Tulong Parad Saray Nakal ed Kongregasyon

1-2. (a) Antoy nalilikna nen Jehova ed saramay manggagaway seryoson kasalanan ya agmagbabawi? (b) Antoy labay nen Jehova ya gawaen na saramay akagaway seryoson kasalanan?

ALIWAN konsintidor ya Dios si Jehova. Kabusol to so kasalanan. (Sal. 5:​4-6) Iilaloan to ya unoren na saray lingkor to iray atagey ya estandarte to ya nabasad Biblia. Pero siempre, amta to ya aliwa tayon perpekto kanian no maminsan, nalilingo tayo. (Sal. 130:​3, 4) Anggaman ontan, agkokonsintien nen Jehova iray ‘mauges a totoo a gagawaen dan baraan so agnaparaan a kaabigan na Dios parad anggapoy-baing a kagagawa ra.’ (Jud. 4) Kanian ibabaga na Biblia ya diad Armagedon et ‘naderal iray mauges a totoo.’​—2 Ped. 3:7; Apo. 16:16.

² Pero tandaan tayo ya anggad posible et aglabay nen Jehova ya walay siopaman ya naderal. Singa naaralan tayo ed inmuunan artikulo na sayan isyu, “labay [nen Jehova] ya amin et naikday pankanawnawan magbabawi.” (2 Ped. 3:9) Aaligen na saray elder si Jehova. No walay akagawa na seryoson kasalanan ed kongregasyon, maanos dan tulongan ya magbabawi tan napapawil to lamet so maong ya relasyon to ed si Jehova. Pero makapaermen ta wala ray nankasalanan ya agmagbabawi, anggano aminpiga la ran kinatongtong na saray elder tan ginawa da lay anggaay nayarian da ya tulongan ira. (Isa. 6:9) Tuloytuloy ni ran siansia ed panggagawa day kasalanan. No ontan, antoy gawaen na saray elder?

“EKAL YO . . . SO MAUGES A TOO”

3. (a) Antoy ibabaga na Biblia ya gawaen na saray elder no agmagbabawi so sakey ya akagaway seryoson kasalanan? (b) Akin et nibaga tayo ya amay nankasalanan lanlamang so rason no akin ya nakal ed kongregasyon?

³ No talagan agmagbabawi so sakey ya akagaway seryoson kasalanan, anggapo lay nagawaan na saray elder noagta tumboken imay walad 1 Corinto 5:13: “Ekal yo ed limog yo so mauges a too.” Amta na samay nankasalanan ya sikatoy naekal ed kongregasyon no agmagbabawi. Kanian sikato lanlamang so rason no akin ya nakal. Aanien to labat no antoy intanem to. (Gal. 6:7) Akin et ontay nibaga tayo? On ta anggano aminpiga lan tinulongan na saray elder ya magbabawi iyan nankasalanan, aga ondengel. (2 Ara. 17:​12-15) Nanengneng ed saray gagawaen to ya agton talaga labay ya unoren so ganggan nen Jehova.​—Deu. 30:​19, 20.

4. Akin et kaukolan ya iyanunsio ed kongregasyon ya nakal so sakey ya agmagbabawin nankasalanan?

⁴ No nakal ed kongregasyon so sakey ya agmagbabawin nankasalanan, iyanunsio ed kongregasyon ya sikatoy aliwa lan Tasi nen Jehova.a Antoy gagala na satan? Aliwan pian pabaingan imay nankasalanan. Iyanunsio itan pian natumbok na saray agagi so ganggan na Biblia ya ‘tundaan da lay miulop’ ed satan ya too tan ‘ag-ira anggan midungo’ ed sikato. (1 Cor. 5:​9-11) Walay balibalin rason nen Jehova no akin ya ingganggan to ’tan. Oniay insulat nen apostol Pablo: “Say daiset a lebadura et palebagen toy interon masa.” (1 Cor. 5:6) No ag-ekalen ed kongregasyon so sakey ya agmagbabawin nankasalanan, naimpluensyaan to ray agagi tan ompan isipen da ni ingen ya ayos labat anggano agda unoren iray ganggan nen Jehova.​—Pro. 13:20; 1 Cor. 15:33.

5. No say sakey ya agi et nakal ed kongregasyon, panoy pangipasen tayo ed sikato, tan akin?

⁵ No nakal ed kongregasyon so sakey ya agi, panoy pangipasen tayo ed sikato? Anggano ibabaga na Biblia ya ‘tundaan tayo lay miulop ed sikato,’ agtayo komon iisipen ya anggapo lay pag-asa ton makapawil. Karnero nin siansia nen Jehova, pero natan et abalang tan akaarawi ed pulok. No nababalang so sakey ya karnero, nayarin makapawil nin siansia ed pulok. Tandaan ya amay nankasalanan et indedika toy bilay to ed si Jehova. Makapaermen balet ta agto natotoor so dedikasyon to, kanian natan et mansasakit ed espiritual. (Eze. 18:31) Pero anggad wala ni panaon tan tuloytuloy nin ipapanengneng nen Jehova so panangasi To, wala nin siansiay pag-asa ton manguman tan makapawil. Anto sirin so gawaen na saray elder pian natulongan da may nankasalanan ya nakal ed kongregasyon?

NO PANON YA TUTULONGAN NA SARAY ELDER IRAMAY NAKAL ED KONGREGASYON

6. Antoy gawaen na saray elder pian natulongan da imay nakal ed kongregasyon?

⁶ Kasin paulyanan la na saray elder so sakey ya nakal ed kongregasyon tan akauley to lan manggaway paraan pian makapawil ed si Jehova? Andin balot! Diad tua, no ipaamta na komite na saray elder ed samay nankasalanan ya sikatoy ekalen ed kongregasyon, ibaga da met ed sikato no anto ray kaukolan ton gawaen pian makapawil. Pero aliwan satan labat. Ibaga da met ya labay da lamet ya nakatongtong kayari na pigaran bulan pian nakumusta ra. No pinmayag ya mitongtong ed satan ya panaon, pasesegen lamet na saray elder ya magbabawi tan ompawil ed si Jehova. Pero no agni anguman tan agni napatnagan ya magbabawi la, agsukoan na saray elder tan maminpiga da lamet ya salien ya katongtongen.

7. Panon ya naalig na saray elder so panangasi nen Jehova no walay nakal ed kongregasyon? (Jeremias 3:12)

⁷ Gagawaen na saray elder so anggaay nayarian da pian naalig day panangasi nen Jehova no walay nakal ed kongregasyon. Singa bilang, agla inalagar nen Jehova ya magbabawi iray rebelden Israelita antis to ran tinulongan. Sikato lan mismo so inmunan nanggaway paraan. Singa abitla ed komaduan artikulo na sayan isyu, impanengneng nen Jehova no panon kabaleg so panangaro to ed saray lingkor to nen ingganggan to si propetan Oseas ya perdonaen tan iyamong to lamet so asawa to, anggano diad saman et tuloytuloy nin manggagawa na seryoson kasalanan. (Os. 3:1; Mal. 3:7) Singa si Jehova, labalabay na saray elder ya makapawil ed kongregasyon imay nankasalanan, tan ipalikna rad sikato ya aliwa itan ya mairap ya gawaen.​—Basaen so Jeremias 3:12.

8. Panon ya makatulong imay ilustrasyon ya imbaga nen Jesus nipaakar ed managdarak ya anak pian mas natalosan tayoy panangaro tan panangasi nen Jehova? (Lucas 15:7)

⁸ Nanonotan yo ni may ilustrasyon ya imbaga nen Jesus nipaakar ed managdarak ya anak ya abitla ed komaduan artikulo na sayan isyu? Nen abantag na samay ama ya nitan la may anak to, “binatik to tan nilakap to insan to inangoban.” (Luc. 15:20) Naimano yo ya agla inalagar na samay ama ya mikasi ni may anak to? On, inabet to la ta malikeliket ed impawil to! Ontan met so nalilikna nen Jehova ed saramay nakal ed kongregasyon, tan aaligen itan na saray elder natan. Labay da ya makapawil ed si Jehova irayan nababalang ya karnero. (Luc. 15:​22-24, 32) No magbabawi tan ompawil so sakey ya nankasalanan, seguradon malikeliket iran amin diman ed tawen, tan ontan tayo met diad dalin!​—Basaen so Lucas 15:7.

9. Antoy labay nen Jehova ya gawaen na saramay nakal ed kongregasyon?

⁹ Anto la ray naaralan tayo? Malinew ya agkokonsintien nen Jehova iray agmagbabawin nankasalanan. Pero aglabay ya ibaga na satan ya pinaulyanan to la ra. Tutulongan to ni ran siansia ta labay to ya makapawil irad sikato. Imanoen so ibabaga na Oseas 14:4 ya nalilikna nen Jehova no magbabawi so sakey ya nankasalanan. Kuan to: “Paabigen ko rad agda inkamatoor. Mabulbulos ko ran aroen, ta naandi lay sanok [ko].” Ontan so nalilikna nen Jehova! No sankanonot itan na saray elder, seguradon napaseseg iran onkiwas ya tampol no walay nanengneng dan anggan melag ya sinyales ya nagbabawi la so sakey ya nakal ed kongregasyon. Ipapaseguro met na satan ya teksto ed saray nakal ed kongregasyon ya inar-aro ira nen Jehova tan labalabay to la ran makapawil ed sikato.

10-11. Antoy gawaen na saray elder pian natulongan da iramay abaybayag lan nakal ed kongregasyon?

¹⁰ Panon to balet iramay abaybayag lan nakal ed kongregasyon, ompan say arum et deka-dekada ni ingen? Ompan intunda da la imay mauges ya gagawaen da, tan ompan say arum et agda la nanonotan so rason no akin ya nakal ira. Antokaman so situasyon da, pansagpotan na saray elder ya anapen tan pasyaren ira. Diad satan ya ipasyar da, nayarin manpikasi ira ya kaiba imay nakal ed kongregasyon, tan pasesegen dan magbabawi tan ompawil. Siempre no say sakey et abaybayag lan akaarawi ed kongregasyon, seguradon makapkapuy lay espiritualidad to. No imbaga to ya labay to lay ompawil ed kongregasyon, mangiyasain iray elder na mangiyaral ed sikato anggano agni akapawil. Saray elder so manpili na agi ya mangiyaral ed sikato.

¹¹ Pian naalig na saray elder so panangaro nen Jehova, ag-ira ontutundan anapen iramay nakal ed kongregasyon, tan pasesegen da ran ompawil ed si Jehova. No nanengneng lad kabibilay na sakey ya nankasalanan ya talagan magbabawi la tan intunda to lay mauges ya gagawaen to, sikatoy sarag lan tampol ya ipawil na saray elder ed kongregasyon.​—2 Cor. 2:​6-8.

12. (a) Anto ran situasyon ya kaukolan ya manalwar ya maong iray elder antis dan ipawil so sakey ya nankasalanan? (b) Akin et agtayo nepeg ya isipen ya wala ray nankasalanan ya aglan balot kasian nen Jehova? (Nengnengen met so paimanod leksab.)

¹² Wala ray situasyon balet ya kaukolan ya manalwar ya maong iray elder antis dan ipawil ed kongregasyon so sakey ya nankasalanan—singa bilang, no nan-abuso na ugaw, nan-apostata, odino implano ton deralen so relasyon dan sanasawa (nayarin ginagala toy mirelasyon ed arum pian nidiborsyo toy asawa to). Diad sarayan situasyon, seguroen na saray elder ya talagan nagbabawi la iyan nankasalanan. (Mal. 2:14; 2 Tim. 3:6) Amta na saray elder ya responsabilidad dan protektaan so kongregasyon. Pero tandaan da met ya no talagan nagbabawi la so sakey ya nankasalanan tan intunda to la ray mauges ya gagawaen to, awaten lamet nen Jehova. Kanian anggano manaalwar ya maong iray elder, agda nepeg ya isipen ya aglan balot kasian nen Jehova iramay akagawa na ontan iran klase na kasalanan.b—1 Ped. 2:10.

NO ANTOY NAGAWAAN NA KONGREGASYON

13. Antoy pandumaan na pantrato tayo ed sakey ya agin impetek o abaat tan ed sakey ya nakal ed kongregasyon?

¹³ Singa apantongtongan ed imbeneg ya artikulo, no maminsan et iyanunsio ed kongregasyon ya walay agin impetek o abaat. Diad ontan ya situasyon, sarag tayo nin siansiay miulop ed sikato ta nagbabawian to lay kasalanan to tan intunda to met lay mauges ya gagawaen to. (1 Tim. 5:20) Kabiangan nin siansia na kongregasyon tan kaukolan toy panamaseseg na saray agagi. (Heb. 10:​24, 25) Pero duma lan tongtongan no say sakey et nakal ed kongregasyon. Ibabaga na Biblia ya “tundaan [tayo] lay miulop” ed satan ya too tan “[agtayo] anggan midudungo” ed sikato.​—1 Cor. 5:11.

14. Panon ya usaren na sakey ya Kristiano so nipasal ed Biblian konsiensia to diad pantrato tod sakey ya nakal ed kongregasyon? (Nengnengen met so litrato.)

¹⁴ Labay to kasin ibaga, agtayo lan balot pansinen so sakey ya nakal ed kongregasyon? Andi met. Tua, agtayo nayarin miulop ed sikato. Pero sarag na kada Kristiano ya usaren so nipasal ed Biblian konsiensia to no kasin imbitaan tod aral so sakey ya nakal ed kongregasyon, nayarin kanayon to odino datin maapit ya kaaro to. No inmatendi, panoy pantrato tayo ed sikato? Dati, agtayo ibabano. Natan balet, akauley so kada Kristiano no panon ton usaren so nipasal ed Biblian konsiensia to. Kanian sikatayon mismo so mandesisyon no kasin ibano o i-welcome tayod aral so sakey ya nakal ed kongregasyon. Pero tandaan tayo ya agtayo miuulop ed samay nakal tan agtayo mitotongtong ya mabayag ed sikato.

15. Siopa iramay tutukoyen na 2 Juan 9-11? (Nengnengen met so kahon ya “Kasin Parehon Klase na Kasalanan so Tutukoyen nen Juan tan Pablo?”)

¹⁵ Pero ompan nitepet tayo, ‘Di ba say ibabaga na Biblia, no ibano tayo may nakal ed kongregasyon, singa tayo met la mibibiang ed saray mauges ya gagawaen to?’ (Basaen so 2 Juan 9-11.) No aralen tayoy konteksto na sayan imbaga nen apostol Juan, natalosan tayo ya say tutukoyen to et saray apostata tan saray aktibon mangipapaseseg na mauges ya kagagawa. (Apo. 2:20) Kanian no say sakey et kabkabat ya apostata odino mangipapaseseg na mauges ya kagagawa, agnepeg ya pasyaren na saray elder. Tua, wala ni tsansa ton magbabawi. Pero anggad agni manguuman, agtayon balot ibabano tan agtayo met iimbitaan ya miaral.

ALIGEN SO PANANGARO TAN PANANGASI NEN JEHOVA

16-17. (a) Antoy labay nen Jehova ya gawaen na saray nankasalanan? (Ezequiel 18:32) (b) Panon ya makapikimeyan iray elder ed si Jehova no tutulongan da iramay akagaway kasalanan?

¹⁶ Anto ray naaralan tayo ed limaran artikulo na sayan isyu? Aglabay nen Jehova ya walay siopaman ya naderal! (Basaen so Ezequiel 18:32.) Labay to ya makapikareenan ed sikato iray nankasalanan. (2 Cor. 5:20) Kanian manlapu la nensaman ya anggad natan, ag-onsasawa si Jehova ya tulongan ya magbabawi iray lingkor ton nankasalanan tan ompawil ira ed sikato. Balbaleg so pribilehyo na saray elder ya mikimeyan ed si Jehova pian natulongan ya magbabawi iramay akagawa na seryoson kasalanan.​—Roma 2:4; 1 Cor. 3:9.

¹⁷ Imadyin yo pay liket ed tawen no walay nankasalanan ya nagbabawi! Kada no walay sakey ya abalang ya karnero ya makapawil ed kongregasyon, agnasabaay liket nen Aman Jehova! No diman tayo mas natatalosan so panangaro, panangasi, tan agnaparaan ya kaabigan nen Jehova, diman tayo met mas naar-aro.​—Luc. 1:78.