Pabiskeg Moy Pananisiam ed Insipan nen Jehova ya Balon Mundo

1-2. Antoy kailangan tayon gawaen legan tayon aalagaren so balon mundo?

LABALABAY tayo lan nagawa imay im-promise nen Jehova ya deralen to iyan sistema nen Satanas tan salatan to na balon mundo. Maong labat ta walay ontan ya iilaloan tayo! (2 Ped. 3:13) Anggano agtayo amta no kapigan itan eksakton nagawa, nanenengneng tayo la ray ebidensya ya talagan asingsingger la itan.—Mat. 24:32-34, 36; Gawa 1:7.

² Pero legan tayon manaalagar, importante ya tuloytuloy tayon pabiskegen so pananisia tayo. Akin ey? On ta anggano abaybayag tayo lad katuaan tan mabisbiskeg so pananisia tayo natan, walay posibilidad ya onkapuy itan. Diad tua, imbaga nen apostol Pablo ya say ikapuy na pananisia et “kasalanan a mainomay a makaamper ed sikatayo.” (Heb. 12:1) Pian ag-onkapuy so pananisia tayo, dalepdepen tayon lanang iray ebidensya ya asingsingger lay balon mundo.—Heb. 11:1.

3. Antoy pantongtongan tayo ed sayan artikulo?

³ Pantongtongan tayo ed sayan artikulo so talora ya nepeg tayon gawaen pian ombiskeg so pananisia tayo ed im-promise nen Jehova ya balon mundo: (1) dalepdepen tayo so dondon, (2) isipen tayoy pakapanyari nen Jehova, tan (3) mansiansia tayon aktibo ed espiritual. Insan tayo pantongtongan imay mensahe nen Jehova ed si propetan Habacuc ya manpabiskeg ed pananisia tayo natan. Pero antis tayon pantongtongan iratan ya amin, amtaen tayo nin unona iray nanduruman situasyon ya kailangan tayoy mabiskeg ya pananisia.

SARAY SITUASYON YA KAILANGAN TAYOY MABISKEG YA PANANISIA

4. Anto ray gagawaen tayon desisyon kada agew, tan akin et kailangan so mabiskeg ya pananisia no mandedesisyon tayo?

⁴ Kada agew, wala ray gagawaen tayon desisyon ya kailangan so mabiskeg ya pananisia. Singa bilang, kaukolan tayoy mandesisyon no siopa ray pilien tayon kakaaro, no anto ray pilien tayon libangan, ontan met ed edukasyon, trabaho, pangasawa o piasawa, tan no kasin manpamilya tayo o andi. Tepetan moy sarilim: ‘Kasin nanengneng ed saray desisyon ko ya manisia ak ya naderal lanlamang iyan sistema tan asingger lay balon mundo? Odino anggapoy pidumaan kod arum ya totoo ya sarili da labat so iisipen da tan iyuupot day biskeg da ed sayan sistema?’ (Mat. 6:19, 20; Luc. 12:16-21) Makapandesisyon tayoy duga no kombinsido tayo ya asingsingger lay balon mundo.

5-6. Akin et kailangan tayoy mabiskeg ya pananisia no ondadalan tayod subok? Mangiter na ilustrasyon.

⁵ Kailangan tayoy mabiskeg ya pananisia no ondadalan tayo ed subok. Ompan onkapuy so liknaan tayo no walay graben sakit tayo, no walay onkontra ed panagdayew tayo, o no walay makapa-stress ya situasyon ya aarapen tayo. No kagagapo ni labat na subok, ompan desidido tayon ag-onsuko. Pero no diman mas ombabayag so subok, diman tayo mas kaukolan so mabiskeg ya pananisia pian makapan-anos tayo tan agnabalang so liket tayo ed panaglingkor.—Roma 12:12; 1 Ped. 1:6, 7.

⁶ Kasin abayag mo lan aanosan so sakey ya subok kanian say pakaliknam et mabaybayag ni so balon mundo? Labay to kasin ibaga, makapuy so pananisiam? Andi met. Singa onia ’tan ay: No abaybayag lay panaon na tiagew o summer tan mansasnit so petang, ompan say pakalikna tayo et mabayag nin onsabi so panaon na mamauran. Pero amta tayo ya onsabi met lanlamang. Ontan met no ondadalan tayod subok. Ompan nadismaya tayon maong kanian say pakalikna tayo et mabayag ni so balon mundo. Pero no mabiskeg so pananisia tayo, segurado tayo ya onsabin-onsabi itan lapud si Jehova so angisipan. (Sal. 94:3, 14, 15; Heb. 6:17-19) No kombinsido tayo ed satan, iyuna tayo nin siansia so panagdayew tayod si Jehova anggano wala ray subok.

7. Antoy opinyon na dakel ya totoo, tan akin et manalwar tayod satan?

⁷ Kailangan tayo met so mabiskeg ya pananisia no manpupulong tayo. Ibabaga na dakel ya totoo ya imposiblin nagawa so ipupulong tayon “maong a balita” tungkol ed balon mundo. (Mat. 24:14; Eze. 33:32) No agtayo manalwar, ompan naapektoan tayo na ontan iran opinyon. Tuloytuloy tayo sirin ya pabiskegen so pananisia tayo. Pantongtongan tayoy talora ya nepeg tayon gawaen.

DALEPDEPEN SO DONDON

8-9. Akin et ombiskeg so pananisia tayo no dalepdepen tayo so dondon?

⁸ Say sakey ya paraan pian ombiskeg so pananisia tayo et no dalepdepen tayo so dondon. Say dondon so garantiya ya talagan ontua so amin ya insipan na Dios. No isipen tayon maong no akin ya inter nen Jehova so dondon tan no anto ray insakripisyo to, lalon ombiskeg so pananisia tayo ya talagan walay bilay ya andi-anggaan diad balon mundo. Akin et ombiskeg so pananisia tayo no dalepdepen tayoy dondon?

⁹ No isipen tayon maong, balbaleg pay insakripisyo nen Jehova pian nitarya to so dondon. Imbaki to so panguloan tan inar-aro ton Anak diad dalin. Abaybayag iran saniba diad tawen tan atan so first time ya makapan-arawian ira. Nen wadiad dalin si Jesus, inanosan toy amin ya klase na irap. Insan, ansaki-sakit tan makapabaing so impatey to. Anengneng tan intepel iratan ya amin nen Jehova pian nadondon itayo! Bilay na Anak to so kasalat! Isip mo pa: Kasin sulit so amin ya sakripisyo tan impantepel nen Jehova no antiktikey lanlamang so bilay tayo diad balon mundo? (Juan 3:16; 1 Ped. 1:18, 19) Mabmabli so imbayar nen Jehova kanian seguradoen to ya manbilay tayo na andi-anggaan diad balon mundo.

ISIPEN SO PAKAYARI NEN JEHOVA

10. Base ed Efeso 3:20, antoy sarasarag ya gawaen nen Jehova?

¹⁰ Say sakey nin paraan pian ombiskeg so pananisia tayo et no isipen tayoy pakapanyari nen Jehova. Walay pakayari ton gawaen so amin ya imbaga to. Diad pakanengneng na too, singa imposible so bilay ya andi-anggaan tan say balon mundo. Pero no isipen tayo, amin lawarin sipan nen Jehova et amay agbalot sarag ya gawaen na too. Tandaan tayo ya sikato so Makapanyarin-amin a Dios. (Job 42:2; Mar. 10:27) Kanian agtayo la nabibigla no saray promise to et makapabilib tan singa imposiblin nagawa.—Basaen so Efeso 3:20.

11. Mangiter na sakey ya ekstraordinaryon sipan nen Jehova. (Nengnengen so kahon ya “Saray Insipan nen Jehova ya Singa Imposiblin Nagawa.”)

¹¹ Rebyuen tayo pa iray pigaran insipan nen Jehova ed saray lingkor to nensaman ya singa imposiblin nagawa. Nen 100 lay taon nen Abraham tan 90 la nen Sara, imbaga nen Jehova ya nawalaan iray anak ya laki. (Gen. 17:15-17) Im-promise to met ed si Abraham ya iter toy dalin na Canaan ed saray apo to tan magmaliw ya kayarian da itan. Nen abaybayag lan naaripen ed Ehipto iray Israelita ya apo nen Abraham, singa imposible ya nakayarian da so Canaan. Pero agawa itan! Kalabas na dakel ya taon, imbaga nen Jehova ya manlukon si Elizabet anta akulaw la. Imbaga met nen Jehova ed sakey ya birhen, si Maria, ya ilukon toy Anak na Dios. Atan imay ilalak ya insipan nen Jehova diad hardin na Eden. Nilibon taon lay linmabas pero sinegurado ton nagawa itan!—Gen. 3:15.

12. Antoy ipapaseguro na Josue 23:14 tan Isaias 55:10, 11 tungkol ed pakapanyari nen Jehova?

¹² No isipen tayon maong no panon ya tinoor nen Jehova iray sipan to, diman tayo mas natalosan ya anggapoy limitasyon na pakapanyari to. Atan so manpabiskeg na pananisia tayo ya ontua so balon mundo. (Basaen so Josue 23:14; Isaias 55:10, 11.) No mabiskeg so pananisia tayo, mas nakombinse tayo so arum pian panisiaan da met so balon mundo. Oniay imbagan mismo nen Jehova nen im-promise to ya walay balon tawen tan balon dalin: “Sarayan salita et napanmatalkan tan tua.”—Apo. 21:1, 5.

MANSIANSIAN AKTIBO ED ESPIRITUAL

13. Akin et ombiskeg so pananisia tayo no miaral tayo?

¹³ Say sakey nin paraan pian ombiskeg so pananisia tayo et no mansiansia tayon aktibo ed espiritual. Singa bilang, lanang tayon miaral. Oniay imbaga nen Sister Annab ya deka-dekada lan walad full-time: “Singa walay kulang no agak miaral. Atan so mamapabiskeg na pananisiak. Anggano aliwan maong ya manpaliwawa so espiker odino aminpigak lan arengel so tema, ondedengel ak ya maong ta amtak ya walan-walay ibaga to ya makatulong pian mas natalosan koy katuaan ed Biblia kanian ombibiskeg so pananisiak.” Aliwan saray paliwawa labat so manpabiskeg na pananisia tayo. Napaseseg itayo met no dengelen tayon maong iray komento na agagi.—Roma 1:11, 12; 10:17.

14. Akin et ombiskeg so pananisia tayo no lanang tayon manpulong?

¹⁴ Ombiskeg met so pananisia tayo no lanang tayon manpulong. (Heb. 10:23) Oniay imbaga nen Sister Barbara ya masulok lan 70 ya taon ya manlilingkor ed si Jehova: “Say panagpulong so manpapabiskeg na pananisiak. No diman ko mas ibabaga ed arum iray balibalin sipan nen Jehova, diman met mas ombibiskeg so pananisiak.”

15. Akin et ombiskeg so pananisia tayo no man-personal study tayo? (Nengnengen met iray litrato.)

¹⁵ Importante met ya walay eskedyul tayon man-personal study pian ombiskeg so pananisia tayo. Makaaral tayo ed si Sister Susan, walan talagay eskedyul ya tutumboken to. Kuan to: “No Simba, aaralen ko lay artikulo na Panag-bantayan ya pantongtongan next week. No Lunes tan Martes, ipaparaan ko lay aralen ed midweek. Tan diad arum ya agew, manpopokus ak ed study project ko.” Atan so sekreto nen Sister Susan pian ag-onkapuy so pananisia to. Makaaral tayo met ed si Sister Irene ya deka-dekada ya nanlingkor ed world headquarters. Ipi-personal study to iray propesiya ed Biblia. Kuan to: “Pankelkelawan ko iray propesiya ed Biblia ta anggan saray sankamelagan ya detalye et tinoor nen Jehova.”c

“SEGURADON ONTUA ITAN”

16. Akin et balibalin dalepdepen tayo imay imbaga nen Jehova ed si Habacuc? (Hebreo 10:36, 37)

¹⁶ Wala ray lingkor nen Jehova ya abaybayag da lan aalagaren so isabi na anggaan. Ompan naiisip mo met no maminsan ya singa mabaybayag ni so Armagedon. Natatalosan nen Jehova no ontan so nalilikna tayo. Alikna met itan nen propetan Habacuc, kanian oniay impaseguro nen Jehova ed sikato: “Say pasingawey et parad aturon panaon, tan maples a mamaarap ed anggaan to, tan agmantila. Anggano naatrasado itan, itultuloy mon ilaloan! Ta seguradon ontua itan. Ag-itan manbayag!” (Hab. 2:3) Kasin atan ya panamaseguro et para labat ed si Habacuc? Andi, parad sikatayo met itan. Diad tua, diad sakey ya sulat nen apostol Pablo, inusar to ray salita ya imbaga nen Jehova ed si Habacuc. Impaisulat itan nen Jehova ed si Pablo ta amta ton makatulong itan ya panamaseguro ed amin ya Kristiano ya manaalagar ed balon mundo. (Basaen so Hebreo 10:36, 37.) On, anggano say pakalikna tayo et singa nanaatrasado so isabi na anggaan, “seguradon ontua itan. Ag-itan manbayag!”

17. Panon ya inyaplika na sakey ya sister imay bilin nen Jehova ed si Habacuc?

¹⁷ Dakel ya agagi so mangiyaaplika ed samay bilin nen Jehova ed si Habacuc. ‘Tuloytuloy iran maniilalo’ anggano deka-dekada lay linmabas. Sakey lay Sister Louise ya abautismoan nen 1939. Kuan to: “Say amtak, onsabi lay Armagedon antis ak ya man-graduate ed high school. Andi ni manaya. Pero agak tinmundan nanalagar. Binasak iray salaysay ed Biblia nipaakar ed saray lingkor nen Jehova ya abayag met ya nanalagar, singa si Noe, Abraham, Jose, tan arum ni ra. Talagan inalagar da so insipan nen Jehova ya bendisyon tod sikara. Tatalaranan ko met so balon mundo. Atan so akatulong ed siak . . . pian mabilabilay ed isip [ko] ya asingsingger la itan.” Seguradon ontan met so nalilikna na arum ya agagi ya abaybayag lan manlilingkor ed si Jehova.

18. No obserbaan tayo ray pinalsa, akin et ombiskeg so pananisia tayo ya talagan walay balon mundo?

¹⁸ Tua, agtayo ni nanenengneng natan so balon mundo ta anggapo ni. Pero isip mo pa ray nanenengneng mod kaliberliber—saray bitewen, kakiewan, ayayep, tan totoo. Antam ya tua ira, ta nanenengneng mo ra. Pero di ba, anggapo iratan dati? Wala la iratan natan ta pinalsa ira nen Jehova. (Gen. 1:1, 26, 27) Ontan met ed balon mundo. Anggapo ni itan natan, pero im-promise nen Jehova ya gawaen to itan. Tan no antoy im-promise to, tooren to. Diad balon mundo, agti la mansakit tan maksil lay laman tayo. On, diad panaon ya inyeskedyul nen Jehova, nanengneng mo lanlamang so balon mundo!—Isa. 65:17; Apo. 21:3, 4.

19. Antoy gawaen mo pian ombiskeg so pananisiam?

¹⁹ Legan mon aalagaren so balon mundo, gawam so anggaay nayarian mon pabiskegen so pananisiam. Dalepdep moy dondon. Isip mon maong so pakapanyari nen Jehova. Tan mansiansia kan aktibo ed espiritual. No nagawa la so amin ya im-promise nen Jehova, seguradon wadman ka no mananos kan manalagar tan no natan ni labat et ipanengneng mo lay mabiskeg ya pananisia!—Roma 5:5; Heb. 6:11, 12.