Impriso Lapud Pananisia Ra—Singapore

Akapriso so 8 ya kabataan ya Tasi nen Jehova diad Singapore lapud agnaako na konsiensia da so pansundalo. Apatira ed sikara so senentensiaan na komaduan termino na pakapriso lapud nansiansia iran mapekder ed papanisiaan da kayari na unonan termino na impakapriso da. Ag-ira nayarin onkerew na legal ya tulong ed Singapore lapud impaakseb na gobierno diman ya kapilitan a mansundalo iray lalaki ed bansa ra tan agbibidbiren na gobierno so kanepegan na sakey ya agmansundalo lapud agnaako na konsiensia to.

No say sakey a laki et mantaon lay 18, kapilitan ya mibiang ed militar na Singapore. Balet no agto gawaen itan lapud agnaako na konsiensia to, ipriso da ya anggad 12 bulan diad kampo na militar. No asumpal to lay sentensia to, ibulos da la insan da iganggan ya mansulong na unipormi na sundalo tan man-training parad militar. Balet no agto lamet gawaen iratan, litisen da lamet tan ipriso da ya anggad 18 ya bulan. Kanian saray kabataan ya Tasi nen Jehova ya agmansundalo et sesentensiaan na duaran mantumbokan ya pakapriso, ami-amin et anggad 30 ya bulan iran napriso.

Aglabay ya Unoren na Singapore so Totontonen na UN

Abayag lan onaapela so United Nations ed saray bansa ya membro na satan ya “awaten dan say agpansundalo na sakey no agnaako na konsiensia to et legal lapud kawayangan ed panagnonot, konsiensia, tan relihyon ya bibidbiren na Universal Declaration of Human Rights.” Anggaman say Singapore et membro la na UN manlapu nen 1965, ag-itan pabor ed totontonen na United Nations nipaakar ed isyu ed pansundalo. Diad sakey a sulat ya apetsaan na Abril 24, 2002 ya aka-address ed UN Commission on Human Rights, imbaga na sakey ya opisyal na gobierno na Singapore ya “no say papanisiaan tan gagawaen na sakey a too et onsusumlang la ed [kanepegan na bansa ya mangidepensa], nepeg ya manunan ikonsidera so kanepegan na bansa ya pansiansiaen so seguridad na satan.” Oniay malinew tan mapuersan insulat na saman ya opisyal: “Agkami mipakna ya onaplika ed amin ya bansa so pangiyabuloy ed sakey a too ya agmansundalo lapud agnaako na konsiensia to.”

Apriso Lapud Agnaako na Konsiensia To so Mansundalo

Yishuo Lin

Walay duaran mas ugaw ya agagin lalaki nen Yishuo Lin. Nagmaliw ya Tasi nen Jehova so nanay to nen ugaw ni Yishuo. Dati lan labalabay toy nipaakar ed science. Nen mas dakel lay nanaaralan to nipaakar ed saray pinalsa, akombinse si Yishuo ya talagan tua so Dios tan sikato so Amalsa ed amin a bengatla. Legan ya ontatatken si Yishuo, nikompara to ray naaralan to ed Biblia ed saray bangat na arum ya relihyon kanian akombinse ya nalmo to lay katuaan.

Manlapu nen ugaw ni Yishuo, amta to la ya kaukolan ya mansiansian neutral iray Kristiano lalo la no nipaakar ed pansundalo. Tan lapud nan-research ya maong tan inaral ton mismo so Biblia, binmiskeg so determinasyon nen Yishuo ya mansiansian neutral ed sayan isyu.

Akatulong met ed si Yishuo so aralem ya impanaral toy Biblia pian makapanparaan ed pakapriso to tan akatulong itan pian niwalad sikato iray Kristianon kualidad ya singa say panangaro ed kaparan too tan panamerdona. Namparaan met pian naasikaso toy espiritualidad to anggan no wala lad prisoan. Singa bilang, antis nin napriso si Yishuo nanggawa la na saray sulat parad sarili to tan insulat to ditan iray punto tan ideya ya manlapud Biblia. Insan inyeskedyul to no kapigan ipawit nen nanay to iratan ya sulat ed sikato no wala lad prisoan.

Lanang ya sankanonot nen Yishuo so Salmo 118:6: “Si Jehova et walad abay ko; agak ontakot. Antoy nagawaan na too ed siak?” Kuanen Yishuo: “Makakatulong iyan teksto ed siak pian makapanpakpel ak tan walay biskeg kon arapen iray subok ya onsabi ed siak.”

Time Line

Mayo 19, 2025

Ami-amin et 8 ya Tasi nen Jehova so akapriso lapud agnaako na konsiensia ra so pansundalo.
Abril 24, 2002

Kinompirma na sakey ya opisyal na gobierno ya agbibidbiren na Singapore so kanepegan na saramay agmalabay a mansundalo lapud agnaako na konsiensia ra.
Pebrero 1995

Linmoor so panameget tan panag-aresto ed saray Tasi nen Jehova ya citizen ed Singapore.
Agosto 8, 1994

Agdinengel na Atagey a Korte na Singapore so apela na saray Tasi.
Enero 12, 1972

Kinansela na gobierno na Singapore so rehistro na Saray Tasi nen Jehova.