Pangiiter na Relief Legan ya Wala ray “Guerra tan Balita Nipaakar ed Saray Guerra”

Diad sarayan kaunoran iran agew, ilaloan tayo ya makarengel tayo ray “guerra tan balita nipaakar ed saray guerra.” (Mateo 24:6) Balet no wala ray agagi tayon naiirapan lapud sarayan nagagawa, naawat da so tulong ya kaukolan da. Nabantayan ed 2022 Update na Mananguley ya Ulop #3 so makapaseseg ya pangiiter na relief na saray agagi diad Eastern Europe parad saramay apektado na guerra diad Ukraine. Panon ya nipapasabi iray relief ed saray agagi anggano kaplesan na guerra? Antoy epekto na sayan pangiiter na relief diad saray agagi tayo ed Ukraine?

Anto ray Kaukolan? Panon ya Nipasabi Iratan?

Nen Pebrero 24, 2022 diad samay mismon agew ya ginmapo so guerra diad Ukraine, inaprobaan na Coordinators’ Committee so badyet ya usaren ed pangiter na relief ed saray agagi diad Ukraine. Tampol ya angaliw so Ukraine branch na saray nakaukolan insan imbunog iratan panamegley na tinuro ton 27 ya Disaster Relief Committee.

Pian natulongan so Ukraine branch, kinmiwas a tampol so World Headquarters na Saray Tasi nen Jehova pian amtaen no anto ni ran tulong so nakaukolan da. Kinerew na Coordinators’ tan Publishing Committee na Mananguley ya Ulop ed Global Purchasing Department ya mikimeyan ed saray representative na branch office na Ukraine tan Poland pian makapanggawa ray plano no panon ya nipasabi iray tulong. Kada agew, manmimiting iray agagi manlapud Purchasing, Shipping, tan Legal department diad kada branch, kaiba so sakey a membro na branch committee na Ukraine, tan saray membro na Global Purchasing Department.

“Unona, inamta mi ni no anto ray kaukolan na agagi,” so imbaga nen Jay Swinney na Global Purchasing Department. “Say labay min iter ed saray agagi et saramay apasalan da lan kanen tan usaren parad panlinis na laman tan kaliberliber da. Balet aliwan satan labat so kaukolan min amtaen. Kaukolan mi met ya aralen no panon ya nipasabin tampol iratan diad Ukraine legan ya nagagawa so guerra diman.”

Nen Marso 9, 2022 amta la na agagi no anto ray kaukolan ya ipawit diad Ukraine. Kaibad satan iray naakan, singa bilang, saray delatan karne tan sira, nanduruman klase na bukel, belas, tan beans, kaiba la ray uusaren ed panlinis na laman tan diad kaliberliber, singa say sabon tan tissue paper. Diad saman, say akalkulan nagastos ed apatiran simba ya suplay na sakey a too et onabot ed $65 (U.S.). Lapud nilibo so agagi tayo ya mankaukolan ed saraya, inaprobaan na Coordinators’ Committee so baleg a kantidad na kuarta ya usaren parad saya. Balet panon ya nibunog iraya ed saray agagin mankaukolan diad safe ya paraan?

Nen Marso 13, sinali na duaran brother ed Poland so mangi-deliver manlapud branch office na Poland paonlad sakey a warehouse diad asingger ed Lviv, Ukraine. Pigaran agew antis iran onalis, tinulongan ira na saray agagi manlapud branch na Poland tan Ukraine pian makapanparaan irad biahe ra. Kinompleto na branch iray papeles ya kaukolan pian makabaliw ed border iray brother ya mangiter na tulong odino humanitarian aid, sineguro da ya walay malinew ya akasulat ed saray luluganan na sarayan brother ya pakanengnengan ya mangiiter ira na tulong, tan akikimeyan ira ed saray agagi ed Ukraine no iner so sankapelesan ya rota ya dalanen na saray brother no akabaliw la rad border. Lapud sayan impanparaan ya maong tan diad tulong nen Jehova, nipasabi iray relief ed saray Disaster Relief Committee diad loob na 24 oras ya impangi-deliver ed saratan diad Lviv ya anggad safe ya akapawil iray brother ed Poland.

Anggaman nipasabi ed agagi so inmunan tulong, saksakey ya tonelada labat so ni-deliver na saray brother. Base ed tantiya, manga 200 tonelada ni so kaukolan ya i-deliver! Balet panon ya maples ya ni-deliver tan nibunog so ontan ya karakel?

“Saray Totoom et Mabulbulos Dan Iyapay so Inkasikara”

Manlapu la nen nibalita diad jw.org so kipapasen na saray agagi tayo ya apektado na guerra ed Ukraine, amayamay so malabay ya ontulong manlapud nanduruman bansa. Dakdakel ya walad ararawin pasen so nandonasyon parad sankamundoan a kimey na saray Tasi nen Jehova, ta amta ra ya nausar itan ed sankaabigan ya paraan. Say arum balet ya manaayam ed saray bansan walad ketegan et inusar day panaon, biskeg, tan saray personal ya kaykayarian da pian ontulong. Nia ray pigara labat ya alimbawa.

Diad Poland, tinipon na saray makukulin volunteer iray nilibon relief package, tan nanggaway card iray ugugaw ya walay drowing to. “Aminpigak lan abasa so Salmo 110:3 ya mangibabagan, ‘saray totoo nen Jehova et mabulbulos dan iyapay so inkasikara,’” so imbaga nen Bartosz Kościelniak, membro na Purchasing Department diad Poland branch. “Balet nen anengneng kon mismo so agnasabaan ya suporta na nilasus ya makukulin volunteer ya sinmabin tampol tan akaparaan ya mankimey, apaneknekan ko ya talagan tua irayan salita.”

Walay sakey ya Tasi nen Jehova ya akanggawa na sakey ya international logistics company. Indonasyon toy pangusar na saray truck to pati say gasolina ya usaren, imbaga to: “Parad siak, pribilehyok ya ipanengneng so panangarok ed saray agagi tan ed si Jehova. Malikeliket ak ya ontulong.” Base ed tantiya, masulok ya 7,700 ya litro na gasolina so nidonasyon, tan inusar na saray agagi so panaon tan biskeg da pian man-drive na ngalngali 48,000 ya kilometro diad pan-deliver na saray relief!

Diad tulong na saray makukuli tan masakripisyon agagi tayo, kasabi Marso 28—manga 15 ya agew kayari na samay inmunan impan-deliver na relief—100 tonelada la na naakan, uusaren parad panlinis na laman tan ed kaliberliber, tan saray suplay ed panagtambal so ni-deliver ed Ukraine! Tan lapud dakdakel so donasyon ya mabulos ya inter na saray agagi tayo tan saray supplier, baleg so abawas ed gastos ya alaen ed pundo parad saray relief. Diad kaplesan, masulok lan 190 tonelada na relief so nipawit na saray Tasi nen Jehova diad Ukraine. Antoy epekto na sarayan inter ya relief ed saray agagi tayo ed Ukraine?

“Akakarga met Ditan so Panangaro Yo!”

Kasabi na saray relief diad Lviv, imbunog iratan na saray Disaster Relief Committee diad Ukraine ed saramay mankaukolan. In-deliver iratan ya tulong diad nanduruman syudad, ya say kaarawi na arum et masulok ya 1,300 kilometro manlapud Lviv. Ginawa itan diad organisadon paraan anggad posible, pero siansian angala itan na panaon.a

Oniay imbaga nen Markus Reinhardt, membro na Branch na Committee diad Ukraine: “Legan na sayan krisis, naeksperiensyan mismo na dakel ya agagi tayo so panangaro nen Jehova tan saray gunggona na pangunor ed saray instruksion na organisasyon to—antis ni ingen ya walay nagawan kalamidad. Singa bilang, impaseseg ed amin ya seguroen dan walay suplay da na naakan tan danum diad abung da diad loob na pigaran simba. Nipaakar ed satan ya instruksion, oniay imbaga nen Anton, sakey ya elder ya manlilingkor ed Kyiv: ‘Imparaan itayo la na organisasyon nen Jehova parad saray mairap ya situasyon, tan pisatsalamatan tayo itan. Lapud walay suplay mi na naakan tan danum, tan wala met so radyo mi, niligtas so bilay mi.’ Misatsalamat kami ta inunor na agagi iyan instruksion kanian awalaan ni na panaon so branch office ya organisaen iray relief ya kaukolan ya i-deliver.”

Antoy alikna na saray agagi nen naawat da iray relief? Oniay imbaga nen Mykola tan Zinaida ya manaayam ed Kharkiv: “A-touch kamin maong ed panangaro yo. Baleg ya salamat ed saray naakan tan tambal ya inter yo. Talagan sankalikna mi so panangasikaso nen Jehova.” Oniay imbaga nen Valentyna ya manaayam met diman: “Manlapu la nen ginmapoy guerra, lanang ya andukey iray pila ed grocery. Nanaupot iray kaukolan ya saliwen. Balet amta tan anengneng nen Jehova iyan problema. Kanian anuro na saray brother ya mangi-deliver na relief diad saray kaabungan, tan karga na saraman ya relief iray mismon kaukolan mi! Diad onman iran mairap ya situasyon, ya singa anggapo lay pag-asa, sankaliknan maong so panangasikaso nen Jehova tan say organisasyon to diad espisyal ya paraan. . . . Talagan makapalikliket ya naeksperiensya so tulong to diad panaon ya kakkaukolan mo.”

Oniay imbaga nen Yevhen tan Iryna, ya tinmakas manlapud Mariupol: “Misatsalamat kami ed panangasikaso tan tulong yo ed pamilya mi. Talagan nipanpanaon iman. Nen inmuna, inisip mi ya produkto labat so karga na saramay kahon, pero nen kalukas mi, a-realize mi ya akakarga met ditan so panangaro yo!”

Seguradon nanenengneng mo no panon ya uusaren nen Jehova so espiritu to pian igiya iray totoo to diad pangi-deliver ed sarayan tulong legan ya wala ray “guerra tan balita nipaakar ed saray guerra.” Nagmaliw met iyan posible lapud mabulos ya donasyon yod sankamundoan ya kimey, ya dakel ed saratan et ginawa yo panamegley na donate.jw.org. Talagan aapresyaen mi inkamaiter yo!

Impangiter na Relief Diad Maples tan Safe ya Paraan

1. 

   Pebrero 24, 2022: Inaprobaan na Coordinators’ Committee so badyet ya usaren ed pangiter na relief diad Ukraine, kanian ginapoan la na branch so pangiter na tulong

2. 

   Pebrero 24—Marso 8, 2022: Angaliw so Ukraine branch na pigaran materyales tan ginapoan dan i-deliver iratan panamegley na saray Disaster Relief Committee. Namparaan met so branch office parad pangawat tan pangibunog ed saray tulong manlapud Poland

3. 

   Marso 9, 2022: Inaprobaan na Coordinators’ Committee so pangi-deliver na tulong odino humanitarian aid diad Ukraine

4. 

   Marso 10–12, 2022: Implano so unonan pangi-deliver na saray naakan tan suplay manlapud Poland paonlad Lviv, Ukraine

5. 

   Marso 13, 2022: Diad unonan pankanawnawa, in-deliver iray naakan tan suplay ya nanlapud Poland paonlad Lviv, Ukraine

6. 

   Marso 14–16, 2022: Diad sakey ya Assembly Hall ya asingger ed Poznan, Poland, inorganisa iray volunteer ed Local Design/Construction pian tiponen iray relief ya naakan tan saray uusaren parad panlinis na laman tan ed kaliberliber

7. 

   Marso 17, 2022: Apat agew kayari na inmunan impangi-deliver, 13 tonelada na saray relief so inggapon in-deliver diad border na Ukraine

8. 

   Marso 21–27, 2022: Singa ginawa ed inmuna, tinipon iray nakekeran relief diad Poland tan inyakar ed Ukraine insan in-deliver iratan ed saray lugar ya mankaukolan diad loob na 24 oras

9. 

   Marso 28, 2022: Diad loob na 20 ya agew kayarin naaprobaan, in-deliver ed Ukraine so 100 toneladan naakan, uusaren ed panaglinis na laman tan ed kaliberliber, tan saray suplay ya tambal

Diad kaplesan, masulok ya 190 tonelada la na relief so nipawit na saray Tasi nen Jehova diad Ukraine.