. Amtaen tayo ed sayan artikulo so siameran aanosan nen Jehova.

ANTO RAY AANOSAN NEN JEHOVA?

5. Panon ya dineralan so ngaran na Dios, tan antoy naliliknam ed satan?

⁵ Dineralan so ngaran to. Importantin maong ed si Jehova so ngaran to, tan labay ton respetoen itan na amin. (Isa. 42:8) Pero dakel so agmanrerespeto ed ngaran to diad loob la na 6,000 taon. (Sal. 74:10, 18, 23) Ginmapo iya diad hardin na Eden, nen say Diablo (mankabaliksan na “Managpauges”) et pinapaway ton wala kunoy isisiblet na Dios ed si Adan tan Eva ya mamaliket ed sikara. (Gen. 3:1-5) Manlapu lad saman, tuloytuloy nin papaugesen na Diablo so ngaran nen Jehova, tan dakel so apanisia to ya walay isisiblet na Dios ed saray totoo. Sankanonot nen Jesus iyan panederal ed ngaran na Ama to, kanian imbangat to ed saray disipulo to ya ipikasi dan: “Ama mi a walad tawen, napasanto komon so ngaran mo.”—Mat. 6:9.

6. Akin et pinmayag si Jehova ya onlabas ni andukey ya panaon pian paneknekan ya sikato labat so walaan na karapatan ya uleyan so amin?

⁶ Dakel so agmanpapasakop ed soberanya odino uley to. Si Jehova labat so walaan na karapatan ya uleyan so tawen tan dalin. Tan sikato so sankaabigan ya manuley, lapud sikato so Amalsa. (Apo. 4:11) Pero kinuestion itan na Diablo, tan kinombinse to ray anghel tan totoo ya aliwan karapat-dapat so Dios ya manuley. Kaukolan so andukey ya panaon pian napaneknekan no kasin duga o aliwa so ibabaga na Diablo. Atan so rason no akin ya pinmayag so Dios ya uleyan na too so kapara ton too diad andukey ya panaon—ta pian nanengneng dan mismo ya aliwliway pansumpalan da no ombiig irad uley To. (Jer. 10:23) Lapud anos na Dios, maminpinsan ya napruebaan ya alingo-lingo so Diablo, tan anggapo lan balot so nayarin mankuestion ed uley nen Jehova. Nanengneng na amin ya say Panarian na Dios labat so makapangiter na tuan kareenan tan mainawan bilay diad dalin.

7. Siopa ray nanrebelde ed si Jehova, tan antoy gawaen to ed saray rebelde?

⁷ Nanrebelde so arum ya ananak to. Nen ginawa nen Jehova iray anghel tan say unonan sanasawa, perpekto ira. Balet walay anghel ya nanrebelde ya nagmaliw a Satanas (mankabaliksan na “Sumusumpa”) tan kinombinse toy Adan tan Eva ya manrebelde met. Dakel ni ran anghel tan totoo so akombinse ton manrebelde. (Jud. 6) Sinmabi panaon, anggan say bansan Israel ya pinilin totoo na Dios et trinaidor day Jehova tan nandayew irad palson dirios. (Isa. 63:8, 10) Asakisakitan si Jehova, pero intepel to iratan ya amin. Anggad natan et manaanos ni, pero onsabi panaon ya deralen to lanlamang so amin ya rebelde. No nagawa la itan, seguradon nainawaan iray matoor ya lingkor nen Jehova ya manaanos met ed sayan mauge-uges ya mundo!

8-9. Anto ran katilaan so ikakayat nen Satanas tungkol ed si Jehova, tan panon tayon napruebaan ya aliwan tua iratan?

⁸ Saray katilaan ya ikakayat na Diablo. Inakusaan nen Satanas si Job tan amin ya matoor a lingkor nen Jehova ya mandadayew ira kuno ed Dios ta bebendisyonan To ra. (Job 1:8-11; 2:3-5) Anggad natan et tuloytuloy ni yan akusasyon nen Satanas. (Apo. 12:10) Walay nagawaan tayo pian napaneknekan ya matila si Satanas—manmatoor tayo anggano wala ray subok tan ipanengneng tayo ya mandadayew tayod si Jehova lapud inar-aro tayo. Benendisyonan nen Jehova si Job lapud impananos to, tan seguradon bendisyonan To tayo met no mananos tayo.—Sant. 5:11.

⁹ Uusaren nen Satanas iray lider na palson relihyon pian ibangat ed saray totoo ya si Jehova et maruksa tan sikato so panlalapuan na amin ya paniirap tayo. Ibabaga da ni ingen ya no ompatey so sakey ya ugaw, inala kuno na Dios ta kaukolan to ni anghel ed tawen. Dederalan day Dios! Pero amta tayo ya ag-itan gawaen nen Jehova ta maar-aron Ama. Kanian no mansakit tayo odino walay ompatey ya kaaro o kapamilya tayo, agtayo tetetelen so Dios. Insipan to ya ekalen to lanlamang iray sakit tan bilayen to iray inaatey, tan seguradon gawaen to itan. Ipaamta tayo sirin ed arum ya si Jehova et maar-aron Dios. No ontan so gawaen tayo, walay niyebat to ed samay mangakantiaw ed sikato.—Pro. 27:11.

10. Antoy naaralan tayo tungkol ed si Jehova diad Salmo 22:23, 24?

¹⁰ Say paniirap na saray inar-aro ton lingkor. Makasin Dios si Jehova, kanian singa bebetagen so puso to no nanenengneng to ya maniirap tayo lapud sakit, irap na bilay, wala ray onkokontrad panagdayew tayo, odino lapud wala ray nagagawaan tayon lingo. (Basaen so Salmo 22:23, 24.) Nasasakitan si Jehova no nasasakitan tayo. Labalabay to lan ekalen so amin ya lapuan na paniirap tayo, tan talagan ekalen to iratan. (Ikompara so Exodo 3:7, 8; Isaias 63:9.) Onsabi so panaon ya “punasen to so amin a lua ed kamataan [tayo], tan anggapo lay patey, anggapo met lay panermen tan panakis tan panotot.”—Apo. 21:4.

11. Anto ray nanailiw nen Jehova ed saray inatey lan matoor ya lingkor to?

¹¹ Say pakakailiw to ed saray inatey lan kakaaro to. Seguradon tatalaranan la nen Jehova so agew ya nanengneng to lamet iray matoor ya lingkor ton inatey la. (Job 14:15) Imadyin mo pay pakakailiw to ed kaaro ton si Abraham. (Sant. 2:23) Ontan met ed si Moises, ya ‘arap-arapan ton kinatongtong.’ (Exo. 33:11) Tan imadyin mo pay pakakailiw to ed saray balibalin kansion na panangirayew nen David tan na arum ni ran salmista! (Sal. 104:33) Abayag lan inatey irayan kakaaro nen Jehova, pero sankanonot to ni ran siansia. (Isa. 49:15) Agto nalingwanan so amin ya kalareker tan ugali da, kanian diad nonot to et “mabilay iran amin.” (Luc. 20:38) Nasabisabi ya paolien to ra, kanian narengel to lamet so pikakasi da tan naliketan lamet ed panagdayew da. No walay inatey ya kaarom o kapamilyam, nonot mo irayan katuaan pian onlemew so liknaan mo.

12. Diad sayan kaunoran iran agew, anto ray nagagawa ya nasasakitan si Jehova?

¹² Say pamapairap na too ed kapara ton too. Kayari na impanrebelde diad Eden, amta nen Jehova ya lalon onuges iray totoo. Kabkabusol nen Jehova so kaugsan, inkaruksa, tan ag-inkahustisya ed mundo natan. Kaskasian to iray mairap-bilay tan saramay agda naidepensa so sarili ra, singa saray ulila tan saray abalo. (Zac. 7:9, 10) Tan lalon nasasakitan si Jehova no nanenengneng ton papairapen tan ipipriso iray matoor ya lingkor to. No sakey kad saray ondadalan ed onian irap, tandaan mo ya inar-aro ka nen Jehova ta manaanos ka ya singa sikato.

13. Anto ray makapabaing ya gagawaen na totoo natan, tan antoy gawaen na Dios ed saramay agda labay so manguman?

¹³ Say iyaabeba na moralidad na totoo. Pinalsa so too ya sarag ton aligen iray kualidad na Dios. Pero lapud impluensya nen Satanas, nagmaliw ya makapabaing tan imoral so kagagawa na totoo. Nen anengneng nen Jehova ya “agaylay inkauges na too” diad panaon nen Noe, “pagbabawian [to] so impanggawa toy totoo diad dalin, tan asakitan so puso to.” (Gen. 6:5, 6, paimanod leksab, 11) Diad inlabas na panaon, lalon inmuges iray totoo. Natan et normal labat lay manggawa na imoral—mirelasyon irad agda asawa, tan ed kapara dan laki odino kapara dan bii. Seguradon makakaimis si Satanas no nanenengneng to ya dakel so naimpluensyaan to. (Efe. 4:18, 19) Pero say talagan panlikliketan to et no walay lingkor nen Jehova ya natukso ton manggawa na imoral. Onsabi panaon ya deralen nen Jehova so amin ya imoral a totoo ya agda labay so manguman.

14. Antoy gagawaen na totoo ed planetan Dalin?

¹⁴ Say panederal na totoo ed planetan Dalin. Anta aliwliwa la lanti resulta na panuuley na too ed kapara ton too, dederalen to ni iyan dalin kanian nanaupot iray ayayep ya imbilin nen Jehova ya asikasoen na too. (Gen. 1:28; Ecl. 8:9) Ibabaga na arum ya scientist ya lapud kagagawa na totoo, masulok ya sakey milyon nin speciesb so magmaliw ya extinct diad ontutumbok iran taon. Kampegan aburido ran maong ta talagan nadederal lay kalikasan! Maong labat ta insipan nen Jehova ya “deralen [to] iramay manederal ed dalin” tan gawaen ton paraiso so interon mundo.—Apo. 11:18; Isa. 35:1.

NO ANTOY NAARALAN TAYOD PANAANOS NEN JEHOVA

15-16. Antoy mamaseseg ed sikatayo ya mananos met ya singa si Jehova? Mangiter na ilustrasyon.

¹⁵ Isip mo pay amin ya problema ya nilibon taon lan aanosan nen Aman Jehova. (Nengnengen so kahon ya “No Anto ray Aanosan nen Jehova.”) Sarasarag pa nen Jehova ya deralen la iyan mundo nen Satanas. Pero lapud anos to, agto ni itan ginawa, tan parad pankaabigan tayo lanlamang itan. Akin ey? Isip mo pa yan ilustrasyon: Walay sanasawa ya nampacheck-up ed doktor, tan naamtaan da ya say lukon na asawan bii et walay deperensya tod laman. Kanian no ompaway so baby da et mairap lanlamang so kipapasen to tan ag-ombayag so bilay to. Anggano amta ra ya nairapan iran mangasikaso, malikeliket ira nen niyanak la may ugaw. Akaparaan iran mansakripisyo tan mananos ta inar-aro da.

¹⁶ Amin tayon ananak nen Adan tan Eva et singa saman ya ugaw. Anggano ag-itayo perpekto, inar-aro itayo nen Jehova tan aasikasoen to itayo. (1 Juan 4:19) Pero say pidumaan nen Jehova ed saramay atateng diad ilustrasyon, sarag ton paabigen iray ananak to. Diad tua, wala lay apili ton petsa no kapigan to ekalen so amin ya paniirap na totoo. (Mat. 24:36) No isipen tayoy panangaro nen Jehova, lalo tayon napaseseg ya mananos met.

17. Akin et napaseseg tayon mananos no basaen tayo may walad Hebreo 12:2, 3 tungkol ed impananos nen Jesus?

¹⁷ No si Jehova so sankaanosan ed amin, say onkokomaduan sankaanosan et si Jesus, ta inalig toy Ama to. Nen wadiad dalin, inanosan toy panag-insulto, kababaingan, tan say ipatey ed panamairapan a poste pian nadondon to tayo. (Basaen so Hebreo 12:2, 3.) Apaseseg si Jesus ya mananos lapud panaanos nen Ama to, tan atan met so mamaseseg ed sikatayo.

18. Base ed 2 Pedro 3:9, antoy resulta na panaanos nen Jehova?

¹⁸ Basaen so 2 Pedro 3:9. Amta nen Jehova no kapigan so dugarugan panaon na panderal to ed sayan mauges ya mundo. Lapud panaanos to, dakel nin totoo so nawawalaan na tsansa ya makapikabat ed sikato. Tan natan et minilyon la so kabiangan na baleg ya ulop ya mandadayew ed sikato. Misalsalamat ira ta lapud panaanos nen Jehova et niyanak ni ra, sikatoy akabat tan naaro da, ya anggad indedika day sarili da ed sikato. Diad arapen, no iter la nen Jehova so premyo na minilyon ya lingkor to ya nananos anggad anggaan, diman lalon napaneknekan ya duga so desisyon nen Jehova ya mananos!

19. Antoy tuloytuloy tayon gawaen, tan antoy awaten tayon premyo?

¹⁹ Maliket si Jehova anggano dakel so aanosan to. Diad amin ya probleman ginawa nen Satanas, ibabaga na Biblia ya si Jehova et siansia nin “maliket a Dios.” (1 Tim. 1:11) Makaaral tayo ed alimbawa to. Dakel met so rason tayon manliket legan tayon aalagaren so panaon ya pasantosen nen Jehova so ngaran to, pruebaan ton sikato so karapat-dapat ya manuley, panampoten toy amin ya kaugsan, tan ekalen toy amin ya problema. Gawaen tayo sirin so anggaay nayarian tayon mananos ta amta tayon manaanos met si Aman Jehova. No ontan so gawaen tayo, walay awaten tayon premyo, ta ibabaga na Biblia: “Maliket so too a tuloytuloy a mansusungdo [o manaanos] ed subok, ta sano sikatoy naabobonan et awaten to so korona na bilay ya insipan nen Jehova ed saramay mantutultuloy a mangaaro ed Sikato.”—Sant. 1:12.