Alig Mo Iray Matoor ya Anghel

1-2. (a) Antoy pidumaan tayo ed saray anghel? (b) Antoy pamparehoan tayo ed saray anghel?

NEN inyasingger ka nen Jehova ed katuaan, nagmaliw kan parte na maar-aron pamilya to ya bubuoen na saray lingkor to ed interon mundo tan saray minilyon ya anghel diad tawen. (Dan. 7:​9, 10) No iimadyinen mo ray anghel, seguro say naisip mon tampol et amay pidumaan tayod sikara. Tua met ya dakel so pandumaan na saray anghel tan totoo. Singa bilang, antis ya pinalsa nen Jehova so too, abaybayag lan manbibilay ed tawen iray anghel. (Job 38:​4, 7) Mas makapanyari ra nen say sikatayo. Tan lapud agtayo perpekto, mas masanto tan matunong ira nen say sikatayo.—Luc. 9:26.

² Pero diad tua, dakel met so pamparehoan tayo ed saray anghel. Singa saray anghel, sarag tayo met ya aligen iray balibalin kualidad nen Jehova. Wala met so kalayaan tayon mandesisyon ya singa sikara. Tan singa sikatayo ran totoo, wala met so kanya-kanyan ngaran, ugali, tan asainmin na saray anghel. Pareho met ya walay espiritual ya pankaukolan tayo. Balanglan anghel o totoo, pinalsa to tayo nen Jehova pian mandayew ed sikato.—1 Ped. 1:12.

3. Anto ran kualidad na saray matoor ya anghel so pantongtongan tayo ed sayan artikulo?

³ Lapud dakel so pamparehoan tayod saray anghel, dakel met sirin so naaralan tayod sikara. Tan napaseseg tayod maong ya alimbawa ra. Pantongtongan tayod sayan artikulo no panon tayon naalig so kapaabebaan na saray matoor ya anghel, pati say panangaro dad totoo, panaanos da, tan say pansasagpot da ya napansiansian malinis so kongregasyon.

MAPAABEBA IRAY ANGHEL

4. (a) Akin et nibaga tayon mapaabeba iray anghel? (b) Antoy rason akin et mapappaabeba iray anghel? (Salmo 89:7)

⁴ Mapaabeba iray matoor ya anghel. Anggano dakel lay eksperiensya da tan mabisbiskeg tan marundunong ira, uunoren da nin siansia iray instruksion nen Jehova. (Sal. 103:20) No susumpalen da ray asainmin da, agda ilalastog so nagagawaan da. Tan agda met uusaren so pakapanyari da pian labat pabiliben so arum. Maliket dan gagawaen so panlabayan na Dios anggano agnaamtaan na arum so ngaran da.a (Gen. 32:​24, 29; 2 Ara. 19:35) Agda labay so pairayew ta amta dan si Jehova labat so makanepegan ed satan. Akin et mapappaabeba iray anghel? On ta inar-aro day Jehova tan baleg so respeto dad sikato.—Basaen so Salmo 89:7.

5. Panon ya impanengneng na sakey ya anghel so kapaabebaan nen binano toy apostol Juan? (Nengnengen met so litrato.)

⁵ Imanoen tayo pay sakey ya agawa ya pakanengnengan ya talagan mapaabeba iray anghel. Nen manga 96 C.E., walay anghel ya agtayo amtay ngaran to ya impanengneng tod si apostol Juan so makapakelkelaw ya pasingawey. (Apo. 1:1) Antoy reaksion nen Juan? Sikatoy dinmakmomo pian idayew may anghel, pero binanon tampol na samay anghel. Kuan to: “Manalwar ka! Agmo itan gagawaen! Sakey ak labat ya aripen a singa sika tan saray agagim . . . Mandayew kad Dios!” (Apo. 19:10) Talagan mapappaabeba iyan anghel! Mapatpatnag ed reaksion to ya agto labay so pairayew. Impaarap toy dayew ed si Jehova. Nanengneng tayo met ed samay imbaga to ya aliwan atagtagey so pakanengneng tod sarili to. Seguradon abaybayag lan manlilingkor ed si Jehova iyan anghel tan mas makapanyari nen say si Juan. Pero imbaga to ya pareho labat iran aripen. Tan anggano binano toy Juan, agto nampasnokan. Maomaong nin siansia so impitongtong to. Seguro inisip to la ya onman so reaksion nen Juan ta ompan nikelawan ya maong ed anengneng ton pasingawey.

6. Panon tayon naalig so kapaabebaan na saray anghel?

⁶ Panon tayon naalig so kapaabebaan na saray anghel? Anggano wala ray nagagawaan tayo parad si Jehova, agtayo komon iratan ilalastog, tan agtayo lalaen so dayew. (1 Cor. 4:7) Tan agtayo komon iisipen ya mas atagey tayo nen saray agagi lapu labat ta abayag ti lan manlilingkor ed si Jehova tan wala ray pribilehyo tayo. Diad tua, no diman mas nanaaruman iray responsabilidad tayo ed kongregasyon, diman tayo met dapat lalon ipanengneng so kapaabebaan. (Luc. 9:48) Singa saray anghel, say rason no akin ya gagawaen tayo iratan ya responsabilidad et lapud labay tayon panlingkoran iray agagi. Agtayo labay ya nalikna ran singa mas importante tayo nen say sikara.

7. Panon tayon nipanengneng so kapaabebaan no bibilinen o sisimbawaen tayo so sakey ya agi odino say anak tayo?

⁷ Panon tayon nipanengneng so kapaabebaan no bibilinen o sisimbawaen tayo so sakey ya agi odino say anak tayo? Anggano ambelat ya simbawa so kaukolan to, komon ta maaro tan maomaong nin siansia so pitongtong tayo. Singa samay anghel ya angipetek ed si Juan, malinew tan makpel tayon ibaga no antoy dugan gawaen to. Pero seguradoen tayo ya ag-onkapuy so liknaan na samay sisimbawaen tayo. No aliwan atagey so pakanengneng tayod sarili tayo, maaro tan marespeto so pangiter tayo na simbawa ya base ed Biblia.—Col. 4:6.

INAR-ARO NA SARAY ANGHEL IRAY TOTOO

8. (a) Akin et nibaga tayon inar-aro na saray anghel iray totoo? (Lucas 15:10) (b) Panon ya ontutulong iray anghel diad kimey ya panagpulong? (Nengnengen met so litrato.)

⁸ Ompan isipen na arum ya anggapoy pibabali na saray anghel ed sikatayo. Pero aliwan tua ’tan ta inar-aro na saray anghel iray totoo. Diad tua, manliket ira no walay nankasalanan ya magbabawi o walay inaktibo ya pinmawil ed si Jehova. Tan manliket met ira no walay toon umanen toy kabibilay to tan awaten toy katuaan. (Basaen so Lucas 15:10.) Aktibo met ya ontutulong iray anghel ed kimey ya panagpulong. (Apo. 14:6) Anggano aliwan sikara so direktan mitotongtong ed saray totoo, sarag da tayon igiya ed saray totoon labay da nin kabaten si Jehova. Pero siempre, agtayon talaga nibaga ya nalmo tayo so sakey ya interesado lapud inggiya tayo na saray anghel, ta sarag met nen Jehova ya usaren so arum ya paraan, singa say masanton espiritu to, pian igiya iray lingkor to. (Gawa 16:​6, 7) Pero say segurado, uusaren to ray anghel diad kimey ya panagpulong. Kanian kada no ipupulong mo so maong a balita, tandaan mo ya wadtan iray anghel pian ontulong tan onsuporta ed sika.—Nengnengen so kahon ya “Naebatan so Pikakasi Da.”

9. Panon tayon naalig so panangaro na saray anghel ed totoo?

⁹ Panon tayon naalig so panangaro na saray anghel ed totoo? No impakabat diad kongregasyon ya walay akapawil ya agi, aligen tayo ray anghel. Miliket tayo! I-welcome tayo may agi tan ipalikna tayod sikato ya inar-aro tayo. (Luc. 15:​4-7; 2 Cor. 2:​6-8) Naalig tayo met iray anghel no mamasya tayo ed panagpulong. (Ecl. 11:6) Tan no panon ya masuporta iray anghel diad panagpulong, suportaan tayo met iray agagi diad ministeryo ra. Singa bilang, miulop tayo ed saray balo-balo nin publisher. Sarag tayo met ya ibaan iray maedad lan agagi tan tulongan tayo ra pian agda napaulyanan so ministeryo ra.

10. Antoy naaralan tayo ed si Sister Sara?

¹⁰ Panon to balet no limitadoy nagagawaan tayod ministeryo lapud situasyon tayo? Manggawa tayo nin siansiay paraan pian makapikimeyan tayo ed saray anghel. Ontan so ginawa nen Sister Sarab ya taga India. Manga 20 ya taon ya nampayunir si Sara, pero nansakit na grabe ya anggad agla makaakar. Lapud sayan situasyon to, a-depress ya maong si Sara. Pero diad tulong na saray agagi tan inagew-agew ya pambabasa to na Biblia, pinmawil so liket to. Sinali toy arum ya paraan na panagpulong. Lapud agto sarag so anggan onyurong pian manggaway sulat, mante-telephone witnessing la. Tinawagan to iray return visit to tan tinepetan to ra no wala ni ray kabat dan interesadon manaral na Biblia. Antoy resulta ey? Kayari labat na pigaran bulan, 70 la so Bible study nen Sara! Agto la nasabaan, kanian inter to lad saray kakongregasyon to so arum ya iyaaralan to. Dakel ed sikara et mimiaral la natan. Seguradon malikeliket iray anghel ya suportaan iray agagi ya mamapasya ed panagpulong, ya singa si Sara.

MAAN-ANOS IRAY ANGHEL

11. Akin et nibaga tayon maan-anos iray matoor ya anghel?

¹¹ Maan-anos iray matoor ya anghel. Libo-libon taon da lan nanenengneng so kaugsan. Nen nanrebelde ed si Jehova si Satanas tan arum nin anghel, seguradon asakisakitan met iray matoor ya anghel ta abayag da ran akaiba diad panaglingkor. (Gen. 3:1; 6:​1, 2; Jud. 6) Manlapu lad saman, kakalabanen la na saray demonyo iray matoor ya anghel, ya singa nanengneng ed samay salaysay ya walad Daniel 10:13. Tan diad tua, manlapu la nen pinalsa nen Jehova so too, seguradon nasasakitan met iray anghel ta nanenengneng da ya mas dakdakel so totoon agmalabay ya manlingkor ed si Jehova. Maong labat ta ag-onsusuko irayan matoor ya anghel. Malikeliket tan masetseseg ni ran siansia ya manlilingkor ed si Jehova. Baleg so tiwala da ya diad dugan panaon et ekalen lanlamang na Dios so amin ya epekto na kasalanan.

12. Antoy gawaen tayo pian makapan-anos tayo?

¹² Panon tayon naalig so inkaanos na saray anghel? Singa saray matoor ya anghel, naeermenan tayo met ed nanenengneng tayon paniirap na saray totoo. Pero singa sikara, kombinsido tayo met ya ekalen na Dios so amin ya kairapan tan kaugsan. Kanian aligen tayo ra, “ag-itayo ontutundan manggawa na maabig.” (Gal. 6:9) Agtayo mapaga ta imbaga nen Jehova ya tulongan to tayo pian makapan-anos tayo. (1 Cor. 10:13) Ipikasi tayod sikato ya ikdan to tayo na masanton espiritu to, ta baleg so nitulong to ’tan pian mas makapan-anos tayo tan mansiansia so liket tayo. (Gal. 5:22; Col. 1:11) Panon to no wala ray onkokontra ed sika diad panlilingkor mo? Agka natatakot, mantiwala ka labat ed si Jehova. Tandaan mo ya agto ka paulyanan. Iter ton iter so biskeg ya kaukolan mo.—Heb. 13:6.

MANSASAGPOT IRAY ANGHEL PIAN MANSIANSIAN MALINIS SO KONGREGASYON

13. Antoy espisyal ya asainmin na saray anghel diad sayan kaunoran iran agew? (Mateo 13:​47-49)

¹³ Diad sayan kaunoran iran agew, walay espisyal ya asainmin ya inter nen Jehova ed saray anghel. (Basaen so Mateo 13:​47-49.) Lapud pampupulong tayo, milyon-milyon tan nanduruman klase na totoo ed interon mundo so magmamaliw ya interesado ed maong a balita. Say arum ed sikara et talagan uumanen day kabibilay da pian naunor da ray ganggan nen Jehova. Say arum balet andi. Antoy betang na saray anghel ed saya ey? Inyasain nen Jehova iray anghel pian “ibiig da iray mauges ed saray matunong.” Labay ton ibaga, proprotektaan day kongregasyon pian mansiansia itan ya malinis. Pero agto labay ya ibagan aglan balot makapawil ed kongregasyon iramay tinaynan day katuaan tan saramay agla nantultuloy ya manaral na Biblia. Tan agto met labay ya ibagan anggapo lan balot so onlesan problema diad loob na kongregasyon. Basta say segurado, mansasagpot ya maong iray anghel pian mansiansian malinis iray kongregasyon.

14-15. Panon tayon naalig so pansasagpot na saray anghel pian mansiansian malinis so kongregasyon? (Nengnengen met so litrato.)

¹⁴ Panon tayon naalig iray anghel diad pansasagpot dan pansiansiaen ya malinis so kongregasyon? Maabig no mitulongan so kada sakey ed sikatayo pian mansiansian malinis so kongregasyon tayo. Nagawaan mo ’tan no protektaan moy espiritualidad mo. Say pilim sirin ya kakaaro et saramay inar-aro day Jehova. Tan paliisan mo so siopaman o antokaman ya mauges so impluensya tod sika. (Sal. 101:3) Tulongan tayo met iray kaagian tayo ya mansiansian matoor ed si Jehova. Singa bilang, panon to no naamtaan mo ya akagaway seryoson kasalanan so sakey ya agi? Lapud panangarom ed sikato, bagaan mo ya katongtongen to ray elder. Pero no agto labay, sika lay mangibaga ed saray elder. Agmo la pababayagen. Kakkaukolan toy tulong iyan agi ta mansasakit ed espiritual!—Sant. 5:​14, 15.

¹⁵ Wala ray akagawa na seryoson kasalanan ya kaukolan ya ekalen ed kongregasyon. No ontan so nagawa, ‘tundaan tayo lay miulop’ ed sikara.c (1 Cor. 5:​9-13) Sayan uksoyan et makakatulong pian mansiansian malinis so kongregasyon. Tan diad tua, no agtayo miuulop ed saray nakal ed kongregasyon, parad pankaabigan da lanlamang itan. No nanengneng da ya matulok tayo ed satan ya uksoyan, ompan napakiwas ira ya ompawil ed si Jehova. Tan no ontan so nagawa, malikeliket tayo, si Jehova, tan saray anghel!—Luc. 15:7.

16. Antoy labalabay mon aligen ed saray anghel?

¹⁶ Maong labat ta impaisulat nen Jehova diad Biblia so maong ya alimbawa na saray anghel. Balbaleg ya pribilehyo ya makapikimeyan tayo ed sikara! Aligen tayo sirin so kapaabebaan da, panangaro dad saray totoo, panaanos da, tan say pansasagpot da pian mansiansian malinis so kongregasyon. No aligen tayo ray matoor ya anghel, mansiansia tayon parte na pamilya nen Jehova anggad angga!