“Mantultuloy Kayon Manlikas tan Manbantay!”

1. Antoy imbaga nen Jesus ed saray disipulo to tungkol ed no kapigan so isabi na anggaan, tan antoy bilin tod sikara?

PIGARAN agew antis ya ompatey si Jesus, oniay intepet na apatiran disipulo to: “Antoy tanda na . . . kaunoran a parte na sistema na mundo?” (Mat. 24:3) Seguro, labay dan naamtaan no kapigan naderal so Jerusalem tan say templo. Bilang ebat, imbaga toy tanda na pakaderal na Jerusalem tan say templo, pati say tanda na “kaunoran a parte na sistema na mundo”—say panaon ya pambibilayan tayo. Kasin walay imbaga nen Jesus ya eksakton petsa no kapigan onsabi so anggaan? Anggapo. Diad tua, oniay imbaga to: “Nipaakar ed satan ya agew odino oras et anggapoy siopaman a makaamta, anggan saray anghel ed tawen odino say Anak, noag say Ama.” Kanian oniay bilin tod amin ya disipulo to: “Mansiansia kayon aliing” tan “mantultuloy kayon manbantay.”—Mar. 13:32-37.

2. Akin et importante ya alerto tan akabantay iray Kristiano nen inmunan siglo?

² Importante ya alerto tan akabantay iray Kristiano nen inmunan siglo ta bilay da so nalalanor. Imbaga nen Jesus ed saray disipulo to no antoy tanda ya asingger lan naderal so Jerusalem tan say templo. Oniay imbaga to: “No nanengneng yoy Jerusalem ya apaliberan lay mankakampo iran armada, amtaen yo a magano lay pakaderal to.” No nanengneng da la itan, imbaga nen Jesus ya kaukolan da lay ‘ombatik ed kapalandeyan.’ (Luc. 21:20, 21) Nen dineral na saray Romano so Jerusalem, akaligtas iramay Kristianon nansiansian akabantay tan inmunor ed pasakbay nen Jesus.

3. Antoy pantongtongan tayo ed sayan artikulo?

³ Manbibilay tayo la ed panaon na anggaan. Kanian kaukolan tayo met so mantultuloy ya manlikas tan manbantay. Diad sayan artikulo, pantongtongan tayo no panon tayon mansiansian balanse legan tayon akabantay ed saray nagagawa ed mundo. Aralen tayo met no panon tayon makapan-alwar ed amin ya gagawaen tayo, tan no panon tayon nausar ed sankaabigan so nakekeran panaon antis na anggaan.

MANSIANSIAN BALANSE LEGAN YA AKABANTAY ED SARAY NAGAGAWA ED MUNDO

4. Akin et interesado tayod saray nagagawa ed mundo natan?

⁴ Interesado tayo ed saray nagagawa ed mundo natan ta labay tayon nanengneng iray ebidensya ya talagan nasusumpal la ray propesiya ed Biblia. Singa bilang, binitla nen Jesus iray espisipikon nagawa antis ya naderal so mundo nen Satanas pian walay ideya tayo tan agtayo kapakapa. (Mat. 24:3-14) Imbaga met nen apostol Pedro ya kaukolan tayon imanoen so pakakasumpal na saray propesiya pian lalon ombiskeg so pananisia tayo. (2 Ped. 1:19-21) Tan oniay nabasa ed gapo na Apocalipsis, say sampot ya libro na Biblia: “Say panangiparungtal nen Jesu-Kristo, ya inter na Dios ed sikato, pian ipanengneng ed saray aripen to no anto ray magano lan nagawa.” (Apo. 1:1) Kanian duga met labat ya imanoen tayo ray nagagawa ed mundo tan no antoy koneksion na saratan ed pakakasumpal na saray propesiya ed Biblia. Tan natural met labat ya labalabay tayon panistoryaan iratan no kaiba tayo ray agagi.

5. No paniistoryaan tayo ray propesiya ed Biblia, antoy dapat tan agtayo dapat gagawaen? (Nengnengen met so litrato.)

⁵ No paniistoryaan tayo ray propesiya ed Biblia, agtayo dapat manggagawa na sarili tayon espikulasyon o interpretasyon. Akin ey? On ta no nandurumay opinyon na agagi, main-inomay ya naderal so pankakasakey na kongregasyon. Singa bilang, ompan nabalitaan tayo ya pantotongtongan na saray lider ed nanduruman bansa no panon dan patundaen iray guerra pian niwalay kareenan tan kaligenan. Imbes ya isipen tayon tampol ya kasumpalan la itan na samay propesiya ed 1 Tesalonica 5:3, mas maabig no amtaen tayo no antoy updated ya impormasyon ya im-publish na organisasyon nen Jehova tungkol ed satan. Ditan tayo ibase iray ibabaga tayo no paniistoryaan tayo iray propesiya ed Biblia pian “mankakasakey [tayo] ed panagnonot.”—1 Cor. 1:10; 4:6.

6. Antoy naaralan tayo ed 2 Pedro 3:11-13?

⁶ Basaen so 2 Pedro 3:11-13. Makatulong iyan bilin nen apostol Pedro pian mansiansia tayon balanse no iisipen tayoy pakakasumpal na saray propesiya ed Biblia. Imbaga to ya importantin “sankanonot [tayon] lanang so isabi na agew nen Jehova.” Akin ey? Aliwan lapud labay tayon naamtaan so “agew tan oras” ya pakagawa na Armagedon. (Mat. 24:36; Luc. 12:40) Imbes, labay tayon samboten so nakekeran panaon pian “manbilay a masanto.” Diad arum ya salita, labay tayon malinis tan matunong so kabibilay tayo. Labay tayo met ya seguroen ya saray gagawaen tayo et “pakapatnagan na debosyon ed Dios”—manlilingkor tayod si Jehova lapud inar-aro tayo. Pian nagawaan tayo itan, importante ya manalwar tayo ed saray gagawaen tayo.

AKIN ET IMPORTANTIN MANALWAR TAYO?

7. Panon tayon nipanengneng ya manaalwar tayo? (Lucas 21:34)

⁷ Imbaga nen Jesus ed saray disipulo to ya kaukolan dan imanoen iray nagagawa ed mundo. Balet kaukolan da met ya imanoen so sarili da. Atan imay imbaga to ed Lucas 21:34. (Basaen.) Oniay warning tod saray disipulo to: “Manalwar kayo.” Uunoren na sakey ya Kristiano itan ya warning no sikatoy lanang ya alerto ed saray manderal na relasyon to ed si Jehova, tan iiwasan ton tampol iratan. Gagawaen to itan ta labay toy mansiansia ed panangaro na Dios.—Pro. 22:3; Jud. 20, 21.

8. Antoy bilin nen apostol Pablo ed saray Kristiano?

⁸ Aliwa labat ya si Jesus so angibaga ya kaukolan tayoy manalwar. Onia met so bilin nen apostol Pablo nen sinulatan to ray Kristiano ed Efeso: “Manalwar kayon maong a say kagagawa yo et aliwan singa saray agmarunong noagta singa saray marunong a totoo.” (Efe. 5:15, 16) Mamapasyay Satanas pian deralen so espiritualidad tayo. Kanian bibilinen itayo na Biblia ya “itultuloy [tayon] tebeken no antoy linawa nen Jehova” pian naprotektaan tayoy espiritualidad tayo.—Efe. 5:17.

9. Antoy gawaen tayo pian natalosan tayo no antoy linawa o panlabayan nen Jehova?

⁹ Ag-akalista ed Biblia so amin ya posiblin maneral na pikakaaro tayo ed si Jehova. Wala ray kaukolan tayon desisyonan diad inagew-agew ya anggapoy direktan ibabaga na Biblia. Pian duga iray desisyon tayo, kaukolan tayon tebeken o talosan no antoy “linawa nen Jehova.” Nagawaan tayo itan no regular tayon aralen so Salita na Dios tan dalepdepen tayo iray nababasa tayo. No natatalosan tayo no antoy panlabayan nen Jehova tan “walad sikatayoy kanonotan nen Kristo,” baleg so posibilidad ya duga iray desisyon tayo anggano anggapoy espisipikon ganggan ed Biblia tungkol ed situasyon tayo. (1 Cor. 2:14-16) Mainomay tayoy manalwar no sankanengneng tayoy peligro. Pero wala ray pakana nen Satanas ya akaamot tan agnaliklikas.

10. Anto ran peligro so panalwaran tayo?

¹⁰ Pian agnaderal so espiritualidad tayo, iwasan tayoy mi-flirt, alabas ya panag-inum tan panangan, tan ansakit ya panagsalita. Agtayo manbabantay na pornograpiya, saray palabas ya puros laban tan pateyan, tan arum nin andi-kakanaan ya bengatla. (Sal. 101:3) Tandaan tayo ya siber-siber so Diablo tan mantatalaran no kapigan to tayo napatitan ya manggaway mauges. (1 Ped. 5:8) No agtayo manalwar, ompan agtayo naliklikas ya ontutubo la manaya ed isip tan puso tayo so inggit, ag-inkamatua, agum, pambusol, inkalastog, tan sakit na linawa. (Gal. 5:19-21) Diad unaan, ompan isipen tayo ya agmet iratan panlapuan na problema. Balet no agtayo iratan bagoten ya tampol, singa iratan makasamal ya tanaman ya no linmamot lan maong et sengegan na ipatey tayo ed espiritual.—Sant. 1:14, 15.

11. Anton peligro so agmon tampol nalikas, tan akin et kaukolan mon iwasan itan?

¹¹ Say piulop ed saramay mauges so impluensya ra et sakey ya peligro ya agmon tampol nalikas. Isipen iyan situasyon: Walay katrabahom ya aliwan Tasi. Mabaibait kad sikato ta labay mo ya maong so impresyon to ed saray Tasi nen Jehova. Kanian no maminsan et mibabansag kad sikato ya mangugto, ya anggad sikato lan lanang so kaibam. No maminsan, bastos iray iistoryaen to. Diad unaan, agmo papansinen, pero lapud lanang mon kaiba, napapasal ka la tan agka la nababastosan. Aminsan kayari trabaho, intagar to kan oninum tan pinagbigyan mo. Agmo aliklikas ya naalig mo la manayay panagnonot to. Kanian no agka ni onkiwas, agta baleg so posibilidad ya gawaen mo met la iray mauges ya gagawaen to? Tua ya mabait tayo ed amin ya totoo, pero tandaan tayo ya maksil so impluensya na saramay lanang tayon nakakaiba. (1 Cor. 15:33) Kanian no agmet kaukolan, agtayo miuulop ed saramay agda uunoren so estandarte nen Jehova. (2 Cor. 6:15) No nanengneng mo ya walay peligro, iwas kan tampol!

USAR MOD SANKAABIGAN SO PANAON MO

12. Antoy ginawa na saray disipulo nen Jesus nensaman legan dan aalagaren so pakaderal na Jerusalem tan say templo?

¹² Walay kimey ya inter nen Jesus ed saray disipulo to legan dan aalagaren so pakaderal na Jerusalem tan say templo. Ingganggan to ra ya ipulong da so maong a balita “diad Jerusalem, diad interon Judea tan Samaria, tan diad sankaarawian a pasen na dalin.” (Gawa 1:6-8) Baleg itan ya kimey! Anggapoy sinayang dan panaon, talagan makulikuli ran nampulong!

13. Akin ya importantin usaren tayod sankaabigan so panaon tayo? (Colosas 4:5)

¹³ Basaen so Colosas 4:5. Kaukolan tayon seguroen ya uusaren tayod sankaabigan so panaon tayo. Akin ey? On ta ag-itayo exempted ed “saray ag-iilaloan a nagawa.” (Ecl. 9:11) Agtayo nibaga no mabilay tayo ni nabuas.

14-15. Antoy sankaabigan ya pangusaran tayoy panaon tayo? (Hebreo 6:11, 12) (Nengnengen met so litrato.)

¹⁴ Nausar tayod sankaabigan so panaon tayo no gawaen tayoy linawa nen Jehova tan pabiskegen tayoy relasyon tayod sikato. (Juan 14:21) Kaukolan ya “magmaliw [tayon] mapekder, agnagiing, a naynay a dakel so gagawaen [tayo] ed kimey na Katawan.” (1 Cor. 15:58) No atan so panguusaran tayoy panaon tayo—anggano manampot bilang so bilay tayo nabuas odino Armagedon la—anggapoy pagbabawian tayo ta amta tayo ya ginawa tayon amin parad si Jehova.—Mat. 24:13; Roma 14:8.

¹⁵ Anggad natan, tuloytuloy ya idadaulo nen Jesus so pampupulong na saray disipulo to diad interon mundo. Totooren to imay sipan to ya ibaan to iray disipulo to ed sayan kimey. (Mat. 28:18-20) Panamegley na organisasyon nen Jehova, ipapasal itayo nen Jesus no panon so manpulong tan itatarya toy amin ya nakaukolan tayo pian nipulong tayo so maong a balita. Gawaen tayo met sirin so betang tayo. Mankuli tayo ed panagpulong tan panag-Bible study, tan mantultuloy tayon manbantay legan tayon aalagaren so isabi na Armagedon. Iyaplika tayo imay bilin ya walad Hebreo 6:11, 12 pian segurado so ilalo tayo.—Basaen.

16. Antoy determinasyon mo?

¹⁶ Wala lay eksakton agew tan oras ya inyeskedyul nen Jehova na panderal to ed mundo nen Satanas. Diad satan ya agew, seguradon sumpalen nen Jehova iray propesiyan impaisulat tod Biblia. Pero no maminsan, ompan iisipen tayo ya mabayag ni itan. Tandaan tayo balet ya amin ya imbaga nen Jehova et seguradon ontua. Onsabi so agew nen Jehova diad mismon petsa ya inyeskedyul to. (Hab. 2:3) Determinado tayo komon sirin ya “mantalaran” tan “maan-anos [ya] manalagar ed Dios a manangiliktar” tayo.—Miq. 7:7.