Kasin Uunoren Mo Iray Pasakbay?

1. Antoy asingsingger lan gawaen nen Jesus?

EKSAYTED tayo la ed saray nagawad arapen! Asingsingger lan ukomen nen Jesus so kada too diad dalin. Labay to ya talaranan tayo itan kanian imbaga to so “tanda” na kiwawala to tan “say kaunoran a parte na sistema na mundo.” (Mat. 24:3) Nabasa iyan propesiya diad Mateo kapitulo 24 tan 25, tan diad Marcos kapitulo 13 tan Lucas kapitulo 21.

2. Antoy pantongtongan tayo ed sayan artikulo, tan antoy nitulong to ’ya ed sikatayo?

² Antis ya mangukom si Jesus, labay to ya akaparaan iray disipulo to. Kanian walay talora ya parabolo o ilustrasyon ya imbaga to pian onkanan pasakbay ed sikatayo. Atan may parabolo na saray karnero tan kanding, saray makabat tan makulangkulang ya mamarikit, tan saray talento. Makatulong irayan parabolo pian natalosan tayo ya say pangukom nen Jesus et ibase to lanlamang ed gagawaen na kada too. Pantongtongan tayo sirin diad sayan artikulo irayan taloran parabolo tan no antoy naaralan tayo ed saratan. Unaen tayo may parabolo na saray karnero tan kanding.

SARAY KARNERO TAN KANDING

3. Kapigan ukomen nen Jesus iray totoo?

³ Diad samay parabolo na saray karnero tan kanding, inkompara nen Jesus ed karnero iramay angawat ed maong a balita tan sinmuporta ed saray alanaan ya agagi to. Diad kabaliktaran balet, naukom bilang kanding iramay ag-angawat ed maong a balita tan agsinmuporta ed saray alanaan ya agagi to. (Mat. 25:​31-46) Ukomen to iray totoo no kasin karnero ira o kanding legan na “baleg a kairapan,” antis ya mismo na Armagedon. (Mat. 24:21) Di ba say sakey ya pastol, agto panibaen iray karnero tan kanding? Ontan met so gawaen nen Jesus. Saramay matoor ya sinmuporta ed saray alanaan ya agagi to et ibiig to ed saramay agsinmuporta ed sikara.

4. Base ed Isaias 11:​3, 4, akin et segurado tayo ya patas so pangukom nen Jesus? (Nengnengen met so litrato.)

⁴ Si Jehova ya mismo so nampili ed si Jesus bilang Ukom, tan ibabaga na Biblia ya patas so pangukom to. (Basaen so Isaias 11:​3, 4.) Oobserbaan nen Jesus iray gagawaen, ugali, tan ibabaga na totoo, ontan met ed panagtrato da ed saray alanaan ya agagi to. (Mat. 12:​36, 37; 25:40) Kanian no baleg a kairapan la, kabisado la nen Jesus no siopa ray sinmuporta ed saray alanaan ya agagi to tan diad kimey da.a Sakey ed saray manunan paraan pian nasuportaan tayo ray agagi to et no mitulongan tayo ed kimey ya panagpulong. No ontan so gawaen tayo, ipasen to tayon “matunong” tan nawalaan tayoy ilalo ya ‘manbilay na andi-anggaan’ diad dalin. (Mat. 25:46; Apo. 7:​16, 17) Marakdakep itan ya premyo! No mansiansia tayon matoor legan tan kayari na baleg a kairapan, agnabural so ngaran tayo ed “libro na bilay.”—Apo. 20:15.

5. Antoy naaralan ed samay parabolo na saray karnero tan kanding, tan siopa ray makaaral ed satan?

⁵ Ipanengneng mon matoor ka. Say parabolo na saray karnero tan kanding et manunan ontutukoy ed saray parad dalin. Ipapanengneng da ya matoor ira diad pamapasya ra ed kimey ya panagpulong tan diad panguunor da ed saray instruksion na “matoor tan makabat ya aripen” ya tinuro nen Jesus. (Mat. 24:45) Pero anggan saray parad tawen et kaukolan da met ya unoren so pasakbay ed sayan parabolo. Akin ey? On ta iimanoen met nen Jesus iray gagawaen, ugali, tan ibabaga ra. Kanian kaukolan da met ya ipanengneng ya matoor ira. Diad tua, wala ni duaran parabolo ya imbaga nen Jesus ya espisipikon parad saray alanaan. Nabasa met iratan diad Mateo kapitulo 25. Isublay tayon pantongtongan so parabolo na saray makabat tan makulangkulang ya mamarikit.

SARAY MAKABAT TAN MAKULANGKULANG YA MAMARIKIT

6. Akin et nibagan makabat iramay limaran mamarikit? (Mateo 25:​6-10)

⁶ Diad sinmublay ya parabolo, inistorya nen Jesus so samploran mamarikit ya pinmaway pian abeten so nobyo ta labay dan ibaan ed ponsia na bansal to. (Mat. 25:​1-4) Imbaga nen Jesus ya say limara ed sikara et “makabat,” amay limara balet et “makulangkulang.” Akaparaan tan alerto iramay makabat ya mamarikit. Mabulos iran manalagar anggano pegley-labi ni isabi na nobyo. Angawit iray lamparaan pian walay pansilew da. Tan angawit ni ra ingey reserban larak pian wala nin siansiay nausar da no bilang ta nabayagan may nobyo. Talagan akaparaan ira! (Basaen so Mateo 25:​6-10.) Kanian kasabi na nobyo, akila ra ya linmoob ed pambansalan to. Ontan so situasyon na saray alanaan ya Kristiano. No mansiansia ran akaparaan tan alerto anggad isabi nen Jesus, makaloob ira diad Panarian ed tawen tan nakaiba day Jesus—say Nobyo.b (Apo. 7:​1-3) Kumusta balet iramay limaran makulangkulang ya mamarikit?

7. Antoy agawa ed saramay limaran makulangkulang ya mamarikit, tan akin ya ontan so agawad sikara?

⁷ Diad kabaliktaran balet, aga akaparaan imay limaran makulangkulang ya mamarikit. Anggano walay awit dan lamparaan, anggapo balet so reserba dan larak. Kanian nen ngalngali la naerep iray lamparaan da, linma ran angaliw. Say makapaermen balet, nitan la manaya may nobyo. Kasabi to, anggapo may limaran makulangkulang ya mamarikit. Kanian ‘saramay akaparaan ya mamarikit labat so akiulop ed sikaton linmoob ed pambansalan, tan inkapot lay puerta.’ (Mat. 25:10) Nen akapawil la iramay makulangkulang ya mamarikit, labay da met komon so onloob, pero say kuan to may nobyo ed sikara: “Agta kayo kabat.” (Mat. 25:​11, 12) Ontan so agawad sikara ta ag-ira akaparaan tan ag-ira nananos ya nanalagar. Antoy naaralan na saray alanaan ed sayan parabolo?

8-9. Antoy naaralan na saray alanaan ed samay parabolo na saray mamarikit? (Nengnengen met so litrato.)

⁸ Ipanengneng mo ya akaparaan tan alerto ka. Nen inistorya nen Jesus so parabolo na saray mamarikit, agto labay ya ibagan walay duaran grupo na alanaan, ya amay sakey ya grupo et akaparaan ed isabi na anggaan tan amay sakey ya grupo balet et andi. Aliwan satan so punto to. Imbaga to man ya parabolo ta labay ton natalosan na saray alanaan ya agda naawat so premyo da no ag-ira mansiansian akaparaan tan mananos ya manalagar anggad isabi na anggaan. (Juan 14:​3, 4) Seryoson pasakbay itan! Balanglan parad tawen tayo o parad dalin, kaukolan ya ipapuso tayo itan ya pasakbay. Dapat ya lanang tayon akabantay tan akaparaan, tan mananos tayo anggad isabi na anggaan.—Mat. 24:13.

⁹ Say sinmublay ya inistorya nen Jesus et amay parabolo na saray talento. Idadanet na satan ya parabolo ya importantin mankuli tayo.

SARAY TALENTO

10. Akin et nibagan matoor imay duaran aripen? (Mateo 25:​19-23)

¹⁰ Diad parabolo na saray talento, inistorya nen Jesus so taloran aripen. Amay duara et matoor ed amo ra, amay sakey balet et andi. (Mat. 25:​14-18) Antis ya linmad arum ya bansa imay amo, inmatalek to ed sarayan aripen so pigaran talento. Nen panaon nen Jesus, anggan say sakey labat ya talento et balbaleg lan kuarta. Amay duaran matoor ya aripen et makulikuli dan innegosyo imay kuarta na amo ra. Kanian antoy agawa? Kapawil to may amo, naamtaan to ya tinmubo ran maong—adoble may kuarta ya intilak tod sikara! Kanian imbaga to ya ‘maabig so agawaan da’ tan ‘miliket irad katawan da.’ (Basaen so Mateo 25:​19-23.) Amay komatlon aripen balet ey? Antoy ginawa tod samay kuarta ya inmatalek ed sikato na amo to?

11. Antoy agawad samay “mangiras” ya aripen, tan akin et onmay agawad sikato?

¹¹ Amay komatlon aripen et akaawat na sakey ya talento, pero “mangiras”! Imbes ya inegosyo to may kuarta, inkotkot tod dalin. Kanian kapawil na amo to, naamtaan to ya aga tinmubo may sakey ya talento. Anta mangiras la lanti may aripen, nanrason ni! Imbes ya onkerew na pasensia ta agto apatelek may kuarta, tinawag to nin “estrikto” may amo to. Sinmanok laingen imay amo. Kanian inala rad sikato may talento tan pinalayas da.—Mat. 25:​24, 26-30.

12. Siopay irerepresenta na samay duaran matoor ya aripen?

¹² Amay duaran matoor ya aripen et ontutukoy ed saray matoor ya alanaan ya Kristiano. Lapud matoor ira, labay nen Jesus ya ‘miliket irad sikato’ kanian iter tod sikara so premyo ra—napaoli ra diad tawen. Atan may tatawagen na Biblia ya “unonan kioli.” (Mat. 25:​21, 23; Apo. 20:5b) Pero antoy nepeg ya gawaen na saray alanaan ya Kristiano natan pian agda naalig imay mangiras ya aripen?

13-14. Antoy naaralan na saray alanaan diad samay parabolo na saray talento? (Nengnengen met so litrato.)

¹³ Ipanengneng mo ya makuli tan maseet ka. Singa met ed samay parabolo na saray mamarikit, nen inistorya nen Jesus may parabolo na saray talento, agto papapawayen ya wala ray alanaan ya magmaliw ya mangiras. Inistorya to itan pian pasakbayan iray alanaan ya Kristiano natan no antoy nagawad sikara no onngiras ira. No naandi so seseg da, agda ‘nabembenan ya malet so pribilehyo da bilang tinawag tan pinili.’ Lapud satan, ag-ira laingen makaloob ed Panarian diad tawen.—2 Ped. 1:10.

¹⁴ Kanian antoy naaralan na saray alanaan ed samay parabolo na saray mamarikit? Nepeg ya akaparaan tan alerto ira. Diad samay parabolo na saray talento ey? Nepeg ya makuli tan maseet ira. Pero wala ni imbaga nen Jesus ya pakaaralan na saray alanaan. Nabasa itan diad Mateo 24:​40, 41.

SIOPA RAY “NAALA”?

15-16. Base ed Mateo 24:​40, 41, akin et kaukolan ya mansiansian akabantay iray alanaan?

¹⁵ Antis ya inistorya nen Jesus imay taloran parabolo, walay imbaga to ya ontutukoy ed sampot ya pangukom ed saray alanaan. Imbaga to ya walay duaran laki ya mankikimey ed uma tan walay duaran bii ya manggigiling na arina. Parehoy gagawaen na samay duaran laki tan samay duaran bii. Pero imbaga nen Jesus ya “say sakey et naala tan samay sakey et natilak.” (Basaen so Mateo 24:​40, 41.) Insan to pinaseseg iray papatumbok to, kuan to: “Kanian mantultuloy kayon manbantay, ta agyo amta no anton agew so isabi na Katawan yo.” (Mat. 24:42) Ontan met so imbaga nen Jesus kayari ton inistorya may parabolo na saramay mamarikit. (Mat. 25:13) Ompapaway ya saksakey so pupuntoen nen Jesus. Saray matoor tan tuan alanaan labat so ‘alaen’ tan palooben nen Jesus diad Panarian ed tawen.—Juan 14:3.

¹⁶ Ipanengneng mo ya akabantay ka. No say sakey ya alanaan et agmansiansian akabantay, natilak tan agmakapila no tiponen la nen Jesus iray “pinili to.” (Mat. 24:31) Anggano aliwa tayon alanaan, makaaral tayo ed saya. Pian awaten tayoy premyo tayon bilay ya andi-anggaan diad dalin, kaukolan tayo met so manmatoor tan mansiansian akabantay.

17. Akin et agtayo dapat kukuestionen si Jehova no wala ray nilanaan to diad imbebeneg labat iran taon?

¹⁷ Lapud kabkabat tan pantitiwalaan tayoy Jehova, agtayo kukuestionen iray desisyon to. Kanian no wala ray nilanaan to ya matoor ya Kristiano diad imbebeneg labat ya taon, agtayo ’tan proproblemaen.c Seguro natandaan yo may ilustrasyon nen Jesus nipaakar ed saray komikimey ed kaubasan ya ginmapon nantrabaho diad koma-11 ya oras o alas-5 la na ngarem. (Mat. 20:​1-16) Sakey oras labat so impankimey da pero parehoy upa da ed saramay asaksakbay ya nankimey. Ontan met ed saray alanaan. Say pakaawat dad premyo da ed tawen et akadepende ed panmatoor da, aliwan no kapigan ira nagmaliw ya alanaan.

UNOR MO IRAY PASAKBAY

18-19. Anto ran leksion tan pasakbay so apantongtongan tayo?

¹⁸ Anto ray apantongtongan tayo? Naaralan tayo diad samay parabolo na saray karnero tan kanding ya natan ni labat et kaukolan lan ipanengneng na saray parad dalin ya matoor ira ed si Jehova, tan nepeg dan pansiansiaen so katooran da anggad baleg a kairapan. Antis ya mismo na Armagedon, saramay nanmatoor et ukomen nen Jesus bilang karnero tan sikara so “mangawat na bilay ya andi-anggaan.”—Mat. 25:46.

¹⁹ Apantongtongan tayo met so duaran parabolo ya onkanan pasakbay ed saray alanaan. Diad samay parabolo na saray mamarikit, limara labat so makabat. Akaparaan tan alerto ira, tan mabulbulos iran nanalagar anggano abayagan may nobyo. Diad kabaliktaran balet, ag-akaparaan iramay makulangkulang ya mamarikit kanian ag-ira pinaloob na nobyo ed pambansalan to. Aligen tayo iramay makabat ya mamarikit. Komon ta agtayo onsasawan alagaren so panderal nen Jesus ed sayan sistema na mundo. Diad parabolo balet na saray talento, apantongtongan tayo ya makuli tan maseet may duaran matoor ya aripen. Nansagpot iran maong parad amo ra kanian aliketan ed sikara. Amay mangiras balet ya aripen, apalayas. Antoy naaralan tayod saya? Komon ta mansiansia tayon makuli ed panlilingkor tayod si Jehova anggad isabi na anggaan. Insan apantongtongan tayo met ya nepeg ya mansiansian akabantay iray alanaan pian ‘alaen’ ira nen Jesus tan awaten day premyo da diad tawen. On, tatalaranan la na saray alanaan so ‘pantipon’ ed sikara nen Jesus diad tawen. Kayari na Armagedon, nagawa la so kasal na Kordero tan sikara so magmaliw ya pinagka-nobya nen Jesus.—2 Tes. 2:1; Apo. 19:9.

20. Antoy gawaen nen Jehova parad saramay maunor ed pasakbay?

²⁰ On, asingsingger la so pangukom nen Jesus. Pero anggapoy nepeg tayon takotan! Basta manmatoor tayo, segurado ya ikdan to tayo nen Jehova na ‘pakayari ya mas mabiskeg nen say pakayari na too’ pian “makatalindeg [tayod] arapan na Anak na too,” si Jesus. (2 Cor. 4:7; Luc. 21:36) Parad tawen tayo man o parad dalin, napaliket tayoy Aman Jehova no unoren tayo ray pasakbay ya naaralan tayo ed saray parabolo nen Jesus. Tan lapud agnaparaan ya kaabigan nen Jehova, seguradoen to ya niliktar iramay say ngaran da et ‘akasulat ed libro’ na bilay!—Dan. 12:1; Apo. 3:5.