Kasin Nanonotan Yo?

Kasin natandaan mo ray abasam ed saray isyu na Say Panag-bantayan ed sayan taon? Nengneng mo pa sirin no naebatan mo irayan tepet:

Antoy epekto no lanang tayon kakatongtongen, dedengelen, tan iisipen si Aman Jehova?

Mas makapandesisyon tayoy duga, magmaliw tayon maong ya managbangat, ombiskeg so pananisia tayo, tan mas naar-aro tayoy Jehova.​—w22.01, p. 30-31.

Akin et importantin pabiskegen tayoy tiwala tayo ed si Jehova tan ed saray pinili ton mangidaulo ed organisasyon to?

No natan ni labat et mantitiwala tayo lad si Jehova tan agtayo kukuestionen iray instruksion tan desisyon na saray elder, agtayo la nairapan ya unoren iray instruksion no baleg a kairapan la, anggano singa aliwan praktikal iratan tan mairap ya unoren.​—w22.02, p. 4-6.

Anton mensahe so labay ya ipasabi na anghel nen imbaga to may tungkol ed “patawin ed lima nen [Gobernador] Zerubabel”? (Zac. 4:8-10)

Ipapaseguro na anghel ed saray Judio ya anggano diad pakanengneng na arum et simpli labat imay balon templo kompara ed samay dati, say importante et nasumpal itan tan natumbok iray maptek ya estandarte nen Jehova.​—w22.03, p. 16-17.

Panon tayon magmaliw ya maong ya ‘ehemplo diad panagsalita’? (1 Tim. 4:12)

Diad ministeryo, dapat ipanengneng tayoy respeto anggano pinansalitaan da tayoy ansakit. Diad aral et mangansion tayoy impapuso tan mankomento tayon lanang. Dapat makapabiskeg iray iistoryaen tayo tan iwasan tayo iray makapasakit a salita.​—w22.04, p. 6-9.

Akin ya samay nanduruman deskripsion ed apatiran ayayep (o panarian) ya abitlad Daniel kapitulo 7 et nanengneng ed saksakey ya ayep ya nabasad Apocalipsis 13:1, 2?

Aliwan gobierno na sakey labat ya bansa so irerepresenta na samay atap ya ayep ya abitlad Apocalipsis 13. Say isisimbolo to et amin ya gobierno manlapu la nensaman anggad natan.​—w22.05, p. 9.

Antoy sakey a paraan pian nipanengneng tayon baleg so tiwala tayo ya iter nen Jehova so hustisya?

Agtayo ombabawi o maneem-em na sakit na linawa no walay nan-insulto, akasakit, o akagaway kasalanan ed sikatayo. Ipalima tayo la itan ed si Jehova. Sarasarag ton buralen so amin ya epekto na kasalanan.​—w22.06, p. 10-11.

Antoy nepeg ya tandaan na sakey ya brother no mangidaulo na pikakasi ed aral?

Ag-uusaren so pikakasi pian simbawaen iray agagi odino singa tayo mangibabaga na announcement. Iwasan tayoy “dakel a salita,” lalo la diad panlukas ya pikakasi. (Mat. 6:7)​—w22.07, p. 24-25.

Antoy labay ya ibaga nen Jesus nen imbaga ton “saramay nanggaway mauges et napaoli pian naukom”? (Juan 5:29)

Nen imbaga to ya “naukom” ira, agto labay ya ibagan nasentensiaan ira base ed impanbilay o ginawgawa ra nensaman. Imbes, ontutukoy itan ed pan-obserba ed sikara kayari ran napaoli. Nengnengen no kasin manguman ira tan idedika day sarili da ed si Jehova.​—w22.09, p. 18.

Antoy impaseseg nen Brother Joseph F. Rutherford diad samay kombension ya agawa nen Setyembre 1922?

Diad kombension ed Cedar Point, Ohio, U.S.A., oniay imbaga to: “Say Ari et manuuley la! Sikayo ray manangiyabawag to. Kanian iyabawag, iyabawag, iyabawag yo so Ari tan say Panarian to!”​—w22.10, p. 3-5.

Base ed Isaias kapitulo 30, anto ray taloran paraan ya tutulongan itayo nen Jehova pian naanosan tayo ray subok?

Naaralan tayod satan ya kapitulo ya (1) dedengelen tan eebatan to iray pikakasi tayo, (2) igigiya to tayo ed dugan dalan, tan (3) bebendisyonan to tayo natan tan bendisyonan to tayo diad arapen.​—w22.11, p. 9.

Akin et nibaga tayon agawa la nensaman so Salmo 37:10, 11, 29 tan nagawa lamet diad arapen?

Sayan insulat nen David et propesiya ya agawa ed Israel legan na uley nen Arin Solomon. Diad bersikulo 11 so angalaan nen Jesus na samay imbaga tod Sermon ed Palandey tungkol ed nagawa diad paraiso ed arapen. (Mat. 5:5; Luc. 23:43)​—w22.12, p. 8-10, 14.