Tepet na Saray Manbabasa
Nen inggapo nen Jesus so Pangdem na Katawan, kulaan na saramay 70 ya disipulo ya imbaki ton manpulong? Kasin tinaynan day Jesus?
Tua ya agkaiba nen Jesus imay 70 ya disipulo nen inggapo to so Pangdem na Katawan. Pero agto labay ya ibagan aliwan matoor irayan disipulo o tinaynan day Jesus. Diad saman ya labi, labay labat ya nakaiba nen Jesus iray apostol to.
Amay 12 apostol tan samay 70 et disipulo iran amin nen Jesus. Diad amin ya disipulo to, sikatoy nampili na 12 lalaki ya tinawag ton apostol. (Luc. 6:12-16) Walad Galilea si Jesus nen “tinipon to so Labindua” tan “imbaki to ran mangipulong ed Panarian na Dios tan mamaabig.” (Luc. 9:1-6) Insan nen linmad Judea, “anuro na 70 ni tan imbaki to ran sanderwa.” (Luc. 9:51; 10:1) Labay ton ibaga sirin, walan-walay disipulo nen Jesus diad nanduruman lugar ya nampulongan to.
Saray Judio ya nagmaliw ya disipulo nen Jesus et seselebraan da nin siansia so tinaon ya Paskua, ya nayarin kaibay pamilya ra. (Exo. 12:6-11, 17-20) Pero nen asingger lay ipatey nen Jesus, intagar to ray apostol to diad Jerusalem pian saniba dan selebraan so Paskua. Agto la tinipon so amin ya disipulo to ya manlapu nid Judea, Galilea, tan Perea. Mapatnag ya saray apostol to labat so labay ton nakaiba ed saman ya okasyon. Oniay imbaga tod sikara: “Nampirpirawatan kon nakaiba ta kayon mangan ed sayan Paskua antis na panirap ko.”—Luc. 22:15.
Anto kasi rason nen Jesus akin et sikara labat so impila to? Tandaan ya diad saman et asingger lan ompatey si Jesus bilang “Kordero na Dios a mangekal ed kasalanan na mundo.” (Juan 1:29) Sikatoy ompatey diad Jerusalem, ya ditan et abaybayag lan manbabagat ed Dios iray Judio. Kada no nanengneng da imay kordero no Paskua, nanonotan da no panon ya inliktar nen Jehova iray inmuunan atateng da diad Ehipto. Pero mas baleg nen say satan so nagawaan na pangibagat nen Jesus ed mismon bilay to—ibulos to ray totoo ed kasalanan tan ipapatey. (1 Cor. 5:7, 8) Lapud dondon bagat to, posible lan magmaliw ya pinagkapundasyon na Kristianon kongregasyon so 12 apostol to. (Efe. 2:20-22) Nabasa ed libron Apocalipsis ya say masanton syudad na Jerusalem et walaan na “12 pundasyon a bato.” Tan akaukit ed saratan so “12 ngaran na 12 apostol na Kordero.” (Apo. 21:10-14) On, mapatnag sirin ya walay importantin betang na saray matoor ya apostol diad pakasumpal na gagala nen Jehova. Kampegan labay iran nakaiba nen Jesus diad sampot lan panselebra toy Paskua tan ed samay inggapo ton espisyal ya okasyon kayari to ’tan—say Pangdem na Katawan.
Anggano agkaiba imay 70 tan arum nin disipulo diad samay Pangdem na Katawan, amin da et minabang ed satan basta manmatoor irad si Jesus. Amin ya alanaan ya Kristiano et magmaliw lanlamang ya kabiangan na samay sipanan parad Panarian ya binitla nen Jesus ed saray apostol to diad saman ya labi.—Luc. 22:29, 30.