Anengneng Kon Mismo so Agnatawalan ya Katooran na Agagi

Aliwan relihyoso man ya kaarok, kanian akalek ak tan tinepetan ko: “Wala siri’ antam ed Biblia?” Agan tampol akasel. Pero, imbaga to lanlamang ya Tasi nen Jehova so nanay to, kanian walay amta to ed Biblia. A-curious ak, kanian agko tinundaan ya tinepetan.

Halos sanlabi kamin nan-istoryaan. Imbaga tod siak ya base ed Biblia, si Satanas so manuuley ed sayan mundo. (Juan 14:30) Seguro abangonan yo la ’tan ya bangat, pero siak, first time ko iman ya narengel. Manlapud impanugaw ko, say amtak et say Dios so mangokontrol ed mundo. Pero naisip ko, ‘Akin et onia balet so bilay anta maar-aro so Dios?’ Diad saman et 26 ko ni labat, pero dakdakel lay anengneng kon mauges ya nagagawa ed mundo.

Say tatay ko et piloto na United States Air Force. Kanian ugaw ak ni, alutoluto lad isip ko ya walay nagawan nuclear war, tan posible ya anggan anton oras et manpasabog na nuclear bomb so US army. Insan nen manaaral ak lad college diad California, agawa so guerra diad Vietnam. Lanang ak ya mimila no manproprotesta iray estudyante. No nitan la ray pulis ya walay awit dan batuta, ombatik kami la. Spray-an da kami tear gas kanian nairapan kamin oningas tan ngalngali agkami makanengneng. Magulogulo man ya panaon! Amayamay so kontrad gobierno. Dakel so protesta tan riot, tan mabetbet ya walay papateyen dan politiko. Nandurumay opinyon na totoo kanian agmo la amta no antoy duga.

Nen 1970, nantrabaho ak diad bandad norte na Alaska, tan baleg so anap ko. Insan linma ak ed London tan angaliw ak na motor. Biahe ak lan biahe, akauley to la no iner so nasabik. Kalabas na pigaran bulan, akasabi ak ed Africa. Diad panmo-motor ko, wala ray akabat kon singa siak met ya labay dan takasan iray problema ed bilay.

Kanian nen imbaga to may kaarok ya say manuuley ed sayan mundo et si Satanas, a-realize ko ya dugay ibabangat na Biblia. Pero say tepet ko, ‘Say Dios balet ey, antoy gagawaen to?’

Diad tinmutumbok ya bulan, nalmok lanlamang so ebat. Tan diad inlabas na panaon, akabat ko ray dakdakel ya bibii tan lalaki ya nandurumay situasyon da pero matoor ira ed saksakey ya tuan Dios.

NORTHERN IRELAND—“SAY DALIN NA BOMBA TAN BALA”

Kapawil kod London, kinontak ko may nanay na kaarok, tan inikdan to ak na Biblia. Nen wala ak lad Amsterdam, Netherlands, anengneng ak na sakey ya Tasi ya babasaen ko itan diad petek na streetlight. Wala ray bangat na Biblia ya impaliwawa tod siak, kanian naarumay amtak. Insan ak linmad Dublin, Ireland, tan inanap koy branch office na Saray Tasi nen Jehova. Nen nalmok ya siansia, tinmoktok ak. Akatongtong ko diman so sakey ya maespiritual ya brother, si Arthur Matthews. Nen in-request ko ya iyaralan to ak na Biblia, inmesel ya tampol.

Agko tinundaan ya binasa iray libro tan magasin ya im-publish na saray Tasi, tan siempre, say mismon Biblia. Labalabay ko ray nanaaralan ko. Nen onaatendi ak la ed aral na saray Tasi, manbilib ak ta anggan saray ugugaw et amta day ebat ed saray tepet ya abaybayag lan itetepet na saray de-aral: ‘Akin et dakdakel so mauges? Siopa so Dios? Antoy nagawa no ompatey tayo?’ Diad Ireland, puro Tasi iray kakaarok ta sikara met labat so kabat ko diman. Tinulongan da ak pian naar-arok si Jehova tan nagawaan koy panlabayan to.

Nampabautismo ak nen 1972. Kayari sakey taon, nampayunir ak tan tinmulong ak ed sakey ya melag ya kongregasyon diad Newry, Northern Ireland. Nanrenta ak na abung ya gawad malalapar iran bato, say kulaan to et diad gilig na palandey. Asingger itan ed alog tan wala ray baka, kanian no manprapraktis ak na paliwawa, sikara so audience ko. Singa madengedengel met ira legan iran manpaparintek. Siempre agda ak na-counselan, pero baleg so nitulong da pian naaralan koy audience contact. Nen 1974, niyasain ak bilang espisyal payunir kaibak si Nigel Pitt, tan nagmaliw kamin malet ya sankaaro.

Diad saman et magulogulo ed Northern Ireland. Kanian tinawag da itan ya “dalin na bomba tan bala.” Normal labat so panlalaban, pateyan, paltogan, tan pati ray kotse et papasabogen da. Say rason et lapud isyu ed politika tan relihyon. Pero, amta na saray Protestante tan Katoliko ya agmibabali ed politika iray Tasi, kanian makakapanpulong kami nin siansia. Amta na saray nakakatongtong mi no kapigan tan no iner so kulaan na saray gulo, kanian wawarningan da kami la pian naiwasan mi peligro.

Pero wala ni ran siansiay makapanerbiyos ya situasyon. Aminsan, kaibak ya nampulong si Denis Carrigan, ya payunir met. Say teritorya mi et diad asingger ya baley ya anggapo ni Tasi, tan mikadua mi ni labat ya naakar itan. Walay bii ya inakusaan ton sundalo kami kuno na Britain tan espiya kami kuno. Naimano to seguro ya dumay tono na panagsalita mi. Mannerbiyos kami, ta diad saman ya panaon, no maomaong kad saray sundalon British, nagunoyan et wala lay mamatey o mamaltog ed sika diad pueg, ta say amta ra et onkakampi ka ed Britain. Inmalis kami la pero legan kamin manaalagar na bus, walay kotse ya tinmunda diad arapan na coffee shop ya kawalaan na samay bii ya mangaakusa ed sikami. Pinmaway may bii tan kinatongtong to may duaran laki ya walad kotse insan to kami inturo. Nagunoyan, paarap lad sikami may kotse, insan tinepetan kami na samay duaran laki no anton oras so isabi na bus. Kasabi na bus, kinatongtong da may driver. Agmi arengel no antoy nantongtongan da. Kalugan mid bus, sikami labat so pasahero. Inisip mi laingen ya implano da la no antoy gawaen dad sikami kapaway mid saman ya baley. Pero akasabi kami met ed destinasyon mi tan anggapoy mauges ya agawa. Kaepas mid bus, tinepetan ko may driver: “Iramay katongtong mo niman, antoy ibabaga ra?” Say kuan to: “Agka mapaga, imbagak ya kabat ta kayo. Anggapoy mauges ya gawaen dad sikayo.”

Nen 1976, inmatendi ak ed distriton asembleaa diad Dublin. Akabat ko diman so sakey ya espisyal payunir ya taga England, si Pauline Lomax. Maespiritual, mapaabeba, tan maomaong si Pauline. Sikato tan say agi ton si Ray et binmaleg ed katuaan. Kayari sakey taon, nankasal kami nen Pauline tan niyasain kami ya espisyal payunir diad Ballymena, Northern Ireland.

Asali mi nanlingkor diad kimey ed sirkito. Say dadalawen mi et saray kongregasyon diad Belfast, Londonderry, tan arum nin lugar ya magulogulo. Pero, apaseseg kamid katooran na saray agagi. Tinaynan day abangonan dan relihyon, inekal dad puso ra so diskriminasyon tan pambusol, tan pinili dan panlingkoran si Jehova. Benendisyonan tan prinotektaan to irayan matoor ya lingkor to!

Samploy taon ak ya nanayam diad Ireland. Insan nen 1981, naimbitaan kami nen Pauline ya manaral ed koma-72 ya klase na Gilead. Ka-graduate mi, niyasain kami diad Sierra Leone, West Africa.

SIERRA LEONE—MATOOR IRAY AGAGI ANGGANO MAIRAP SO BILAY

Nanayam kamid missionary home, labinsakey kami ya amin. Taloray kasilyas tan duaray amesan, pero saksakey so kusina, telepono, washing machine, tan dryer. Mabetbet ya anggapoy kuryente. Dakel so otot diad gubida, tan wala ray kobra diad basement.

Tua, aliwan mainawa so bilay, pero na-enjoy min maong so ministeryo mi. Madengel iray totoo ta baleg so respeto da ed Biblia. Dakel so nagmaliw ya Bible study mi tan nan-Tasi ira. Say tawag ed siak na totoo et “Mister Robert.” Say tawag dad si Pauline et “Misis Robert.” Pero nen niyasain ak la ed branch office tan matalag ak lan makapanpulong, say tawag la na totoo ed si Pauline et “Misis Pauline.” Tan “Mister Pauline” lay tawag dad siak. Panlikliketan itan nen asawak!

Mairap so bilay na dakel ya agagi diad Sierra Leone, pero lanang ya iiter nen Jehova so pankaukolan da. No maminsan et diad paraan ya agda iilaloan. (Mat. 6:33) Nanonotan ko, walay sakey ya sister ya anta alenleneg la kalamor so kuarta to, inter to ni itan ed sakey ya brother ya a-malaria imbes ya isaliw toy kanen dan saniina. Abalitaan to kasi ya samay brother et anggapoy isaliw toy tambal. Pero diad saman lanlamang ya agew, walay biglan nampaayos na buek ed samay sister kanian asalatan lanlamang imay kuarta to. Dakel so ontan ya eksperiensya na saray agagi.

NIGERIA—INARAL MI MIBAGAY ED BALON KULTURA

Nen siameray taon mi lad Sierra Leone, inyalis da kami diad Bethel ed Nigeria. Baleg iyan branch office. Agak masyadon nan-adjust, ta no anto may trabahok ed Sierra Leone, aman nin siansiay trabahok diad Nigeria. Pero si Pauline so talagan nairapan ta anguma-uman so rotina to. Apasal ya pulong lan pulong tan manga 130 ya oras so irereport to kada bulan. Dakel so study to diad Sierra Leone, tan maples so iyaaligwas da. Kasabi mi balet diad Nigeria, say asainmin to et man-repair na kawes. Abayag antis ya aka-adjust, pero a-realize to lanlamang ya baleg so nitutulong na asainmin to, tan nampokus la ed no panon ton napaseseg so arum ya Bethelite.

Agkami pamilyar ed kultura na Nigeria, kanian inaral mi itan. Aminsan, walay brother ya linmad opisinak tan inkabat tod siak so sister ya balon tawag ed Bethel. Nen kuan ko lan pisamanoan, tinmalimukor ed arapan ko. Abigbigla ak! Anonotan kon tampol imay walad Gawa 10:25, 26 tan Apocalipsis 19:10. Kuan kod sarilik, ‘Anto kasi, banoen ko?’ Pero naisip ko, seguradon amta toy ibabangat na Biblia ta nagmaliw ya Bethelite.

Nababaingan ak ya maong ed saman. Kayari min nantongtong, nan-research ak. Naamtaan ko ya onman so ginawa to may sister ta aman so kaugalian da. Ontan nin siansiay gagawaen da ed arum ya lugar diad Nigeria, mapa-bii o laki. Atan so paraan pian nipanengneng day respeto, aliwan pian idayew so sakey ya too. Sabagay wala ray ontan ya nabasad Biblia. (1 Sam. 24:8) Maong labat ta agak la nansalita, ta no andi, abaingan may sister.

Dakel ya agagi so akabat mid Nigeria ya makapabilib so katooran da. Sakey lay Isaiah Adagbona.b Naamtaan toy katuaan nen kabataan ni, pero ag-abayag et a-diagnose ya walay ketong to. Sikatoy inawit ed leper colony, tan bukor to labat so Tasi diman. Pinulongan to ray kaiba to diman anggano dakel so kinmontra ed sikato. Masulok ya 30 so atulongan to ya nan-Tasi tan walay abuon kongregasyon diad saman ya leper colony.

KENYA—MAAN-ANOS IRAY AGAGI ED SIAK

Nen 1996, inyasain da kami diad branch office ed Kenya. First time koy makapawil lamet ed Kenya manlapud samay impasyar ko ditan ya naistoryak ed gapo. Wala ray bakes ya makakaloob ed sular na Bethel. No nanengneng da ray sister ya walay awi-awit dan prutas, mungkogen da ra tan bigla labat iran mangalay prutas. Aminsan, walay sister ya apaulyanan ton akalukas so bintana na kuarto to. Kapawil to, asabian toy sakey ya pamilya na saray bakes ya pampi-piestaan da ray naakan ed kuarto to. Maneyag tan batik may sister! Ataktakot iramay bakes tan tinmataboy irad bintana.

Inyasain da kami nen Pauline diad Swahili congregation. Pinankondukta da ak ya tampol na CBS o Panag-aral na Kongregasyon ed Libro (ya say tawag la natan et Panag-aral na Kongregasyon ed Biblia). Pero diad tua, agak ni marunong ya man-Swahili. Say gawaen ko, manparaan ak lan masakbay pian anggan panon et amtak ya basaen iramay tepet. Pero no say komento na agagi et duma ed samay walad libro, agko la natalosan. Kababaing ed saray agagi! Maong labat ta maan-anos tan mapaabeba ra.

AMERIKA—MATOOR IRAY AGAGI ANGGANO MAINAWAY BILAY

Ngalngali sakey taon mi met ed Kenya. Insan nen 1997, inyasain kami ed Bethel diad Brooklyn, New York. Mainaway bilay ed sayan bansa kanian duma met so subok dia. (Pro. 30:8, 9) Balet masetseseg tan matoor iray agagi. Ag-ira manpapayaman. Uusaren day panaon, kuarta, tan kaykayarian da pian suportaay kimey na organisasyon.

On, diad inlabas na saray taon tan diad nanduruman lugar ya nakar mi, anengneng min mismo so agnatawalan ya katooran na agagi anggano nandurumay situasyon da. Diad Ireland, magulogulo tan grabe so pambubusolan. Diad Africa, mairap so bilay tan nanaarawian iray agagi. Diad Amerika, subok so materyalismo. Seguradon makakaliket tan makakaimis si Aman Jehova no nanenengneng to ya sikatoy inar-aro na saray lingkor to anggano nandurumay situasyon da!

Agmi aliklikas so inlabas na panaon—‘maples itan ya linmabas nen say makinan panag-abel.’ (Job 7:6) Natan et malikeliket kamin manlilingkor ed world headquarters diad Warwick, New York. Sankalikna mi so tuan impanaagi tan panangaro. Kontento kami ed bilay mi ta amta mi ya susuportaan mi Ari tayo, si Kristo-Jesus, tan magano to lan bendisyonan so amin ya matoor.—Mat. 25:34.