No Panon Kan Makapan-adjust ed Balon Kongregasyon Mo

Duma balet so subok ed si Nicolas tan Céline. Kaukolan day onalis na kongregasyon ta atan so inyasain ed sikara na branch office ed France. Oniay imbaga da: “Nen unaan, eksayted kami. Pero nen ombabayag la, nanailiw mi la ray kakaaro mi. Mair-irap man ya liknaan ta anggapo ni so masyadon ka-close mi ed balon kongregasyon mi.”a No bilang ta nanairapan kad balon kongregasyon mo, antoy gawaen mo pian mansiansia kan maliket ed panaglingkor mo? Antoy nagawaan na arum pian natulongan da ka? Antoy gawaen mo pian napaseseg mo ray agagi? Tan panon ya makatulong so iyalis mo ed iyaligwas mod espiritual?

APATIRAN PRINSIPYO YA MAKATULONG ED SIKA

1. Manmatalek kad si Jehova. (Sal. 37:5) Si Sister Kazumi ya tagad Japan et 20 taon la ed kongregasyon to, pero kaukolan toy onalis na kongregasyon lapud trabaho na asawa to. Panon ton ‘impiya so dalan to ed si Jehova’? Kuan to: “Pikasi ak lan pikasi no natatakot, maer-ermen, tan aburido ak. Ibabagak ya amin ed si Jehova so naliliknak. Kayarik ya manpikasi, naliliknak ya papabiskegen to ak.”

Antoy gawaen mo pian ombiskeg so talek mod si Jehova? Say pananisia tayo ed si Jehova et singano tanaman. Pian ombaleg so tanaman, kaukolan itan ya salogen tan abonoan. Ontan met so gawaen tayod pananisia tayo. Si Brother Nicolas ya abitla nen niman et dadalepdepen to kuno so alimbawa na saramay nansakripisyo pian nagawaan day panlabayan nen Jehova, singa si Abraham, Jesus, tan Pablo. Nen im-personal study to so alimbawa da, binmiskeg kunoy tiwala to ya agpaulyanan nen Jehova. On, baleg so nitulong na pam-personal study pian nasarag mo iray pananguman ed bilay mo, tan nausar mo ray punto ya nanaaralan mo pian napaseseg mo iray agagi ed balon kongregasyon mo.

2. Iwasan moy mangikompara. (Ecl. 7:10) Si Brother Jules et taga Benin, balet inmalis diad United States. Nan-adjust kunon maong ed kultura, kuan to: “Say pakaliknak et kailangan kon ibaga so amin ya detalye ed bilay ko ed kada agin nakatongtong ko. Sinmabid punto ya nasisikig ak la.” Lapud aliwan onman so apasalan nen Jules, pinaliisan to ray agagi pian agda la natepet-tepetan. Pero nen mas akabat to la ray agagi, anguman so pakanengneng tod sikara. Kuan to: “Atalosan ko ya anggano nandurumay nanlapuan tayo, parepareho tayon totoo. Pero awaten tayo ya talagan nandumaan so panagsalita tan kakikiwas tayo.” Agmo sirin ikokomparay balon kongregasyon mo ed samay datin kongregasyon mo. Oniay imbaga na sakey ya payunir, si Sister Anne-Lise: “Lanang kon iisipen ya inmalis ak pian walay balon naaralan ko, aliwan pian anapen may datin apasalan ko.”

No sakey kan elder, nagkalalo lan importante ya iwasan moy mangikompara. No naimanom ya dumay paraan na saramay mangidadaulo diad balon kongregasyon mo, agto labay ya ibagan aliway gagawaen da. Antis kan mangiter na suhestion, amtaen mo ni no anton talagay kipapasen ed satan ya lugar. (Ecl. 3:​1, 7b) Mas marakep no makaaral iray agagi ed maong ya alimbawam nen say ipilit moy opinyon mo ed sikara.—2 Cor. 1:24.

3. Mansiansia kan aktibo. (Fil. 1:27) Nayarin makapabanal so iyalis na balon kongregasyon, pero gawam so nayarian mon miaral ya tampol diad mismon Kingdom Hall. Siempre, no matalag kan nanengneng na balon kakongregasyon mo, panon da kan natulongan? Si Lucinda et inmalis ed baleg ya syudad ed South Africa kaibay duaran ananak to. Oniay imbaga to: “Binilin ak na saray kakaarok ya mikaaro ak ya tampol ed saray agagi, miulop ak ed sikara diad ministeryo, tan mankomento ak ya lanang ed aral. Imbaga mi met ed saray brother ya sarag dan usaren so abung mi parad meeting for field service.”

Napabiskeg moy pananisiam tan saray agagi no lanang mo ran kaiba ed saray kimey ed kongregasyon. Si Anne-Lise ya abitla nen niman et pinaseseg na saray elder ya miulop ed nanduruman agagi diad panagpulong. Kuan to: “Nen ginawak iman, aliknak ya tampol ya parte ak na kongregasyon.” Marakep met no suportaan moy panaglinis tan panagmintina na Kingdom Hall pian nalikna na agagi ya aya la so ituturing mon kongregasyon mo. No aktibo ka ed saray kimey na kongregasyon, onapit so liknaan na agagi ed sika tan naliknam ya parte ka la na pamilya da.

4. Mikaaro ka. (2 Cor. 6:​11-13) Mas mainomay so mikaaro no nalikna na agagi ya imamalasakit mo ra. Kanian marakep no masakbay ka lan onsabi ed Kingdom Hall antis na aral pian nakaistoryaan mo ray agagi, tan agkan tampol onsesempet kayari na aral. Tandaan moy kangaranan na agagi. No tandaan moy kangaranan da tan iyapit moy liknaan mo ed sikara, seguradon labalabay da kan nakabat tan nakaaro.

Paulyan mon nakabat na saray agagi so tuan inkatoom, imbes ya manpanggap ka pian naawat da ka. Oniay imbaga nen Lucinda ya abitla nen niman: “Nen inimbitaan mi ray agagi diad abung mi, mas akabkabat da kami tan akabkabat mi met ira kanian nagmaliw kamin malet ya sankakaaro.”

“AWAT YO SO SAKEY TAN SAKEY”

Diad tua, mairap pay miaral diad Kingdom Hall ya anggapoy masyadon kabat mo. Kanian antoy nitulong mo no wala ray balo ed kongregasyon yo? Oniay impaseseg nen apostol Pablo: “Awat yo so sakey tan sakey, a singa ed impangawat na Kristo ed sikayo.” (Roma 15:7) Baleg so nagawaan na saray elder pian nalikna na saray kakkaalis da ed kongregasyon ya welcome ira. (Nengnengen so kahon ya “Antoy Makatulong ed Iyalis Mo?”) Pero siempre, makatulong so amin diad kongregasyon, anggan saray ugugaw, pian nalikna dan welcome ira.

Say sakey ya makatulong pian nakaaro tayo ray kakkaalis dad kongregasyon tayo et no imbitaan tayo ra ed abung tayo. Mannonot tayo met na arum nin praktikal ya paraan pian natulongan tayo ra. Singa bilang, nen kakkaalis na sakey ya sister ed sakey ya syudad, walay sister ya tinmulong ed sikato pian nakabisado to may lugar tan imbangat to no panon so kalulugan ed bus tan tren. A-touch ya maong imay sister ed malasakit to yan agi tan akatulong itan pian makapan-adjust kunon tampol.

MANPATATKEN KA LEGAN KAN MAN-AADJUST

Makaaral tayo ed saray siwit. No sibong ni ra, ompan antakot dan salien so ontikyab tan agda labay ya taynan so ubong da. Pero no nasali da lay ontikyab, dirediretso la. Nayarin ontan met so situasyon mo no kakkaalis moy kongregasyon. Ompan diad gapo et manaalangan ka nin mikaaro ed saray agagi tan nababaingan ka. Pero no labanan moy liknaan mo tan mikaaro kad sikara, seguradon na-enjoy moy panaglingkor mo ed si Jehova. Oniay imbaga nen Nicolas tan Céline: “Alikna mi ya singa kami impasal nen Jehova ed sayay inyalis mi. Lapud inaral mi no panoy mibagay ed nanduruman totoo tan ed balon lugar, naaralan mi met no panon ya ipanengneng iray balibalin ugali. Onia met so imbaga nen Jean-Charles ya abitla ed gapo: “Kinmalakal tan tinmatken ed espiritual iray ananak mi diad balon kongregasyon mi. Kayari labat na pigaran bulan, wala lay parte na anakon bii diad midweek ya aral tan amay anakon laki, nagmaliw ya unbaptized publisher.”

Panon to no labay moy onalis ed lugar ya daiset so Tasi pero ag-iyabuloy na situasyon mo? Diad tua, anggano agka onalis na kongregasyon, naliknam ya singa ka walad balon kongregasyon no iyaplikam iray suhestion ed sayan artikulo. Pabiskeg moy tiwalam ed si Jehova, lanang kan mibiang ed saray kimey na kongregasyon, miulop kad saray nanduruman agagi diad ministeryo, mikaaro ka ed saramay agmo ni masyadon ka-close, tan lalom nin pabiskegen so panangarom ed saray kakaarom. No walay balo ed kongregasyon yo odino walay agin mankaukolan, manisip kay paraan no panon mo ran natulongan. No diman mo lalon ipapanengneng so panangaro, diman ka met lalon ontatken ed espiritual. (Juan 13:35) Tandaan mo ya “naliliketan a maong so Dios ed saratan a bagat.”—Heb. 13:16.

Apatunayan la na dakel ya agagi ya anggano mairap so onalis na kongregasyon, makapaliket itan. Kanian enjoy moy balon kongregasyon mo. “Nen inmalis ak na kongregasyon, mas nilukas kon maong so pusok,” so kuan nen Anne-Lise. Onia met so imbaga nen Kazumi: “No onalis kay kongregasyon, naliknam so tulong nen Jehova diad paraan ya agmo nin balot asali.” Si Jules balet ey? Kuan to: “Dakdakel la natan iray kakaarok diad kongregasyon mi, kanian agak la nasisikig. Naar-arok la ray agagi kanian seguradon nairapan ak no kailangan ko lamet so onalis.”