Tepet na Saray Manbabasa

Siopa may “bii” ya abitlad Isaias 60:​1, tan panon ya sikatoy ‘onalagey’ tan ‘mangisindag na liwawa’?

Oniay nabasa ed Isaias 60:1: “Alagey ka, O bii, isindag moy liwawa, ta pinmatnag so liwawam. Nisindag ed sika so gloria nen Jehova.” Base ed ontutumbok ya bersikulo, amay bii et ontutukoy ed Sion o Jerusalem, say kabisera o capital city na Juda diad saman ya panaon. (Isa. 60:14; 62:​1, 2) Irerepresenta na sayan syudad so bansan Israel. Walay duaran tepet ya kaukolan tayon ebatan: Unona, kapigan tan panon ya ‘inmalagey’ so Jerusalem tan angisindag na espiritual ya liwawa? Komadua, kasin ayan propesiya nen Isaias et wala ni mas baleg ya kasumpalan to?

Kapigan tan panon ya ‘inmalagey’ so Jerusalem tan angisindag na espiritual ya liwawa? Nen abihag iray Judio ed Babilonia diad loob na 70 ya taon, apaulyanan so Jerusalem tan say templo ditan. Pero nen atalo na saray Medo tan Persiano so Babilonia, sarag la na saray Israelita so ompawil ed dalin da. Kanian sarag da met lan ipawil so dugan panagdayew. (Esd. 1:​1-4) Nen 537 B.C.E, ontan so ginawa na samay unonan grupo na saray matoor ya Israelita ya nanlapud 12 ya tribu. (Isa. 60:4) Angiyapay lamet ira na saray bagat ed si Jehova, sinelebraan da iray piesta, tan impaalagey da lamet so templo. (Esd. 3:​1-4, 7-11; 6:​16-22) Kanian sinminag lamet so gloria nen Jehova diad Jerusalem. On, sinminag lamet itan diad saray totoo to. Tan insindag da met itan ya liwawa ed saray nasyon ya walad espiritual ya kabilungetan.

Pero ag-asumpal diad literal ya Jerusalem so amin ya propesiya nen Isaias. Sinmabi panaon ya aga lanlamang nanmatoor iray Israelita ed si Jehova. (Neh. 13:27; Mal. 1:​6-8; 2:​13, 14; Mat. 15:​7-9) Tan agda ingen inawat si Jesu-Kristo, say imbaki nen Jehova ya Mesias. (Mat. 27:​1, 2) Nen 70 C.E, aderal lamet so Jerusalem tan say templo ditan.

Diad tua, atan ya agawa et impasakbay la nen Jehova. (Dan. 9:​24-27) Mapatpatnag sirin ya aliwan say literal ya Jerusalem so usaren to pian nasumpal so amin ya propesiya ya nabasad Isaias kapitulo 60.

Kasin ayan propesiya nen Isaias et wala ni mas baleg ya kasumpalan to? On, wala. Pero say mansumpal ed satan et duma lan simbolikon bii—“say Jerusalem ed tagey.” Imbaga nen apostol Pablo ya ayan bii so “ina” na saray Kristiano ya parad tawen. (Gal. 4:26) Say Jerusalem ed tagey et ontutukoy ed walad tawen ya kabiangan na organisasyon nen Jehova ya bubuoen na amin ya matoor ya anghel. Si Jesus tan saray 144,000 ya alanaan ya Kristiano so simbolikon ananak to. Sarayan alanaan ya Kristiano et tinawag ya “masanton nasyon”—“say Israel na Dios.”—1 Ped. 2:9; Gal. 6:16.

Panon ya ‘inmalagey’ tan ‘angisindag na liwawa’ so Jerusalem ed tagey? Saray alanaan ya ananak to diad dalin so nansumpal ed sayan propesiya. Nengnengen tayo no panon ya tinmua ed sikara imay propesiya ya nabasa ed Isaias kapitulo 60.

Saray alanaan ya Kristiano et datin walad espiritual ya kabilungetan, manlapu la nen inatey iray apostol tan kinmayat so apostasya. (Mat. 13:​37-43) Diad satan ya panaon, nagmaliw iran aripen na Makapanyarin Babilonia—say empiryo na palson relihyon diad interon mundo. Nansiansia ran aripen anggad “kaunoran a parte na sistema na mundo” ya ginmapo nen 1914. (Mat. 13:​39, 40) Insan nen 1919, nibagan inmalagey iray alanaan ya Kristiano lapud nibulos la ra. Tan amasya ran tampol ed kimey ya panagpulong kanian nisindag da ed saray totoo so espiritual ya liwawa.a Diad inlabas na saray taon, inmasingger ed satan ya liwawa iray totoo ya nanlapud amin a nasyon, kaiba la iramay nakekeran kabiangan na Israel na Dios o saramay “arari” ya abitla ed Isaias 60:3.—Apo. 5:​9, 10.

Diad arapen, lalo nin isindag na saray alanaan ya Kristiano so liwawa ya nanlapud si Jehova. No awaten da lay premyo da diad tawen, magmaliw iran parte na “Balon Jerusalem”—say nobya nen Kristo ya bubuoen na 144,000 ya kakaiba ton arari tan saserdote.—Apo. 14:1; 21:​1, 2, 24; 22:​3-5.

On, baleg so betang na Balon Jerusalem ed kasumpalan na Isaias 60:1. (Ikompara so Isaias 60:​1, 3, 5, 11, 19, 20 ed Apocalipsis 21:​2, 9-11, 22-26.) No panon ya say gobierno na Israel nensaman et walad syudad na Jerusalem, say gobierno diad balon mundo et say Balon Jerusalem, tan si Jesu-Kristo. Akin et nibagan ‘onleksab so balon Jerusalem manlapud tawen’? On ta say kulaan na atension na Balon Jerusalem et saray totoo diad dalin. Saray totoo ya matakot ed Dios ya nanlapud amin a nasyon et “manakar diad panamegley na liwawa na satan.” Nibulos la ra ed kasalanan tan patey. (Apo. 21:​3, 4, 24) Nagawa lad satan imay ‘pangipawil ed amin a bengatla’ ya impropesiya nen Isaias tan arum nin propeta. (Gawa 3:21) Sayan panangipawil et ginmapo nen nagmaliw ya Ari si Kristo tan nasumpal itan kayari na Sanlibon Taon ya Uley to.