No Panon Yon Napagalangan si Jehova Diad Agew na Kasal Yo

1-2. Antoy labay nen Jehova ya nagawa diad agew na kasal yo?

NO WALAY inarom, kasin plano yo lay mankasal? No on, congrats ed sikayon dua! Seguradon dakel so iyuulo yo ed pampaparaan yo. Tandaan yo ya interesado si Jehova ed pankasal yo. Labay to ya na-enjoy yoy agew na kasala yo, tan labay to met ya maliket so paniba yo kayari to ’tan.—Pro. 5:18; Kansion nen Sol. 3:11.

² Kanepegan nen Jehova so napagalangan diad agew na kasal yo. Akin et kanepegan toy napagalangan? Tan panon yon nagawaan itan? Makatulong iyan artikulo ed saray saninaro ya plano da lay mankasal. Pero makatulong ed sikatayon amin iray prinsipyon napantongtongan dia pian napagalangan tayo met si Jehova no naimbitaan tayo ed kasal tan no onkerew ed sikatayo na suhestion so nobyo tan nobya legan na pampaparaan da.

AKIN ET KANEPEGAN NEN JEHOVA SO NAPAGALANGAN?

3. No manplaplano lan mankasal so saninaro, iner da nepeg ya ibase iray desisyon da, tan akin?

³ No manplaplano la so saninaro parad pankasal da, nepeg dan ibase iray desisyon da ed saray prinsipyo ya impaisulat nen Jehova diad Biblia. Akin et duga labat ya ontan so gawaen da? On ta si Jehova so angigapo ed uksoyan na panangasawa. Sikato so angasal ed si Adan tan Eva—say sankaunaan ya sanasawa. (Gen. 1:28; 2:24) Kanian no manplaplano lan mankasal so saninaro, nepeg ya say manunan sankanonot da et no antoy nibaga nen Jehova.

4. Legan ya iplaplano na saninaro so kasal da, anto ni sakey ya rason akin et nepeg dan ikonsidera no antoy nibaga nen Jehova?

⁴ Anto ni sakey ya ambelat ya rason akin et nepeg yon ikonsidera no antoy nibaga nen Jehova legan kayon manplaplano? Nia ay: Tandaan yo ya Ama tan best Friend yo si Jehova. (Heb. 12:9) Segurado ya labay yon mansiansian maapit so relasyon yod sikato. Agkayo sirin ompapayag ya walay nagawa diad agew na kasal yo o diad arum nin agew ya lapud satan et napabarong yoy Jehova tan naapektoay pikakaaro yod sikato. (Sal. 25:14) No isipen yoy amin ya kamaongan tod sikayo tan saray bendisyon ya iter to nid sikayo diad arapen, agta duga labat ya pagalangan yo diad agew na kasal yo?—Sal. 116:12.

PANON YON NAPAGALANGAN SI JEHOVA?

5. Panon ya makatulong so Biblia ed saninaro ya manplaplano lan mankasal?

⁵ Anggapoy nabasad Biblia ya listaan na saray nayari o agnayarin gawaen diad seremonya o reception na kasal. Kanian aliwan pareparehoy kasal na saray Kristiano. Akadepende nin siansia itan ed kipapasen tan panlabayan na nobyo tan nobya, tan no antoy apasalan ed lugar da. Tan siempre, kaukolan dan seguroen ya natutumbok da iray batas na gobierno. (Mat. 22:21) Basta niay tandaan yo: No ibase yo ray desisyon yo ed saray prinsipyo na Biblia, napagalangan tan napaliket yoy Jehova diad agew na kasal yo. Anto iratan ya prinsipyo?

6. Base ed Roma 13:​1, 2, akin et importantin unoren na nobyo tan nobya iray batas na gobierno antis iran naikasal?

⁶ Unor yo ray batas na gobierno. (Roma 13:​1, 2) Diad dakel ya bansa, wala ray batas na gobierno ya kaukolan ya unoren na nobyo tan nobya antis iran naikasal. No plano yo lay mankasal, dapat amta yo iratan ya batas. No agyo kabisado, sarag yoy mantepet tan manpatulong ed saray elder ed kongregasyon yo.b

7. Anto dapat so seguroen yo ya nalikna na amin ya bisita yo diad agew na kasal yo?

⁷ Seguroen yo ya nalikna na amin so inkasagrado na okasyon. (1 Cor. 10:​31, 32) Komon ta say napatnagan ed agew na kasal yo et say bunga na espiritu na Dios, aliwan say espiritu na mundo. (Gal. 5:​19-26) Nepeg ya iplanon maong na nobyo so agew na kasal. Say nobyo so magmaliw ya ulo na nobya to, kanian responsabilidad ton seguroen ya maliket tan mapagalang so bansal da. Antoy makatulong pian ontan so nagawa? Marakep no walay brother ya manpaliwawa base ed Biblia. No maaro tan marespeto so paraan na pampaliwawa to, nalikna na amin ya bisita yo ya say panangasawa et talagan regalo ya nanlapud si Jehova. Makatulong met itan pian nalikna ra ya seryoso iyan okasyon. Kanian kaslakan ya agagi, mas labay da ya say seremonya et diad Kingdom Hall, no posible. No labay yo ya diad Kingdom Hall so seremonyay kasal yo, masakbay yo lan sulatan so ulop na mamatatken na kongregasyon ya manguusar ed satan ya Kingdom Hall.

8. Antoy makatulong pian agnapatnagan so espiritu na mundo diad reception na bansal yo? (Roma 13:13)

⁸ Basaen so Roma 13:13. No walay reception ed agew na kasal yo, seguroen yo met ya agnapatnagan ed satan so espiritu na mundo. Amay Griegon salita ya impatalos ya “mabanday a panliliket” et ontutukoy ed saray okasyon ya saray totoo et maniinuman tan mankakansionan anggad aralem lay labi. Seguradon agyo labay ya ontan so nagawa ed bansal yo. Kanian no bilang ta mangiserbi kayoy alak, manisip kayoy paraan pian naseguro yo ya anggapoy nabuek ya bisita yo.c No manpatogtog kayoy musika, amay dugaruga labat so kakasil to pian makapan-istoryaan iray bisita yo. Pili yon maong no anton klase na musika so ipatogtog yo tan i-check yoy lyrics pian anggapoy nagapol.

9. Anto ray dapat ya ikonsidera na nobyo tan nobya no mandedesisyon ira parad programa na reception da?

⁹ Kasin diad reception yo et wala ray mangansion o onsayaw, wala ray ipabantay ya slideshow o video, tan wala ray mangiter na mensahe? Mangarum iratan na liket ed sayan espisyal ya agew yo. Segurado yo balet ya makapaseseg so interon programa. (Fil. 4:8) Antis yon aprobaan so sakey ya presentasyon, tepetan yoy sarili yo: ‘Aga kasi nasakitan so liknaan na saray akibansal? Kasin pagalangan na saya so uksoyan na panangasawa?’ Tan nia so sankaimportantian ya tepet: ‘Kasin napagalangan si Jehova?’ Agmet makapuy so manpaelek, pero paliisan yoy mabanday ya panagsalita. Singa bilang, paliisan yo iramay lurey ya walay laok ton nipaakar ed sekso. (Efe. 5:3) No walay kapamilya tan kakaaro yo ya mangiter na mensahe, bilin yo la ran masakbay ya dapat et makapaseseg so mensahe ra.

10. Anto ray marakep ya resulta no simpli labat so kasal? (1 Juan 2:​15-17)

¹⁰ Iwasan yoy manpasikat. (Basaen so 1 Juan 2:​15-17.) No ipaarap yod si Jehova so galang imbes ya ipaarap yoy atension na totoo ed sarili yo, lalo to kayon ar-aroen. Kanian no iplaplano yoy kasal yo, iwasan yoy ‘manpangta’ tan manggastos na sobsobra. Akin et marakep no simpli labat so kasal? Oniay imbaga nen Mike ya tagad Norway: “Simpli labat so kasal mi kanian agkami akautang tan nituloy mi pampapayunir mi. Pero anggano simpli, marakep nin siansia tan agmi man nalinglingwanan.” Tan onia met so imbaga nen Tabitha ya tagad India: “Agkami masyadon na-stress. Lapud simpli labat so kasal mi, agmi ’tan nansakitan na ulo, ta daiset labat so kaukolan min iplano tan desisyonan.”

11. Anto ray nepeg ya ikonsidera na nobyo tan nobya no iplaplano day isulong tan itsura da diad agew na kasal da? (Nengnengen met so litrato.)

¹¹ Say isulong yod kasal ey? Seguradon labay yo ya guapo tan magana kayo diad satan ya agew. Diad panaon na Biblia, importantin maong so itsura tan isulong na nobyo tan nobya. (Isa. 61:10) Lapud espisyal iyan agew, seguradon labay yo ya espisyal met so isulong yo. Pero pili yo nin siansia imay desente tan masimpit. (1 Tim. 2:9) Tua, kaukolan yon isipen ya maong so isulong tan itsura yo, pero aleg komon ya atan so manunan naimano diad agew na kasal yo.—1 Ped. 3:​3, 4.

12. Akin et kaukolan ya seguroen na nobyo tan nobya ya agnalaokan so kasal da na saray kagagawa o tradisyon ya kontra ed Biblia?

¹² Iwasan yo ray kagagawa o tradisyon ya kontra ed Biblia. (Apo. 18:4) Maslak ya kasal natan et alaokan na saray tradisyon ya walay koneksion to ed palson relihyon tan espiritismo. Ibabaga na Biblia ya marutak so pakanengneng nen Jehova ed saratan, tan papasakbayan to tayo ya arawian tayo iratan. (2 Cor. 6:​14-17) Kanian no wala ray tradisyon ed kasal ya apasalan lan gawaen na totoo diad lugar yo pero agkayo segurado no malinis itan ed pakanengneng nen Jehova, marakep no i-research yo ni no iner so nanlapuan to ’tan. Aral yo met iray prinsipyo ed Biblia ya makatulong ed pandesisyon yo no kasin gawaen yo itan diad kasal yo.

13. Panon ya naalig na nobyo tan nobya so inkamaapresya nen Jehova?

¹³ Diad lugar yo, kasin apasalan la na totoo so mangawit na regalo no mibansal ira? Antokaman so regalo na saray bisita yo, tandaan yo ya aliwan parepareho so pakasarag na too. Siempre, diad sikatayo ran Kristiano, labalabay tayoy mangiter ta makapaliket itan. (Pro. 11:25; Gawa 20:35) Pero agyo komon oobligaen ya manregalo iray bisita yo, tan agyo ipapalikna ed sikara ya agkayo maliket no aliwan mabli so regalo da o melag labat so niiter da. Alig yoy inkamaapresya nen Jehova. Paulyan yo ray bisita yo ya mangiter ya mabulbulos tan amay unong ed pakasarag da.—2 Cor. 9:7.

NO WALA RAY ONLESAN PROBLEMA LEGAN KAYON MANPLAPLANO

14. Anto ray posiblin onlesan problema legan ya iplaplano na nobyo tan nobya so kasal da?

¹⁴ Diad pamplano yoy kasal ya mamagalang ed si Jehova, walan-walay onlesan problema. Singa bilang, ompan labay yo ya simpli labat so kasal yo, pero say problema, aliwan ontan so apasalan ed lugar yo. Oniay imbaga nen Charlie ya tagad Solomon Islands: “Nairapan kami nen ililista mi la no siopa ray imbitaan mi diad reception. Dakdakel so kaaro mi. Tan diad lugar mi, iilaloan da la ya imbitaan mo ra no kaarom ira.” Onia met so imbaga nen Tabitha ya abitla nen niman: “Diad lugar mi, apasal ira ya dakel so imbitado diad bansal. Nen imbaga mid saray atateng mi ya manga 100 labat so imbitaan mi, nen unaan et kontra ira, pero atalosan da lanlamang.” Oniay imbaga nen Sarah ya tagad India: “Diad sikami, pabonggaan so kasal. Iray kakapinsan ko, engrande so bansal da. Kanian babagaan ak na kakanayon mi ya dapat et mas bongga so kasal ko.” Antoy gawaen yo no wala ray onian onlesan problema?

15. Akin et importante so pampikasi diad pamplano na kasal?

¹⁵ Lanang yon ipikasi ed si Jehova ya tulongan to kayo ed pampaplano yo. No walay onlesan isyu o abupburido kayo parad bansal yo, ibaga yo labat itan ed si Jehova. (Fil. 4:​6, 7; nengnengen so study note ya “lahat” diad nwtsty-TG.) Kerew yod si Jehova ya tulongan to kayo pian mansiansia kayon kalmado, makapandesisyon kayoy duga, tan napanindigan yo ray desisyon yo anggano agkompormi so arum. (1 Ped. 5:7) No nanenengneng yon eebatan to ray pikakasi yo, mas ombiskeg so tiwala yod sikato. Oniay imbaga nen Tabitha ya abitla nen niman: “Nen manpaparaan kami lan saninaro parad bansal mi, agmi labay ya pansengegan itan na pankolkol mi tan na pamilya mi. Kanian kada no pantongtongan mi ray plano mi, manpipikasi kami ni. Diad tulong nen Jehova, nagmaliw ya mareen tan mauksoy so preparasyon mi.”

16-17. Panon ya makatulong so marespeto tan maomaong ya pitongtong diad pamplanoy kasal?

¹⁶ Nepeg ya marespeto tan maomaong so pitongtong yo ed sakey tan sakey tan ed pamilya yo. (Pro. 15:22) Dakel so kaukolan ya desisyonan na nobyo tan nobya. Singa bilang, say petsa na kasal da, pigaray gastosen, siopa ray imbitaan, tan arum ni. Antis kayon mandesisyon, mantongtong kayon maong. Agyo lilingwanan ya ikonsidera iray prinsipyo ed Biblia tan saray advice na maespiritual iran agagi. No mantotongtong kayon saninaro tan no katongtong yo ray kapamilya yo, nepeg ya marespeto so panagsalita yo tan dengel yoy opinyon na balang sakey. No wala ray suhestion na saray kapamilya yo, singa saray atateng yo, pagbigyan yo ra no makatunongan met so kerew da. Ta diad tua, espisyal met itan ya agew parad sikara. Pero no talagan agyo ra napagustoan, marespeto yon ibaga so rason no akin. (Col. 4:6) Ipaliwawa yod sikara ya say manunan sankanonot yo et no panon yon napagalangan si Jehova diad agew na kasal yo.

¹⁷ Ompan mas mairap ya ipaliwawa so desisyon yo ed saray atateng yo no aliwa ran Tasi. Pero anggapoy imposible no idalan yod maong ya tongtongan. Oniay imbaga nen Brother Santhosh ya tagad India: “Labay na pamilya mi ya ipilad bansal mi iray ritual na saray Hindu. Aga natanggap na saray kakanayon mi so desisyon mi. Abayag antis mi ran akombinse. Pero pinagbigyan mi iray kerew da ya agmet kontra ed Biblia. Singa bilang, inunor mi iray labay dan iparungo ed saray bisita diad reception. Tan nandesisyon kami ya anggapo lay mangansion o onsayaw ta ag-ira apasal ed satan.”

18. Antoy makatulong pian naseguron anggapoy nagawan aberya diad agew na kasal yo? (1 Corinto 14:40) (Nengnengen met so litrato.)

¹⁸ Iplano yon maong so kasal yo. No organisado tan mauksoy so kasal yo, agkayo masyadon na-stress ed satan ya agew. (Basaen so 1 Corinto 14:40.) Oniay imbaga nen Wayne ya tagad Taiwan: “Manga pigaran agew antis na kasal mi, miniting mi iray agagi ya namboluntaryon onasisti. Nantongtongan tan impraktis mi no anto ray gawaen diad seremonya pian seguradon anggapoy nagawan aberya.” Seguroen yo met ya natumbok so imbaga yon oras na kasal yo bilang respeto ed saray bisita yo.

19. Antoy makatulong pian mansiansian mauksoy so reception na bansal yo?

¹⁹ Isip yo la iray posiblin onlesan problema tan no panon yon naiwasan itan. (Pro. 22:3) Singa bilang, no niyugali na totoo diad lugar yo so miponsia anta ag-ira imbitado, isip yo la no anto ray gawaen yo pian ag-itan nagawa diad bansal yo. Ipasipor yo la ed saray kapamilya o kakanayon yon aliwan Tasi no anto ray nagawa ed kasal yo tan no akin ya agyo tinumbok so arum ya tradisyon ed lugar yo. Maabig no nabasa da imay artikulo ed jw.org ya “Panon ya Gagawaen so Bansal na Saray Tasi nen Jehova?” Marakep met no walay maespiritual ya brother ya iyasain yo bilang “manangasikaso na ponsia” o director of the feast pian walay mangasikaso ed programa diad reception. (Juan 2:8) No malinew yon ibagad sikato iray labay yon nagawa, balbaleg so nitulong to pian seguradon natumbok iray plano yo tan mansiansian mauksoy so reception na bansal yo.

20. Anto ray nepeg ya tandaan na saninaro no iplaplano day agew na kasal da?

²⁰ No isipen yo ray amin ya kaukolan ya iparaan parad agew na kasal yo, natural labat ya na-stress kayoy daiset. Pero tandaan yo ya sakey agew labat itan. Manlapud satan ya agew, saniba yo lan napanlingkoran si Jehova tan ditan met la onggapo so maliket ya bilay yo bilang sanasawa. Gawa yo labat ya simpli so kasal yo, tan segurado yon napagalangan si Jehova. Manmatalek kayod sikato. Diad tulong to, maong so pansumpalan na agew na kasal yo. Diad ilabas na saray taon, no pawilen yo itan ya agew, seguradon makaimis kayo tan anggapon balot so pagbabawian yo.—Sal. 37:​3, 4.