TEPET NA SARAY KABATAAN
Antoy Kaukolan Kon Gawaen Kayari Bautismo?—Part 1: Ituloy Moy Gagawaen Mo
Kaukolan ya mintinaen iray mablin kayarian singa say abung odino luluganan. Ontan so kaukolan mon gawaen ed relasyon mod Dios. Panon kan mansiansian maapit ed Dios kayari bautismom?
Diad sayan artikulo
Ituloy mon aralen so Salita na Dios
Ibabaga na Biblia: ‘Manbunga kayo ed kada maabig a kimey tan aruman so suston kakabatan yo nipaakar ed Dios.’—Colosas 1:10.
Say labay ton ibaga: Kayari na bautismom, kaukolan mon ituloy ya basaen so Biblia tan dalepdepen iray nanaaralan mo.—Salmo 25:4; 119:97.
No antoy nayarin nagawa: No maminsan, ompan anggapoy ganam ya manaral. Ompan isipen mon agkan talaga “maaral ya too.”
No antoy nagawaan mo: Aral mon maong iray topic ed Biblia ya makapainteres ed sika. Manggawa kay sarilim ya rotina na personal ya panag-aral—amay aliwan ambelat parad sika. Say goal mo et pian onaralem so panangarom ed si Jehova tan ed Salita to. Makatulong tan makapa-enjoy so ontan ya panag-aral.—Salmo 16:11.
Tip: Pian talagan makaaral ka, gawam itan ed mareen ya pasen pian agka nadisturbo.
Ompan makatulong iya:
Basaen:
“Panon Ak ya Natulongan na Biblia?—Part 2: Gawam ya Makapa-enjoy so Pambasam na Biblia”
Bantayan:
I-download:
Ituloy moy manpikasi ed si Jehova
Ibabaga na Biblia: “Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat.”—Filipos 4:6.
Say labay ton ibaga: Mitotongtong so Dios ed sika tan ontan ka met ed sikato. Dedengelen moy Dios no babasaen moy Salita to; tan mitotongtong kad sikato no manpipikasi ka. Tandaan mo ya no manpikasi ka, sarag mon kerewen iray kaukolan mo tan pisalamatan iray bendisyon ya nanaawat mo.
No antoy nayarin nagawa: No maminsan, ompan singa paulit-ulit labat la iray ipipikasim. Ompan manduaruwa ka ni ingen no talaga kasin ondedengel si Jehova odino talaga kasin labay to kan dengelen.—Salmo 10:1.
No antoy nagawaan mo: Diad sanagew, isip mo ray sarag mon ipikasi. No agni iyabuloy na situasyon mo ya ipikasim lan amin iray naisip mo, tandaan mo ni labat iratan insan mo ipila ed pikakasim no mas malaem lay oras mo. Ipikasim iray importantid sika, balet ipikasim met iray pankaukolan na arum.—Filipos 2:4.
Tip: No singa magmamaliw lan paulit-ulit iray ipipikasim, ipikasim itan ed si Jehova. Labay ton dengelen so amin ya panaaburidoan mo, kaiba la ray nipaakar ed panagpikasim.—1 Juan 5:14.
Ompan makatulong iya:
Basaen:
I-download:
Ituloy mon ipaamtad arum iray papanisiaan mo
Ibabaga na Biblia: “Imanom a naynay so sarilim tan say ibabangat mo. . . . Ta diad panggawam ed saya et niliktar moy sarilim tan saramay ondedengel ed sika.”—1 Timoteo 4:16.
Say labay ton ibaga: No ipapaamtam ed arum iray papanisiaan mo, ombibiskeg met so pananisiam. Kanian niliktar moy bilay na saramay ondedengel ed sika pati say mismon bilay mo.
No antoy nayarin nagawa: No maminsan, ompan anggapoy ganam ya ipaamtad arum iray papanisiaan mo. Ompan natatakot ka ni ingen lalo la no diad eskuelaan.
No antoy nagawaan mo: Agmo pupulyanan ya kontrolen na negatibon liknaan ya singa say takot iray desisyon mo. Oniay insulat nen apostol Pablo: “Anggano napipilitan ak a gawaen iya [say pangipulong ed maong a balita], wala nin siansiay inmatalek ed siak a responsabilidad.”—1 Corinto 9:16, 17.
Tip: Ipatanir mod atateng mo ya mananap kay kaaron magmaliw a maong ya alimbawa ed sika—dapat amay Tasi met ya maseseg ed ministeryo.—Proverbio 27:17.
Ompan makatulong iya:
Ituloy moy onatendi ed saray Kristianon pantitipon
Ibabaga na Biblia: “Nonoten tayoy sakey tan sakey pian makapansasagyatan itayo a mangaro tan manggaway maabig iran kimey, ya agtayo papaulyanan so pantitipon tayo.”—Hebreo 10:24, 25.
Say labay ton ibaga: Say talagan rason no akin ya mimiaral tayo et pian dayewen tayoy Jehova. Balet wala ni duaran kaaruman ya nitulong na piaral. Unona, napaseseg ka na saray agagi. Komadua, napaseseg mo met ira no miaral tan mibiang ka.—Roma 1:11, 12.
No antoy nayarin nagawa: No maminsan, ompan ontitikyab so isip mo legan na aral kanian agmo naaralan iray importantin leksion. Odino ompan natukso kan agla miaral no wala ray arum ya gawaen mo singa saray asainmin mod eskuelaan.
No antoy nagawaan mo: Siempre kaukolan mon gawaen iray asainmin mo, balet dapat seguroen mon makapiaral kan regular, tan segurom ya talagan makakaaral ka. Mibiang ka diad panagkomento. Kayari na aral, komendaan moy anggan sakey ya agin walay parte to odino nankomento.
Tip: Maparaan antis ya miaral. I-download so JW Library® app, tan pindoten so tab ya “Meetings” pian naamtaan mo no anto ray topic ed kada aral.
Ompan makatulong iya: