Inataki na Russia so Ukraine

Inataki na militar na Russia so Ukraine ya asaksakbay ed kabuasan na Pebrero 24, 2022 anggano pansasagpotan la na saray lider ed interon mundo ya iwasan so guerra. Antoy nayarin epekto na saya ed mundo? Oniay imbaga na secretary-general na United Nations ya si António Guterres nen apalabas iran agew: “Agtayo naisip no panon kagrabe so panirap tan kabaleg na naderal lapud saya, tan no antoy epekto ed seguridad na saray bansa ed Europe tan ed interon mundo.”

Antoy ibabaga na Biblia ed saray nagagawa ya singa onia?

• Impasakbay la nen Jesu-Kristo so panaon ya “manlalaban iray bansa ontan met ed saray panarian.” (Mateo 24:7) Basaen so artikulon “Anto so Tanda na ‘Kaunoran Iran Agew,’ odino ‘Panaon na Anggaan’?” pian naamtaan no panon ya ipapanengneng na Biblia ya saray nagagawan guerra natan et kasumpalan na propesiya nen Jesus.

• Diad libro na Biblia ya Apocalipsis, inyilustra so guerra panamegley na sakey ya akakabayo ed “ambalbalangan kabayo” ya ‘mangeekal na kareenan ed dalin.’ (Apocalipsis 6:4) Basaen so artikulon “Say Apatiran Akakabayo—Siopa Iratan?” pian naamtaan no panon ya onaplika iyan propesiya ed saray guerra natan.

• Impasakbay lad libro na Daniel so panlaban na “ari na amianen” tan say “ari na abalaten.” (Daniel 11:25-45) Bantayan so video ya Asumpal ya Propesiya—Daniel Kapitulo 11 pian naamtaan no akin ya nibagan say Russia tan saray kaalyado ton bansa so ari na amianen.a

• Binitla met ed Apocalipsis so “guerra a nagawa ed baleg ya agew na Dios a Makapanyarin-amin.” (Apocalipsis 16:14, 16) Balet, aliwan saya may guerra na saray bansa ya nanenengneng tayo natan. Basaen so artikulon “Anto so Guerra ya Armagedon?” parad kaaruman ya impormasyon nipaakar ed satan ya nagawad arapen.

Akin et makapanilalo kan walay balibalin arapen?

• Ibabaga na Biblia ya ‘patundaen na Dios iray guerra diad interon dalin.’ (Salmo 46:9) Basaen so artikulon “Makakaasa Ka sa Isang Magandang Kinabukasan” parad kaaruman ya impormasyon nipaakar ed balibalin arapen ya impromisa na Dios.

• Imbangat nen Jesus iray patumbok to ya ipikasi dan onsabi lay Panarian na Dios. (Mateo 6:9, 10) Satan ya Panarian et gobierno ed tawen ya manggawa ed saray linawa na Dios parad dalin, tan kaiba ed saray linawa na Dios ya magmaliw a mareen so interon mundo. Pian naamtaan mo no panon kan natulongan na Panarian, bantayan so video ya Anto so Panarian na Dios?

Walay masulok ya 129,000 ya Tasi nen Jehova ya manaayam diad Ukraine. Singa met ed saray Tasi nen Jehova diad arum ya bansa, aaligen day Jesus diad pansiasiansia dan neutral ed politika tan ag-ira mibabali ed guerra. (Juan 18:36) Diad interon mundo, tuloytuloy ya ipupulong na saray Tasi nen Jehova so “maong a balita na Panarian” bilang solusyon ed saray problema na totoo, kaiba lay guerra. (Mateo 24:14) Papasesegen mi kan kontaken kami pian naaruman ni antam ed ilalo ya ibabaga na Biblia.