Natulongan Ka na Libron Job no Mansimbawa Ka

1-2. Antoy kaukolan ya gawaen na saramay taloran kakaaro nen Job tan si Elihu, pero akin et aliwa itan ya mainomay?

MAPLES ya kinmayat so balita. Nen alimas so kayamanan nen Job, naamtaan itan ya tampol na saray totoo diad lugar da. Nen abalitaan itan na taloran kakaaro nen Job—si Elifaz, Bildad, tan Zofar—nambiahe ira paarap ed Uz ta labay dan ligliwaen. Pero kasabi da, abigbigla ra ed anengneng da.

² Anggapoy akerad si Job! Iramay dakdakel ya karnero, baka, kamelyo, tan asno to et anggapo lan amin. Inatey iray ariripen to, tan inatey met so amin ya ananak to nen ageba imay kulaan dan abung tan apataan ira. Kayari to ’tan ya amin, adapoan na sakit si Job. Manpapaotot ta napnoy pelsa so interon laman to. Asabian nen Elifaz, Bildad, tan Zofar si Job ya pakaskasi kalamor ya akalespak ed dapol. Anto kasi reaksion da? Ag-ira akasalita! Pitoy agew ya sankanengneng da labat si Job pero anggapon balot so imbaga ra. (Job 2:​12, 13) Kaleganan to ’tan, walay sinmabin mas ugaw ya laki ya say ngaran to et Elihu, tan inmasingger ed kulaan da. Sa wakas, si Job lan mismo so nansalita. Insamba toy agew na inkiyanak to, tan imbaga to ya labay to lay ompatey! (Job 3:​1-3, 11) On, kaskasian si Job, talagan kakkaukolan toy tulong. Tsansa la na saramay lalaki ya pasesegen si Job tan paneknekan ya tuan kakaaro ira. Nengnengen tayo no antoy ginawa ra.

3. Antoy pantongtongan tayo ed sayan artikulo?

³ Impaisulat nen Jehova ed si Moises no antoy imbaga tan ginawa na saramay taloran kakaaro nen Job tan si Elihu. No imanoen tayo so arum ed saramay imbaga nen Elifaz, mapatnag ya nanlapu itan ed demonyo. Diad kabaliktaran balet, iramay imbaga nen Elihu et nanlapud si Jehova. (Job 4:​12-16; 33:​24, 25) Kanian diad libron Job, wala ray nabasam ditan ya maong ya simbawa, tan wala met iray makapuy ya simbawa. Pantongtongan tayod sayan artikulo no panon ya makatulong so libron Job pian makapangiter tayoy maong ya simbawa. Pantongtongan tayo nin unona so makapuy ya alimbawa nen Elifaz, Bildad, tan Zofar. Insan tayo itumbok so maong ya alimbawa nen Elihu. Tan no panangiter na simbawa so pantongtongan, amtaen tayo no antoy naaralan na saray Israelita nensaman ed libron Job, tan no anto met so naaralan tayo natan.

NO PANON YA SINIMBAWA SI JOB NA TALORAN KAKAARO TO

4. Akin et ag-aligliwa si Job ed imbaga tan ginawa na saramay taloran kakaaro to? (Nengnengen met so litrato.)

⁴ Ibabaga na Biblia ya pinmasyar ed si Job iramay taloran kakaaro to pian ‘miambegya ed sikato tan ligliwaen da.’ (Job 2:11) Pero kasin aligliwa day Job? Andi. Akin ey? Niay taloran rason: Unona, agda dinengel si Job tan agda tinalosan so situasyon to. Pinapaway da ingen ya dudusaen nen Jehova si Job ta wala kunoy ginawa ton aliwa.a (Job 4:7; 11:14) Komadua, iramay imbagbaga ra et anggapo lanlamang so nitulong tod si Job. Singa balibali met ya dengelen, pero diad tua et andi-kakanaan. (Job 13:12) Ansakit ingen so panagsalita ra. Singa bilang, amiduan impasagilig nen Bildad ya nasyosyodotan lad si Job ta nambabangil kunoy ibabaga to. (Job 8:2; 18:2) Si Zofar ingen, papapawayen to ya “anggapoy kargay ulo” nen Job! (Job 11:12) Komatlo, halata ed panagsalita ra ya melmelag so pakanengneng dad si Job. Tua, ompan agda met ineyag-eyagan, pero mapatpatnag ya anggapoy respeto rad sikato. (Job 15:​7-11) Imbes ya ligliwaen day Job tan pabiskegen day liknaan to, impalupa dad sikato ya walay aliwan ginawa to kanian maniirap.

5. Antoy resulta na samay simbawa na taloran kakaaro nen Job?

⁵ Anto kasi nalilikna nen Job legan ya mansasalita irayan lalaki? Seguradon asakisakitan tan singa bebetagey puso to. (Job 19:2) Atay palsaan da ka ya walay ginawam ya aliwa, siempre agmo naiwasan so onsyodot. Agtayo la sirin pankelawan no akin ya onman lay impangidepensa nen Job ed sarili to, tan no akin ya akapangibaga laingen na “saray salitan agla ninonot.” (Job 6:​3, 26) Amay insimbawa na saraman ya lalaki et duman maong ed panagnonot nen Jehova. Aliwliway impantrato dad si Job. Agda anggan impalikna ed sikato ya imamalasakit da. Kanian agda aliklikas, uusaren la ra manaya nen Satanas. (Job 2:​4, 6) Antoy naaralan na saray lingkor nen Jehova nensaman ed sayan agawa, tan anto met so naaralan tayo natan?

6. Antoy naaralan na saray mamatatken ed Israel ed makapuy ya alimbawa na saramay taloran kakaaro nen Job?

⁶ No antoy naaralan na saray Israelita nensaman. Nen niiter la nen Jehova iray ganggan to ed bansan Israel, nampili na saray kualipikadon mamatatken—eksperiensyadon lalaki—ya magmaliw ya ukom tan ontulong ed saray kapara dan Israelita ya unoren iray ganggan to. (Deu. 1:​15-18; 27:1) No walay onasingger tan manpatulong ed sikara, kaukolan day ondengel ya maong antis iran mandesisyon o mangiter na simbawa. (2 Awa. 19:6) Kaukolan da met so mantepet pian naamtaan da no anton talagay agawa. (Deu. 19:18) Nepeg ya maong so pitotongtong da ed saramay onaasingger ed sikara. Akin ey? On ta no ipalikna ran nanaingongotan ira, ompan nababaingan laingen imay too ya ibagay nalilikna to. (Exo. 22:​22-24) On, dakel so naaralan na sarayan mamatatken ed Israel diad istoryay bilay nen Job.

7. Diad Israel nensaman, siopa ni ray nayarin mangiter na simbawa, tan antoy naaralan dad istoryay bilay nen Job? (Proverbio 27:9)

⁷ Pero siempre, aliwan saray mamatatken labat ed Israel so nayarin mangiter na simbawa. Anggan siopan Israelita—ugaw man o matatken, laki man o bii—et sarag ton simbawaen so kaaro to no bilang ta walay nanengneng ton kaukolan ton paaligwasen ed panagdayew to, o no walay kaukolan ton umanen ya kagagawa to. (Sal. 141:5) Ontan so tuan kaaro! (Basaen so Proverbio 27:9.) No dalepdepen na saray Israelita imay makapuy ya ginawa di Elifaz, Bildad, tan Zofar, makaaral ira no anto ray agda nepeg ya ibaga tan no anto ray agda nepeg ya gawaen no mangiiter iray simbawa.

8. Anto ray agtayo gagawaen no mangiiter tayoy simbawa? (Nengnengen met so litrato.)

⁸ No antoy naaralan tayo natan. No ondadalan ed subok iray agagi tayo, labalabay tayo ran tulongan. Pero manalwar tayo pian agtayo naalig iramay taloran kakaaro nen Job. Nia ray tandaan tayo: Unona, agtayo huhusgaan imay too tan agtayo bastabasta mangiiter na simbawa no agtayo ni amta so amin ya detalye tan no anton talagay agawa. Komadua, agtayo ibabase so simbawa tayo ed sarili tayo labat ya opinyon, ya singa ginawa nen Elifaz. Lanang tayon ibase so simbawa tayo diad Biblia. (Job 4:8; 5:​3, 27) Komatlo, agtayo pansasalitaan na ansakit imay too. Di ba, tua met so arum ya imbaga nen Elifaz tan saramay kakaiba to? Wala ingen imay imbaga nen Elifaz ya impila nen apostol Pablo ed sakey ya sulat to. (Ikompara so Job 5:13 ed 1 Corinto 3:19.) Pero parad si Jehova, katilaan so imbagbaga ra ta dineralan day Dios tan sinakitan day liknaan nen Job. (Job 42:​7, 8) Nia so agtayo lilingwanan: No mangiiter tayoy simbawa, seguroen tayo ya aga ompaway ya aliwan maaro si Jehova, tan agtayo ipapalikna ed samay toon sisimbawaen tayo ya agto kanepegay naaro. Pantongtongan tayo met no antoy naaralan tayod si Elihu.

NO PANON YA SINIMBAWA NEN ELIHU SI JOB

9. Anggano dakdakel lay imbaga na saramay kakaaro nen Job, akin et kaukolan to nin siansiay tulong, tan panon ya tinulongan nen Jehova?

⁹ Asumpal ya siansia so impanebatan nen Job tan saramay taloran kakaaro to. Dakdakel so imbagbaga ra—diad ami-amin et 28 ya kapitulo ed Biblia. Pero halos amin ya imbaga ra et lapud pansyodot tan petang na ulo ra. Kanian anggano abaybayag iran nantongtong, aglinmemew so liknaan nen Job. Kakkaukolan to ni naligliwa tan naipetek. Panon ya tinulongan nen Jehova si Job? Inusar toy Elihu ya mansimbawa ed sikato. Akin balet et aglan tampol nansalita si Elihu? Oniay kuan tod sikara di Job: “Maedad kayo la balet siak, ugaw ak ni. Kanian pinokpokan koy sarilik lapud panagrespetok.” (Job 32:​6, 7) Inisip nen Elihu ya marunong tan eksperiensyado iray maedad la ta mas abayag la ran manbibilay no ikomparad saray mas ugaw ni. Kanian maan-anos kalamor ya dinmengel ed si Job tan ed saray kakaaro to. Pero kayari na impanebatan da, agto la nitepel so agmansalita. Kuan to: “Aliwan say edad labat so manggawad sakey a marunong, tan aliwan saray mamasiken labat so makatalos ed duga.” (Job 32:9) Antoy sinmublay ya imbaga nen Elihu, tan panon to itan ya imbaga?

10. Antoy ginawa nen Elihu antis ton simbawaen si Job? (Job 33:​6, 7)

¹⁰ Antoy ginawa nen Elihu pian onkalmay liknaan nen Job tan mas akaparaan ya ondengel ed ibaga to? Unona, kinontrol nen Elihu so liknaan to. Panon tayon nibaga ya kinontrol toy liknaan to? Ibabaga na Biblia ya sinmanok met si Elihu lapud imbagbaga nen Job tan saramay kakaaro to. (Job 32:​2-5) Pero agbalot impangget nen Elihu so sanok to ed si Job, tan agto met nansalitaan na ansakit. Mapaabeba tan makaaro ingen so impitongtong to. Singa bilang, oniay kuan tod si Job: “Nampara ta labat diad arapan na tuan Dios.” (Basaen so Job 33:​6, 7.) Insan antis ya mangiter na simbawa si Elihu, impaseguro tod si Job ya dinengel ton maong iramay imbaga to. Diad tua, inulit to iramay manunan punto ya imbaga nen Job. (Job 32:11; 33:​8-11) Tan nen intuloy toy mansalita, wala ray pankanawnawa ya binitla to lamet iramay imbaga nen Job.—Job 34:​5, 6, 9; 35:​1-4.

11. Panon so impansimbawa nen Elihu ed si Job? (Job 33:1)

¹¹ Agbalot impalikna nen Elihu ed si Job ya anggapoy kana to. Marespeto so impansimbawa to ed sayan matoor ya lingkor nen Jehova. Singa bilang, binitla nen Elihu so ngaran nen Job, ya agbalot ginawa na saramay taloran lalaki. (Basaen so Job 33:1.) Inikdan met nen Elihu na pankanawnawa si Job ya onebat, seguro ta sankanonot to may alikna to ya labalabay toy onsalet nen mantotongtong si Job tan saramay taloran lalaki. (Job 32:4; 33:32) Sinegurado met nen Elihu ya nipaimano tod si Job iramay aliwan imbagbaga to, tan impanonot tod si Job iray kualidad nen Jehova—say karunongan, pakapanyari, hustisya, tan matoor ya panangaro to. (Job 36:​18, 21-26; 37:​13, 23, 24) Lapud maomaong so impansimbawa nen Elihu, akaparaan lay nonot nen Job nen si Jehova lan mismo so akitongtong ed sikato. (Job 38:​1-3) Antoy naaralan na saray lingkor nen Jehova nensaman ed alimbawa nen Elihu, tan anto met so naaralan tayo natan?

12. Akin et angibaki si Jehova na saray propeta ed Israel nensaman, tan antoy naaralan na saray propeta tan arum nin Israelita ed alimbawa nen Elihu?

¹² No antoy naaralan na saray Israelita nensaman. Angibaki si Jehova na saray propeta pian ipaamta so gagala to ed saray Israelita. Singa bilang, nen panaon na saray ukom, inusar nen Jehova so propetesa ya si Debora pian walay mangigiya ed saray Israelita tan walay pinagka-nanay da ya manbilin ed sikara. Inusar met nen Jehova si Samuel manlapud inkaugaw to pian ipasabid saray Israelita iray instruksion To. (Ukom 4:​4-7; 5:7; 1 Sam. 3:​19, 20) Insan nen panaon la na saray arari, tuloytuloy nin siansia ya angibaki si Jehova na saray propeta pian walay mangipetek ed saray lingkor to tan walay ontulong ed sikaran ombiskeg ed espiritual. (2 Sam. 12:​1-4; Gawa 3:24) No dalepdepen na saray propeta tan arum nin Israelita so maong ya alimbawa nen Elihu, makaaral ira no antoy nepeg dan ibaga tan no panon so pansalita ra no manisimbawa ira.

13. Antoy gawaen tayo pian napaseseg tayo ray agagi?

¹³ No antoy naaralan tayo natan. Singa saray propeta nensaman, ipapaamta tayo met natan ed saray totoo so mensahe na Dios ya walad Biblia. Tan singa saray propeta, seseguradoen tayo met ya makapabiskeg tan makaligliwa iray ibabaga tayod saray agagi. (1 Cor. 14:3) Napapanonotan met iray elder ya komon et “maabig [tan] atimplaan na asin” so pitongtong da ed saray agagi, anggan diad saramay makakapangibaga la na “saray salitan agla ninonot” lapud subok ya dadalanen da.—Col. 4:6; Job 6:3; 1 Tes. 5:14.

14-15. Panon ya naalig na saray elder si Elihu no manisimbawa ira? Mangiter na alimbawa.

¹⁴ Isipen pa iyan situasyon. Naamtaan na sakey ya elder ya walay sister ed kongregasyon da ya nadi-depress. Angitagar na sakey nin brother iyan elder tan binisita da imay sister pian napaseseg da. Nen katongtong da la, imbaga na sister ya anggano tuloytuloy met ya mimiaral tan manpupulong, agto balet naliliknay liket. Antoy dugan gawaen na samay elder?

¹⁵ Unona, kaukolan to nin talosan so situasyon to may sister tan maanos ton dengelen. Anto kasi rason akin et onman so nalilikna to? Kasin say pakalikna to et agla inaro nen Jehova? Kasin nabebelatan ed “saray kapagaan ed bilay” tan agto la amtay gawaen to? (Luc. 21:34) Komadua, maabig no komendaan na elder imay sister. Singa bilang, komendaan to ta mimiaral tan manpupulong nin siansia anggano onmay nalilikna to. Tan komatlo, no natatalosan la na elder so situasyon to may sister tan no akin ya onman so nalilikna to, diman to la usaren so Biblia pian pabiskegen so liknaan to tan ipasegurod sikato ya inar-aro nen Jehova.—Gal. 2:20.

ITULTULOY MON ARALEN SO LIBRON JOB

16. Antoy gawaen tayo pian tuloytuloy tayo nin makaaral ed libron Job?

¹⁶ Talagan dakel so naaralan tayo ed libron Job! Diad imbeneg ya artikulo, naaralan tayo no akin ya aabuloyan na Dios so paniirap tan no panon tayon makapanmatoor ed si Jehova anggano ondadalan tayod subok. Insan diad sayan artikulo, apantongtongan tayo no anto ray naaralan tayod libron Job pian makapangiter tayoy maong ya simbawa. Agtayo aaligen iramay taloran kakaaro nen Job. Say aligen tayo et si Elihu! No bilang ta walay kaukolan mon simbawaen, anto kasi no rebyum ni irayan apantongtongan tayo? Tan no abayag la may sampot ya impanbasam ed sayan marakdakep ya libro, maabig no iplanom lamet ya basaen. Seguradon dakel ni naaralan mo!