Panon ya Naalig na Kongregasyon si Jehova no Walay Akagawa na Seryoson Kasalanan?

1. Antoy labay nen Jehova parad amin ya totoo?

INIKDAN to tayo nen Jehova na kalayaan ya mandesisyon parad sarili tayo. Regalo to itan ed sikatayo. Inagew-agew tayon mandedesisyon. Nen indedikam so sarilim ed si Jehova tan nagmaliw kan parte na pamilya to, atan so sankaimportantian ya desisyon ya ginawam ed bilay mo. Diad tua, labay nen Jehova ya ontan so gawaen na amin ya totoo. Akin ey? On ta inar-aro to tayo, tan labay to ya maliket so bilay tayo. Labalabay to tayon nakaaro tan manbilay ya andi-anggaan.​—Deu. 30:​19, 20; Gal. 6:​7, 8.

2. Antoy labay nen Jehova ya gawaen na saramay agmagbabawin nankasalanan? (1 Juan 2:1)

² Pero agto tayo pipiliten nen Jehova ya manlingkor ed sikato. Sikatayo so akauley ya mandesisyon no kasin manlingkor tayo ed sikato o andi. Panon to balet no akagaway seryoson kasalanan so sakey ya bautismadon Kristiano? No agmagbabawi, ekalen ed kongregasyon. (1 Cor. 5:13) Pero anggano ontan so nagawa, labay nen Jehova ya magbabawi itan ya too tan ompawil ed sikato. Diad tua, say sakey ya rason no akin ya intarya to so dondon et pian naperdona to iramay pagbabawian day kasalanan da. (Basaen so 1 Juan 2:1.) On, maar-aron Dios si Jehova. Sikato ni ingen ya mismo so mamapaseseg ed saramay akagawa na seryoson kasalanan ya pagbabawian day ginawa ra.​—Zac. 1:3; Roma 2:4; Sant. 4:8.

3. Antoy pantongtongan tayo ed sayan artikulo?

³ No walay akagawa na seryoson kasalanan diad kongregasyon, labay nen Jehova ya aligen tayoy panagnonot to. Pantongtongan tayod sayan artikulo no panon tayon naalig so panagnonot nen Jehova. Legan mon aaralen iyan artikulo, imanom irayan punto: (1) no antoy instruksion nen apostol Pablo ed kongregasyon diad Corinto nen walay agi ya akagawa na seryoson kasalanan, (2) no antoy imbaga ton gawaen da nen nagbabawi imay nankasalanan, tan (3) no antoy pakanengneng nen Jehova ed saray lingkor to ya akagaway seryoson kasalanan.

ANTOY GINAWA NA KONGREGASYON ED CORINTO NEN WALAY AGI YA AKAGAWAY SERYOSON KASALANAN?

4. Antoy agawa ed kongregasyon ed Corinto? (1 Corinto 5:​1, 2)

⁴ Basaen so 1 Corinto 5:​1, 2. Diad samay komatlon impanbiahe nen Pablo bilang misionero, akasabid sikato so makapabiglan balita ya nagagawa ed balobalo nin kongregasyon ed Corinto. Walay brother ditan ya karelasyon toy asawa nen ama to o stepmother to. Aburidon maong si Pablo ta ayay gagawaen to yan agi et “ag-anggan nagagawa ed saray nasyon”! Say makapaermen, puppulyanan labat na kongregasyon iyan agi tan ompan ipapasirayew da ni ingen so pangokonsinti da. Ompan inrason da ya makasi tan makatalos met ya Dios si Jehova, tan aaligen da labat itan ya ugali to. Tua ya makasi si Jehova, pero agton balot konsintien so toon manggagawa na seryoson kasalanan. Mauge-uges so gagawaen to man ya agi, kanian seguradon aderal so reputasyon na interon kongregasyon tan balbalawen ira na totoo. Seguradon mauges met so impluensya to ed saray agagi ya nakakaiba to. Kanian antoy imbaga nen Pablo ya gawaen da?

5. Antoy imbaga nen Pablo ya gawaen na kongregasyon diad Corinto, tan anton detalye so binitla nen Pablo? (1 Corinto 5:13) (Nengnengen met so litrato.)

⁵ Basaen so 1 Corinto 5:13. Pinakiwas nen Jehova si Pablo ya sulatan so kongregasyon ed Corinto tan impaliwawa tod sikara ya kaukolan dan ekalen ed kongregasyon imay agmagbabawin nankasalanan. Panoy nepeg ya pantrato da ed saman ya laki? Oniay kuan nen Pablo: “Tundaan yo lay miulop” ed sikato. Imbaga to ni ingen ya “[ag-ira] anggan midudungo ed ontan a too.” (1 Cor. 5:11) Akin et ontan la kadetalyado so instruksion nen Pablo? On ta no midungo kad sakey ya too, aga naiwasan ya makapantongtong kayon mabayag. No unoren na agagi so malinlinew ya bilin nen Pablo, naprotektaan so kongregasyon ed mauges ya impluensya na satan ya too. (1 Cor. 5:​5-7) Sakey ni, no ontan so gawaen da, ompan diman natalosan na samay laki ya talagan ambelbelat so ginawa ton kasalanan, nalikna toy kababaingan, tan napakiwas ya magbabawi.

6. Antoy reaksion na kongregasyon ed samay sulat nen Pablo, tan antoy epekto to ’tan ed samay mismon nankasalanan?

⁶ Nen nipawit la nen Pablo imay sulat to ed saray Kristiano ed Corinto, sankanonot to no anto kasi reaksion da. Ag-abayag, walay balibalin imbalita nen Tito ed si Pablo. Inunor na kongregasyon so instruksion to tan inekal da ed kongregasyon imay agmagbabawin nankasalanan. (2 Cor. 7:​6, 7) Pero wala ni makapaliket ya agawa. Kalabas na pigaran bulan manlapud samay impangipawit nen Pablo na sulat to, nagbabawi imay laki ya nankasalanan. Inuman toy panagnonot tan kabibilay to, tan uunoren to lay matunong ya estandarte nen Jehova. (2 Cor. 7:​8-11) Nen abalitaan itan nen Pablo, antoy sinmublay ya imbaga to ya gawaen na kongregasyon?

PANOY PANTRATO NA KONGREGASYON ED SAMAY MAGBABAWIN NANKASALANAN?

7. Antoy maong ya resulta nen nakal ed kongregasyon imay nankasalanan? (2 Corinto 2:​5-8)

⁷ Basaen so 2 Corinto 2:​5-8. Imbaga nen Pablo: “Magenap la ed satan a too so disiplinan inter na karaklan ed sikayo.” Singa ibabaga nen Pablo ya susto la so naawat ya disiplina na samay laki ta apakiwas lan magbabawi.—Heb. 12:11.

8. Nen nagbabawi la may nankasalanan, antoy imbaga nen Pablo ya gawaen na kongregasyon?

⁸ Oniay imbaga nen Pablo ya gawaen na kongregasyon: “Nepeg a mapangasi yon perdonaen tan ligliwaen” imay nankasalanan ya agi, tan “ipaseguro yod sikato so panangaro yo.” On, aglabat basta imbaga nen Pablo ya kaukolan lan ipawil na saray elder iyan agi diad kongregasyon. Binilin to met so interon kongregasyon ya kaukolan dan ipalikna ed saman ya agi diad salita tan gawa ya talagan aperdona da la tan inar-aro da. No ontan so gawaen da, naliklikna to ya talagan malikeliket so kongregasyon ed impawil to.

9. Akin et nayarin manaalangan so arum ya agagi ed Corinto ya perdonaen imay agin nankasalanan anggano nagbabawi la?

⁹ Anto kasi reaksion na saray agagi ed saman ya bilin nen Pablo? Kasin manaalangan so arum ed sikara ya awaten iman ya agi ed kongregasyon anggano nagbabawi la? Anggapoy ibabaga na Biblia, pero posible ya ontan so alikna na arum ed sikara. Agtayo met ira natetel ta aderal so reputasyon na kongregasyon lapud ginawa na saman ya agi. Tan ompan wala ray agagi ya niiyan ed kababaingan tan asakisakitan lapud kasalanan ya ginawa to. Ompan agmet natanggap na arum ya kaukolan dan awaten tan panengnengan na panangaro iyan agi. Seguro inisip da, ‘Akin ey, singa anggapoy agawa? Samantalang sikami, gagawaen mi anggaay nayarian min unoren si Jehova.’ (Ikompara so Lucas 15:​28-30.) Pero anggano ontan so alikna o naisip da, akin et importante ya ipalikna ray tuan panangaro ed sayan agi ya nagbabawian to lay kasalanan to?

10-11. Antoy nagawa no aglabay na saray elder ya ipawil ed kongregasyon imay laki anggano nagbabawi la?

¹⁰ Imadyin yo pa no aglabay na saray elder ya ipawil ed kongregasyon imay laki anggano nagbabawi la. Tan no bilang akapawil la, anto kasi nalikna to no agnin siansia pansinen na saray agagi tan agda panengnengay panangaro? Imbaga nen Pablo ya ompan ‘nadaeg na alablabas ya ermen’ iyan agi, tan isipen to ya aglabay na agagi ya magmaliw lamet ya parte na kongregasyon. Tan imbes ya mansagpot pian naapiger toy relasyon tod si Jehova, ompan onsuko la tan isipen to ya aglan balot naperdona.

¹¹ Tan diad tua, no agperdonaen na agagi iyan agi ya nagbabawian to lay kasalanan to, naapektoan so mismon relasyon da ed si Jehova. Akin ey? On ta agda aaligen si Jehova, ya mabulos ya mameperdona ed saray magbabawin nankasalanan. Say aaligen da et si Satanas, ya agto amtay mangaro tan anggapon balot so panangasi to. Kanian no ag-ira mamerdona, singa ra manpapausar ed Diablo pian pateyen ed espiritual iman ya agi.​—2 Cor. 2:​10, 11; Efe. 4:27.

12. Antoy nepeg ya gawaen na saray agagid Corinto pian naalig day Jehova?

¹² Anto sirin so gawaen na saray agagi ed Corinto pian naalig day Jehova, aliwan si Satanas? Nepeg ya parehoy panagnonot da ed panagnonot nen Jehova, tan aligen day panagtrato to ed saray magbabawin nankasalanan. Imanoen no antoy ibabaga na Kasulatan nipaakar ed si Jehova. Insulat nen David: “Maomaong ka O Jehova, tan akaparaan kan mamerdona.” (Sal. 86:5) Oniay insulat nen Miqueas: “Siopay Dios a singa sika, a mameperdonay kasalanan tan lingo?” (Miq. 7:18) Tan onia met so insulat nen Isaias: “Ibeneg komon na marelmeng a too so kagagawa to tan ibeneg na mauges a too iray kanonotan to; sikatoy ompawil komon ed si Jehova, a mangipatnag na panangasi ed sikato, on, diad Dios tayo, ta baleg so panamerdona to.”​—Isa. 55:7.

13. Akin et duga labat ya agla pabayagen na saray elder so pangipawil dad samay laki ed kongregasyon? (Nengnengen so kahon ya “Kapigan Akapawil ed Kongregasyon Imay Laki?”)

¹³ On, naalig na saray agagi ed Corinto si Jehova no i-welcome da ed kongregasyon imay agi ya nagbabawian to lay kasalanan to, tan ipalikna dad sikato ya inar-aro da. No unoren da itan ya bilin nen Pablo, ipapanengneng da ya “matulok [ira] ed amin a bengatla.” (2 Cor. 2:9) Tua ya pigaran bulan ni labat so linmabas manlapud impakaekal tod kongregasyon, pero mapatnag ya inawat toy disiplina tan apakiwas lan magbabawi. Kanian anggapoy rason pian pabayagen ni na saray elder so ipawil tod kongregasyon.

ALIGEN SO HUSTISYA TAN PANANGASI NEN JEHOVA

14-15. Antoy naaralan tayo ed samay agawa ed kongregasyon diad Corinto? (2 Pedro 3:9) (Nengnengen met so litrato.)

¹⁴ Impaisulat nen Jehova diad Biblia imay agawa ed kongregasyon diad Corinto pian pakaaralan tayo. (Roma 15:4) Naaralan tayod satan ya agbalot konsintien nen Jehova iray manggagawa na seryoson kasalanan. Ompan isipen na arum ya lapud makasi si Jehova, paulyanan to labat ya mansiansia ed kongregasyon so sakey ya nankasalanan ya agto pagbabawiay ginawa to. Tua ya makasi si Jehova, pero tandaan tayo ya aliwan konsintidor, tan agton balot iyabeba so estandarte to. (Jud. 4) No paulyanan to labat ya mansiansiad kongregasyon so agmagbabawin nankasalanan, kaskasian laingen iray matoor ya lingkor to ta seguradon naimpluensyaan ira.​—Pro. 13:20; 1 Cor. 15:33.

¹⁵ Pero naaralan tayo met ya aglabay nen Jehova ya walay siopaman ya naderal. Labay ton iliktar iray totoo anggad posible. Ipapaseguro to ya kasian to iramay talagan pagbabawian day kasalanan da tan pansasagpotan dan apigeren so relasyon dad sikato. (Eze. 33:11; basaen so 2 Pedro 3:9.) Kanian nen nagbabawi imay laki diad Corinto tan intunda to lay mauges ya gagawaen to, inusar nen Jehova si Pablo pian ipaliwawa ed saray agagi ya kaukolan dan perdonaen tan awaten lamet ed kongregasyon.

16. Antoy epekto ed sika na sayan inaral tayo nipaakar ed samay agawa diad Corinto?

¹⁶ Diad impanaral tayo ed sayan agawa ed kongregasyon diad Corinto, lalo tayon apaneknekan ya si Jehova et maar-aro, matunong, tan Dios na hustisya. (Sal. 33:5) Antoy epekto to ’ya ed sika? Seguradon labalabay mon irayew tan pisalamatan si Jehova! Diad tua, kakkaukolan tayoy panamerdona to, ta makasalanan tayon amin. Maong labat ta intarya nen Jehova so dondon, kanian sarag to tayon perdonaen. On, talagan inar-aro nen Jehova iray lingkor to, tan labay to ya maong so pansumpalan tayo anggano makasalanan tayo. Makapalemew itan na liknaan!

17. Antoy pantongtongan tayo ed ontutumbok ya artikulo?

¹⁷ Diad panaon tayo balet ey? No walay akagawa na seryoson kasalanan, panon ya naalig na saray elder ed kongregasyon so panangaro tan panangasi nen Jehova? Panon dan natulongan ya magbabawi imay nankasalanan? Anto dapat so reaksion tayo no walay nakal o akapawil ed kongregasyon? Aratan ya tepet so pantongtongan tayo diad ontutumbok ya artikulo.