Kasin Nanonotan Yo?

Kasin binasam tan tinalosan mo iray artikulo ed Say Panag-bantayan ed sayan taon? Nengneng mo pa sirin no naebatan mo irayan tepet:

Akin et iglogloria tayoy Jehova?

On ta rerespetoen tan inar-aro tayon maong si Jehova. Sakey ni, labay tayo ya sikatoy nakabat met na arum.—w25.01, p. 3.

No asakitan tayo ed imbaga o ginawa na arum, antoy gawaen tayo pian mabulos tayon mamerdona?

Agtayo ibabaliwalay nalilikna tayo. Pero agtayo la maneem-em na sakit na linawa, ta no andi, aga onabig so sugat ed puso tayo tan ompan naapektoan met lay ugali tayo.—w25.02, p. 15-16.

Akin et maong ya alimbawa ed saray kabataan ya brother si Marcos?

Mabulbulos si Marcos ya nanserbi ed arum. Wala may panaon ya adismaya tan asakitan ya maong si Marcos, pero aga sinmuko. Akaaral ya maong ed impiulop to ed saray maespiritual ya brother, singa si apostol Pablo.—w25.04, p. 27.

Antoy labay ya ibaga nen Jesus nen impikasi ton: “Impakabat kod sikara so ngaran mo”? (Juan 17:26)

Amta la na saray disipulo to so ngaran na Dios. Pero imbangat tod sikara no anto ray ugali nen Jehova, no antoy gagala to parad dalin tan ed totoo, no anto la ray ginawa to, tan no anto ni ray gawaen to diad arapen.—w25.05, p. 20-21.

Antoy awaten o bidbiren tayo no mapaabeba tayo?

Awaten tayo ya wala ran talagay agtayo amta. Singa bilang, agtayo amta no kapigan so isabi na anggaan tan no panon so ikiwas nen Jehova parad sikatayo diad satan ya panaon. Agtayo met amta no antoy nagawa nabuas, tan agtayo masyadon natatalosan so katuaan ya kabkabat to tayo nen Jehova.—w25.06, p. 15-18.

Antoy gawaen tayo pian minabang tayo ed sakey ya artikulo o publikon paliwawa?

Tepetan tayoy sarili tayo: ‘Anto ran makakombinsin impormasyon so inusar dia? Wala kasi abitlan balibalin ilustrasyon ya nausar ko no ipupulong koy katuaan? Wala kasi kabat ko ya labalabay to yan topic?’—w25.07, p. 19.

Antoy naaralan tayod samay impamerdona nen Jehova ed si David?

Wala ray agawaan nen David ya seryoson kasalanan, pero impapuson nagbabawi kanian pinerdona nen Jehova. (1 Ara. 9:​4, 5) No pinerdona la nen Jehova so kasalanan tayo, lingwanan to met la. Agto la ungkaten tan agto tayo la dusaen lapud satan.—w25.08, p. 17.

No walay punto ya agmasyadon natatalosan na iyaaralan mo, antoy gawaen mo?

No bilang ta impaliwawam lan maong no antoy ibabangat na Biblia pero agto nin siansia natalosan, ituloy yo labat so leksion insan yo la pawilen iman ya punto.—w25.09, p. 24.

Ibabaga na Biblia ya walay pakayari na kasalanan ya ‘palikdoen’ itayo. (Heb. 3:13) Antoy labay ton ibaga ’tan?

Say atawir tayon kasalanan so manlalagyat ed sikatayon manggaway aliwa. Atan met so rason no akin ya nalilikna tayon ag-itayo inaro nen Jehova.—w25.10, p. 16.

Antoy talora ya gawaen tayo pian lalo tayon onapit ed si Jehova kada no manpikasi tayo?

(1) Isipen tayo ray kualidad nen Jehova. (2) Isipen tayo so espisipikon problema ya labay tayon ibaga ed sikato, singa bilang, no walay kaukolan tayon perdonaen. (3) Dukeyan tayoy pikakasi tayo pian nibaga tayoy amin ya walad puso tayo.—w25.10, p. 19-20.

Panon tayon natulongan iray maedad la?

Pasyaren tan tawagan tayo ra. Ibaan tayo ran manpa-check up ed doktor. Tan itagar tayo ran mangiyaral tan manpulong. Singa bilang, itagar yo ran man-cart witnessing.—w25.11, p. 6-7.

Panon ya napagalangan na nobyo tan nobya si Jehova diad agew na kasal da?

Unor yo ray batas na gobierno. Seguroen yo ya napatnagan so bunga na masanton espiritu na Dios diad seremonya tan reception. Nepeg ya masimpit so isulong yo tan agyo gagawaen iray tradisyon ya kontrad Biblia. Nepeg ya marespeto so pitongtong yod sakey tan sakey tan ed pamilya yo legan yon iplaplano so kasal.—w25.12, p. 21-24.