Sakey Taon La so Guerra ed Ukraine—Anton Ilalo so Iiter na Biblia?

Nen Biernes, Pebrero 24, 2023, sakey taon la so apalabas manlapu nen ginmapo so guerra ed Ukraine. Base ed pigaran report, manga 300,000 ya sundalo na Ukraine tan Russia so inatey o asugatan, tan manga 30,000 ya sibilyan so nayarin inatey. Pero, ompan mas dakel ni ingen so aktual ya bilang.

Makapaermen ta singa agni nasumpal iyan guerra.

• “Ngalngali sakey taon la manlapu nen linmusob ed Ukraine iray sundalo na Russia, pero anggapoy pakapatnagan ya itunda da itan. Agmet nibaga no siopan talagay manalo, tan singa anggapoy napankasundoan da ya solusyon.”—NPR (National Public Radio), Pebrero 19, 2023.

Dakel ya totoo so naeermenan lapud aliwliwan epekto na saray guerra ya nagagawa ed interon mundo lalo la ta nadadamay pati saray inosentin totoo. Anton ilalo so iiter na Biblia? Nasumpal ni kasi iray guerra?

Say guerra ya panampoten toy amin ya guerra

Ibabaga na Biblia ya walay guerra ya mangiligtas ed totoo, aliwan maneral ed sikara. Saya et say Armagedon—say “guerra a nagawa ed baleg ya agew na Dios a Makapanyarin-amin.” (Apocalipsis 16:14, 16) Diad sayan guerra, ekalen na Dios so uley na too ya sengegan na saray nagagawan guerra. Pian naamtaan no panon ya niwalay kareenan panamegley na Armagedon, basaen irayan artikulo:

• “Anto so Guerra ya Armagedon?”

• “Armagedon—Sakey a Maong a Balita!”