No Nakal Kad Trabaho—Saray Prinsipyo na Biblia ya Ontulong ed Sika
No nakal kad trabaho aliwa labat ya say pinansyal mo so apektado noagta pati say bilay na pamilyam tan anggan say emosyon tan panag-isip mo. Ikonsidera irayan suhestion ya nibase ed makabat iran prinsipyo na Biblia ya makatulong ed sikan nasarag iyan situasyon mo.
Ibagam ed arum iray naliliknam.
Oniay ibabaga na Biblia: “Say tuan kaaro et mangaaro ed amin a panaon.”—Proverbio 17:17.
No naandian kay trabaho, ompan maer-ermen ka, makakapasnok ka, odino naguguloan ka tan pakaliknam et pinmalpak ka. No ibagam iray naliliknam ed saray kapamilyam tan maapit ya kakaarom, sarag da kan tulongan pian oninaway liknaan mo. Sarag da ka met ya ikdan na praktikal iran advice ya makatulong ed sika ed pananap moy balon trabaho.
Iwasan so sobran panaburido.
Oniay ibabaga na Biblia: “Agkayon balot mapagpaga nipaakar ed ontumbok ya agew, ta wala ni ray kapagaan ed ontumbok ya agew.”—Mateo 6:34.
Papasesegen tayo na Biblia ya masakbay lan manplano. (Proverbio 21:5) Balet bibilinen to tayo met ya iwasan so sobran pampaga odino panaburido ed no antoy nagawad arapen. Kaslakan to et panaburidoan tayo iramay bengatlan agmet talagan nagawa. Kanian mas maong no say pampokusan tayo et amay parad sayan agew ni labat.
Dakel ni ray praktikal ya advice ya nabasad Biblia no panon mon nasarag so stress ya naliliknam. Pian naaruman ni antam, basaen so artikulon “No Anto ray Gawaen Mo Sano Nai-stress Ka.”
Uman moy paraan na panaggastos mo.
Oniay ibabaga na Biblia: “Naaralan koy sekreto no panon so manbilay . . . balanglan walaan ak na dakdakel odino mankaukolan ak.”—Filipos 4:12.
Man-adjust kad balon kipapasen mo. Labay ton ibaga uman moy panaggastos mo pian agka makagastos na sobra ed no antoy kayam. Iwasan moy onutang no agmet kaukolan.—Proverbio 22:7.
Parad kaaruman ya suhestion no panon kan maka-adjust ed balon situasyon mod pinansyal, nengnengen so artikulon “No Panon ya Pasaragen so Daiset ya Kuarta.”
Usar mod sankaabigan so panaon mo.
Oniay ibabaga na Biblia: “Mantultuloy kayon manbilay a walaay karunongan . . . , ya usar yod sankaabigan so panaon yo.”—Colosas 4:5.
Anggano anggapo lay eskedyul mo natan ed panagtrabaho, pansiansiam ni so maong ya rotinam ed panguusar moy panaon mo. No gawaen mo itan napansiansiam so direksion na bilay mo tan mas balibali liknaan mo ed sarilim.
Mibagay ka.
Oniay ibabaga na Biblia: “Walay nagunggona ed kada kimey a pansasagpotan.”—Proverbio 14:23.
Dapat akaparaan ka ya aralen iray kimey ya agmo nin balot asali. Ompan kaukolan mon awaten iray trabahon singa abebay pakanengneng na arum ed satan odino mas abebay sueldo ditan nen say datin pantratrabahoan mo.
Manseet ka.
Oniay ibabaga na Biblia: “Diad kabuasan et mangisibwag kay binim tan agmo pampapainawaen so limam anggad labi; ta agmo amta no dinan so ontubo.”—Eclesiastes 11:6.
Ituloy mo labat so mananap na trabaho. Ibagam ed arum ya manaanap kay trabaho. Mitongtong kad saray kakanayon mo, kabat mo, datin katrabahom, tan kakaabay yo. Mannengneng ka ed saray agency ya mangiiter na trabaho, diad saray pakabat odino patalastas, tan diad website na saray kompanya ompan walay iyoopresi dan trabaho. Manparaan ka parad dakel ya interbyu tan mangi-submit ka na dakel ya application anggad makalmo ka lay trabaho.