MANTULTULOY A MANBANTAY!

Relihyon tan say Guerra ed Ukraine—Antoy Ibabaga na Biblia?

Imanoen irayan komento tungkol ed saray kabkabat ya lider na relihyon tan say nagagawan guerra diad Ukraine:

“Anggapon balot so negatibo ya ibabaga na lider na Russian Orthodox Church ya si Patriarch Kirill tungkol ed inyataki na Russia. . . . Say Russian Orthodox Church et tuloytuloy ya mangikakayat na saray propaganda tungkol ed Ukraine tan uusaren iratan nen Putin pian idepensa so guerra.”—EUobserver, Marso 7, 2022.
“Imbaga nen Patriarch Kirill . . . ya duga labat so inyataki na Russia ed Ukraine ta makatulong iyan guerra pian nalabanan so kasalanan.”—AP News, Marso 8, 2022.
“Nen Lunes diad Kyiv, say lider na Ukrainian Orthodox Church ya si Metropolitan Epiphanius I et binasbasan to iray totoo diad ‘pilaban da ed saray onaatakin Russian’ . . . Imbaga to met ya ag-ira mankasalanan no pateyen da iray sundalo na Russia.”—Jerusalem Post, Marso 16, 2022.
“Susuportaan mi [say Ukrainian Council of Churches and Religious Organizations (UCCRO)] so Armed Forces of Ukraine tan amin ya milalaban parad Ukraine, walad sikara so basbas mi diad pangidedepensa da ed Ukraine, tan idadasal mi ra.”—UCCROa Statement, Pebrero 24, 2022.

Antoy nibagam? Duga kasi ya saray relihyon ya mangibabagan patumbok ira nen Jesu-Kristo et bagaan da iray membro ra ya miguerra? Anto kasi so ibabaga na Biblia?

Abaybayag lan mibabali so relihyon ed saray guerra

Ibabaga na dakel ya relihyon ya labay da so deen, pero nanengneng ed history ya kokonsintien tan susuportaan da ni ingen so guerra, tan ibabaga ra ya duga labat itan. Pigaran dekada la ya ipapaamta na Saray Tasi nen Jehova ed totoo so pankunkunwari na sarayan relihyon. Nia ray pigaran alimbawa ya nabasa ed saray publikasyon mi.

Nabasa ed artikulon “Ang mga Krusada—Isang ‘Kalunus-lunos na Ilusyon’” no akin ya say Romano Katoliko so natetel ed saray agawan massacre o impamatey ed dakdakel ya totoo diad ngaran na Dios tan nen Kristo.
Impaamta na artikulon “Ang Iglesya Katolika sa Aprika” ya agpinigilan na relihyon so impanlalaban tan impanpapateyan na saray tribu.
Impaliwawa na saray artikulon “Masisisi ba ang Relihiyon?,” “Ang Bahagi ng Relihiyon sa mga Digmaan ng Tao,” tan “Ang Relihiyon ay Pumapanig” no panon ya dakel lan guerra so sinuportaan na saray pari na Katoliko, Orthodox, tan Protestante tan binasbasan da iray sundalo na bansa ra.

Duga kasi ya onsuporta ed guerra iray relihyon ya mangibabagan Kristiano ira?

Imbangat nen Jesus: “Arom so kaparam a too a singa ed sikan dili.” (Mateo 22:39) “Itultuloy yon aroen iray mamubusol ed sikayo.”—Mateo 5:44-47.

Isipen pa: Kasin uunoren na sakey ya relihyon iyan ganggan nen Jesus tungkol ed panangaro no babagaan to ray membro to ya pateyen da iray kalaban diad guerra? Naamtaan moy ebat diad artikulon “Ang Tunay na mga Kristiyano at ang Digmaan” tan “Is It Possible to Love One’s Enemies?”

Imbaga nen Jesus: “Say Panarian ko et agkabiangan na sayan mundo. No say Panarian ko et kabiangan na sayan mundo, akilaban la komon iray lingkor ko pian agak niyawat [o naerel] na saray Judio.” (Juan 18:36) “Amin iramay mangusar na espada et ompatey ed espada.”—Mateo 26:47-52.

Isipen pa: No saray disipulo nen Jesus nensaman et ag-anggan akilaban pian sikatoy naprotektaan, duga kasi ya milaban iray Kristiano natan parad arum ya rason? Basaen so artikulon “Nayari Kasin Miguerra Iray Kristiano?” pian naamtaan mo no panon ya tinumbok na inmuunan Kristiano so alimbawa nen Jesus tan inunor da iray bangat to.

Antoy nagawad saray relihyon ya onsusuporta ed guerra?

Ibabangat na Biblia ya makapadimla ed Dios iray relihyon ya ibabaga ran patumbok ira nen Jesus pero agda uunoren iray bangat to.—Mateo 7:21-23; Tito 1:16.

Ibabaga na Apocalipsis ya diad pakanengneng na Dios, saratan ya relihyon so sengegan na impatey na “amin [ya] pinatey diad dalin.” (Apocalipsis 18:21, 24) Akin ey? Nabasam so ebat diad artikulon “Anto so Makapanyarin Babilonia?”
Imbangat nen Jesus ya amin ya relihyon ya makapadimla ed Dios et naderal lapud saray mauges ya ginawa ra, no panon ya say makapuy ya kiew et “batangen tan ibuntok ed apoy.” (Mateo 7:15-20) Panon itan ya nagawa? Naamtaan moy ebat diad artikulon “Magano lay Panampot Na Palson Relihyon!

Duma Iray Tasi nen Jehova

Uunoren na saray Tasi nen Jehova ed Russia tan Ukraine tan ed interon mundo so ganggan nen Jesus ya mansiansian neutral ed politika tan agmibabali ed guerra. Atan so rason no akin ya agkami mibibiang tan agmi susuportaan so guerra ed Ukraine tan anggan iner ya lugar. Lapud desidido kami ya unoren so ibabaga na Biblia, wala ray Tasi ya papairapen na gobierno. (Juan 15:19, 20; 2 Timoteo 3:12) Singa bilang, dakel ya Tasi so impriso na gobierno na Russia tan say arum ed sikara et in-torture ni ingen. Saray pasen ya pandadayewan mi et kinompiska met na gobierno. Parad kaaruman ya impormasyon, onlad www.jw-russia.org.

Bantayan so apatiran-minuto ya video ya Jehovah’s Witnesses in Irkutsk Remain Faithful Despite Brutal Home Raids pian nanengneng mo no panon ya papairapen na gobierno na Russia iray Tasi nen Jehova lapud pananisia ra.
Abaybayag lan kabkabat ya saray Tasi nen Jehova et neutral o ag-ira mibabali ed politika. Bantayan so video ya Matoor Anggano Napapasegsegang pian nanengneng mo no panon iran nansiansian neutral anggano pinairap iran maong na gobiernoy Nazi Germany tan say datin Soviet Union.

Komon ta na-explore mo so website mi pian naamtaan mo no anto ni ray papanisiaan mi, kaiba la so balibalin promise na Biblia ya onsabi so panaon ya anggapo lan balot so guerra. (Isaias 2:4; Jeremias 29:11) Kontak mo kami labat no labay mo ni kaaruman ya impormasyon.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Say UCCRO, o Ukrainian Council of Churches and Religious Organizations, et bubuoen na 15 ya relihyoson organisasyon ya mangirerepresenta ed relihyon ya Orthodox, Griego tan Romano Katoliko, Protestante, tan saray sekta ya mangibabagan Kristiano ira, ontan met ed saray Judio tan Muslim.