Impriso Lapud Pananisia Ra—Ukraine

Diad loob na ngalngali taloran dekada, minanabang iray Tasi nen Jehova ed Ukraine ed sakey ya ganggan ya aabuloyan to iramay agnaako na konsiensia ra so mansundalo ya manggawa na alternatibon serbisyo ya anggapoy koneksion to ed militar. Lapud satan ya probisyon, makakatulong ira ed publiko tan napansiasiansia da met ya malinis so konsiensia ra.

Balet manlapu la nen ginmapoy guerra ed Ukraine nen Pebrero 24, 2022 abaliwala la so karapatan parad alternatibon serbisyo. Lapud satan, akasoan bilang kriminal so nilasus ya totoon agnaako na konsiensia ra so mansundalo. Diad sarayan nagagawa, agnarerespeto iray papanisiaan da ya mamapakiwas ed sikara ya agmansundalo tan agmet narerespeto so karapatan da ya unoren so ididikta na konsiensia ra. Satan ya nagagawa et aliwan unong ed saray prinsipyo parad karapatan na totoo tan ed Konstitusyon na Ukraine ya mangibabagan: “Diad saray situasyon ya agnaako na sakey ya too so mansundalo lapud saray papanisiaan to ed relihyon to, sarag toy manggawa na alternatibon serbisyo (ya anggapoy koneksion to ed militar).”

Anggad nen Mayo 19, 2025 ami-amin et apatiran Tasi so akapriso lapud agnaako na konsiensia ra so mansundalo tan asentensiaan ira na 36 ya bulan ya pakapriso. Tan talora nin Tasin lalaki so walad pretrial detention legan iran manaalagar na sentensia ra.

Napapagaan Iray Internasyonal ya Organisasyon

Lapud sankaimano iratan ya nagagawa, imbalikas na taloran UN Special Rapporteurs so pampapaga ra lapud abalang so alternatibon serbisyo diad Ukraine. Oniay imbaga ra ed gobierno na Ukraine nen Nobyembre 8, 2023: “Napapagaan kami met ed saray nagagawan panaglitis ed saray totoon agda labay so mansundalo lapud pananisia ra, pati saramay onsusuporta pian narespeto so karapatan na saray agda labay so mansundalo lapud ag-itan naako na konsiensia ra.”

Apriso Lapud Agnaako na Konsiensia To so Mansundalo

Andrii Khomenko

Nen 2002 abautismoan si Andrii Khomenko bilang Tasi nen Jehova. Si Iryna so asawa to tan walay anak dan duaran lalaki. Regular dan aaralen so Biblia bilang pamilya tan ibabaga da met ed saray totoo ed lugar da iray mensahe na Biblia ya mangiiter na ligliwa tan ilalo. Kagapoy guerra nen 2022 namboluntaryo si Andrii ya ontulong ed saray totoon nan-evacuate pian makalmo ray napanayaman tan tinmulong met ya manaanap na tambal parad saray maedad la.

Nen Marso 2024 atawagan si Andrii ya mansundalo pero lapud saray papanisiaan to ed relihyon to, akikasi ya ikdan day alternatibon serbisyo. Pero agnaaprubaan itan ya kerew to tan sinampaan da na kaso bilang kriminal. Lapud satan, nen Hulyo 26, 2024 senentensiaan na Okhtyrka District Court si Andrii na taloran taon ya pakapriso lapud agto labay so mansundalo. Inyapela to itan pero nen Disyembre 23, 2024 atan lanlamang so desisyon na Sumy Court of Appeal. Kanian nen Pebrero 3, 2025 apriso si Andrii.

Time Line

Mayo 19, 2025

Ami-amin et pitoran Tasi nen Jehova so akapriso.
Pebrero 24, 2022

Ginmapoy Martial law tan ginmapon manparaan so militar pian mi-guerra.
Hunyo 23, 2015

Diad kaso nen Vitaliy Shalaiko, nandesisyon so Atagey ya Korte na Ukraine ya respetoen so karapatan na saramay agnaako na konsiensia ra so mansundalo legan ya manpaparaan so militar pian mi-guerra.
Disyembre 1991

Niwalay Ganggan Parad Alternatibon Serbisyo (ya anggapoy koneksion to ed militar).
Pebrero 28, 1991

Nirehistro iray Tasi nen Jehova diad Ukraine.