Agka Manpapatalo ed Saray Mauges ya Pilalek Mo

1. Antoy nasasali na amin ya totoo?

NASASALIM may natutukso kan manggaway aliwa anggano antam ya ag-itan labay nen Jehova? Ompan isipen mo ya sika labat so makakaliknay ontan. Pero oniay ibabaga na Biblia: “Anggapoy tukso a sinmabid sikayo ya agni asali na arum a totoo.” (1 Cor. 10:13)a Labay ton ibaga, antokaman tay mauges ya pilalek ya lalabanan mo, seguradon walan-walay arum ya too ya ontan met so lalabanan to. On, agmo bukbukor. Tan tandaan mo ya diad tulong nen Jehova, sarag mon daegen so tukso.

2. Anto ray tukso ya nayarin lalabanan na arum ya Kristiano tan anggan saray iyaaralan na Biblia? (Nengnengen met so litrato.)

² Nia ni sakey ya ibabaga na Biblia: “Nasusubok so kada sakey sano sikatoy nasagyat tan natangguyor na dilin pilalek to.” (Sant. 1:14) Base ed sayan teksto, walay kanya-kanyan kakapuyan o mauges ya pilalek ya lalabanan tayo. Singa bilang, wala ray Kristiano ya nayarin natutukson manggaway seksual ya imoralidad. Ompan say arum ingen et natutukson manggaway imoral ed kapara dan laki o kapara dan bii. Wala ray agagi tayo ya nitunda da lay manbantay na pornograpiya pero ompan natutukso iran manbantay lamet. Say arum et nitunda da met lay sobran kakainum da na alak o say pan-drugs. Pero ompan no maminsan et anap-anapen da nin siansia itan. Pigara labat iratan ed saray tukso ya lalabanan na saray Kristiano tan anggan saray iyaaralan na Biblia. On, anggapoy nipuera ed tukso, kanian walan-walay panaon ya nalikna tayo met imay alikna nen apostol Pablo. Kuan to: “Sano labay kon gawaen so duga, say mauges so walad siak.”—Roma 7:21.

3. Antoy nalikna na sakey ya too no walay lalabanan ton mauges ya pilalek ya pawil-pawil labat?

³ No walay lalabanan mon mauges ya pilalek tan pawil-pawil labat itan, ompan say pakaliknam et talagan agmo nayarian ya labanan so tukso. Ompan naliknam met ya agka la karapat-dapat ya manbilay na andi-anggaan ta agla naliliketan si Jehova ed sika. Pero aglabay nen Jehova ya ontan so naliknam ta aliwan tua iratan. Pian nakombinse ka ya aliwan tua iratan, pantongtongan tayod sayan artikulo iyan duaran tepet: (1) Akin kasi et ontan so naliliknam? (2) Antoy gawaen mo pian agka natalo na mauges ya pilalek mo?

PAKANA ITAN NEN SATANAS

4. (a) Antoy labay nen Satanas ya nalikna tayo no natutukso tayo? (b) Tua kasi ya agtayo nayarian ya labanan so tukso? Ipaliwawa.

⁴ Labay nen Satanas ya nalikna tayon agtayo nayarian ya labanan so tukso. Diad tua, gagawaen toy anggaay nayarian to pian natukso itayo. Amta itan nen Jesus kanian oniay imbangat tod saray papatumbok to ya ipikasi da ed si Jehova: “Agmo aabuloyan a napelag kami ed tukso, noagta iliktar mo kami ed samay mauges.” (Mat. 6:13) Labay nen Satanas ya patunayan ya tua may akusasyon to ed saray totoo—ya agtayo la kuno unoren si Jehova no natutukso tayon manggaway aliwa. (Job 2:​4, 5) Pero isip mo pa: Siopay ag-inmunor ed si Jehova ta matmainomay ya adaeg na mauges ya pilalek to? Di ba si Satanas? Labay to sirin ya papawayen ya pareho tayo labat ed sikato ya matmainomay tayo met ya benegan si Jehova no walay tukso. Inisip to ingen ya anggan say mismon Anak na Dios et singa sikato ya basta-basta labat ombigay ed tukso! (Mat. 4:​8, 9) Pero talaga kasin agtayo nayarian ya labanan iray mauges ya pilalek tayo? Andi! Nayarian tayo diad tulong nen Jehova! Atan may punto nen apostol Pablo nen insulat ton: “Walay biskeg kon arapen so amin a bengatla lapud samay mangiiter ed siak na pakayari.”—Fil. 4:13.

5. Panon tayon amta ya baleg so tiwala nen Jehova ya nayarian tayon labanan iray mauges ya pilalek tayo?

⁵ Duman maong balet si Jehova ed si Satanas. Baleg so tiwala nen Jehova ya nayarian tayon labanan iray mauges ya pilalek tayo. Panon tayon amta? On ta abaybayag lan impropesiya nen Jehova ya walay baleg ya ulop ya manmatoor ed sikato tan makaliktar ed baleg a kairapan. Isip mo pa: Say Dios ya agto nayarian so mantila so mismon angibaga ya dakdakel so makaloob ed balon mundo, aliwa labat ya pigpigara. “Akasulong ira na amputin kawes”—labay ton ibaga, malinis ira ed pakanengneng to. (Apo. 7:​9, 13, 14) On, diad pakanengneng nen Jehova, sarag tayon daegen iray mauges ya pilalek tayo tan nayarian tayoy mansiansian malinis anggad balon mundo.

6-7. Anto ni labay nen Satanas ya nalikna tayo no wala ray mauges ya pilalek tayo?

⁶ Labay met nen Satanas ya nalikna tayon agtayo karapat-dapat ya manbilay na andi-anggaan lapud wala ray mauges ya pilalek tayo. Pero isip mo pa: Siopan talagay aga karapat-dapat ya manbilay na andi-anggaan? Di ba si Satanas? Sikatoy senentensiaan la nen Jehova ya naderal! (Gen. 3:15; Apo. 20:10) On, anggapo lay ilalo to. Pero sikatayo, wala! Kanian ampetang so ulo to. Labay ton papawayen ya anggapo met so ilalo tayo. Pero aliwan tua ’tan. Ipapaseguro na Biblia ya ‘aglabay nen Jehova a walay siopaman a naderal noagta labay to ya amin et naikday pankanawnawan magbabawi.’ (2 Ped. 3:9) On, labay to tayon tulongan nen Jehova pian manbilay tayo na andi-anggaan.

⁷ Kanian no bilang ta iisipen mo ya agmo nayarian ya labanan iray mauges ya pilalek mo tan agka karapat-dapat ya manbilay na andi-anggaan, tandaan mo ya si Satanas so malabay ya ontan so naliknam. Ekal mo iratan ya tampol ed nonot mo, ta pakana to iratan!—1 Ped. 5:​8, 9.

EPEKTO MET ITAN NA ATAWIR TAYON KASALANAN

8. No imbagan kasalanan, kasin ontutukoy labat itan ed panggaway aliwa? Ipaliwawa. (Salmo 51:5) (Nengnengen met so “Kabaliksan na Salita.”)

⁸ Aliwan si Satanas labat so rason no akin ya nalilikna tayon agtayo nayarian ya labanan iray mauges ya pilalek tayo tan agtayo karapat-dapat ya manbilay na andi-anggaan. Say sakey nin rason no akin ya ontay nalilikna tayo et lapud kasalanan ya atawir tayod inmunan atateng tayo.b—Job 14:4; basaen so Salmo 51:5.

9-10. (a) Antoy alikna nen Adan tan Eva nen makasalanan la ra? (Nengnengen met so litrato.) (b) Anto met so nalilikna tayo natan lapud atawir tayon kasalanan?

⁹ Imanoen no antoy alikna nen Adan tan Eva nen nagmaliw iran makasalanan. Nen agda inunor si Jehova, inmamot ira tan nanggawa ray naisakbong dad laman da. Lapud makasalanan la ra, nakokonsiensia, natatakot, aburido ran maong, tan nababaingan ira. No isipen tayoy situasyon da, singa ra atalakan ed abung ya apatira labat so kuarto to. Tua, makaliber ira ed nanduruman kuarto, pero ag-ira makapaway ed samay abung. On, agda la natakasan so epektoy kasalanan. Kanian anggan antoy gawaen da, agda naiwasan so nakonsiensia, ontakot, naaburido, tan ombaing.

¹⁰ Pero walay pidumaan tayo ed si Adan tan Eva. Agla onaplika so dondon ed sikara. Sikatayo balet, sarag itayon perdonaen nen Jehova tan nawalaan tayoy malinis ya konsiensia lapud dondon. (1 Cor. 6:11) Pero tandaan, makasalanan tayo nin siansia ta atawir tayo itan ed sikara. Kampegan nalilikna tayo met imay alikna ra—nakokonsiensia, natatakot, nanaaburido, tan nababaingan tayo met! Diad tua, ibabaga na Biblia ya makmaksil so impluensya na kasalanan ed saray totoo, “anggan diad saramay say kasalanan da et aliwan singa ed insumlang nen Adan.” (Roma 5:14) On, say atawir tayon kasalanan so sakey ya rason no akin ya nalilikna tayon agtayo nayarian ya labanan iray mauges ya pilalek tan agtayo karapat-dapat ya manbilay na andi-anggaan. Panon tayon nalabanan so ontan ya liknaan?

11. No bilang ta ididikta na isip mo ya agmo nayarian ya labanan iray mauges ya pilalek mo, anto dapat so gawaen mo, tan akin? (Roma 6:12)

¹¹ Lapud makasalanan tayo, singa walay boses ya mandidikta ed sikatayo ya say ibabaga to et agtayo nayarian ya labanan iray mauges ya pilalek. No narengel mo la itan ya boses, agmo komon dedengelen. Akin ey? On ta no dengelen mo, singa ka labat unor-unor ed kasalanan. Pero say kuan na Biblia, agtayo dapat aabuloyan ya “man-ari” so kasalanan. (Basaen so Roma 6:12.) Labay ton ibaga, agtayo ompapayag ya kontrolen itayo na kasalanan. On, anggano wala ray mauges ya pilalek tayo, wala nin siansia ed sikatayo so desisyon no kasin gawaen tayo itan o andi. (Gal. 5:16) Baleg so tiwala nen Jehova ya sarag tayon labanan so tukso. Ta no agtayo sarag, di agto tayo komon iganggan ya labanan iray mauges ya pilalek tayo. (Deu. 30:​11-14; Roma 6:6; 1 Tes. 4:3) Kanian imbes ya manpakontrol ka ed mauges ya pilalek mo, labanan mo. Sarag mo ’tan!

12. No bilang ta ididikta na isip mo ya agka karapat-dapat ya manbilay na andi-anggaan, anto dapat so gawaen mo, tan akin?

¹² Lapud makasalanan tayo, singa wala ni sakey ya boses ya mandidikta ed sikatayo. Say ibabaga to et agtayo karapat-dapat ya manbilay na andi-anggaan ta senentensiaan to tayo la kuno nen Jehova lapud walay mauges ya pilalek tayo. No narengel mo la itan ya boses, agmo komon dedengelen. Akin ey? On ta kontra itan ed ibabaga na Biblia ya natatalosan nen Jehova so situasyon tayo ta amta to ya makasalanan itayo. (Sal. 103:​13, 14) “Amta to so amin a bengatla” nipaakar ed sikatayo. (1 Juan 3:​19, 20) Kanian no walay lalabanan mon mauges ya pilalek, amta to no akin ya ontan so naliliknam tan no panon ya akaapekto ed sika so atawir mon kasalanan. Pero aya so tandaan mo: Anggano walay mauges ya pilalek mo pero lalabanan mo tan agmo itan gagawaen, makaseguro ka ya malinis ka ed pakanengneng nen Jehova. Akin et makaseguro ka ed satan?

13-14. No walay mauges ya pilalek tayo, labay to kasin ibaga, agtayo la makapaliket ed si Jehova? Ipaliwawa.

¹³ Ipapanengneng na Biblia ya baleg so pandumaan na pampilalek ya manggaway aliwa tan say panggawa na aliwa. No maminsan, basta labat onsulpot iray mauges ya pilalek tayo anggano agtayo gagagalaen. Pero walad sikatayoy kontrol no kasin unoren tayo itan ya pilalek o andi. Singa bilang, isipen pa iramay agagi ed Corinto nen inmunan siglo ya datin homoseksual. Oniay insulat nen Pablo: “Ontan so arum ed sikayo nensaman.” On, nitunda da lay homoseksual ya kagagawa ra. Pero labay to kasin ibaga, manlapu la nen nagmaliw iran Kristiano, agda lan balot pinilalek iray homoseksual ya kagagawa? Andi, imposible ya agda lan balot itan alikna, lalo la ta apasalan da lay ontan ya kabibilay. Pero anggano walay ontan ya pilalek da, tuloytuloy dan nilabanan itan tan agla ra nanggawa na homoseksual ya kagagawa, kanian apaliket day Jehova. Diad pakanengneng to, “naurasan tan alinisan” la ra. (1 Cor. 6:​9-11) Ontan met so pakanengneng nen Jehova ed sika no lalabanan moy mauges ya pilalek mo tan pansasagpotan mon ag-itan gawaen.

¹⁴ Antokaman tay mauges ya pilalek mo, makapantiwala ka ya nalabanan mo itan. Anggano pawil-pawil itan, tandaan mo ya sarag mon kontrolen so sarilim tan sarag mon iwasan iray “labalabay na laman tan kanonotan [mo].” (Efe. 2:3) Anto ray sarag mon gawaen pian agka natalo na mauges ya pilalek mo?

ANTOY GAWAEN MO PIAN AGKA NATALO NA MAUGES YA PILALEK MO?

15. Pian nalabanan tayoy mauges ya pilalek tayo, antoy kaukolan tayon aminen ed sarili tayo, tan antoy agtayo dapat gagawaen?

¹⁵ Pian nalabanan moy mauges ya pilalek mo, kaukolan mon aminen ed sarilim ya walay kakapuyan mo. No mankatunongan ka ni, singam “papalikdoen” o lolokoen so sarilim. (Sant. 1:22) Singa bilang, isipen pa so toon problema toy kakainum toy alak. Ompan irason to ya, ‘Mas dakel ni ingey iinumen na arum nen say siak.’ Odino isipen pa met so toon say kakapuyan to et onnengneng ed pornograpiya. Ompan tetelen toy misis to tan ibaga ton, ‘Agak komon natukson onnengneng ed pornograpiya no malambing si misis ko.’ No ontan so panagkatunongan na sakey, mas mainomay ya natukson manggaway aliwa. Kanian imbes ya manrason o manbaraan ka, awat mo ya walay kakapuyan mo, tan agmo teteteley arum.—Gal. 6:7.

16. Panon mon nipanengneng ya talagan desidido ka ya gawaen so duga?

¹⁶ Nia ni sakey ya makatulong pian nalabanan moy mauges ya pilalek mo: Antis nin onsabi so tukso, dapat desidido ka la ya gawaen so duga. (1 Cor. 9:​26, 27; 1 Tes. 4:4; 1 Ped. 1:​15, 16) Panon mon nipanengneng ya talagan desidido ka? Likas mo no anto ray pakakatuksoan mo tan no kapigan ka mas mainomay ya natukso. Singa bilang, kasin mas nanairapan kan labanan so mauges ya pilalek mo no naknaksawan ka odino no aralem lay labi? Iparaan mo la sirin so sarilim ed ontan iran situasyon tan mas manalwar ka diad ontan iran oras. Isip mo met lan patiuna no antoy gawaen mo. On, iparaan mo lay isip mo pian antam lay gawaen mo antis nin onsabi so tukso.—Pro. 22:3.

17. Antoy naaralan tayo ed alimbawa nen Jose? (Genesis 39:​7-9) (Nengnengen met so litrato.)

¹⁷ Imanoen pa may ginawa nen Jose nen inakit na asawa nen Potifar. Kasin nannonotan to ni no antoy gawaen to? Andi, tinmanggi ya tampol! (Basaen so Genesis 39:​7-9.) Akin kasi et onmay reaksion to? On ta antis nin inakit na asawa nen Potifar, desidido lay Jose ya gawaen so duga. Agto labay so mirelasyon ed agto asawa ta amta ton kasalanan itan. Alig moy Jose, antis nin onsabi so tukso, dapat desidido ka la ya gawaen so duga. Pian no wala lad arapan mo so tukso, agka la mannonot no antoy gawaen mo ta patiuna ka lan nandesisyon ya say gawaen mo et no antoy duga.

LANANG MON USISAEN SO SARILIM

18. Anto ni sarag mon gawaen pian tuloytuloy mon nalabanan so mauges ya pilalek mo? (2 Corinto 13:5)

¹⁸ Pian tuloytuloy mon nalabanan so mauges ya pilalek mo, lanang mon “suboken” o usisaen so sarilim. (Basaen so 2 Corinto 13:5.) Singa bilang, isip mo pa ray agawa nen imbebeneg ya agew ya nipaarap ka ed tukso. Antoy nagmaliw ya reaksion mo tan antoy walad isip mo? No pawilen mo man ya situasyon, ompan walay naisip mo ya mas marakep komon ya ginawam. Anggano alabanan mo so tukso, tepetan mo nin siansiay sarilim: ‘Kasin pinmaliis o tinmanggi ak ya tampol?’ No say ebat mo et andi, agka komon nadidismaya. Imbes, ipasen mo ya sinyales itan ya kaukolan mo nin pabiskegen so determinasyon mo ya gawaen so duga. Tepetan mo sirin so sarilim na onia ran tepet: ‘No walay imoral ya onsebang ed nonot ko, anto kasi gawaen ko pian nabural itan ya tampol ed isip ko? Kumusta ray babantayan, babasaen, o dedengelen ko ey? Kasin aratan laingen so manutukso ed siak ya manggaway aliwa? No walay nanengneng kon malaswa ya litrato o eksena, kasin ipapaliis kon tampol so matak? Kasin natatalosan ko ya parad pankaabigan ko lanlamang no kontrolen koy sarilik tan unoren koy Jehova?’—Sal. 101:3.

19. Akin et kaukolan tayoy manalwar ed anggan saray angkekelag ya desisyon ya gagawaen tayo? Mangiter na alimbawa.

¹⁹ Usisam met so sarilim ta ompan wala ra manayay gagawaen mo ya makapuy so epekto tod sika pero manbubulagbulagan ka labat. Delikado itan ta say kuan na Biblia: “Say puso et agnapanmatalkan nen say antokaman a bengatla tan desperado.” (Jer. 17:9) Imbaga ingen nen Jesus ya say puso so “panlalapuan na saray mauges a panagkatunongan.” (Mat. 15:19) Singa bilang, isipen pa so sakey a too ya nitunda to lay onnengneng ed pornograpiya. No medyo abayag to met lan nitunda itan, ompan isipen to ya agmet makapuy no onnengneng ed makapaakit ya litrato ta irason ton aliwa met ya labos-lakseb may nenengnengen to. Odino ompan isipen to, ‘Ayos labat so manpantasyay imoral ta iimadyinen ko met labat, agko met aktual ya gagawaen.’ No ontan so panagkatunongan na sakey ya too, aloko la na puso to tan singa to la ‘iplaplano no panon ton peneken iray pilalek na laman to.’ (Roma 13:14) Antoy gawaen mo pian ag-itan nagawad sika? Manalwar ka ed anggan saray angkekelag ya desisyon ya gagawaen mo. Ta no andi, saratan ya angkekelag ya desisyon et nayarin ompelag ed seryoson kasalanan.c Agka la mankakatunongan. No antam ya makapuy, agmo la gagawaen. Agka ompapayag ya lokoen ka na pusom!

20. Antoy iilaloan tayon nagawad arapen, tan antoy nepeg tayon tandaan natan?

²⁰ On, diad tulong nen Jehova, sarag tayon labanan so tukso. Misatsalamat tayo met ta lapud dondon, walay ilalo tayon manbilay na andi-anggaan diad balon mundo. Diad satan ya panaon, talagan akapokus tayo labat ed maliket ya panlilingkor tayod si Jehova ta anggapo lay mauges ya pilalek ya kaukolan tayon labanan. Pero anggad agni itan sinmabi, kaukolan tayon labanan iray mauges ya pilalek tayo. Agmo sirin iisipen ya agmo nayarian ya labanan so mauges ya pilalek mo tan agmo met iisipen ya agka karapat-dapat ya manbilay na andi-anggaan. No tuloytuloy kan milaban, bendisyonan nen Jehova so sagpot mo, tan seguradon manalo ka!