Man-drowing Ka Pian Natandaan Moy Aaralen Mo

Kasin no maminsan et nanairapan kan tandaan so aaralen mo? Agka mapaga ta agmo bukbukor so ontan. Pero iray bangat nen Jesus, mainomay tayon natandaan, anto? Akin kasi? On ta angusar si Jesus na saray ilustrasyon ya pan-imadyinen to tayo. Kanian no manaaral ka, usar moy imahinasyon mo pian mas natandaan moy aaralen mo. Antoy sakey ya paraan pian nagawaan mo itan? Man-drowing ka.

Dakel so mangibabaga ya no idrowing day balon naaralan da, mas natandaan da iratan. Makakatulong kuno ’tan ed sikara pian aliwan saramay salita labat so natandaan da, noagta pati iramay manunan punto. Ayos labat anggano aliwan masyadon marakep o komplikado so drowing mo. Anggano simpli labat itan, baleg lay nitulong to. Base ed impan-research, lalo lan makatulong iyan teknik ed saray maedad la pian agda mainomay ya nalingwanan iray aaralen da.

Kanian diad ontumbok ya panaral mo, salim so man-drowing. No salien mo yan teknik, seguradon naliketan ka ta mas dakel la natay natandaan mo!