Alig Moy Kapaabebaan nen Jehova

1. Akin et makapadinayew so kapaabebaan nen Jehova?

NO OBSERBAAN mo ray totoon walay posisyon o pakayari da, kasin nibagam ya mapaabeba ira? Seguro say ebat mo et andi. Duma balet si Jehova—sikato so makapanyarin-amin pero mapappaabeba. (Sal. 113:​5-8) Napatnagan so kapaabebaan to diad amin ya gagawaen to. Anggapon balot so nalikas ya inkalastog ed sikato. Pantongtongan tayod sayan artikulo so apatiran kualidad nen Jehova tan no antoy koneksion to ’tan ed kapaabebaan to. Pantongtongan tayo met no panon ya inalig nen Jesus so kapaabebaan nen Ama to. Makatulong iyan artikulo pian lalo tayon onapit ed si Jehova tan lalo tayon naalig so kapaabebaan to.

MAINOMAY YA ASINGGERAN SI JEHOVA

2. Antoy naaralan tayo ed Salmo 62:8 nipaakar ed si Jehova? (Nengnengen met so litrato.)

² No say sakey et mapaatagey, mairap ya katalosan. Lapud atagtagey so pakanengneng tod sarili to, ngalngali aglabay ya asinggeran na saray totoo, tan iwasan da ni ingen. Aliwan ontan si Aman Jehova. Ipapaseguro tod sikatayo ya sarasarag tayoy onasingger ed sikato, tan labay to ya ibalikas tayoy amin ya walad nonot tan puso tayo. (Basaen so Salmo 62:8.) Si Jehova et singa maar-aron ama ya lanang ya akaparaan ya ondengel ed ibabaga na anak to. On, labalabay ton dengelen iray pikakasi tayo. Diad tua, impaisulat tod Biblia so dakel ya pikakasi na saray lingkor to nensaman. Singa to ibabagad sikatayo ya, ‘Agkayo nababaingan ya onasingger ed siak.’ (Jos. 10:​12-14; 1 Sam. 1:​10-18) Pero, kasin naliliknam no maminsan ya singa agka makanepegan ya onasingger ed si Jehova?

3. Akin et makaseguro ka ya labalabay nen Jehova ya manpikasi kad sikato anggano say pakaliknam et agka makanepegan?

³ Labalabay nen Jehova ya manpikasi kad sikato, anggano say pakaliknam et agka makanepegan. Akin et makaseguro kad satan? Nanonotan mo may ilustrasyon nen Jesus nipaakar ed managdarak ya anak? Diad satan ya ilustrasyon, inkompara nen Jesus si Jehova ed samay maar-aron ama. Nen magbabawi la may anak, pakalikna to et agla makanepegan ya magmaliw a parte na pamilya ra. Pero antoy reaksion to may ama nen amawil may anak to? Imbaga nen Jesus ya legan ya wala nid arawi imay anak, “abantag nen ama to tan naabagey to, kanian binatik to tan nilakap to insan to inangoban.” (Luc. 15:​17-20) Ontan ya klase na ama si Jehova. No manpikasi ed sikato iray lingkor to ya nakokonsiensia tan naeermenan lapud agawaan dan lingo, ondengel ya maong. (Tag. 3:​19, 20) Lapud mapaabeba tan makasi si Jehova, apuraen toy ombatik ya singa panangibaga pian naligliwa to ran tampol tan nipalikna tod sikara ya inar-aro to ra. (Isa. 57:15) Panon itan ya gagawaen nen Jehova? Uusaren to ray elder, saray Tasin kapamilya tayo, tan saray agagi ya ontulong ed sikatayo. (Sant. 5:​14, 15) Gagawaen to itan ta labay to ya mansiansia tayon maapit ed sikato.

4. Akin et nibaga tayon mainomay ya asinggeran si Jesus?

⁴ Panon ya inalig nen Jesus so Ama to? Mapappaabeba met si Jesus. Kanian nen wadiad dalin, labalabay ya asinggeran na saray totoo. Ag-ira nababaingan ya mantepet ed sikato. (Mar. 4:​10, 11) Kanian no sikato met so mantepet ed sikara, ag-ira manalangan ya ibaga no antoy walad nonot da. (Mat. 16:​13-16) Tan no makagawa ray lingo, ag-ira aburido ya ompan pantamian ira nen Jesus, ta amta ra ya si Jesus et maomaong, makasi, tan maanos. (Mat. 17:​24-27) Talagan inalig nen Jesus so Ama to kanian lalon akabkabat na saray papatumbok to si Jehova. (Juan 14:9) Atalosan da ya si Jehova et mapaabeba tan matmainomay ya asinggeran, aliwan singa saray lider na relihyon da ya marukruksa, mapaatagey, tan anggapoy pibabali da ed saray totoo.

5. Akin et mas mainomay ya asinggeran so toon mapaabeba?

⁵ Panon tayon naalig si Jehova? Aralen tayoy manpaabeba pian agnababaingan so arum ya onasingger ed sikatayo. No say sakey et aliwan mapaabeba, matmainomay ya nainggit, mairap toy mamerdona, tan ma-pride. No ontan so ugali tayo, arawian itayo na arum. Pero no mapaabeba tayo, labalabay da tayo ta amta ran maomaong tan maanos tayo, tan mainomay tayoy mamerdona. (Col. 3:​12-14) Diad kongregasyon, kaukolan ya ipalikna na saray elder ya mainomay iran asinggeran. Agnababaingan ya onasingger iray agagi no lanang da ran nanenengneng. Kanian anggad posible, komon ta lanang ya miaral ed Kingdom Hall iray elder, imbes ya onkonekta labat irad aral online. Tan anggad iyabuloy na situasyon da, komon ta miulop irad agagi diad panagpulong ed kaabungan. No diman mas nakakabat na agagi iray elder, ag-ira manalangan ya manpatulong no walay problema ra.

MAKATUNONGAN TAN MAKONSIDERA SI JEHOVA

6-7. Mangiter na alimbawa ed Biblia ya inkonsidera nen Jehova so kerew na saray lingkor to.

⁶ No say sakey et mapaatagey tan mamaong, ipilit to no antoy labay to. Aliwan ontan si Jehova. Lapud mapaabeba, makatunongan so panagtrato tod arum. Anggano sikato so Sankatagyan tan amta to no antoy sankaabigan ya gawaen, mabulos ya ondengel ed arum anggano wala lay desisyon to. Singa bilang, imanoen pa may agawa nen wala ray mauges ya imbagbaga nen Miriam kaibay agi ton si Aaron, ya kontra ed si Moises. Si Moises so tinuro nen Jehova ya representative To. Kanian nen onman so ginawa nen Miriam, singa si Jehova ya mismo so agto nirespeto. Sinmanok si Jehova, kanian dinapoan toy kating si Miriam. Nen anengneng nen Aaron so agawa, akikasi ed si Moises. Insan akikasi met si Moises ed si Jehova ya paabigen toy atsi ra. Antoy reaksion nen Jehova? Kasin nampaatagey tan imbaga to ya no antoy desisyon to, agla nauman? Andi, mapappaabebay Jehova, kanian pinagbigyan toy kerew da tan pinaabig toy Miriam.—Num. 12:​1-15.

⁷ Nanengneng tayo met so kapaabebaan nen Jehova diad indengel tod si Arin Hezekias. Imbaki nen Jehova si propetan Isaias pian ibagad si Hezekias ya ompatey la. Pero nen manakis si Hezekias tan nampikasi ed si Jehova ya onabig komon ed sakit to, akasian nen Jehova. Dinengel nen Jehova so pikakasi to, tan inaruman to na 15 ya taon so bilay to. (2 Ara. 20:​1, 5, 6) On, lapud mapaabeba si Jehova, kakasian to ray lingkor to tan ikokonsidera to ray kerew da.

8. Panon tayon amta ya makatunongan met si Jesus? (Marcos 3:​1-6)

⁸ Panon ya inalig nen Jesus so Ama to? Nen wadiad dalin si Jesus, makatunongan tan maomaong so impantrato tod totoo, tan makonsidera ed pankaukolan da. Singa bilang, nampaabig na saray mansasakit diad agew na Sabaton, anggano amta to ya sikatoy busolen na saray lider na relihyon ya mangibabagan ag-itan nayari. (Basaen so Marcos 3:​1-6.) Bilang ulo na kongregasyon, ipapanengneng met nen Jesus so konsiderasyon ed sikatayo natan. Singa bilang, no walay agi ya makagawa na seryoson kasalanan, agto sukoan. Ikdan toy panaon pian nipetek toy aliwan gagawaen to.—Apo. 2:​2-5.

9. Panon tayon nipanengneng ya makatunongan tan makonsidera tayo? (Nengnengen met so litrato.)

⁹ Panon tayon naalig si Jehova? Pian magmaliw tayon makatunongan, pansagpotan tayon aligen so panagnonot nen Jehova tan say panagtrato tod arum. (Sant. 3:17) Singa bilang, naalig na saray atateng si Jehova no ikonsidera day abilidad na ananak da, tan agda ipagawad sikara iray bengatlan agda sarag. Makaaral iray atateng ed maong ya alimbawa nen Jacob, ya singa nabasad Genesis 33:​12-14. Nipanengneng met na atateng ya mapaabeba tan makatunongan ira no agda pankokomparaen iray ananak da tan agda ipalikna ya singa walay papaboran da. Importante met ya makatunongan tan makonsidera iray elder. Singa bilang, no say labay ya nagawa na sakey ya elder et duma ed suhestion na karaklan ya elder, agto ipilit so opinyon to. Suportaan to so desisyon na ulop na mamatatken no anggapo met so nakokontran prinsipyo ed Biblia. (1 Tim. 3:​2, 3) Sikatayo ran publisher ey? Agtayo huhusgaan iray agagi anggano dumay opinyon da ed opinyon tayo. (Roma 14:1) On, “naamtaan komon na amin a totoo a makatunongan [tayo].”—Fil. 4:5.

MAAN-ANOS SI JEHOVA

10. Anto ray prueba ed Biblia ya maan-anos si Jehova?

¹⁰ Aglabay na saray mapaatagey so manalagar. Ag-ira makankaanos! Pero si Jehova, sikato so sankaanosan ed amin. Singa bilang, imbaga nen Jehova ed si Noe ya onlabas ni 120 ya taon antis Ton deralen iray mauges ya totoo. (Gen. 6:3) Lapud satan, apabaleg ni nen Noe iray ananak to, tan akapanpaalagey ni na biong diad tulong na pamilya to. Kalabas na saray taon, anggano akapandesisyon lay Jehova ya deralen toy Sodoma tan Gomorra, dinengel to nin siansia si Abraham nen aminpigan akitawalan. No aliwan mapaabeba si Jehova, seguro say ibaga tod si Abraham, ‘Anggapoy karapatan mo ya kuestionen so desisyon ko!’ Pero lapud mapaabeba si Jehova, maan-anos ya dinmengel.—Gen. 18:​20-33.

11. Base ed 2 Pedro 3:​9, akin et manaanos ni anggad natan si Aman Jehova?

¹¹ Anggad natan et manaanos ni si Aman Jehova. Maan-anos ton aalagaren so inyeskedyul ton panaon na panderal to ed sayan sistema na mundo. Akin et ontan lay panaanos to? On ta “agto labay a walay siopaman a naderal noagta labay to ya amin et naikday pankanawnawan magbabawi.” (Basaen so 2 Pedro 3:9.) Maong labat ta maan-anos si Jehova! Lapud panaanos to, minilyon ya totoo so nagmaliw ya kaaro to! Komon ta samboten na dakel nin totoo so onapit ed sikato legan ya wala ni panaon. Ta diad tua, walay anggaan na panaanos nen Jehova. Inaro to ray totoo, pero aga ompayag ya tuloytuloy so kaugsan diad dalin, kanian onsabi panaon, deralen to la so amin ya mauges!—Hab. 2:3.

12. Akin et nibaga tayon aaligen nen Jesus so panaanos nen Jehova?

¹² Panon ya inalig nen Jesus so Ama to? Singa si Jehova, libolibon taon met la ya manaanos si Jesus. Diad saratan ya taon, naimatonan ya mismo nen Jesus no panon ya dineralan nen Satanas si Jehova tan saray matoor ya lingkor To. (Gen. 3:​4, 5; Job 1:11; Apo. 12:10) Abaybayag met lan nanenengneng nen Jesus so paniirap na totoo. Seguradon labalabay to lan “deralen . . . iray kimey na Diablo”! (1 Juan 3:8) Pero akin et maan-anos to nin aalagaren so go signal nen Jehova? Say sakey ya rason et lapud mapaabebay Jesus. Bibidbiren to ya si Jehova so makaamta ed dugan panaon na panderal ed sayan sistema nen Satanas.—Gawa 1:7.

13. Panon tayon nibaga ya maan-anos si Jesus ed saray apostol to, tan akin et agto ra sinukoan?

¹³ Nen wadiad dalin si Jesus, maan-anos ed saray apostol to. Singa bilang, aminpigan nansasangsangan na saray apostol no siopa ed sikara so manunaan. Kasin lapud satan et adismaya lay Jesus ed sikara? Andi. Agto ra sinukoan. (Luc. 9:46; 22:​24-27) Baleg so tiwala to ya manguman lanlamang ira. Singa saray apostol, kasin asalim lay akagawa na lingo tan aminpigam itan ya naulit? No on, tandaan mo ya mapaabeba tan maan-anos si Jesus. Misatsalamat tayo ta ontan so Ari tayo!

14. Antoy gawaen tayo pian magmaliw tayon mas maanos?

¹⁴ Panon tayon naalig si Jehova? Aralen tan aligen tayoy ‘panagnonot nen Kristo.’ (1 Cor. 2:16) Panon tayon nagawaan itan? Kaukolan tayoy mansagpot. Singa bilang, aral moy Ebanghelyo. Agmo labat itan babasaen. Dalepdep mo ray ginawa nen Jesus, tan no akin ya onmay ginawa to. Tan siempre, ipikasim ed si Jehova ya tulongan to kan mansiansian mapaabeba tan maanos ya singa si Jesus. No parehoy panagnonot tayo ed panagnonot nen Jesus, naalig tayo met lay Jehova—magmaliw tayon mas maanos ed sarili tayo tan ed saray agagi.—Mat. 18:​26-30, 35.

IIMANOEN TAN PAPAGALANGAN NEN JEHOVA IRAY MAPAABEBA

15. Panon tayon nibaga ya talagan iimanoen nen Jehova iray mapaabeba? (Salmo138:6)

¹⁵ Basaen so Salmo 138:6. Base ed sayan teksto, iimanoen nen Jehova iray mapaabeba. Baleg ya kagalangan ya imanoen ka na Sankatagyan ed interon uniberso! Diad loob na libolibon taon, isipen pa iray mapaabeban totoo ya pinagalangan nen Jehova. Say arum ed sikara et agmasyadon kabat, pero impila ira nen Jehova ed rekord na Biblia. Singa bilang, impaisulat nen Jehova ed si Moises so nipaakar ed si Debora, sakey ya managkomis ya matoor ya nanserbi ed pamilya nen Isaac tan Jacob, diad loob na manga 125 ya taon! Dagdaiset labat so amta tayo nipaakar ed si Debora. Pero sinegurado nen Jehova ya naisulat ed Biblia so sakey ya detalye ya pakanengnengan ya inar-aro to yan matoor ya bii tan inar-aro met na pamilyan nanserbian to. (Gen. 24:59; 35:​8, paimanod leksab) Kalabas na dakel ya taon, nilanaan nen Jehova si David, sakey ya ugaw ya managpastol, ta sikato so apili ton magmaliw ya ari ed Israel. (2 Sam. 22:​1, 36) Insan nen niyanak lay Jesus, wala ray mapaabeban managpastol ya pinagalangan nen Jehova. Angibaki na anghel ya mangibalita ed sikara ya niyanak lad Betlehem so ugaw ya magmaliw ya Mesias. Sikara so unonan akaamta ed satan! (Luc. 2:​8-11) Insan nen inawit nen Jose tan Maria si Jesus diad templo, pinagalangan nen Jehova iray maedad lan lingkor to ya si Simeon tan Ana. Impaamta tod sikara ya amay ugaw ya awi-awit nen Jose tan Maria et Anak na Dios. (Luc. 2:​25-30, 36-38) On, “anggaman atagtagey si Jehova, iimanoen toy mapaabeba”!

16. Panon met ya pinagalangan nen Jesus so arum?

¹⁶ Panon ya inalig nen Jesus so Ama to? Pinagalangan met nen Jesus iray totoon mapaabeba. Imbangat to so katuaan nipaakar ed Panarian na Dios ed ‘saray abebay-aral tan ordinaryon totoo.’ (Gawa 4:13; Mat. 11:25) Kada no manpapaabig na saray mansasakit, aliwan basta apaabig to ra et duga la. Ipapalikna to met ed sikara ya imamalasakit tan rerespetoen to ra. (Luc. 5:13) Diad samay labi antis na ipatey to, inurasan to ray sali na saray apostol to. Kimey itan na sakey ya aripen! (Juan 13:5) Tan antis ya ompawil ed tawen, pinagalangan toy amin ya papatumbok to, kaiba tayo la! Inter tod sikatayo so sankaimportantian ya kimey—say pangibangat na katuaan ed arum pian nawalaan iray bilay ya andi-anggaan. Atan la so sankabalegan ya pribilehyo ya nayarin niwala ed anggan siopan too!—Mat. 28:​19, 20.

17. Panon tayon napagalangan so arum? (Nengnengen met so litrato.)

¹⁷ Panon tayon naalig si Jehova? Napagalangan tayo met iray totoo no ipulong tayod sikara so maong a balita anggan antoy kipapasen dad bilay, antokaman so lahi da, atagey man so inaral da o andi. Diad loob na kongregasyon ey? Napagalangan tayo ray agagi no ipasen tayo ya mas atagey ira nen say sikatayo, antokaman so abilidad o pribilehyo tayo. (Fil. 2:3) Seguradon naliliketan si Jehova no sikatayo lay ‘unonan mangipanengneng na galang’ ed arum.—Roma 12:​10, paimanod leksab; Sof. 3:12.

18. Akin et labay mon aligen so kapaabebaan nen Jehova?

¹⁸ No gawaen tayoy anggaay nayarian tayo ya aligen so kapaabebaan na maar-aron Ama tayo ed tawen, naalig tayo met iray arum ya kualidad to. Mainomay itayon asinggeran, tan magmaliw tayon mas makonsidera tan maanos. Tan singa si Jehova, napakiwas tayo met ya pagalangan so arum. No nanenengneng nen Jehova ya aaligen tayoy kapaabebaan to, magmaliw tayon mas mabmabli ed pakanengneng to!—Isa. 43:4.