1 | Pikakasi “Ipaawit Yod Sikato so Amin a Kapagaan Yo”

IBABAGA NA BIBLIA: “Ipaawit yod [Dios] so amin a kapagaan yo, lapud iyaansakit to kayo.”—1 PEDRO 5:7.

No Antoy Labay ton Ibaga

Iimbitaan itayo nen Jehova a Dios ya ibaga ed sikato so amin ya pakakabelatan na nonot tan puso tayo. (Salmo 55:22) Melag may baleg so problema, sarag tayon ipikasi ed sikato. No importante itan ed sikatayo, importante met itan ed si Jehova. No manpikasi tayod sikato, natulongan itayo pian ondeen so nonot tayo.—Filipos 4:6, 7.

No Panon Iyan Makatulong

No mankakaproblema tayod isip, ompan maer-ermen tayo tan pakalikna tayo et bukbukor tayo. Nayarin agnatatalosan na arum so dadalanen tayo. (Proverbio 14:10) Pero no ipikasi tayod Dios so amin ya nalilikna tayo, maar-aro to tayon dengelen tan natalosan to tayo. Iimanoen itayo nen Jehova, amta to iray ermen tan irap tayo, tan labay to ya ipikasi tayo so amin a pampapagaan tayo.—2 Awaran 6:29, 30.

No manpipikasi tayo ed si Jehova, mas mantiwala tayo ya imalasakit to tayo. Ompan nalikna tayo met may impikasi na sakey ya nansulat ed Biblia: “Nanenengneng moy paniirap ko; amtam so pinasyan pakakagonigon ko.” (Salmo 31:7) Amay amta tayon iimanoen itayo nen Jehova et baleg lay nitulong to pian nasarag tayo ray mairap ya dadalanen tayo. Pero aglabat napapansin nen Jehova so aanosan tayon problema. Imbes, natatalosan to iray dadalanen tayo nen say anggan siopa tan tulongan to tayon napabiskeg na Biblia.

No Panon ya Natutulongan na Biblia si Julian

No Antoy Epekto ed Siak na Anxiety

“Walay anxiety tan obsessive-compulsive disorder ko (OCD). Agko natalaranan so iyataki na anxiety’k. No maminsan okay ak, insan bigla ak labat ya nanerbiyos ya anggapoy rason. Mas onloloor iya no wala ak ed dakel ya totoo. Grabe panaburidok no anto kasi pakanengneng na arum ed siak.

“Masupsuporta ed siak iramay makaamta ed sakit ko. Tua no maminsan, wala ray ibabaga ra ya makapadismaya. Pero misatsalamat ak nin siansia ta sasalien da ak ya tulongan.

“No maminsan lapud anxiety tan OCD’k, ngalngali agak makapanpikasi. Agak maka-concentrate tan nairapan ak ya mitongtong ed si Jehova. Maples ya manguman-uman so panagnonot ko, diad kapeles to, agko nasabayan. No agko la nakontrol, agko met la amtan ibaga ed si Jehova so nononoten tan naliliknak.”

No Panon Ak ya Natutulongan na Biblia

“Naaralan kod Biblia ya agmet kailangan ya andukerukey odino inap-apiger so pansalita tayo pian awaten na Dios so pikakasi tayo. No maminsan, no agko la amtay ibagak, ipikasik labat: ‘Jehova, tulongan yo ak.’ Anggano onman labat, nalikas kon natatalosan ak nen Jehova tan iiter toy kailangan kon tulong. Likud nid pikakasi, nampadoktor ak. Maong labat ta ginawak iraman kanian dinmakep so kondisyon ko. Sulit so impansagpot kon onkerew na tulong ed Amak ed tawen, alikliknak so panangaro tan panangasikaso tod siak.”