“Kien nen Jehova so Panlalaban”

Ginmapo iyan isyu nen 1999. Imbaga na gobiernoy France ya kaukolan ya kaltasan na buis so amin ya donasyon ya naawat na branch office tayo ed France manlapud 1993 anggad 1996. Angisegep tayo na kaso ed korte diad France, pero atalo tayo. Inmapela tayo, balet pareho nin siansia so desisyon na korte. Kanian say ginawa na gobierno, angala ra ed bank account na branch office tayo na masulok ya 4.5 million euros ($6,300,000 U.S.). Say pag-asa tayo labat pian nabawi itan ya kuarta et no mangisegep tayoy kaso ed ECHR. Pero antis dan bembenan so kaso tayo, imbaga na ECHR ya kaukolan mi ni onatendi ed hearing tan onarap ed legal team na gobiernoy France kaiba so sakey ya representative na ECHR pian nanengneng no kasin makapan-aregloan kami la.

Inilaloan mi la ya seguradon ibaga na representative na ECHR ya manbayar tayo la na anggan melag labat ya porsiento to may buis ya kekerewen na gobiernoy France. Pero no manbayar tayo anggan sakey euro labat, nakontra tayo so prinsipyo na Biblia. Amay donasyon na saray agagi et parad Panarian, aliwan parad gobierno. (Mat. 22:21) Pero inmarap kami nin siansia ed saman ya hearing bilang respeto ed protocol na ECHR.

Agawa itan ya hearing ed sakey ya balibalin conference room na ECHR. Duga may inisip mi. Diad gapo ni labat, imbaga to la may representative ya kaukolan ya manbayar na buis iray Tasi nen Jehova, anggan melag labat ya porsiento na samay kekerewen na gobiernoy France. Singa walay nandagdag ed sikami, kanian agmi apigilan so mantepet. Say kuan mi, “Amta yo ya angala la so gobierno na masulok ya 4.5 million euros ed bank account mi?”

Abigbigla may representative. Nen inamin na legal team na gobiernoy France ya tua may ibabaga mi, anguman so siplog na dagem! Nampasnokan ira na samay representative tan sinumpal ton tampol so hearing. Agkami makapanisia. Alikliknak ya si Jehova so nanggaway paraan pian naipanalo mi iyan kaso. Kayari to man ya hearing, malikeliket kamin maong.

Nen Hunyo 30, 2011, nandesisyon so ECHR ya ilegal imay buis ya kekerewen na gobiernoy France. Ingganggan na ECHR so gobiernoy France ya ipawil da may kuartan inala da tan manbayar ni ra ingen na interes! Lapud sayan desisyon na ECHR, anggad natan et bulos ya makakapandayew iray agagi tayo ed France. Amay bigla labat ya intepet mi ya agmin balot impraktis et singa samay bato ya kinmutep ed moling nen Goliat. Aman manaya so mangipanalo ed sikatayo. Kanian akin et analo tayo? On ta singa samay imbaga nen David ed si Goliat, “kien nen Jehova so panlalaban.”—1 Sam. 17:​45-47.

Aliwan sayan kaso labat so naipanalo tayo. Anggano makapanyarin gobierno tan relihyon so kalaban tayo, 1,225 lan kaso so naipanalo tayo ed supreme court na 70 ya bansa tan anggan diad saray internasyonal ya korte. Lapud satan, naproprotektaan so karapatan tayo—singa say karapatan tayo ya nabidbir bilang sakey ya relihyon, say karapatan tayon manpulong, say karapatan tayon agmibiang ed saray nasyonalistikon seremonya, tan say karapatan tayon agmanpasaksak na dala.

Akin et akapila ak ed legal team ya angidepensa ed sayan kaso ed Europe anta diad saman et manlilingkor ak ed World Headquarters na Saray Tasi nen Jehova ed New York, U.S.A.?

MASETSESEG IRAY ATATENG KO

Saray atateng ko ya si George tan Lucille et nan-graduate ed koma-12 ya klase na Gilead. Manlilingkor ni ra ed Ethiopia nen niyanak ak nen 1956. Say ngaran ko et Philip ta inngaran da ak ed si Felipe, amay makulikulin ebanghelisador nen inmunan siglo. (Gawa 21:8) Diad tinmumbok ya taon, imbawal na gobiernoy Ethiopia so kimey na organisasyon tayo. Ugaw ak ni labat ed saman, pero natandaan ko ni may pasekreton pampupulong tan pipiaral na pamilya mi. Lapud agko ni natatalosan so nagagawa, nai-enjoy ko man! Pero makapaermen ta in-deport na gobierno so pamilya mi nen 1960.

Nanayam kami la ed Wichita, Kansas, U.S.A. Anggano duma lan lugar so kawalaan mi, aga abawasan so seseg na saray atateng ko ya singa nen misionero ni ra. Balibali so alimbawa da tan impuppurek da so katuaan ed siak tan ed duaran agagik ya inyanak met ed Ethiopia—si atsik Judy tan say agi min laki ya si Leslie. Abautismoan ak nen 13 so taon ko. Tan kayari na taloy taon, tinmulong kamin pamilya ed lugar ya daiset so Tasi, diad Arequipa, Peru, tan ditan kami la nanayam.

Nen 1974, nen 18 ni labat so taon ko, inyasain ak na branch office na Peru ya manlingkor bilang espisyal payunir, kaibay apatira nin brother. Imbaki da kamin manpulong ed saray lugar ya agnin balot apulongan diad Andes Mountains. Kaibad teritorya mi so komunidad na saray katutubo ya say salita ra et Quechua tan Aymara. Say uusaren mid panagpulong et truck ya ginawa lan singa abung. Singa balbaleg ya kahon so itsura to, kanian tinawag mi itan ya Biong. Agko nalinglingwanan iman ya panaon. Malikeliket ak kada no ibabasak ed saray katutubo so ibabaga na Biblia ya asingger lan ekalen nen Jehova so kairapan, sakit, tan patey. (Apo. 21:​3, 4) Dakel ed sikara so nagmaliw ya lingkor nen Jehova.

ATAWAG AK ED WORLD HEADQUARTERS

Nen 1977, binmisita ed Peru si Brother Albert Schroeder ya diad saman et sakey ed saray membro na Mananguley ya Ulop na Saray Tasi nen Jehova. Pinaseseg da ak ya man-apply ed world headquarters diad Brooklyn Bethel. Kanian nan-apply ak. Atawag ak ya manlingkor ed Bethel diad saman lanlamang ya taon nen Hunyo 17, 1977. Diad unonan apat taon kod Bethel, niyasain ak ed Cleaning department tan asalik met ed Maintenance department.

Nen Hunyo 1978, walay akabat kon sister diad internasyonal ya kombension ed New Orleans, Louisiana—si Elizabeth Avallone. Maespiritual met iray atateng to ya singa saray atateng ko. Apat taon lan regular payunir ed saman si Elizabeth tan labay ton itultuloy so full-time ya panlilingkor to diad interon bilay to. Nankabatan kamin maong ya anggad naar-aro mi sakey tan sakey. Nankasal kami nen Oktubre 20, 1979, tan nanlingkor kamin dua ed Bethel.

Maar-aro iray agagi diad samay unonan kongregasyon mi, say Brooklyn Spanish congregation. Diad inlabas na saray taon, niyasain kami ed talora nin kongregasyon. Maar-aro iray agagi tan masutsuporta irad panlilingkor mi ed Bethel. Misatsalamat kami ed tulong da, ontan to met ed saray kakaaro tan kakanayon mi ya tinmulong ed sikami diad impangasikaso mid saray atateng mi nen matatken la ra.

NIYASAIN AK ED LEGAL DEPARTMENT

Nen Enero 1982, abigbigla ak ta inyalis da ak ed Legal Department. Kalabas na taloy taon, pinan-aral da ak ed law school pian magmaliw ak ya abogado. Legan ak ya manaaral, naamtaan ko ya dakel la manayan kaso so naipanalo na Saray Tasi nen Jehova. Lapud saratan ya impanalo tayo, agunggonaan met so arum ya totoo ed United States tan ed arum ya bansa ta nagmaliw ya mas malinew so karapatan na kada too. Inaral min maong iratan ya kaso diad klase mi.

Nen 1986, aturo ak bilang overseer na Legal Department. Trenta ni labat so taon kod saman. On tua, malikeliket ak ta baleg so tiwala na Bethel ed siak anggano ugaw ak ni. Pero aburido ak met ta amtak ya ambelat iyan asainmin tan dakel ni agko amta.

Nen 1988, nagmaliw ak ya abogado. Pero agko aliklikas ya naapektoan la manayay espiritualidad ko lapud impanaral ko. Diman ko anengneng ya no mangala kay atagey ya edukasyon, sarag to kan gawaen ya maambisyon, tan say pakaliknam et mas atagey ka nen saramay ag-akapanaral. Maong labat ta wadtay asawak. Tinulongan to ak pian nipawil ko may datin espiritual ya rotinak antis ak ya manaral ed law school. Medyo abayag met, pero kalkalnan pinmawil so maapit ya relasyon kod si Jehova. Apatunayan ko ya say liket tayo et ag-akadepende ed talino odino ed karakel na inaral tayo. Nalikna tayo labat so tuan liket no maapit so relasyon tayo ed si Jehova tan ed saray agagi.

TINMULONG AK PIAN NIDEPENSA SO MAONG A BALITA

Kayarik ya nanaral ed law school, tinmulong ak ed pangasikaso na saray legal ya pankaukolan na Bethel tan ed pangidepensa ed karapatan tayon manpulong. Nai-enjoy koy asainmin ko, pero wala met iray subok ta mapmaples ya onlalaknab tan manguuman so organisasyon tayo. Singa bilang nensaman, walay nigeter ya kontribusyon parad saray publikasyon tayo. Pero nen 1991, niyasain so Legal Department ya ontulong pian nauman iyan uksoyan. Manlapu lad saman, makaala la iray totoo na saray publikasyon tayo anggano ag-ira mangiter na kontribusyon. Lapud sayan uksoyan, mas nagmaliw ya simpli so kimey ed Bethel, pati say panagpulong tayo. Akatulong iya pian napaliisan tayo ray problema ed panagbuis. Pero lapud sayan pananguman, inisip na arum ya agagi ya ompan naupotan tayoy pundo, kanian agtayo la makaimprinta na saray publikasyon ya iter tayod saray totoo tan agla magmaliw ya mabunga so ministeryo tayo. Pero kabaliktaran so agawa. Manlapu la nen 1990, adoble so bilang na saray lingkor nen Jehova. Tan natan, matmainomay lan na-access na totoo iray publikasyon tayo, tan libre labat iratan ya amin. Anengneng ko ya anggano baleg tay pananguman, maong so pansumpalan to diad tulong nen Jehova tan diad panangigiya na matoor ya aripen.—Exo. 15:2; Mat. 24:45.

Anengneng ko met ya say rason no akin ya wala ray naipapanalo tayon kaso ed korte et aliwa labat ya lapud marundunong iray abogado tayo, noagta lapud maabig ya ugali na saray lingkor nen Jehova. Mabetbet ya atan so rason no akin ya napapakiwas iray huis tan saray opisyal na gobierno ya ontulong ed sikatayo. Say nanonotan kon alimbawa et amay nen inmatendi so taloran membro na Mananguley ya Ulop kaibay kaasawaan da ed pigaran kombension ed Cuba nen 1998. Anengneng na saray opisyal na gobierno ya maomaong tan marespeto ira. Akatulong itan pian nakombinse ira ya talagan neutral tayo ed politika. Amay impanengneng da ya maong ya ugali et mas baleg so agawaan to nen say akadkaunan impitongtong mi ed saray opisyal.

No maminsan balet, no aga naalad maong ya tongtongan, napilitan tayon mangisegep na kaso ed korte pian ‘nidepensa so maong a balita tan makala tayoy legal a kanepegan ya ipulong itan.’ (Fil. 1:7) Singa bilang, pigaran dekada ya agbibidbiren na saray opisyal na gobierno ed Europe tan South Korea so karapatan tayon mandesisyon ya agmibiang ed military. Lapud satan, manga 18,000 ya brother ed Europe tan masulok ya 19,000 ya brother ed South Korea so nipriso ta agnaako na konsiensia ra so pan-training ed military.

Pero nen Hulyo 7, 2011, nandesisyon ya siansia so ECHR ed samay kason Bayatyan v. Armenia. Inobliga na satan ya korte so amin ya bansa ed Europe ya payagan dan man-alternative civilian service iramay agnaako na konsiensia ra so pan-training ed military. Insan nen Hunyo 28, 2018, ontan met so nagmaliw ya desisyon na South Korean Constitutional Court. Agtayo manalo ed saratan ya kaso no agnansiansian matoor iray kabataan ya brother ed Europe tan South Korea.

Mansasagpot ya maong so Legal Department ed headquarters tan ed amin ya branch office tayo ed interon mundo pian nidepensay karapatan tayon mandayew ed si Jehova tan ipulong so Panarian. Kagalangan min idepensa iray agagi ya papasegsegangen na gobierno. Anggano wala ray panaon ya agtayo manalo ed sakey ya kaso, ayos labat ta baleg la itan ya pantasi ed “saray gobernador tan arari . . . tan ed saray nasyon.” (Mat. 10:18) Nibagak itan ta mangiiyan kami na saray teksto ed saray ipapasa min legal ya dokumento, kanian nababasa itan na saray huis, opisyal na gobierno, say media, tan anggan say publiko. Tan manbibitla kami met na saray teksto legan na panaglitis. Akatulong itan pian naamtaan na saray mapaabeban totoo no siopan talaga iray Tasi nen Jehova tan no iner akabase iray papanisiaan tayo. Say arum ed sikara et kaagian tayo la natan.

SALAMAT JEHOVA!

Diad masulok ya 40 ya taon, ipapasen kon baleg ya pribilehyo so makapitulongan ed pangasikaso ed saray legal ya pankaukolan na saray branch office ed interon mundo. Kagalangan ko met so onarap ed saray ataragey ya korte tan ed nanduruman opisyal na gobierno. Inar-arok tan pandinayewan ko iray katrabahok ed Legal Department diad world headquarters tan ed saray legal department na saray branch office tayo ed interon mundo. Nibagak ya benendisyonan ya maong nen Jehova so bilay ko, kanian anggapo lay arum nin anapen ko.

Misatsalamat ak met ed maar-aron asawak ya si Elizabeth. Diad apalabas ya 45 ya taon, wadtan ya lanang parad siak, diad irap man o inawa. Pambiliban ko ta masutsuporta ed siak anggano walay graben sakit ya liliknaen to tan mabetbet lan makapuy so laman to.

Anengneng min mismo ya antokaman so subok o pilalaban ya aarapen tayo, nasarag tayo iratan aliwan lapud sarili tayon biskeg o abilidad. Singa samay imbaga nen David, “Si Jehova so biskeg na totoo to.” (Sal. 28:8) On, “kien nen Jehova so panlalaban.”