Natulongan Ka na Libron Job no Walay Mairap ya Dadalanen Mo

1-2. Anto ray rason akin et sulit ya basaen so libron Job?

KASIN asalim lan abasa so libron Job? Insulat iyan libro manga 3,500 taon lay apalabas. Anggano datdaan la iya, dakel so mangibabaga ya diad amin ya insulat ya libro ed interon mundo, sakey iya ed saray obra maestra! Pambiliban da imay nansulat ed sayan libro ta simpli labat iray salitan inusar to, pero tagos ed puso. Si Moises so nansulat ed sayan libro, pero say talagan Autor to iya et si Jehova.—2 Tim. 3:16.

² Say libron Job et importantin kabiangan na Biblia. Akin ey? On ta impalinew na sayan libro so sankaimportantian ya isyu ya nalalanor so amin ya anghel tan totoo: say pamasanto ed ngaran nen Jehova. Dakel met so naaaralan tayo ditan nipaakar ed saray makapadinayew ya kualidad nen Jehova—singa say panangaro, karunongan, hustisya, tan pakayari to. Singa bilang, 31 ya beses ya abitla ed libron Job ya si Jehova so “Makapanyarin-amin.” Ebatan met na libron Job iray importantin tepet tayo. Sakey la ditan imay abaybayag lan itetepet na totoo ya: Akin et aabuloyan na Dios so paniirap?

3. Anto ni sakey ya rason akin et marakep ya araley libron Job?

³ No wala kad toktok na palandey, nanengneng moy amin ya walad kaliberliber mo. Mipadpara, no basaen moy libron Job, singa ka onkakalab ed palandey ta nanengneng mo ray bengabengatla base ed pakanengneng nen Jehova. Pantongtongan tayo ed sayan artikulo no panon ya makatulong so libron Job no walay mairap ya dadalanen tayo. Pantongtongan tayo met no panon ya akaaral iray Israelita nensaman ed istoryay bilay nen Job, tan no anto met so naaralan tayo natan. Tan diad sampot, pantongtongan tayo no panon tayon usaren so libron Job pian natulongan tayo met so arum.

INABULOYAN NEN JEHOVA YA MANIRAP SI JOB

4. Akin et duman maong si Job ed saray Israelita ya walad Ehipto?

⁴ Diad samay panaon ya naaripen iray Israelita ed Ehipto, walay sakey ya laki ya say ngaran to et Job ya manaayam ed Uz. Say kawalaan na Uz et nayarin diad bandad bukig na Insipan ya Dalin, tan wala itan ed norte na Arabia. Balbaleg so pidumaan nen Job ed saray Israelita. Wala ray Israelita ed Ehipto ya nandayew lad palson dirios. Pero si Job, matottoor ed si Jehova. (Jos. 24:14; Eze. 20:8) Oniay imbaga nen Jehova nipaakar ed si Job: “Anggapoy miparad sikato diad dalin.”a (Job 1:8) Si Job et respetadon too tan “sankayamanan ed amin a taga Bukig.” (Job 1:3) Anta sikat tan maimpluensya, matoor balet ya manlilingkor ed Dios. Kampegan ampetang so ulo nen Satanas ed si Job!

5. Akin et inabuloyan nen Jehova ya manirap si Job? (Job 1:​20-22; 2:​9, 10)

⁵ Imbaga nen Satanas ed si Jehova ya no manirap si Job, seguradon agla manlingkor ed Sikato. (Job 1:​7-11; 2:​2-5) Inar-aron maong nen Jehova si Job. Pero lapud ambelat imay akusasyon nen Satanas, inmabuloy ya pruebaan nen Satanas no kasin tua may akusasyon to. (Job 1:​12-19; 2:​6-8) Inaala nen Satanas iray ayayep nen Job, pinatey toy samploran ananak to, tan dinapoan toy makapadimlan sakit, ya lapud satan et napnoy pelsa so interon laman to, manlapud dapan ya anggad toktok na ulo. Pero anggan antoy gawaen nen Satanas, desidido si Job ya ag-ikbanan so katooran to. (Basaen so Job 1:​20-22; 2:​9, 10.) Sinmabi panaon, pinaabig nen Jehova si Job, inikdan to na mas dakel nin kayamanan, tan benendisyonan to na samplora nin ananak. Pinmawil met so respeto na totoo ed si Job. Benendisyonan met nen Jehova si Job na andukey ya bilay. Nambilay ni na 140 ya taon kanian anengneng to ni ray apo na saray apo to. (Job 42:​10-13, 16) Panon ya akatulong so istoryay bilay nen Job ed saray lingkor na Dios nensaman, tan panon met itan ya makatulong ed sikatayo natan?

6. Panon ya akatulong ed saray Israelita so istoryay bilay nen Job? (Nengnengen met so litrato.)

⁶ No antoy naaralan na saray Israelita nensaman. Mair-irap so bilay na saray Israelita nen wala rad Ehipto. Singa bilang, imadyin yo pay bilay ya abangonan nen Josue tan Caleb. Ugugaw ni ra labat, aripen la ra. Insan nanakar-akar irad kalawakan diad loob na 40 ya taon lapud adamay irad kasalanan na saray rebelden Israelita. Seguradon akatulong sirin so istoryay bilay nen Job ed saray Israelita tan ed saray ananak tan apo da pian natalosan da no siopan talagay panlalapuan na paniirap tan no akin ya aabuloyan itan na Dios. Akatulong met so istoryay bilay nen Job pian naamtaan da ya importantin maong ed si Jehova so katooran na sakey ya too, tan seguradoen To ya nabendisyonan iray matoor ya lingkor To.

7-8. Panon ya makatulong so libron Job ed saray totoon maniirap? Mangiter na alimbawa.

⁷ No antoy naaralan tayo natan. Dakel ya totoo natan so agla manisia ed Dios ta agda natatalosan no akin ya aabuloyan ton manirap iray maong ya totoo. Say sakey et si Hazelb ya taga Rwanda. Nen ugaw ni, manisia ed Dios, pero anguman itan nen wala ray aliwliwan agawa ed bilay to. Nansian iray atateng to tan akiasawa lamet si nanay to. Legan ya ombabaleg si Hazel, minaltrato na stepfather to. Insan nen tinedyer lay Hazel, walay nan-rape ed sikato. Mimimisa kuno pian onlemew komoy liknaan to, pero anggapo met lanlamang. Kanian nanggaway sulat si Hazel ya ditan et imbalikas toy nalilikna tod Dios. Oniay insulat to: “Dios ko, manpipikasi ak met ed sika tan maong ak ya too, akin balet et puros irap so iiter mod siak? Manlapud natan, lingwanan ta ka la tan gawaen ko lay labalabay ko.” Singa si Hazel, say amta na dakel ya totoo natan et manlalapud Dios so paniirap da. Makapaermen ta mair-irap la lanti situasyon da, agda ni amta no antoy tua.

⁸ Pero sikatayo, amta tayoy tua. Naaralan tayod libron Job ya aliwan say Dios so panlalapuan na paniirap; si Satanas! Naaralan tayo met ed istoryay bilay nen Job ya no maniirap so sakey ya too, agtayo dapat iisipen ya aanien to labat no antoy intanem to. Ibabaga na Biblia ya anggan siopan too et nayarin nabiktima na “panaon tan saray ag-iilaloan a nagawa.” (Ecl. 9:11; Job 4:​1, 8) Naamtaan tayo met ed libron Job ya no manmatoor tayo anggano ondadalan tayod subok, walay niyebat nen Jehova ed pangakantiaw nen Satanas tan walay nitutulong tayo pian nalinisay reputasyon To. (Job 2:3; Pro. 27:11) Misatsalamat tayo ta atalosan tan naamtaan tayo iratan ya katuaan. Amta tayo lay rason no akin ya maniirap tayo tan saray inad-aro tayod bilay. Asabi panaon, naamtaan nen Hazel so katuaan. Nen inyaralan na saray Tasi nen Jehova, diman to atalosan ya aliwan say Dios so nanlapuan na saray problema to. Oniay imbaga to: “Nampikasi ak lamet ed Dios tan imbagak ed sikato so amin ya walad pusok. Nen imbagak ya lingwanan ko lay Dios, aliwan tua man. Nibagak labat iman ta agko nin talaga kabat. Pero natan ya amtak lay katuaan, naliliknak ya inar-aro ak nen Jehova. Sa wakas, maliket tan kontento ak lad bilay ko!” On, balbaleg so epekto ed sakey ya too no natalosan to no akin ya aabuloyan na Dios so paniirap. Pantongtongan tayo natan no antoy naaralan tayod alimbawa nen Job no ondadalan tayod subok.

MAKATULONG SO ALIMBAWA NEN JOB PIAN MAKAPANMATOOR TAYO

9. Antoy kipapasen nen Job nen mansasakit? (Santiago 5:11)

⁹ Imadyin mo pay Job ya akalespak ed dapol, tan diad abay to et wala ray piraso na abetag ya banga ya panggogogo tod sugat to. Napnoy pelsa so laman to tan manpapaotot ya maong. Dinmeket so laman to tan puros kegang. Mapmabeng tan makapkapuy la. Singa anggapo lay arum ya gagawaen nen Job noag say gogoen iray sugat to tan oney-ey lapud irap ya dadalanen to. Pero diad tua, mansusungdo tan manmamatoor si Job. (Basaen so Santiago 5:11.) Antoy akatulong ed si Job pian makapanmatoor?

10. Antoy pakanengnengan ya maap-apit so liknaan nen Job ed si Jehova?

¹⁰ Imbaga nen Job ed si Jehova so amin ya nalilikna to. (Job 10:​1, 2; 16:20) Singa bilang, diad kapitulo 3, imbalikas ton amin so sakit na linawa to ta say amta to et nanlapud si Jehova so paniirap to. Insan nen katongtong to la iramay taloran kakaaro to ya mangibabagan dudusaen kuno na Dios, paulit-ulit ton indepensa so sarili to tan imbaga to ya sikatoy matoor. No maminsan ingen, singa si Jehova la so kakatongtongen to, tan labay ton papawayen ya mas matunong ni nen say Dios! (Job 10:​1-3; 32:​1, 2; 35:​1, 2) Pero inamin to lanlamang ya wala ray imbagbaga ton “agla ninonot.” (Job 6:​3, 26) Diad kapitulo 31, imbaga nen Job ya onebat komon so Dios tan Sikato so mismon mangibaga ya agto kanepegay manirap. (Job 31:35) Labay nen Job ya naamtaan no akin ya maniirap, pero siempre, anggapoy karapatan ton obligaen si Jehova ya ipaliwawa ed sikato so rason.

11. Antoy reaksion nen Jehova ed amin ya imbagbaga nen Job?

¹¹ No usisaen tayo balet ya maong iramay imbagbaga nen Job, diman tayo nanengneng ya talagan agton balot isalat so katooran tod si Jehova tan baleg so tiwala to ya importantin maong ed si Jehova so panmamatoor to. Nen nampasiplog si Jehova na maksil a dagem tan kinatongtong toy Job, agto la impaliwawa so rason no akin ya maniirap si Job. Agto met la nampasnokan, tan agto la inungkat iramay aliwan imbagbaga nen Job. Imbes, maar-aron imbangat nen Jehova si Job, singa tatay ya katongtong toy anak to. Aman so sankaabigan ya paraan pian nipetek so kanonotan nen Job. Inamin lanlamang nen Job ya kulang ya maong so pakatalos to tan pagbabawian to iramay imbagbaga to. (Job 31:6; 40:​4, 5; 42:​1-6) Antoy naaralan na saray lingkor nen Jehova nensaman ed sayan agawa, tan anto met so naaralan tayo natan?

12. Antoy naaralan na saray Israelita ed istoryay bilay nen Job?

¹² No antoy naaralan na saray Israelita nensaman. No dalepdepen na saray Israelita so istoryay bilay nen Job, dakel so naaralan da. Laen tayo pan alimbawa si Moises. Legan ton idadaulo so bansan Israel, dakdakel so dinalan ton irap. Aminpiga met ya adismaya tan kinmapuy so liknaan to. Pero say balibali ed si Moises, onasingger ed si Jehova no walay problema, tan aga manrerebelde ya singa ginawa na arum ya Israelita. (Exo. 16:​6-8; Num. 11:​10-14; 14:​1-4, 11; 16:​41, 49; 17:5) Akatulong met so alimbawa nen Job ed si Moises nen impetek nen Jehova. Nen manga koma-40 lan taon na panaakar-akar na saray Israelita ed kalawakan tan mankakampo rad Kades, ‘akapansalita na bengatbengat’ si Moises, tan inala toy dayew ya para komon ed si Jehova. (Sal. 106:​32, 33) Lapud satan, aglaingen inabuloyan nen Jehova ya makaloob ed Insipan ya Dalin. (Deu. 32:​50-52) Seguradon asakitan si Moises ed saman ya desisyon nen Jehova, pero mapaabeba ton inawat so disiplina. On, no si Moises et akaaral ed istoryay bilay nen Job, seguradon akaaral met iray sinmusublay ya henerasyon na saray Israelita. No dalepdepen day alimbawa nen Job, diman da natalosan ya sarasarag dan ibalikas ed si Jehova so amin ya nalilikna da, pero agda nepeg ya isipen ya mas matunong ira nen si Jehova. Naaralan da met ed alimbawa nen Job ya kaukolan day manpaabeba tan awaten so disiplina nen Jehova.

13. Panon ya makatulong so istoryay bilay nen Job pian makapansungdo o makapan-anos tayo? (Hebreo 10:36)

¹³ No antoy naaralan tayo natan. Mair-irap so bilay natan, kanian dakdakel so subok ya susungdoan o aanosan tayo. (Basaen so Hebreo 10:36.) Singa bilang, wala ray agagi ya grabe sakit da, say arum et nadi-depress o walay anxiety da. Say arum balet et walay graben problema da ed pamilya, tan say arum et inateyan. No maminsan, anta ondadalan tayo la lanti ed subok, wala ni ibaga o gawaen na arum ya lalon mamabelat ed liknaan tayo. (Pro. 12:18) Pero no ontan so situasyon, ibaga tayo labat ed si Jehova so amin ya nalilikna tayo, ya singa ginawa nen Job. Seguradon dengelen To tayo. (1 Juan 5:14) No bilang ta wala ray naibagam ed si Jehova ya “agla ninonot,” agka mapaga ta aga onsyodot ed sika. Ikdan to ka ingen na biskeg na liknaan tan karunongan pian nasarag mo tay dadalanen mo. (2 Awa. 16:9; Sant. 1:5) Tulongan to ka met pian nipetek so kanonotan mo ya singa ginawa tod si Job. Nayarin usaren to so Biblia, say organisasyon to, o saray maespiritual ya kakaaro pian bilinen o disiplinaen to ka. (Heb. 12:​5-7) Abendisyonan si Job nen mapaabeba ton inawat so disiplina nen Jehova. Kanian makaseguro ka ya bendisyonan ka met nen Jehova no awaten moy panametek to. (2 Cor. 13:11) On, dakel so naaralan tayod si Job! Pantongtongan tayo natan no panon tayon usaren so istoryay bilay nen Job pian natulongan tayoy arum.

USAR MO SO LIBRON JOB PIAN TULONGAN SO ARUM

14. No walay mantepet no akin ya maniirap tayo ran totoo, antoy kaslakan ya iyeebat tayo?

¹⁴ Kasin asalim la ya walay nantepet ed sika no akin ya maniirap tayo ran totoo? Antoy inyebat mo ey? Seguro imbagam ed sikato imay ibabaga na Biblia ya agawad hardin na Eden. Ompan inistoryam may ginawa nen Satanas, amay rebelden anghel. Tinilaan to si Adan tan Eva pian manrebelde met ira ed Dios. (Gen. 3:​1-6) Insan impaliwawam ed samay katongtong mo ya nen nanrebelde si Adan tan Eva, diman met la ginmapon manirap tan ompatey so totoo. (Roma 5:12) Insan diad sampot, seguro impaliwawam ya inmabuloy so Dios ya palabasen ni so andukey ya panaon pian napaneknekan ya matila si Satanas, tan nipulong so maong a balita ya diad arapen et magmaliw lamet ya perpekto iray totoo. (Apo. 21:​3, 4) Balibali no ontan so inyebat mo. Makatulong iyan panagkatunongan pian natalosan na totoo no akin ya maniirap tayo.

15. Panon tayon usaren so istoryay bilay nen Job pian nipaliwawa tayod arum no akin ya maniirap tayo ran totoo? (Nengnengen met so litrato.)

¹⁵ Say sakey nin paraan pian nipaliwawa tayod arum no akin ya maniirap tayo et no istoryaen tayod sikara so agawad si Job. No bilang ta walay nantepet na ontan ed sika, komendaan mo tan ibagam ed sikato ya balibali tay tepet to. Insan mo natan ibaga ya ontan met so tepet nen Job, sakey ya matoor ya lingkor na Dios nensaman ya dakel so dinalan ton irap tan inisip to ni ingen ya nanlapud Dios so paniirap to. (Job 7:​17-21) Seguro mas ganadon ondengel imay katongtong mo no naamtaan to ya amay tepet to et nensaman ni manaya itetepet na saray totoo. Ipaliwawam ed sikato ya say nanlapuan na impanirap nen Job et say Diablo, aliwan say Dios. Pinairap na Diablo si Job ta labay ton papawayen ya manlilingkor labat iray totoo ed Dios lapud bebendisyonan To ra. Akin et inabuloyan na Dios ya pairapen na Diablo si Job? On ta baleg so tiwala na Dios ya wala ran talagay totoo ya manlilingkor ed sikato lapud inaro da, aliwan lapud bendisyon so habol da. No say sakey ya too et manmatoor ed Dios anggano maniirap, napaneknekan ya aliwan tua may akusasyon nen Satanas. Insan diad sampot, ibagam ed samay katongtong mo ya benendisyonan na Dios si Job ta nansiansian matoor. Basta say linew mo, aliwan say Dios so panlalapuan na paniirap tayo. No natalosan to itan ya katuaan, seguradon nainawaan ya maong.

16. Panon ya akatulong ed si Mario so libron Job?

¹⁶ Imanoen no panon ya akatulong so libron Job ed sakey ya laki ya say ngaran to et Mario. Nen 2021, mante-telephone witnessing so sakey ya sister tan say sankaunaan ya atawagan to et si Mario. Imbasa na sister so sakey ya teksto ed Biblia, tan impaliwawa to ya dedengelen na Dios iray pikakasi tayo tan walay balibalin arapen ya ipaparaan To parad totoo. Nen tinepetan na sister si Mario no antoy nibaga tod saya, imbaga nen Mario ya plano to lay manbikkel, tan manggagawa lay sulat parad pamilya to. Kuan to: “Manisia ak ed Dios, pero ayan kabuasan, pakaliknak et singa tinaynan to ak la.” Diad komaduan intawag na sister, inistorya tod si Mario iray irap ya dinadalan nen Job. Labay nen Mario ya basaen so libron Job, kanian impawit na sister ed sikato so link na Balon Mundo a Patalos na Masanton Kasulatan diad jw.org. Antoy epekto to yan amin ed si Mario? Alikna toy panangaro na Dios, kanian nampaiyaral na Biblia tan labalabay to nin kabaten si Jehova.

17. Akin et misatsalamat ka ya impila nen Jehova diad Biblia so istoryay bilay nen Job? (Job 34:12)

¹⁷ On, walay pakayari na Salitay Dios ya umanen so bilay na totoo, lalo lad saramay maniirap. (Heb. 4:12) Misatsalamat tayod si Jehova ta impaisulat tod Biblia so istoryay bilay nen Job! (Job 19:​23, 24) Ipapaseguro na libron Job ya “agmanggagaway mauges” so Dios. (Basaen so Job 34:12.) Naamtaan tayo met ed satan ya libro no akin ya aabuloyan na Dios so paniirap tan no panon tayon makapanmatoor anggano maniirap tayo. Nausar tayo met so libron Job pian natulongan tayo ray maniirap ya onlemew so liknaan da. Pantongtongan tayod ontumbok ya artikulo no panon ya makatulong so libron Job no mangiter tayoy simbawa.